staffmedia.am-ում պարբերաբար անդրադառնում ենք տարբեր ընկերությունների թիմային մշակույթին՝ ուսումնասիրելով կապը կորպորատիվ արժեքների, թիմային ավանդույթների և ընկերության հաջողության միջև։ Շարունակելով այս շարքը՝ ներկայացնում ենք մեր գործընկերոջ՝ Ucom-ի թիմային մթնոլորտը, արժեքները և այն բացառիկ հնարավորությունները, որոնք ընկերությունն առաջարկում է աշխատակիցների մասնագիտական աճի և զարգացման համար։ Ի՞նչն է Ucom-ը դարձնում առանձնահատուկ աշխատավայր և ինչպե՞ս է ընկերությունը կերտում այնպիսի միջավայր, որտեղ աշխատակիցները ոչ միայն կատարում են իրենց պարտականությունները, այլև իրագործում իրենց ներուժը:
Թվային առաջընթաց՝ ամուր արժեքների հիման վրա
Ucom-ի տեսլականն ուղղված է տեխնոլոգիական նորարարություններին, աշխատակիցների շարունակական զարգացմանը և հաճախորդների փորձի շարունակական բարելավմանը։
Վերջին տարիներին ընկերությունը ձեռնարկել է համապարփակ թվային փոխակերպման ծրագիր՝ արդիականացնելով իր առանցքային համակարգերը։ Արդեն ընթացքի մեջ են նոր կառավարման հարթակի ներդրման աշխատանքները, որոնք կապահովեն ներքին գործընթացների ավտոմատացում և կբարձրացնեն տվյալների կառավարման ճշգրտությունը։ Վերջերս ընկերությունը գործարկել է նաև նոր TV և մեդիա հարթակ, որն օգտատերերին առաջարկում է ավելի ճկուն, նորարարական, բովանդակային և օգտագործման համար հարմար ինտերֆեյս՝ բարձրորակ բովանդակությամբ։
Միևնույն ժամանակ, Ucom-ն առաջամարտիկ է 5G տեխնոլոգիայի ներդրման գործում՝ արդեն իսկ գործարկելով գերժամանակակից 5G ցանցը 28 մարզային քաղաքներում և շարունակաբար ընդլայնելով այն։ Այս բոլոր նախաձեռնությունները միտված են ձևավորելու տեխնոլոգիական միջավայր, որը համապատասխանում է ժամանակակից պահանջներին և նպաստում է ինչպես ընկերության ռազմավարական նպատակների իրագործմանը, այնպես էլ աշխատակիցների ու բաժանորդների փորձառության բարելավմանը։
Մարդիկ մարդկանց համար
Ucom-ի կորպորատիվ մշակույթի հիմքում «մարդիկ մարդկանց համար» արժեքն է։ Այն ոչ միայն ընկերության գործելաոճի հիմնասյունն է, այլև թիմային փոխհարաբերությունների գլխավոր շարժիչ ուժը։ Այն արտահայտվում է ամենօրյա աշխատանքի մեջ՝ աջակցող և հոգատար միջավայր ստեղծելով, որտեղ կարևոր է յուրաքանչյուր աշխատակցի ձայնը։ Ucom-ում խրախուսվում են բաց հաղորդակցությունը, փոխադարձ հարգանքն ու մարդակենտրոն որոշումների կայացումը՝ հավատալով, որ հաջողությունը սկսվում է ներսից՝ մարդկանցից։
Այս մոտեցման շնորհիվ ձևավորվել է ոչ միայն բարձր պրոֆեսիոնալիզմով աչքի ընկնող, այլև ջերմ և միասնական թիմ, որտեղ յուրաքանչյուր աշխատակից ունի հնարավորություն զարգանալու, ակտիվորեն ներգրավվելու և իր անձնական ներդրումն ունենալու ընկերության ընդհանուր նպատակների իրականացման գործում։
Յուքոմցի լինելու առավելությունները և թիմային ավանդույթները
Հարցին, թե որն է Յուքոմցի լինելու առավելությունը, աշխատակիցների պատասխանները բացահայտում են ընկերության կորպորատիվ մշակույթի առանձնահատկությունները: Ընդհանուր մթնոլորտը ձևավորվում է փոքր, բայց նշանակալի ավանդույթների միջոցով, որոնցից ամենասպասվածը «Ուրախ ուրբաթներն» են: Այդ օրերին աշխատանքային ժամերը կրճատվում են, իսկ աշխատակիցներն ունեն հնարավորություն ազատ ժամանակն անցկացնելու սիրելի մարդկանց հետ կամ նվիրվելու նախընտրած զբաղմունքներին:
Ընկերությունում առանձնահատուկ նշանակություն ունեն աշխատանքային տարեդարձերը, որոնց միջոցով արժևորվում է յուրաքանչյուր աշխատակցի անցած մասնագիտական ուղին: Կարևորելով թափանցիկությունն ու երկխոսությունը՝ Ucom-ը պարբերաբար կազմակերպում է բաց հանդիպում-քննարկումներ, որտեղ թիմը միավորվում է ընդհանուր ձեռքբերումներն ամփոփելու, միմյանց լսելու և ապագա նախաձեռնությունների մասին տեղեկանալու նպատակով:
Աշխատակիցների բարեկեցությունը խրախուսելու համար Ucom-ը տրամադրում է լրացուցիչ ազատ օր ծննդյան կապակցությամբ: Տոնական օրերը նշվում են միասնաբար, իսկ տարվա ընթացքում կազմակերպվում են թիմային արշավներ, որոնք օգնում են աշխատակիցներին վերականգնել ուժերը, ամրապնդել թիմային կապերը և ոգևորությամբ վերադառնալ աշխատանքային առօրյային:
Մասնագիտական աճի անսահման հնարավորություններ
Ucom-ում առանցքային արժեք է համարվում աշխատակիցների պրոֆեսիոնալ զարգացումը, նախաձեռնողականությունը և համագործակցային աշխատանքային մշակույթը: Աշխատակիցներն ակտիվորեն ներգրավված են որոշումների կայացման գործընթացում, հստակ գիտակցում են իրենց դերը և ուղղակի ազդեցությունն ընդհանուր արդյունքների վրա:
Ընկերությունը մշակել է համակարգված մոտեցում անձնական և մասնագիտական աճի նկատմամբ՝ հետևողականորեն աջակցելով նոր գիտելիքների ձեռքբերմանը և փորձի փոխանակմանը թիմի ներսում: Ucom-ի աշխատանքային միջավայրում խրախուսվում են կառուցողական քննարկումները, նորարարական գաղափարները և գործընկերային աշխատելաոճը:
Ընկերության փիլիսոփայության հիմքում ընկած է այն համոզմունքը, որ յուրաքանչյուր աշխատակից ունի զարգացման ներուժ, և ղեկավարության առաքելությունն է այդ ուղին հնարավորինս հասանելի դարձնել: Մասնագիտական աճի հնարավորությունները բազմազան են՝ սկսած ներքին վերապատրաստումներից և արտաքին դասընթացներից մինչև մասնագիտական նախագծերում ներգրավվածություն և թիմերի ներսում ուղղությունների փոփոխման հնարավորություն:
Ucom-ը խրախուսում է ոչ միայն ուղղահայաց առաջխաղացումը, այլև հորիզոնական զարգացումը՝ երբ աշխատակիցները փորձում են իրենց նոր ոլորտներում: Բազմաթիվ են այն օրինակները, երբ աշխատակիցները, սկսելով իրենց մասնագիտական ուղին հաճախորդների սպասարկման ոլորտում, հետագայում հաջողությամբ տեղափոխվել են տեղեկատվական տեխնոլոգիաների, մարքեթինգի և այլ բաժիններ:
Ընկերությունում կարևորվում է նաև աշխատանքային և անձնական կյանքի հավասարակշռությունը՝ հիմնվելով այն համոզմունքի վրա, որ մարդն իրեն լավագույնս դրսևորում է, երբ գտնում է առողջ բալանս կյանքի տարբեր ոլորտների միջև: Հենց այդ պատճառով Ucom-ը ջանք է գործադրում, որպեսզի իր թիմակիցներն ունենան կյանքի բոլոր կարևոր պահերը լիարժեք վայելելու հնարավորություն:
Այսօր և ապագայում Ucom-ը շարունակելու է կատարել ներդրումներ թվային գործիքների զարգացման մեջ, որոնք կլավացնեն աշխատակիցների փորձառությունը և կնպաստեն արդյունավետության բարձրացմանը։
Ընկերության բոլոր նախաձեռնությունները նպատակ ունեն ձևավորելու մի գործակցային մշակույթ, որտեղ յուրաքանչյուրը կստանա անհրաժեշտ գործիքներ ու հնարավորություններ՝ լիարժեք կերպով օգտագործելու իր ներուժը։
Իսկ մեզ մնում է միայն հավելել, որ եթե ցանկանում եք մասը դառնալ այս ջերմ, պրոֆեսիոնալ և նորարար թիմի, ուր յուրաքանչյուր թիմակցի ձայնը կարևոր է, իսկ մասնագիտական աճի հնարավորությունները՝ անսահման, հետևե՛ք Ucom-ի կարիերայի էջին staff.am-ում և ծանոթացե՛ք առկա թափուր հաստիքներին։
