Տեխնոլոգիական ոլորտի մի շարք համաշխարհային փորձագետներ եկել են Երևան տեղում ու տեսակապով քննարկելու արհեստական բանականության և ավտոմատացված ուսուցման նորագույն միտումներն ու կիբեռանվտանգության և հարակից ուղղությունների մի շարք հիմնահարցեր։ Կազմակերպիչը հայկական Ucraft-ն է, որն առաջին անգամ չէ, որ Հայաստանում է մեկտեղում միջազգային հեղինակավոր ընկերություններին՝ հայրենականը միջազգային շուկային առավել ճանաչելի դարձնելու, միջազգային փորձն էլ հայրենական շուկա բերելու նպատակով։
Google Cloud, Netflix, Microsoft, Booking.com, Cloudflare, LKI Consulting. այս և այլ ընկերությունների մասնագետներ Jump Dev Conference-ի շրջանակում կիսվում են փորձով ու ծանոթանում ոլորտի հայկական հնարավորություններին ու առաջարկներին։
«2019-ին մեկ հարկի տակ էինք հավաքել դիզայներներին։ Jump Design Conference-ը մեծ հետաքրքրություն էր առաջացրել։ Այս անգամ համաժողովն այլ թեմա ու բովանդակություն ունի. հիմնականում ծրագրավորողների համար է։ Ոչ մասնագետների համար կարող է հասկանալի չլինել։ Հայաստանն այս ոլորտում մեծ ներուժ ունի և որակյալ ու պիտանի պրոդուկտ է տալիս աշխարհին, բայց միջազգային փորձին ծանոթանալը կարևոր է», – կարծում է Ucraft-ի հիմնադիր Գևորգ Բալյանը։
Ոլորտի հայկական ներուժը զարմացրել ու հիացրել է միջազգային հռչակ վայելող ընկերությունների ներկայացուցիչներին։ Նրանց խոսքով՝ այսպիսի ձևաչափով քննարկումները հրաշալի հնարավորություն են ընձեռում փոխանակվել փորձով ու նոր համագործակցություններ նախաձեռնել։
Աղբյուրը՝ starthub.am
