Ամառ Է․ ինչպես պահպանել աշխատանքի արդյունավետությունը

Շոգ ամառ, քաղաքային եռուզեռ Երևանում, զբոսաշրջիկներով լեփ-լեցուն սրճարաններ, իսկ մեր մտքում դրախտային ծովափնյա հանգիստ։ Անհնար է ներկա պահին պատկերացնել մի այնպիսի ընկերություն, որտեղ աշխատակիցները միմյանց հետ չեն քննարկում լավագույն հանգստի գոտիները, թե որտեղ կարելի է անցկացնել իրենց ամառային հանգիստը։

Բայց չէ՞ որ ես այս պահին նստած եմ աշխատասենյակում, իմ առջև՝ գրասեղանիս վրա դրված են շաբաթվա իմ բոլոր հանձնարարականները, իսկ ես շարունակ չեմ կարողանում մոտիվացվել և արդյունավետ աշխատել։

Փոխարենը մտածելու, թե երբ է լինելու Ձեր հաջորդ արձակուրդը, կարգավորեք կյանքը, որից խուսափելն այս պահին անհնարին է։
Սեթ Գոդին

Ահա և մի քանի խորհուրդներ, որոնք կօգնեն պահպանել աշխատանքային տրամադրությունը ողջ ամառվա ընթացքում։

1 Ծրագրեք ակտիվ առօրյա
Աշխատանքային օրվա ավարտից հետո կարող եք Ձեր օրն առավել հետաքրքիր կազմակերպել։ Ծրագրեք, օրինակ, զբոսանք այգում, ընտանիքի կամ ընկերների հետ այցելություն լողավազան կամ հանգստի համար նախատեսված այլ վայրեր, որոնք Ձեզ իսկապես կմոտիվացնեն։ Այս դեպքում Դուք ուղղակի կկենտրոնանաք աշխատանքի վրա, որից հետո ոգևորված կպատրաստվեք օրվա երկրորդ կեսին։

2 Խուսափեք սթրեսային իրավիճակներից
Մի ստուգեք Ձեր Ֆեյսբուքյան էջը կամ այլ սոց․ կայքեր, եթե գիտեք, որ Ձեր ընկերները վայելում են ծովափնյա հանգիստ, և ֆեյսբուքյան էջը ողողված է նմանատիպ լուսանկարներով։ Ինչու չէ նաև, եթե աշխատասենյակում նստած եք այնպիսի դիրքով, որ Ձեր առջև պատուհանից այն կողմ գեղեցիկ տեսարան է, ուրեմն փորձեք փոխել Ձեր դիրքը։

3 Աշխատանքը կազմակերպեք դրսում
Եթե Ձեր աշխատանքը թույլ է տալիս ոչ ֆորմալ պայմաններում հանդիպումներ կազմակերպել և աշխատել, ապա ինչո՞ւ չօգտագործել այդ հնարավորությունը։ Հատկապես շատ արդյունավետ են անցնում խմբային քննարկումները, ռազմավարական պլանավորման և հետագա քայլերի մշակման շուրջ աշխատանքները։ Ակնհայտ փաստ է, որ վիտամին D-ն չափազանց կարևոր է առողջության համար, ինչը մեծ քանակությամբ կարող եք ստանալ արևի ճառագայթների շնորհիվ։

Այսինքն, առավոտյան աշխատանքի մի մասը կազմակերպելով դրսում, այսպես ասած, co-working space-ում՝ Դուք կկարողանաք ինչ-որ չափով հանգիստը համատեղել աշխատանքի հետ, քան թե ողջ օրվա ընթացքում նստել աշխատավայրում տխուր և ապամոտիվացված, իսկ աշխատանքային օրն ավարտել ոչ արդյունավետ։

Ձեզ ընդամենն անհրաժեշտ է․

 Գրիչ և թուղթ,
 Նոթբուք,
 Հեռախոս,
 Եվ Wi-Fi:

Իսկ մի՞թե կա ինչ-որ այլ խոչընդոտող հանգամանք, որը կարող է Ձեզ հետ պահել նման հետաքրքիր որոշումից։

4 Ուսուցում և այլևս ոչ մի խնդիր
Պարզից էլ պարզ է, որ ներդրում կատարելով Ձեր հմտությունների զարգացման վրա, Դուք ներդրում եք կատարում Ձեր ապագայի վրա։ Եթե դեռևս չեք հասցրել մասնակցել վերաորակավորման որևէ դասընթացների արդեն բավականին երկար ժամանակ, ապա մի անհանգստացե՛ք, այս ամառ գուցե և լավագույն ժամանակն է։

Առաջին քայլը հասկանալն է, թե հատկապես Ձեզ ինչ հմտություններ են անհրաժեշտ և ինչ որակավորման վրա պետք է ուշադրություն դարձնել։

Իսկ այնուհետև անհրաժեշտ է փնտրել համապատասխան որակավորման կուրսեր և թրեյնինգներ, որոնք Ձեզ կդարձնեն guru։ Այս հարցում Ձեզ կարող է օգնել staff.am trainings հարթակը, որտեղ տեղադրված են ՀՀ առաջատար ընկերությունների և միջազգային կրթական հաստատությունների դասընթացները։

Համոզված եղեք, իհարկե, որ ձեռք բերված գիտելիքն իսկապես Ձեզ անհրաժեշտ է և կարող է բացել նոր ճանապարհներ Ձեր կարիերայում։

5 Day off-ի հնարավորություն
Եթե դեռևս չունեք արձակուրդի հնարավորություն, խորհուրդ ենք տալիս մեկ օր արձակուրդ վերցնել, որն առաջիկա շաբաթ-կիրակիի հետ ինչ-որ չափով կօգնի լիցքաթափվել աշխատանքային գերհոգնածությունից և երկուշաբթի մոտիվացված վերադառնալ աշխատանքի։

Այսօր արդեն հուլիսի 25-ն է, դրսում սովորականից անսովոր ջերմաստիճան՝ 29°C, մեկ ամիս ևս և ամառը կավարտվի, իսկ մեզ միայն մնում է խաղաղվել և բարձր տրամադրությամբ կազմակերպել աշխատանքային առօրյան առավել արդյունավետ 🙂