Մինչ աշխարհի տարբեր երկրներում համավարակի օրերին շատուշատ կազմակերպություններ փնտրում են մարդկային ռեսուրսները կառավարելու արդյունավետ, արագ ու ավտոմատացված տեխնոլոգիական լուծումներ, Հայաստանում staff.am ստարթափ թիմը, որը մշակում և մատուցում է HRTech ծառայություններ և գործիքներ, նոր հաջողություններ արձանագրեց՝ ընդլայնելով HireBee հարթակի գործունեության աշխարհագրությունը։ Պրոդուկտը ներկայացվեց Կենտրոնական Ասիայի ևս 3 երկրում՝ Ղրղզստանում (hirebee.kg), Տաջիկստանում (hirebee.tj) և Ուզբեկստանում(hirebee.uz)։
Դեռևս 2019թ․ հունիս ամսին թիմը հայտարարեց ԱՊՀ երկրներից ղազախական շուկա (hirebee.kz) մուտք գործելու մասին, իսկ այսօր ոչ միայն տոնում է Ղազախստանում ունեցած մեկամյա ձեռքբերումները, Կենտրոնական Ասիայի ևս երեք երկրում ներկայացվածությունը, այլ նաև շարունակում է գործել իր ծրագրերի իրագործման ուղղությամբ։ Մինչև տարվա վերջ նախատեսվում է կարիերայի հարթակը ներկայացնել երեք նոր շուկաներում՝ Ռուսաստան (hirebee.ru), Բելառուս (hirebee.by), Վրաստան (hirebee.ge), իսկ վերջնանպատակում՝ HireBee-ն կիրառելի և ճանաչելի դարձնել աշխարհում իր HRtech լուծումներով։
Այս ոգևորվածության շարժառիթներից գլխավորը HR ոլորտը զարգացնելու ու կատարելագործելու ձգտումն է, որ 2017 թվականից մինչ այսօր ունեն հիմնադիրները։ Այս պահին Կենտրոնական Ասիայում պրոդուկտի կորպորատիվ հաճախորդների շարքն են զբաղեցնում ՏՏ, բանկային, ֆինանսական, ապահովագրության, արտադրության, հեռահաղորդակցության և այլ ոլորտների այնպիսի խոշորագույն ընկերություններ, ինչպիսիք են՝ Home Credit Bank-ը, British American Tobacco-ն, Beeline Kazakhstan-ը, EFES Kazakhstan-ը, Sberbank Kazakhstan-ը և այլ ընկերություններ։
«Ղազախստանում հարթակի թողարկումից հետո մեր Գործատու ընկերությունները բազմիցս են մեզ հետ կիսվել HireBee-ն Կենտրոնական Ասիայի մյուս երկրներում նույնպես տեսնելու ցանկությամբ։ Բացի այդ այս շուկաներում HRTech հարթակի զարգացման բավականին մեծ պոտենցիալ ենք նկատում։ Եվ ըստ մեր ուսումնասիրությունների համապատասխան սպասումներ ունենք», – մեզ հետ Zoom զանգի ընթացքում նշեց staff.am և HireBee համահիմնադիր և ղեկավար Վահե Ավետիսյանը։
Քանի որ HR ոլորտի պրոդուկտներում նոր սերունդ ենք թևակոխվում, որտեղ շեշտը դրվում է պրոդուկտի հնարավորությունների, բոլորը մեկում տեխնոլոգիական լուծումների, պրոցեսների ավտոմատացման և մեծ տվյալների վերլուծության վրա, HireBee-ի պահանջարկը շարունակ մեծանում է։
«Կենտրոնական Ասիայում HireBee-ի ռազմավարությունը շարունակելու է մնալ նույնը, ինչպես նաև կաշխատենք պրոֆեսիոնալ ուղղություններով այն ընկերությունների հետ, որոնց անհրաժեշտ է առաջադեմ թվային գործիքակազմ, և որոնք հավասարապես կարևորում են նաև Գործատուի բրենդը, այսինքն՝ HR բրենդը», – զրույցի ժամանակ հավելեց staff.am և HireBee համահիմնադիր Լուիզա Ավետիսյանը։
Նշենք, որ Covid-19-ի համավարակի ընթացքում ստարթափ թիմը ոչ միայն մշակում և կատարելագործում է իր գործիքները Հայաստանի և միջազգային շուկաների համար, այլ նաև հատուկ քայլեր է ձեռնարկել, որն արտակարգ դրության և ֆինանսատնտեսական դժվարությունների ժամանակ օգնում է ընկերություններին և անհատ թրեյներներին առավել մատչելի տարբերակով օգտվել պրոֆեսիոնալ գործիքներից։
Դե իսկ, այս նվաճումներն էլ թիմին էլ ավելի են ոգևորում ու շարունակում են ակտիվորեն աշխատել նոր հայկական պրոդուկտով միջազգային շուկա մուտք գործելու ուղղությամբ, որի մասին շատ շուտով մենք ձեզ հետ կկիսվենք։
HireBee կարիերայի հարթակի մասին
HireBee-ն Գործատուների համար՝ մարդկային ռեսուրսների մասնագետների համար ժամանակակից և լիարժեք HR հարթակ և ինտելեկտուալ օգնական, որն առաջարկում է թվային լուծումներ՝ սկսած աշխատանքի հայտարարության տեղադրումից մինչև թեկնածուին աշխատանքի առաջարկ ուղարկելը։
HireBee-ն աշխատանք փնտրողների համար՝ աշխատանքի որոնման և կարիերայի առաջխաղացման խելացի ուղեցույց և գործիքակազմ։
Աղբյուրը՝ Vnews.am
