Աշխատանքը պատերազմի ժամանակներում. ինչպես աջակցել սեփական «զորքին»

Նույնիսկ եթե աշխատում եք մարտի դաշտից հարյուրավոր կիլոմետր հեռավորության վրա, միևնույն է պատերազմը հոգեբանական լարվածության ու սթրեսի աղբյուր է։ Ընդամենը, կարող եք հարցնել տարբեր ղեկավարների, որոնք փորձում են կառավարել իրենց ընկերությունը պատերազմի ժամանակներում։ Շատ դեպքերում, ուղղակի անհնար է լինում ապահովել պրոդուկտիվ ու հանգիստ աշխատանքային միջավայր։

Մի կողմից աշխատանքը չի կարող տուժել, քանի որ պետության՝ որպես օրգանիզմի կենսունակությունն եք ապահովում, իսկ մյուս կողմից էլ մարտահրավերները բավականին շատ են ու զգույշ քայլերով է պետք հաղթահարել։

Այս մարտահրավերները բարեհաջող հաղթահարելու համար StaffMedia-ում առանձնացրել ենք մի քանի խորհուրդ, թե ինչպես կառավարել աշխատանքային հարաբերությունները պատերազմի ժամանակ։

Այսպիսով․

Ովքե՞ր պետք է լինեն ընկերությունների «առաջնագծում»․

Դեռևս այս տարվա սկզբին, երբ համաճարակի հետևանքով արտակարգ դրություն էր հայտարարվել, HR ղեկավարի կամ հայերեն լեզվով՝ մարդկային ռեսուրսների կառավարչի դերն ավելի քան երբևէ կարևորվեց։ Այժմ՝ ռազմական դրություն․․․ պատերազմ․․․ տեղահանվածներ, առաջացել է թիմին համախմբելու ու հայրենիքին թիմային աջակցություն ցուցաբերելու անհրաժեշտությունը։ Կրկին ընկերությունների առաջնագծում են HR ղեկավարները, իսկ փոքր ընկերություններում ղեկավարները կամ տնօրենները, ովքեր որպես հրամանատար՝ ուղղորդում են իրենց «զորքին» ։) Ի դեպ, մեր հայրենասեր HR-ները պատերազմի հենց առաջին օրվանից ակտիվորեն անցան գործի։ Շատ շուտով պատերազմը կավարտվի, իսկ ձեր ընկերությունը կառանձնանա իր բարձր թիմային ոգով ու համախմբվածությամբ։ Հպարտ ենք ու հաղթելու ենք, անկասկած։

Արդյո՞ք պետք է այլ կերպ վերաբերվել աշխատակիցներին պատերազմական իրավիճակում․

Այո՛, առաջին հերթին ձեր ընկերությունում կլինեն աշխատակիցներ, ովքեր թողնում են իրենց գործը և մեկնում ռազմաճակատ, թիմում դա արդեն ստեղծում է սպասողական ու անհանգիստ տրամադրություն։ Շատ հավանական է նաև, որ աշխատակիցների հարազատները, եղբայրները անմիջապես գտնվում են մարտի դաշտում, իհարկե, «դժոխային» իրավիճակներ ստեղծելով հակառակորդի համար ։)․․․ բայց ինչևէ, այստեղ կարևոր է ըմբռնել, որ աշխատակիցները մեծ դժվարությամբ են կենտրոնանում աշխատանքի վրա կամ պարզապես չեն կարողանում աշխատել։ Այս ամենի հետ մեկտեղ կարող է լրացուցիչ դժվարություններ ստեղծել նաև հեռահար աշխատանքը։ Եվ միանշանակ, դուք պետք է աջակցեք ձեր աշխատակիցներին, հարցնեք, թե ինչով կարող եք օգտակար լինել։ Այս կերպ դուք ևս մեկ անգամ ցույց եք տալիս ձեր լավագույն գործատու լինելը։

Ի՞նչ անել, երբ մեդիա լրահոսն առաջնային պլան է մղվում

Համաշխարհային փորձը ցույց է տալիս, որ պատերազմական իրավիճակներում բազմաթիվ ընկերություններ են բախվում այս իրավիճակին․ անգամ ղեկավարները չեն կարողանում կտրվել մեդիա նորությունների դաշտից։ Որոշակի ժամանակ կարող եք հատկացնել բոլորին, միասին քննարկեք իրավիճակը՝ այս կերպ փոքր-ինչ կմեղմվի լարվածությունը, իսկ այնուհետև միասին կանցնեք աշխատանքի։

Արդյո՞ք ձեր աշխատակիցների անվտանգությունն ապահովված է․

Կան աշխատանքներ, որոնք մոտ են խոցելի շրջաններին կամ լոգիստիկայի ոլորտում են, ու շատ կարևոր է, որ ձեր կողմից գնահատվի ռիսկի բոլոր գործոնները աշխատակիցների անվտանգությունն ապահովելու նպատակով։

Հուսով ենք, որ այս խորհուրդներն օգտակար կլինեն բոլոր մարտահրավերները հաղթահարելու և ձեր «զորքերի» ոգին բարձր պահելու համար։

ՀԱՂԹԵԼՈՒ ԵՆՔ!