Ամփոփում ենք 2021 թվականը՝ ոգեշնչվելով մեր Գործատուների հաջողություններով։
Ընդամենը մի քանի օր առաջ տարեվերջյան այց կազմակերպեցինք We Construct ընկերություն։ Փոքրիկ շրջայց կատարեցինք գրասենյակում, կիսեցինք թիմի տոնական-աշխատանքային տրամադրությունն ու զրուցեցինք We Construct համահիմնադիր և գործադիր տնօրեն Լևոն Համբարձումյանի և HR ղեկավար Էմմա Մարգարյանի հետ։ Թեման կարծում եմ արդեն գուշակեցիք` մտովի ճամփորդեցինք 365 օր՝ առանձնացնելով We Construct-ի այս տարվա լավագույն ձեռքբերումները ու սահմանելով 2022թ. առաջնահերթությունները։
Այս տարի թիմով նշեցինք մեր հինգամյակը, որը շատ խորհրդանշական էր մեզ համար։ Այդ 5 տարին ամփոփում է իր մեջ մեր պրոֆեսիոնալ թիմի աշխատանքը, 10x թիմի աճն ու outsource ծառայություններին զուգահեռ նոր պրոդուկտի SetTime-ի մշակումը։
Լևոն Համբարձումյան, We Construct համահիմնադիր և Գործադիր տնօրեն
Մեր աշխատակիցները քաջ գիտակցում են, որ Մենք նախևառաջ Թիմ ենք, և այստեղ հավաքվել ենք մեկ նպատակի համար, նաև գիտակցում ենք, որ աշխատակցի և բիզնեսի հաջողությունը փոխկապակցված է։
Էմմա Մարգարյան, We Construct HR ղեկավար
Եթե դեռևս չեք հասցրել ծանոթանալ We Construct-ի գործունեությանը, ապա հակիրճ ներկայացնենք։
We Construct-ը հայ հիմնադիրների կողմից ստեղված տեղեկատվական տեխնոլոգիաների ոլորտի առաջադեմ ընկերություն է իր նորարարական գաղափարներով և միջազգային գործընկերներին տրամադրվող ծառայություններով։ Հիմնադրվելով դեռևս 2016 թվականին՝ այն այսօր ունի 30 աշխատակից, ովքեր ակտիվորեն ներգրավված են նաև նոր պրոդուկտի՝ SetTime-ի մշակման ու թողարկման գործում։ Այսինքն, շատ շուտով թե բիզնեսները, թե անհատներս կարող ենք խնայել մեր ժամանակը՝ պլանավորելով մեր անհատական օրակարգը ու տարբեր ծառայություններից օգտվելիս նախապես ամրագրելով մեզ հարմար ժամանակը։
Ի՞նչ նվաճումներով ու նորություններով եք ամփոփում այս տարին։
Արդեն 5 տարեկան։ Այս տարի թիմով նշեցինք մեր հինգամյակը, որը շատ խորհրդանշական էր մեզ համար։ Այդ 5 տարին ամփոփում է իր մեջ մեր պրոֆեսիոնալ թիմի աշխատանքը, 10x թիմի աճն ու outsource ծառայություններին զուգահեռ նոր պրոդուկտի SetTime-ի մշակումը, որն արդեն բիզնեսների համաև կթողարկվի գալիք տարում։ Ի լրումն այս հաջողությունների, անդամագրվել ենք նաև ԱՏՁՄ-ին (UATE) ու մասնակցել ենք DigiTec Expo 2021-ին՝ ներկայացնելով մեր նոր նախագիծը հազարավոր մարդկանց և ստանալով նրանց կողմից դրական արձագանք, որ այն խնդիրը, որը մենք լուծել ենք, ունի պահանջարկ և ակտուալ է։
Ո՞րն եք համարում այս տարվա Ձեր ամենամեծ մարտահրավերը։
Այս տարի մեր հստակ նպատակներից է եղել մեծացնել թիմն ու թողարկել պրոդուկտը, բայց, իհարկե, մակրո մակարդակում առաջացած փոփոխությունները չեն կարող չթողնել իրենց ազդեցությունը։ Ամենամեծ մարտահրավերը մեզ համար հետպատերազմյան ժամանակահատվածն էր։ Բավականին բարդացել էր նոր մասնագետներ ներգրավելը, քանի որ կյանքը կանգնել էր պատերազմի ժամանակ, որն իր հերթին ազդել էր նոր մասնագետների` ոլորտ մտնելուն: Որպես մեկ այլ մարտահրավեր կարող եմ նշել COVID-ը և դրանից առաջացած դժվարությունները:
Բարեբախտաբար, մենք կարողացանք հաղթահարել այդ ժամանակահատվածը ևս և 2021-ի երկրորդ կեսին ներգրավեցինք նոր աշխատակիցների ու ավելացրեցինք մեր պրոյեկտների քանակը:
Ի՞նչ քայլեր են այս տարի իրականացվել աշխատակիցների մասնագիտական աճի ապահովման համար։
2021թ-ին ներդրել ենք աշխատակիցների խրախուսման նոր համակարգ՝ այժմ առաջարկելով նաև ոչ նյութական խրախուսման տարբեր փաթեթներ, մասնավորապես, աշխատակիցների և իրենց ընտանիքի անդամների համար առողջության ապահովագրության բավականին լավ փաթեթ, հավելյալ վճարվող արձակուրդի օրեր տարեկան կտրվածքով (day offs), աշխատակցի ծննդյան օրվա կապակցությամբ կազմակերպության կողմից նվեր քարտ, ինչպես նաև աշխատակիցների համար կազմակերպում ենք անգլերեն լեզվի վերապատրաստման դասընթացներ, քանի որ առաջնորդվում ենք հետևյալ սկզբունքով, որ ցանկացած բիզնեսի հաջողության հիմքում ուժեղ, խելացի աշխատակիցներն են։
Ի՞նչ միջոցառումներ եք մեկնարկել՝ ուղղված թիմի և համայնքի զարգացմանը։
Այս տարի բավականին մեծ ուշադրություն ենք դարձրել նոր մասնագետների պատրաստմանը՝ մեկնարկելով «Ամառային պրակտիկա» ծրագիրը։ Այս ծրագրի միջոցով մենք հնարավորություն տրամադրեցինք նորավարտ երիտասարդներին դիմել, մասնակցել պրակտիկայի, հմտանալ, և աշխատանքի առաջարկ ստանալ մեզ մոտ։
Արդյունքում ունեցանք անսպասելի մեծաքանակ դիմորդներ՝ թվով 286, դիմորդները հիմնականում տեխնիկական կրթություն ունեին։ Մրցութային փուլերը և սահմանված 3-ամսյա պրակտիկան անցնելուց հետո լավագույններն աշխատանքի առաջարկ ստացան և այժմ շարունակում են աշխատել մեր Թիմում։
Ծրագիրը բացառիկ էր իր ֆորմատով, նաև բավականին հաջող ընթացք ունեցավ, և պլանավորում ենք այն իրականացնել պարբերական։ Նման ծրագրերը աջակցում են և մեզ որպես գործատու լուծել անձնակազմի հավաքագրման խնդիրը, իսկ դիմորդների տեսանկյունից ՝ սա լավագույն հնարավորությունն է` չունենալով դեռևս աշխատանքային փորձ մուտք գործել աշխատաշուկա, ունենալ կայուն աշխատանք դինամիկ և զարգացող կազմակերպությունում։
Իսկ որո՞նք են գալիք տարվա Ձեր գլխավոր նպատակները։
Կարող ենք նշել մի քանի խոշոր նպատակներ, որոնք մտադիր ենք իրագործել 2022թ.-ին.
1. Մեծացնել մեր թիմը` աշխատակիցների քանակը հասցնելով 60-ի։
2. Ներգրավել ավելի շատ պրոյեկտներ։
3. Սկսել և ավարտին հասցնել սեփական գրասենյակի կառուցումը։
4. Թողարկել մեր նոր պրոդուկտը (SetTime)։
5. Նոր պրոդուկտով մասնակցել ներդրումային ծրագրերի, ներգրավել ներդրումներ։
Շնորհակալություն We Construct-ին թիմով նման արդյունավետ տարի ստեղծելու համար ու մաղթենք նպատակների իրագործման ու մեծ հաջողությունների 2022 թվական։
