Շաբաթվա գիրքը | Դուք այն եք, ինչ անում եք (What You Do Is Who You Are)

Staffmedia.am-ը շարունակում է «Շաբաթվա գիրքը» շարքը։ Նախորդ անգամ անդրադարձել էինք Սթիվեն Քովիի «Ամենաարդյունավետ մարդկանց յոթ սովորույթները» գրքին, որտեղ հեղինակը բացահայտել է այն սկզբունքները և սովորույթները, որոնք հատուկ են հաջողակ և արդյունավետ կյանք վարող մարդկանց։

Երբ Բենը նոր էր հիմնադրել LoudCloud ընկերությունը, բիզնեսում հաջողելու վերաբերյալ շարունակաբար խորհուրդներ էր հարցնում տարբեր փորձառու գործադիր տնօրեններից և ոլորտի առաջատարներից։ Նրանք բոլորը տալիս էին միևնույն պատասխանը․ «Ուշադրություն դարձրու քո մշակույթին։ Մշակույթն ամենակարևորն է»։ Իսկ հարցը, թե ինչ է մշակույթը, և ինչպես է հնարավոր այն ձևավորել, մնում էր անպատասխան։ Հետո ժամանակի ընթացքում նա հասկացավ, որ ընկերության մշակույթը հենց իր՝ ղեկավարի արժեհամակարգի, վարքագծի և անհատականության արտացոլանքն է։ Ուստի սկսեց կիրառել «առաջնորդել՝ օրինակ ծառայելով» սկզբունքը։ 

Դուք այն արժեքները չեք, որոնք թվարկված են ձեր կազմակերպության պատերին։ Դուք այն բառերը չեք, որ ասում եք գործնական հանդիպումների ժամանակ։ Դուք ձեր մարքեթինգային արշավը չեք։ Դուք անգամ այն չեք, ինչին որ հավատում եք։ Դուք այն եք, ինչ անում եք։

Իսկ արդեն ընկերության մշակույթը արտացոլվում է ձեր աշխատողների այն որոշումներում, որոնք կայացվում են ձեր բացակայության ժամանակ։ 

Հաճախ դուք ինքներդ չեք գիտակցում, որ ստեղծում եք նոր մշակույթ։

Եթե դուք տեսնում եք մի բան, որը ձեր մշակույթից դուրս է, և անտեսում եք այն, դուք ստեղծում եք նոր մշակույթ։

Հետևաբար՝ պետք է ուշադրություն դարձնել ոչ միայն «կարելիների», այլ նաև «չիկարելիների» վրա։ 

Մշակույթը քարացած չէ․ ընկերության աճին և զարգացմանը զուգընթաց պետք է որդեգրել նոր և ավելի համապատասխան մշակույթ․ այն, ինչն աշխատում էր 1 տարի առաջ, հնարավոր է՝ չաշխատի 1 տարի հետո։

Հեղինակը Հայիթիի հեղափոխության օրինակով ներկայացնում է ընկերության ներսում մշակույթ ստեղծելու սկզբունքները։

Հայիթիի հեղափոխությունը պատմության մեջ ստրուկների ապստամբության միակ հաջողված դեպքն է, որի ամենանշանավոր առաջնորդը Տուսեն-Լուվերտյուրն (Toussaint Louverture) էր։ Իսկ ինչպե՞ս է նրան հաջողվել կոտրել ստրկական մշակույթը։ Ահա այդ հիմնական սկզբունքները, որոնք կարող են փոխել ցանկացած կազմակերպության մշակույթ․

Շարունակեք անել այն, ինչն աշխատում է

Նոր մշակույթ ստեղծել չի նշանակում ամբողջությամբ վերացնել հինը։ Պետք է պահել այն, ինչն աշխատում է և արդյունավետորեն կարելի է համադրել նորի հետ։ Տուսեն-Լուվերտյուրը ստրուկների մշակութային տոնակատարությունների երգերը, որոնք անհասկանալի էին հակառակորդին, օգտագործում էր որպես հարձակվելու գաղտնի ազդանշան։

Ստեղծեք ոչ ստանդարտ կանոններ

Ներմուծեք կանոններ, որոնք առաջին հայացքից որևիցե կապ չունեն կազմակերպության և աշխատանքի հետ և կարող են զարմանք և շոկ առաջացնել։ Բոլորը կհարցնեն՝ «ինչու՞», և այդ «ինչու»-ի պատասխանը նրանք երբեք չեն մոռանա։ Տուսեն-Լուվերտյուրը, օրինակ, արգելեց ամուսնացած սպաներին հարճեր ունենալ, ինչը այն ժամանակ բավականին տարածված և նորմալ երևույթ էր․ եթե նրանք հավատարիմ չեն իրենց կանանց, ինչպե՞ս կարող են հավատարիմ լինել մի ողջ զորքի։ 

Հագնվեք հաջողությանը համապատասխան

Ստեղծեք գերազանցության և հաջողության խորհրդանշաններ և հետևեք դրանց։ Այս սկզբունքը կմիավորի բոլորին մեկ ընդհանուր գաղափարի շուրջ։ Լուվերտյուրի կողմից մշակված զինվորական համազգեստի օգտագործումը անկազմակերպ խումբը վերածեց կարգապահ, էլիտար ուժի՝ ինքնության և նպատակի զգացում սերմանելով։

Ներառեք արտաքին ուժեր

Կազմակերպության մշակույթը փոխելիս ցանկալի է ներգրավել տվյալ ոլորտում կամ մշակույթում փորձառու արտաքին ղեկավարություն։ Այս սկզբունքը փոփոխության գործընթացը կդարձնի ավելի սահուն, արագ և հեշտ։

Ձեր որոշումները պետք է ընդգծեն մշակութային առաջնահերթությունները

Կազմակերպության ղեկավարը անսպասելի, բայց սկզբունքային որոշումներ կայացնելով կարող է խթանել մշակութային փոփոխությունները։

Ձեր խոսքերը վերածեք գործողությունների

Այն կազմակերպությունը, որտեղ ղեկավարի գործողությունները համընկնում են իր հայտարարությունների հետ, ունի ավելի ամուր և արդյունավետ մշակույթ։ Նոր մշակույթ սովորեցնելու լավագույն եղանակը օրինակ ծառայելն է։ 

Այնուհետև հեղինակը սամուրայների օրինակով փորձում է բացատրել մշակույթի ողջ էությունը։

Սամուրայը՝ հին Ճապոնիայի ռազմականացված խավը, ուներ ապրելաձևի հզոր բարոյական կոդեքս, որը կոչվում էր բուշիդո՝ թարգմանաբար՝ մարտնչողի ճանապարհը։

Բուշիդոն նման է սկզբունքների ամբողջության, բայց իրականում այն պրակտիկաների ամբողջություն է։ Սամուրայը մշակույթը սահմանում է ոչ թե որպես արժեքների, այլ որպես առաքինությունների համակարգ: Արժեքը պարզապես համոզմունք է, մինչդեռ առաքինությունը այն համոզմունքն է, որին դուք անընդհատ ձգտում եք:

Մշակույթի տեսանկյունից այն, ինչին դուք հավատում եք, գրեթե ոչինչ չի նշանակում: Իսկ ահա այն, ինչ անում եք, սահմանում է, թե ով եք դուք։

Իսկ ի՞նչ տեխնիկաներ են օգտագործել սամուրայները մշակույթը պահպանելու համար․

1․ Նրանք մանրամասն պարզաբանել և հաշվի են առել ցանկացած հավանական մշակութային խնդիր, որպեսցի խուսափեն թյուրիմացությունից։

2․ Նրանք ներկայացրել են սկզբունքները/կանոնները վառ և տպավորիչ պատմությունների տեսքով։

Սակայն այս ամենն իր արդյունքը կտա միայն այն դեպքում, երբ ղեկավարը հստակ գիտակցի, թե ինչ է ուզում ինքը։ 

Ամփոփելով նշենք, որ, այո, մշակույթը հաջողակ ընկերություն հիմնելու գործում շատ կարևոր է, սակայն այն չի կարող երաշխավորել ձեր հաղթանակը։ Հարց է առաջանում․ այդ դեպքում ինչու՞ այդքան ժամանակ և էներգիա ծախսել ամուր մշակույթ կառուցելու համար։ Պատասխանը շատ պարզ է․ ձեր ընկերությունում աշխատող մարդիկ աշխատանքից դուրս հիշելու են ոչ թե այն մրցանակները, որ ստացել են, ոչ թե այն դժվարին առաջադրանքները, որոնք հաղթահարել են, այլ այն, ինչ զգացել են ձեր ընկերության պատերի ներսում աշխատելիս, ինչը ոչ այլ ինչ է, քան ընկերության մշակույթի արդյունքը։