Լավագույն գովազդը, որ Դուք կարող եք ունենալ, հավատարիմ հաճախորդն է, որ դառնում է Ձեր բրենդի «դեսպանը» և գովազդում է Ձեր բիզնեսը:
Ահա թե ինչու են կազմակերպությունները ուշադրության կենտրոնում պահում իրենց հաճախորդներին, թե՛ այն պահին, երբ սկսում են գրել իրենց բիզնես պլանը, թե՛ երբ ունեն բավականաչափ մեծ շահույթ: Հաճախորդների բազան կազմակերպության այն հաճախորդների ցուցակն է, որը հիմնականում համընկնում է սկզբնական թիրախային խմբի հետ: Նրանք այն հաճախորդներն են, որոնք գոնե մեկ անգամ գնում են կատարել Ձեզանից։ Կազմակերպության նպատակն է ստեղծել վերադառնալու համար անհրաժեշտ շարժիչ ուժը՝ հավատարմությունը:
Գոյություն ունի հաճախորդների բազայի երկու տեսակ՝
- հաճախորդներ, որոնք կատարում են կանոնավոր փոքր գնումներ,
- հաճախորդներ, որոնք կատարում են քիչ, բայց ավելի խոշոր գնումներ։
Վերջիններիս հետ հարաբերությունների զարգացումը երբեմն հանդիսանում է մարքեթինգային ռազմավարության մաս: Հավատարիմ հաճախորդների բազայի պահպանման և ընդլայնման կարևորագույն շարժառիթը վաճառքի, հետևաբար նաև եկամտի ավելացումն է։
Harvard Business Review-ի անցկացրած ուսումնասիրության արդյունքում հայտնաբերվել է, որ հաճախորդի պահպանման մակարդակի 5% աճը բերում է շահույթի 70% աճի:
Մեկ այլ շարժառիթ է հանդիսանում այն, որ նոր արտադրանք թողարկելիս, կազմակերպությունն արդեն ունենում է բազա, որին կարող է ներգրավել արտադրանքի կամ ծառայության փորձարկման շրջանում:
Ամենակարեվորը մարդկանց երջանկացնելն է: Եթե Դուք մարդկանց երջանկացնեք, նրանք ուրախ կլինեն բացել իրենց դրամապանակները եվ վճարել Ձեզ։
Այս միտքը կիսում է նաև Bodice of Holt-ի գործադիր տնօրեն Ալիս Բոդենը: Նրա կազմակերպությունն առաջարկում է տնային առաքման ծառայություն մրգերի և բանջարեղենի համար: Նա ասում է, որ իրենց ծառայություններն ամբողջովին համապատասխանեցված են իրենց հաճախորդների կարիքներին:
Այս մոտեցումն աշխատում է նաև բիզնես հաճախորդների հետ (B2B):
Փորձառու և շնորհալի մարզիչների կողմից անհատական մարզչական և զարգացման լուծումներ առաջարկող կազմակերպության՝ «Sogno»-ի տնօրեն Մայք Կոկբուրն ասում է. «Կարևոր է, որ մենք հասկանանք, թե որն է մեր հաճախորդների առաքելությունը, նրանց նպատակները: Դրանից հետո մենք հասկանում ենք, թե ինչպես կարող ենք արագացնել տվյալ գործընթացը և հարմարեցնել մեր ծառայությունները` նրանց կարիքների բավարարմանը: Դա հանգեցնում է ավելի հավասարակշռված հարաբերությունների»:
Բիզնեսում կարևոր է հաճախորդների կարիքները բավարարելը, ինչը ճիշտ անելու դեպքում Դուք ձեռք եք բերում հավատարիմ հաճախորդներ։
Այժմ, հասկանանք, թե ինչպես կարելի է պահպանել և մեծացնել հաճախորդների բազան:
- Բաժանե՛ք Ձեր ժամանակը
Եթե փորձեք միևնույն ժամանակ, և՛ բարելավել հարաբերությունները Ձեր ներկա հաճախորդների հետ, և՛ ներգրավել նորերին, Դուք կարող եք բախվել դժվարությունների: Այդ ամենից խուսափելու համար, կատարեք ժամանակի ճիշտ բաժանում այս երկուսի միջև:
- Ապահովե՛ք հետադարձ կապը
Մենք ապրում ենք տեխնոլոգիայի զարգացման դարաշրջանում, և ցանկացած վատ կամ լավ կարծիք, որը հայտնվում է սոց. ցանցերում, մնում է այնտեղ: Ահա, թե ինչու պետք է արագ և համակարգված պատասխանել ցանկացած մեկնաբանության: Եթե նույնիսկ խնդիրը լուծված է, այդ մասին նշեք պատասխանի մեջ, որ պոտենցիալ հաճախորդները հասկանան, որ բացի արձագանքելուց Դուք նաև լուծում եք առաջացած խնդիրները։
- Արե՛ք այն, ինչ խոստացել եք անել և նույնիսկ` ավելին
Ավելին քան վստահությունը, մարդկանց գրավում է իրենց նկատմամբ ուշադրությունը: Արեք ամեն ինչ անթերի, նույնիսկ եթե Դուք ընդամենը բարևում եք Ձեր հաճախորդին:
- Լա՛վ վերաբերվեք Ձեր աշխատողներին
Եթե Դուք վատ վերաբերվեք Ձեր աշխատողներին, հավանականությունը մեծ է, որ նրանք իրենց հերթին վատ կվերաբերվեն Ձեր հաճախորդներին:
- Ցու՛յց տվեք Ձեր անձնային կողմը
Ուղարկեք շնորհակալական և շնորհավորական նամակներ, արեք անակնկալ նվերներ, կապի մեջ եղեք Ձեր հաճախորդների հետ և տեղեկացրեք նրանց նորությունների մասին:
- Դարձե՛ք Ձեր հաճախորդի ընկերը, և նա Ձեզ չի լքի:
Ժամանակ տրամադրեք՝ իսկապես հասկանալու Ձեր հաճախորդների կարիքները, պահպանեք հաղորդակցության բաց և թափանցիկ ուղիները և ակտիվորեն լսեք նրանց մտահոգություններն ու արձագանքները:
Ամփոփելով, կարող ենք ընդգծել հաճախորդների բազայի հետ աշխատանքի կարևորությունը, սակայն պետք չէ մոռանալ, որ Ձեր բիզնեսը Ձեր արարչությունն է. շրջապատեք Ձեզ և Ձեր բիզնեսը ճիշտ մարդկանցով:
