Եթե հետևում եք staff.am թիմի այցերին տարբեր ընկերություններ ու մեր StaffCoverage-ներին, ապա հաստատ նկատած կլինեք մեր շա՜տ հավեսով տեսաանդրադարձն ու StaffMedia հոդվածը DISQO-ի մարդկանց մասին։
Այնքան բազմազան թիմային միջոցառումներ, meetup-ներ ու ծրագրեր ունեն, այդ ամենին հավելյալ՝ աշխույժ ու աշխատասեր թիմ, որոնք միասին էլ կազմում են DISQO մշակույթը։ Եկեք հիմա մտովի այս ամենը տեղափոխենք վիրտուալ աշխարհ ու կարդանք ստորև, տեսնենք ինչպես է ստացվել։ Համաձա՞յն եք 🙂
Այսպիսով, staff.am՝ ընկերությունների #WorkFromHome փորձին նվիրված նախագծի շրջանակներում DISQO թիմը կիսվեց իր լավագույն պրակտիկաներով՝ ինչպե՞ս և ի՞նչ մեթոդներով դարձնել remote աշխատանքն առավել քան արդյունավետ։
Հատուկ շնորհակալություն DISQO թիմին 🙂
Work from home` DISQO-ի արձագանքը COVID 19-ին
Ուրբաթ օրը՝ մարտի 13-ին, երբ անգամ արտակարգ իրավիճակ հայտարարված չէր, մենք առաջիններից էինք, որ կարևորելով աշխատակիցների առողջությունն ու ապահովությունը՝ անցանք հեռահար աշխատանքի ռեժիմին։
Հենց այդ նույն օրը մեր համահիմնադիր-գործադիր տնօրեն Արմեն Աճեմյանն օնլայն հանդիպման հրավիրեց բոլորիս՝ DISQO-ի բոլոր գրասենյակներից, ու հայտարարեց պարտադիր տնից աշխատանքի անցնելու մասին։ ԲՈԼՈՐՍ ՊԱՏՐԱՍՏ ԷԻՆՔ 🙂
DISQO-ի հիմնադրման առաջին իսկ օրվանից մեր համահիմնադիր-տեխնիկական տնօրեն Դրո Քոչարյանն ունեցել է հեռահար աշխատանքն ապահովելու տեսլականը, ըստ որի էլ ստեղծել և զարգացրել է ներկայիս աշխատուժը։ Ուստի, թե արձագանքն ու թե անցումը մեզ համար դյուրին ստացվեց։
«Բարեբախտաբար, վերջին կես տարվա ընթացքում արմատացրած տվյալահեն կառավարման (Data-Driven Management) հիմքերը մեզ պատրաստել էին հեռահար աշխատանքին»,- նշում է Դրո Քոչարյանը։
Հենց առաջին օրն էլ նա մեզ ներկայացրեց մի շարք մոտեցումներ ու խորհուրդներ հեռահար աշխատանքն արդյունավետ դարձնելու համար։ Դրանք այս ընթացքում անընդհատ թարմացվում են թե ղեկավարության ու թե թիմի մյուս անդամների առաջարկներով։
Եթե չլիներ թիմի հետ իրական շփման և գրասենյակի կարոտը, ապա կարծում եմ` ճիշտ ենք նկատել, աշխատանքը նույն շարժով DISQO-ում սլանում է: Իսկ արդյո՞ք ունեիք հատուկ մշակված WFH մեթոդաբանություն։
DISQO-ի թիմում կան հեռահար աշխատակիցներ թե Հայաստանում ու թե ԱՄՆ-ում, ուստի այս մեթոդաբանությունը նոր չէր մեզ համար։ Բացի այդ, քանի որ մեր գրասենյակները գտնվում են տարբեր ժամային գոտիներում, աշխատանքային գրաֆիկը մեզ մոտ շատ ճկուն է։ Վերջինս միշտ նպաստել է ավելի արագ հաղորդակցմանը, որոշումների կայացմանն ու աշխատանքային ժամերի արդյունավետ կառավարմանը։
Նույնիսկ աշխատանքի հարցազրույցների համար ունենք օնլայն անցկացնելու փորձ։ Կան թիմեր, որոնց ղեկավարները կամ թիմի մյուս անդամները աշխատում են Գլենդելի գրասենյակում, ուստի նրանց հետ օնլայն հարցազրույցներ կազմակերպում էինք ի սկզբանե։ Հիմա դրանց միայն ավելացել են այստեղ իրականացվող հարցազրույցները, որոնք հեշտությամբ անցկացնում ենք օնլայն։ Այսինքն, այս առումով գրեթե ոչինչ չի փոխվել և նույն կերպ շարունակում ենք կադրերի հավաքագրումը, նույնիսկ ունենք նոր թափուր աշխատատեղեր։
Այնուամենայնիվ, մինչ այս 100%-անոց հեռահար աշխատանք չենք ունեցել, բայց սա լավ մարտահրավեր էր մեզ համար թիմի հիմքերն ավելի ամրացնելու ու միասին աճելու համար։ Դե իսկ, մենք էլ միշտ պատրաստ ենք մարտահրավերների։
Իսկ, որո՞նք են այն tech գործիքները, որոնց օգնությամբ էլ կազմակերպում եք 100%-անոց հեռահար աշխատանք։
Ինչպես նշեցինք, հեռահար աշխատանք մենք միշտ ենք ունեցել, ուստի այնպիսի գործիքակազմեր, ինչպիսի են՝ Slack-ը, JIRA-ն, GitPrime-ը, G-Suite-ի ամբողջական փաթեթը, և այլն, մեր առօրյա աշխատանքային պրոցեսի մաս են կազմում։ Բացի այդ, մեր բոլոր թիմակիցներն ապահովված են համակարգիչներով, նոթբուքերով ու անհրաժեշտ այլ տեխնիկական սարքավորումներով, որոնք այս ընթացքում իրենց տանն են տեղավորած՝ արդյունավետ աշխատանքն ապահովելու համար։
Ավելին, նախորդ ամիսներին մեր տեխնիկական թիմը սկսել է նոր պլատֆորմ օգտագործել ՝ 15Five՝ իրական ժամանակում օրական թարմացումների ու լրացումների համար։ Այս պահին սա առավել քան կարևոր է, որպեսզի առաջացած խնդիրներին ու նոր մարտահրավերներին հնարավորինս արագ լուծումներ տրվեն։
Մարտահրավերներ․․․ հետաքրքիր է, եկեք փոքր-ինչ խոսենք ձեզ հանդիպած մարտահրավերների և լուծումների շուրջ, որի միջոցով էլ կստանանք DISQO-ի մարդկանց remote աշխատանքի պրոդուկտիվության բանաձևը 🙂
Հեռահար աշխատանքի արդյունավետության համար տեխնիկական ապահովվածությունից պակաս կարևոր չեն աշխատանքային մեթոդաբանություններն ու մոտեցումները։
Օրինակ՝ խիստ կարևոր է դասակարգել առաջադրանքների, հարցումների ու նամակների առաջնահերթությունները։ Օրինակ՝ Eisenhower Matrix-ի մեթոդը բավականին արդյունավետ է աշխատանքը պլանավորելու ու կատարողականությունը բարձրացնելու համար։ Վերջերս էլ մենք անցել ենք OKR-ների (Objectives and Key Results՝ նպատակներ և հիմնական արդյունքներ) համակարգին, ըստ որի էլ որոշվում ու գնահատվում են առաջնահերթությունները։
Թիմային շփումներն ու հաղորդակցությունները մյուս մարտահրավերներից են, որոնց համար ևս մի քանի լուծումներ ենք ընտրել։ Օրինակ՝
1:1 հանդիպումներն ավելի հաճախ ենք իրականացնում, որտեղ քննարկում ենք, թե ինչն է խանգարում արդյունավետ աշխատանքին։
Աշխատանքային ժամերն ավելացնում ենք Google Calendar, որպեսզի իմանանք միմյանց հասանելիությունը համագործակցելու ու քննարկումներ ունենալու համար։ Բացի այդ, սա օգնում է խուսափել գերծանրաբեռնվածությունից։
Նախընտրում ենք անցկացնել վիդեո զանգեր աուդիո զանգերի փոխարեն, քանի որ հետազոտությունները ցույց են տվել, որ դրանք նպաստում են կոլեգաների միջև կապի ամրապնդմանը։ Ի դեպ, մենք ունենք նաև նոր կոլեգաներ, շուտով կխոսենք այդ մասին 🙂
DISQO-ի մարդիկ առանձնանում են նաև իրենց միթափներով, թիմային հանդիպումներով ու սովորույթներով։ Հետաքրքիր է՝ ինչպե՞ս եք լրացնում այդ բացը այս նոր աշխարհում։
Իհարկե, եթե մեզ հետևում եք սոցիալական մեդիայում, նկատած կլինեք, որ մենք շատ թիմային միջոցառումներ ու գրասենյակային զբաղմունքներ ունենք, որոնք աստիճանաբար տեղափոխում ենք օնլայն հարթակ։ Օրինակ՝
Չէինք կարող աշխատել առանց մեր ավանդական սուրճի ընդմիջումների ու զրույցների։ Ուստի սրա պլանավորումն առաջին քայլերից էր՝ օրական երկու անգամ։ Այստեղ ևս կարևոր է կանոններ ունենալն ու դրանց հետևելը։
Ամսական երկու անգամ ունենում ենք «Jalapeño» կոչվող թիմային հանդիպումները, որտեղ տարբեր թիմերի անդամներ ներկայացնում են իրենց ձեռքբերումները կամ նորությունները։ Սա ևս պահպանել ենք և իրականացնում ենք վիդեո զանգերի միջոցով։
Ստեղծել ենք #Surviving_Covid_19 slack ալիք, որտեղ ոչ թե կիսվում ենք նորություններով, այլ կիսվում ենք ամենազավեշտալի նյութերով՝ իրավիճակային լարվածությունը ցրելու համար։
«Հարևանների» հետ շփումը հաջորդ հետաքրքիր հանդիպումներից է։ Մեր գրասենյակը open-space է և, բացի թիմի անդամների հետ շփումներից, հարակից սեղանի շուրջ գտնվող թիմի անդամների հետ ևս մտերմանում ենք ու կարևոր է այդ շփումը շարունակել նաև օնլայն տարբերակով։
Օրինակ՝ մեր front-end ծրագրավորողներից Արշակը և PR մասնագետ Տաթևը հարևաններ են ու հաճախ են միասին երաժշտություն լսում։
Շարունակելով բարի սովորությունը՝ նրանք ստեղծեցին WFH երգացանկ, որով կիսվեցին ոչ միայն թիմում, այլև սոցիալական մեդիայում։ Այսպիսով` գրասենյակային հետաքրքիր աուրան տեղափոխվում է օնլայն հարթակ։
Աշխատակիցների մտավոր ու ֆիզիկական առողջության մասին ևս հոգացել ենք։ Քանի որ գրասենյակում շաբաթական մերսման ժամերը չէինք կարող օնլայն անցկացնել, փոխարենը կազմակերպել ենք օնլայն յոգայի դասընթացներ։
Իսկապես, այդ բացը լրացված է, ու վստահ ենք նաև, որ շատ ուրախ ու արկածային են անցնում ձեր օրերը։
Այո՛, ճիշտ եք նկատել։ Թիմում զավեշտալի challenge է սկսվել՝ DISQOstache: Թիմի անդամները միմյանց մարտահրավեր են նետում ամենազավեշտալի բեղերը կամ մորուքը աճեցնելու կամ սափրելու ու իրենց նկարները հրապարակելու համար։ Եթե այսպես շարունակվի, թիմի որոշ անդամների գուցե սկսենք չճանաչել 🙂
Մյուս ուրախ շարքը՝ երեխաների ու տնային կենդանիների մասին պատմելն էր՝ նրանց որպես կոլեգա դիմելով։
Մի քանի բառով, ի՞նչ առավելություններ տվեց այս աշխատանքային ռեժիմը DISQO թիմին։
Առավելություններից ամենակարևորը միանշանակ ընտանիքի հետ ավելի շատ ժամանակ անցկացնելն է։ Հաճախ մեր վիդեո զանգերին միանում են նաև DISQO ընտանիքի կրտսեր անդամները։ Նրանք «փորձում» են օգնել իրենց ծնողներին 🙂
Իսկ ամենավերջում, մեր բլից հարցը 🙂 Հաճախ եք չէ՞ մտածում․ «Որ նորից գնանք գրասենյակ, առաջին բանը, որ կանենք, դա․․․․․․․»:
Չեմ չափազանցնի, եթե նշեմ, որ մեր գրասենյակի սուրճն ու դրա շուրջ զրույցներն ամենաշատն ենք կարոտել, երևի հենց սա էլ կլինի մեր կարոտն առնելու առաջին քայլը։ Դե իսկ հաջորդիվ՝ մեր գեղեցիկ տեսարանը, գամակը, Play Station-ը, և այլն։ Կարճ ասած՝ առաջինը կանենք այն, ինչը մեր առօրյայի անբաժան մասն էր կազմում ու որոնց շուրջ մենք այնքա՜ն պատմություններ, հումորներ ու չհրապարակվող նկարներ ունենք։
#WorkFromHome VS #OfficeWork
Չնայած մենք ձեզ հետ միասին ծանոթացանք, որ DISQO վիրտուալ գործընկերներն ընդհանրապես չեն տարբերվում իրական գործընկերներից, պարզապես փոխվել են աշխատանքի և շփման իրականացման միջոցները, շատ շուտով միմյանց ու գրասենյակի նկատմամբ կարոտը նորից կմիավորեն DISQO-ի մարդկանց իրական աշխատավայրում։ Սպասենք տեսնելու այդ ֆանտաստիկ ու հուզախառն նկարները staff.am մեդիա աղբյուրներում 🙂 (p.s. DISQO-ում մեզ խոստացել են կիսվել այդ նկարներով ու հումորային պատմություններով):
