Ահա և եկավ ժամանակը վիրտուալ ու խենթ այց կատարելու բոլորիս հայտնի PicsArt ընկերություն։ Միգուցե շատերիս է արդեն բախտ վիճակվել ներկա գտնվել այս ընկերությունում, զգալ ջահելական ու ստեղծարար ոգին մարդկանց մեջ և գրասենյակի ամեն դետալում, տեսնել՝ ինչպես են թիմակիցներն առավոտյան ողջունում միմյանց, կատակում, դրական լիցքեր փոխանցում ու պիկսարտյան յուրօրինակ առօրյա ստեղծում։
Այստեղ են ձուլվում արվեստն ու իրականությունը՝ սկիզբ դնելով նորանոր հնարավորությունների, որոնցից ամեն ամիս աշխարհով մեկ օգտվում է 150 մլն-ից ավելի օգտատեր։
Եվ այս արտակարգ դրության պայմաններում, երբ յուրաքանչյուր ընկերություն ջանք չի խնայում ապահովելու իր աշխատակիցների անվտանգությունն ու առողջ միջավայրը, մենք առիթը բաց չթողեցինք կիսվել PicsArt-ի գլոբալ հեռահար աշխատանքի լավագույն փորձով։
PicsArt-ի հին ու նոր թիմակիցներ, շնորհակալ ենք 🙂
Work From Home` PicsArt-ի արձագանքը Covid19-ին
PicsArt-ը շատ արագ կողմնորոշվեց, և նոր իրավիճակը չբարդացած, այդ ուղղությամբ անմիջապես ձեռնարկվեցին մտածված քայլեր։ Մեր ղեկավարության՝ թե տեղի, թե ԱՄՆ-ի, մտքերի փոխանակման արդյունքում ընկերության ամբողջ անձնակազմը տնից աշխատելու ձևաչափին անցավ սկսած մարտի 5-ի հետմիջօրեից։ Մի քանի օրը բավարար եղավ հասկանալու համար, որ ընկերությունը լիովին պատրաստ է դիմագրավել նոր իրավիճակի պարտադրած դժվարությունները և արդեն մարտի 8-ին հայտարարվեց ևս երկու շաբաթ աշխատանքը տնից շարունակելու որոշման մասին։
Այդ ընթացքում աշխատանքն իր բոլոր մանրամասներով չդրսևորեց նահանջի և ոչ մեկ նշան, ընհակառակը, մեկուսացումը մի տեսակ ներամփոփվելու պատճառ դարձավ և ավելի մեծ թափ ստացավ հատկապես ստեղծագործական աշխատանքը։
Մենք աշխույժ ենք պահում մեր դիմորդների հետ կապը, հարցազրույցները, այս ընթացքում բազմաթիվ առաջարկ նամակներ ենք ուղարկել և աշխատանքի ենք ընդունել նոր մասնագետների։ Մեր նոր աշխատակիցները ստացել են իրենց համակարգիչները, նվերներն ու փուչիկները և իրենց աշխատանքի հետ կապված անհրաժեշտ ցուցումներն ու բացատրություններն էլ ստացել են օնլայն տարբերակով։ Աշխատանքային առաջին շաբաթը նորեկների համար ընթացել է այնպես, ինչպես դա կլիներ գրասենյակում։
Մենք մեզ համար էլ պարզեցինք, որ այն, ինչ արվում էր սովորական պայմաններում, առանց որևե զանցառման կարելի է իրագործել նաև հեռահար տարբերակով։
Եվ, իսկապես, եթե դեռևս չեք հասցրել ծանոթանալ PicsArt-ում առկա 18 նոր աշխատատեղերին, ապա անպայման հետևեք։ Կարիերայի պիկսարտյան աճի հնարավորություններ Software, մոբայլ ծրագրավորողների, տվյալագետների, վեբ դիզայներների, պրոդուկտի դիզայներների, որակի ապահովման և այլ մասնագետների համար։
Համավարակն այսօր ամբողջ աշխարհն է ցնցել իր ծավալով` շրջանակում ներառելով նաև այն երկրները, որտեղ PicsArt-ն ունի գրասենյակներ։ Այս առումով հետաքրքիր է ծանոթանալ ձեր փորձին՝ ի՞նչ քայլեր են ձեռնարկվել և մինչ այժմ ձեռնարկվում բոլոր աշխատակիցների անվտանգության ապահովման, առողջության ապահովագրման և վիրուսով վարակվելու ռիսկի նվազեցման ուղղությամբ։
Մեր ավելի քան 500 աշխատակիցների համար (Հայաստան, ԱՄՆ, Ռուսաստան, Չինաստան, Հնդկաստան, Ճապոնիա) ստեղծված են ապահովության բոլոր պայմանները։ Այս ընթացքում անմիջական շփում պահանջող բոլոր հանդիպումները, ժողովներն ու աշխատանքային քննարկումներն արվում են լսատեսողական տարբեր սարքերի միջոցով, ախտահանվել են մեր բոլոր գրասենյակները, և նույնիսկ ժամանցային հետաքրքրական հարթակներ ենք ստեղծել, որպեսզի մարդկանց աշխատանքը համեմվի հումորով ու ժպիտներով ? Բնականաբար բոլորն ունեն բժշկական ապահովագրություն, բայց մենք հույս ունենք, որ մեր նախաձեռնումները կարգելակեն աղետալի վարակի տարածումը։
Այլ ցուցանիշներ և գործելաոճ անհնարին էր սպասել PicsArt-ից 🙂 Նույնիսկ հավելվածն այս օրերին, կարող ենք ասել, հումանիտար աջակցություն է ամբողջ աշխարհին։ Տանը մնալով՝ կարելի է զարգացնել երևակայությունը, գործի դնել ստեղծագործ միտքն ու լուսանկարներին հաղորդել վառ ու տրամադրություն ստեղծող էֆեկտներ։
Իսկ հեռահար աշխատանքի նման պատրաստված մոտեցումն արդյո՞ք նախապես մշակված էր Ձեր կողմից, թե իրականացվել է իրավիճակից ելնելով։
WFH-ը միշտ մաս է կազմել ընկերության քաղաքականությանը և, բնականաբար, չէր կարող նորություն լինել, բայց այսպիսի լայնամասշտաբ WFH-ի կարիք երբևե չի եղել, հետևաբար իր տեսակով սա թեև նորություն, սակայն ամբողջովին վերահսկելի է։ Մենք ունենք մշակված մոտեցում, որի շնորհիվ մեր աշխատակիցների աշխատանքն այս ընթացում կլինի արդյունավետ՝ միևնույն ժամանակ կառավարելի դարձնելով նրանց կյանք-աշխատանք հավասարակշռությունը։ Ունենք նաև աջակցման խումբ միշտ հասանելի տարատեսակ խնդիրների քննարկման և լուծման համար։
Կնշե՞ք այն tech գործիքները, որոնք այսօր ամենաշատն են կիրառվում ձեր կողմից։
Բնականաբար օգտվում ենք լսատեսողական կապի տարբեր միջոցներից՝ Slack, Hangouts, zoom, Skype, Highfive և թիմային աշխատանքն աշխույժ պահելու համար համարյա ամեն օր միանում, խոսում, կարծիքներ ենք փոխանակում, նույնիսկ training-ներ ենք իրականացնում։
Նոր իրավիճակը ենթադրում է նոր մարտահրավերներ և, իհարկե, նոր լուծումներ։ Կպատմե՞ք այս մասով ձեր փորձի մասին։
Առայժմ հեռահար աշխատանքը 20 օրական է, և իրավիճակը կարող ենք գնահատել` միայն դատելով այս օրերի արդյունքներից։ Առավելություն, միաժամանակ թերություն է այն, որ բոլորն աշխատում են շատ ավելի, քան բնական օրերին։ Արթնանում են «աշխատավայրում» և ժամացույցին նայելու կարիք են զգում, որպեսզի չուշանան մասնակցելու նախատեսված ժողովին կամ քննարկմանը։ Այս օրերին բացակայում են աշխատանքային օրվա սկիզբն ու ավարտը նախանշող շրջանակները, և քանի որ շփումները հասել են իրենց նվազագույն մակարդակին, այդ բացը լրացվում է… աշխատանքով։ Որոշ ժամանակի համար սա նույնիսկ կարող է հաճելի թվալ և ինչ խոսք, նաև արդյունավետ, բայց երկար շարունակվելու դեպքում վստահաբար կունենա իր բացասական ազդեցությունը։ Աշխատանքը կդառնա հոգնեցնող և մարդկային իրական շփման բացակայությունը կթուլացնի նյարդային համակարգը։
Այս պահին աշխատանքներ են տարվում թիմերի ղեկավարների հետ, որպեսզի խմբի հետ շփման ձևաչափը փոփոխվի, օրինակ ՝ մարդկանց հիշեցնենք աշխատանքային օրվա սկզբի, իհարկե, նաև ավարտի մասին։
Մարտի 30-ից սկսած նախատեսում ենք ազատ շփման ժամեր, երբ մարդիկ առիթ կունենան քննարկել նաև ոչ աշխատանքային նյութեր։
Եվ վստահ ենք, որ այդ քննարկումներն անցնում են PicsArt-ին բնորոշ համուհոտով։
Ըստ իս, իրավիճակն ինքնին բավականին արկածային է, ուրեմն հույս ունենանք, որ այս ընթացքն արագ և դրական ավարտ կունենա բոլորի համար 🙂
«Ցանկացած իրավիճակից կարելի է օգուտ քաղել»․ կարծում եմ՝ համաձայն եք այս մոտեցման հետ, իսկ ի՞նչ արդյունք կտա այն ձեր թիմին։
Նոր փորձառություն։ Կարծում եմ սա պատճառ կդառնա, որ մենք «քարտեզագրենք» մեր գործունեության բոլոր ուղղությունների բոլոր մանրամասները, որպեսզի չեզոքացնենք իրական շփման բացակայության հետևանքները և հետագայում էլ որևե key անձի բացակայությունը երբևե չխոչընդոտի սկսված նախագծի ընթացքը։
Գաղտնիք չէ, որ PicsArt-ն աշխատաշուկայում տարբերվում է իրեն հատուկ ոճով, իսկ ինչպիսի՞ն կլինի ձեր գրասենյակային աշխատանքային առաջին օրն այս համավարակից հետո 🙂
Օ~, դա կլինի մեծ ուրախության օր և հաստատ այդ օրը ոչ ոք լիարժեք չի կարողանա կենտրոնանալ իր աշխատանքի վրա։ Բոլորն իրար հարազատացած մարդիկ են, որոնք երկար բացակայությունից հետո, հակառակ հաճախակի օնլայն շփումներին, շատ բան կունենան իրար պատմելու։ Թող գա այդ օրը և մենք կուղարկենք մեր ուրախ լուսանկարը…
Մենք նույնպես լիահույս ենք, որ շատ շուտով պիկսարտյան վիրտուալ իրականությունն իր տեղը կզիջի գրասենյակային առօրյային․ նորից աշխատանքային եռուզեռ կտիրի գրասենյակում, լիքը ժպիտներ, կարոտած թիմային քննարկումներ։
