Ապրիլի 29-ին տեղի ունեցավ «Կոկա-Կոլա Հելլենիկ Արմենիա»-ի և «Մենեջմենթ Միքս» ընկերության «Երիտասարդների զարգացում 2019» ծրագրի առաջին բաց դասը, որին հրավիրված էին մասնակցելու staff.am համահիմնադիր Լուիզա Ավետիսյանը, ՀՀ կրթության և գիտության փոխնախարար Արևիկ Անափիոսյանը, ՀՀ աշխատանքի և սոցիալական հարցերի փոխնախարարներ Գեմաֆին Գասպարյանը և Արման Ուդումյանը, ծրագրի գործընկերներն ու մենթորները:
«Երիտասարդների զարգացում 2019» ծրագիրն իրականացվում է աշխարհի շուրջ 28 երկրներում՝ նպատակ ունենալով զարգացնել երիտասարդների «կյանքի» և «բիզնես» հմտությունները, ինչպես նաև ապահովել սահուն մուտք աշխատաշուկա։
«Հայաստանում ծրագիրն իրականացնում ենք արդեն մեկ տարի շարունակ եւ շատ ուրախ էինք տեսնել, թե մասնակիցների, թե փորձառու մենթորների ակտիվությունը եւ հատկապես այն ոգեւորությունը, որով ծրագիրն ընդունվեց հասարակության կողմից: Խոշոր գործատու լինելով՝ բավական լավ պատկերացում ունենք անձնային եւ մասնագիտական այն հմտությունների մասին, որոնք անհրաժեշտ են աշխատանք գտնելու համար: Մենք գիտակցում ենք, որ ներդնելով երիտասարդների մեջ, մենք ներդրում ենք կատարում ապագայի համար»,- իր ողջույնի խոսքում նշեց Կոկա-Կոլա Հելլենիկ Արմենիա ընկերության գլխավոր տնօրեն Քրիստոֆ Սփեքը։
2018-ին «Երիտասարդների զարգացում» ծրագրին մասնակցել է Երեւանում եւ մարզերում բնակվող ավելի քան 2100 երիտասարդ՝ ձեռք բերելով ինքնազարգացման ու ինքնագնահատման հմտություններ, նախագծերի կառավարման, հաղորդակցական, բանակցային եւ վաճառքի, բիզնես պլանավորման, ինչպես նաեւ ֆինանսական գրագիտության հմտություններ: Այս տարի նախատեսվում է ներգրավել եւս 2500 մասնակից, իսկ մինչեւ 2020-ը՝ կյանքի եւ բիզնես հմտությունների դասընթացներով աջակցել 8000 երիտասարդի:
«Այս ծրագիրը հատկանշական է մասնավորապես նրանով, որ սահմանամերձ շրջանների երիտասարդները ևս ներառված են ծրագրում»,- նշեց «Մենեջմենթ Միքս» ընկերության հիմնադիր Ռաֆֆի Սեմերջյանը։
ՀՀ կրթության և գիտության փոխնախարար Արևիկ Անափիոսյանը իր ելույթում կարևորեց այնպիսի հարթակի ստեղծումը, որը հնարավորություն կընձեռի մի կողմից ուսումնական, նախնական և միջին մասնագիտական կրթական հաստատութուններին, մյուս կողմից գործատուներին հանդիպել և քննարկել կրթական ծրագրերը, որոնք լավագույնս կպատրաստեն մեր ապագա մասնագետներին։
Բաց դասի ընթացքում ներկայացվեցին նաև մասնակիցների և մենթորների հաջողության պատմությունները։
Հայաստանի աշխատանքային շուկայի զարգացման միտումների, հասանելի կրթական ծրագրերի, պահանջված մասնագիտացումների ու հմտությունների մասին համակողմանի ելույթ ունեցավ staff.am համահիմնադիր Լուիզա Ավետիսյանը:
«Մենք անչափ կարևորում ենք աշխատաշուկայի զարգացումը թրեյնինգների, տարբեր նախագծերի և նախաձեռնությունների միջոցով։ Մեր ուշադրության կենտրոնում են բոլոր գործատուների կարիքները, պահանջվող մասնագիտական և փափուկ(soft) հմտությունները, ինչի շնորհիվ էլ ուղղորդում ենք մեր օգտատերերին իրենց կարիերայում սկսած պրոֆեսիոնալ CV-ի կառուցումից մինչև գործատուին ճիշտ ներկայանալը»։
Նշենք, որ «Երիտասարդների զարգացում 2019» նախագիծն իրականացվում է ՀՀ կրթության և գիտության նախարարության և «Կոկա-Կոլա Հելլենիկ Արմենիայի» միջև ստորագրված փոխըմբռնման հուշագրի շրջանակում։ Իսկ ծրագրի գրանցումը, դասընթացների համակարգումը, ինչպես նաև կազմակերպչական բոլոր աշխատանքներն այս տարի իրականացնում և համակարգում է ծրագրի գործընկեր «Մենեջմենթ Միքս» միջազգային բիզնես խորհրդատվական ընկերությունը, որը տեղակայված է Հայաստանում, Լիբանանում ու Կիպրոսում և գործունեություն է ծավալում աշխարհի 25 երկրում:
Ցանկանու՞մ եք մասնակցել ծրագրին, զարգացնել կյանքի և բիզնես հմտությունները, կամ մոտիվացված եք ձեր փորձը կիսել երիտասարդների հետ՝ որպես մենթոր, ապա այցելեք ստորև հղումներով Ձեր մասնակցությունը հաստատելու համար։
