Հայաստանի ազգային պոլիտեխնիկական համալսարան

1263 Ընկերության էջի դիտումներ

10 հետևորդ

0 ակտիվ աշխատանքներ

5 ընդհանուր աշխատանքներ

Հայաստանի ազգային պոլիտեխնիկական համալսարանը հանրապետության միակ ինժեներական համալսարանն է, այն ստեղծվել է 1933-ին՝ Շինարարական և Քիմիատեխնոլոգիական ինստիտուտների միավորմամբ: ՀԱՊՀ-ն իրավահաջորդն է Կ. Մարքսի անվան պոլիտեխնիկական ինստիտուտի (ԵրՊԻ) և Հայաստանի պետական ճարտարագիտական համալսարանի։ Նորաստեղծ ինստիտուտը, ունենալով 2 ֆակուլտետ և 107 ուսանող, կոչված էր հմուտ կադրեր ապահովելու շինարարական հրապարակի վերածված հանրապետության շինարդյունաբերությանը և բուռն զարգացող քիմիական արդյունաբերությանը: Պոլիտեխնիկականը դարձավ երկրի արդյունաբերության մշտական ուղեկիցը, որի հաջողությունները միաժամանակ և փոխադարձաբար պայմանավորված էին ինստիտուտի ընդլայնմամբ և զարգացմամբ:

Աճելով Հայաստանի արդյունաբերության տեմպերին համընթաց՝ 1980-1985թթ. Պոլիտեխնիկը դարձավ Հայաստանի խոշորագույն բարձրագույն ուսումնական հաստատությունը և Խորհրդային Միության առաջատար ինժեներական դպրոցներից մեկը՝ իր շուրջ 25 հազար ուսանողներով և 65-ից ավելի մասնագիտություններով: 1991թ. նոյեմբերի 29-ին Երևանի պոլիտեխնիկական ինստիտուտը վերակազմակերպվեց՝ անվանվելով Հայաստանի պետական ճարտարագիտական համալսարան(ՀՊՃՀ): ՀՀ Կառավարության որոշմամբ 2005թ. համալսարանին վերադարձվեց նրա ավանդական «Պոլիտեխնիկ» անունը: Իսկ 2014թ. նոյեմբերի 13-ին Հայաստանի պետական ճարտարագիտական համալսարանը վերանվանվեց Հայաստանի ազգային պոլիտեխնիկական համալսարան:

ՀԱՊՀ կենտրոնական կրթահամալիրը գտնվում է Երևանում, իսկ մասնաճյուղերը՝ Գյումրիում, Վանաձորում և Կապանում, որոնք իրենց հերթին մարզի գիտական մտքի հզոր կենտրոններ են: Համալսարանին կից գործում են նաև ՀԱՊՀ նախակրթարանը, ավագ դպրոցը և քոլեջը։

Համալսարանն իրականացնում է միջին, բարձրագույն և հետբուհական մասնագիտական կրթության 4 հիմնական կրթական ծրագրեր` միջին մասնագիտական, բակալավրի, մագիստրոսի և ճարտարագետ հետազոտողի որակավորման աստիճանների շնորհմամբ։

Բացի ուսումնական ստորաբաժանումներից, Համալսարանում գործում են մի շարք աջակցող կենտրոններ, մշակութային, մարզական, սոցիալական և ուսանողական սննդի օբյեկտներ։ Համալսարանն ունի Գիտատեխնիկական գրադարան` ավելի քան 1 միլիոն միավոր գրականությամբ, համակարգչային լայն ցանց` ավելի քան 2000 ժամանակակից համակարգիչներով և տեխնոլոգիական կարողությամբ մի շարք լսարաններ։

Պոլիտեխնիկն այսօր ազգային բարձրագույն տեխնիկական կրթության առաջատարներից է և հեղինակություն է վայելում ոչ միայն մեր երկրում, այլև նրա սահմաններից դուրս։ Այն տեխնիկական գիտությունների խոշոր գիտահետազոտական կենտրոն է։ Այստեղ կատարվում են հետազոտություններ բարդ տեխնիկական համակարգերի մաթեմատիկական մոդելավորման, նանոտեխնոլոգիաների, տեղեկատվական տեխնոլոգիաների և ինֆորմատիկայի, մեքենագիտության և նյութագիտության, էներգետիկայի և էլեկտրատեխնիկայի, ռադիոտեխնիկայի և միկրոէլեկտրոնիկայի, քիմիական տեխնոլոգիաների և մեքենաշինության, ավտոմատացման և կառավարման համակարգերի, ինչպես նաև` կիրառական մաթեմատիկայի բնագավառներում։

Համալսարանում ձևավորվել և շարունակում են ձևավորվել ինստիտուտներ, որոնք խորացված են տվյալ կրթության ոլորտում և միտված են ապահովելու ավելի խորքային գիտելիքներ։ Պոլիտեխնիկն ունի համագործակցության շուրջ 200 պայմանագրեր միջազգային գործընկեր համալսարանների և հետազոտական կենտրոնների հետ ամբողջ աշխարհում: Համալսարանում տարեկան իրականացվում են ավելի քան 30 միջազգային գիտահետազոտական և դրամաշնորհային ծրագրեր: Դրանք ֆինանսավորվում են տարբեր միջազգային գործակալությունների և ֆոնդերի կողմից, ինչպիսիք են՝ «Erasmus+»,  ESPAQ, «DOCMEN», «MARUEEB», «InnoCENS» և «eDrone»: ՀԱՊՀ-ի ոչ ակադեմիական ակտիվ գործընկերների շարքում կարելի է առանձնացնել Synopsys, National Instruments, Microsoft, Kaspersky Lab, Autodesk, Magate, Chronimet Mining, Impex High Tech, Schneider Electric, Simens, Beelin, РосАтом, «Տաշիր Գրուպ» և մի շարք այլ առաջատար միջազգային ընկերություններ և հաստատություններ: Համալսարանը, արդեն երկար տարիներ հաջողությամբ մասնակցելով մի շարք գիտահետազոտական (INTAS, USAID, NATO Science, SCOPES, DAAD, FP, МНТЦ և այլն) ծրագրերի, սերտորեն անդամակցում է բազմաթիվ առաջատար արտասահմանյան բուհեր և գիտահետազոտական կենտրոններ միավորող այլ կոնսորցիումների: ՀԱՊՀ-ն խրախուսում է ուսանողների մասնակցությունը փոխանակման ծրագրերում: Համալսարանի ուսանողական համակազմի անքակտելի մասն են կազմում օտարերկրյա ուսանողները: Պոլիտեխնիկում գիտական հետազոտություններն անցկացվում են ինչպես ինստիտուտներում/ֆակուլտետներում, այնպես էլ հետազոտական բազային լաբորատորիաներում։ Գործում են գիտությունների թեկնածուի և դոկտորի գիտական աստիճանների շնորհման 6 մասնագիտացված խորհուրդներ։

Իր գործունեության 90 տարիների ընթացքում Պոլիտեխնիկը երկրին տվել է  ավելի քան 130 հազար շրջանավարտ, որոնք ձևավորել են Հայաստանի Հանրապետության ճարտարագիտական ներուժը, գիտատեխնիկական հանրությունը և արդյունաբերական ղեկավարությունը։

Ոլորտ` Կրթություն
Ընկերության տեսակը` Հիմնադրամ
Հիմնադրման տարեթիվ` 1933

Աշխատակիցների քանակը` 1500-2000

Գտնվելու վայրը: 105 Տերյան փողոց, Երևան, Հայաստանի Հանրապետություն

Վեբ կայք

Տեղադրված աշխատանքներ (0)

Այս պահին տվյալ ընկերությունում չկան թափուր աշխատատեղեր։

Հասցեն անփոփոխ․ ինժեներական խաչմերուկ՝ Պոլիտեխնիկ

www.polytech.am

Արտոնությունների փաթեթ

Օտար լեզվի դասընթացներ
Բժշկական ապահովագրություն
Կորպորատիվ միջոցառումներ
Ուսում/թրենինգ արտերկրում
Օնլայն և տեղական թրեյնինգներ
Բժշկական ապահովագրություն ընտանիքի համար

Կոնտակտներ

105 Տերյան փողոց, Երևան, Հայաստանի Հանրապետություն
+37410563520