Հայաստանի սոցիալական աշխատողների ասոցիացիա
Հայաստանի սոցիալական աշխատողների ասոցիացիան Հայաստանում սոցիալական աշխատողներին միավորող խոշորագույն կազմակերպություն է, որին անդամակցում են 250-ից ավելի անդամներ՝ ակադեմիական և պրակտիկ (պետական և հասարակական կառույցներ) շրջանակներից։
Ասոցիացիայի հիմնական նպատակներն են՝ Հայաստանում սոցիալական աշխատանքի կրթության և պրակտիկայի զարգացումը, սոցիալական աշխատողների և նրանց շահառուների իրավունքների և շահերի պաշտպանությունը, ՀՀ սոցիալական քաղաքականության և սոցիալական պաշտպանության բարեփոխումներին նպաստելը, ինչպես նաև գործող սոցիալական ծառայությունների պրոֆեսիոնալիզացիան։
Հայաստանի սոցիալական աշխատողների ասոցիացիան հիմնադրվել է 2004 թվականին: Ասոցիացիան իր գործունեության ընթացքում սերտորեն համագործակցում է սոցիալական աշխատողների, ինչպես տարածաշրջանում՝ ՌԴ, Վրաստան, Իրան, Արևելյան Եվրոպայի երկրներ և այլն, այնպես էլ դրանից դուրս գտնվող ազգային ասոցիացիաների, ''Սոցիալական աշխատանքի դպրոցների'' ասոցիացիայի, ինչպես նաև տեղական ու արտասահմանյան բուհերի, սոցիալական ծառայություններ տրամադրող կազմակերպությունների և միջազգային կառույցների հետ։ Լինելով, Հայաստանում սոցիալական աշխատողներին համախմբող խոշորագույն կազմակերպությունը, Ասոցիացիան սկսած 2005 թվականից հանդիսանում է սոցիալական աշխատողների միջազգային ընտանիքի մասը՝ լինելով Սոցիալական աշխատողների միջազգային ֆեդերացիայի (ՍԱՄՖ) անդամ, իսկ 2017 թվականից անդամակցում է Սոցիալական բարեկեցության միջազգային խորհրդին (ICSW)։
Հայաստանի սոցիալական աշխատողների ասոցացիան հանդիսանում է «Հայաստանում սոցիալական ներառման և ինքնաբավ կենսապահովման միջոցառումների խթանում» Ծրագիրը իրականացնող մարմինը: Նախատեսվում է, որ Ծրագիրը ընդլայնելու է Արարատի, Արմավիրի, Կոտայքի, Լոռու և Շիրակի մարզերի քաղաքային և գյուղական համայնքներում ավելի քան 11,000 խոցելի անձանց համար սոցիալական աջակցության նպաստներից և ծառայություններից օգտվելու հնարավորությունները, և տրամադրելու է ինքնազբաղվածության աջակցություն: Ծրագրի դրամաշնորհը տրամադրվել է Ճապոնիայի Սոցիալական Զարգացման Հիմնադրամի (Japan Social Development Fund, JSDF) կողմից: Դրամաշնորհային պայմանագիրը ստորագրվել է 2020թ. մայիսի 6-ին (մանրամասների համար):
Ծրագիրը մշակվել է Համաշխարհային բանկի կողմից՝ Աշխատանքի և սոցիալական հարցերի նախարարության համագործակցությամբ և իրականացվելու է «Հայաստանի սոցիալական աշխատողներիասոցացիա» հասարակական կազմակերպության կողմից, որը Հայաստանում սոցիալական աշխատողների ազգային մասնագիտական ներկայացուցչական և շահույթ չհետապնդող կառույց է: Ճապոնիայի Սոցիալական Զարգացման Հիմնադրամը հինադրվել է Ճապոնիայի Կառավարության և Համաշխարհային Բանկի կողմից՝ որպես Համաշխարհային Բանկի սահմանված չափանիշներին համապատասխանող երկրների բնակչության ամենաաղքատ և առավել խոցելի խմբերին ուղղակի օգնություն ցուցաբերելու մեխանիզմ: Հիմնական նպատակն է՝ ամրապնդել նրանց ներուժը, ընդլայնել նրանց կարողությունը և մասնակցությունը հասարակական և տնտեսական կյանքում:
