Գյումրիի Տեղեկատվական Տեխնոլոգիաների Կենտրոն

«Ոչ թե հաց տալ մեկ օր ապրելու համար, այլ սովորեցնել հաց վաստակել կյանքում ապրելու համար»՝ այս կարգախոսն էր առաջնորդում այն նվիրյալ բարերարներին, ում համատեղ ջանքերով 2005թ. հիմնադրվեց «Գյումրիի Տեղեկատվական Տեխնոլոգիաների Կենտրոն» գիտակրթական հիմնադրամը. առաջին քարը դրվեց «Սարկիսյան Մեյսն» ընկերության նախագահ և հիմնադիր Պատրիկ Սարկիսյանի, Հայ Օգնության Ֆոնդի, Ձեռնարկությունների Ինկուբատոր Հիմնադրամի, «Շիրակ Տեխնոլոգիաներ» ՍՊԸ-ի և ազգանվեր ամերիկահայ ու տեղացի բարերարների կողմից` լեցուն հավատով ու հույսով, որ ապագա սերունդն իր աշխատասիրությամբ և նպատակասլացությամբ ավելի է ամրացնելու այդ հիմնաքարը: Աշխատանքները մեկնարկեցին 60 քառ. մետր տարածքում՝ 2 աշխատակցով և 5 համակարգչով: Կենտրոնի գործունեության փաստը հրապարակելուց հետո, տեղի բուհերի ավելի քան 20 շրջանավարտ դիմեց կենտրոնում ուսուցանելու: