Վիզուալ Հայաստան զարգացման հիմնադրամ

Ընդամենը երկու տարվա պատմություն ունեցող «Աշխարհացույց» կրթական ծրագիրը՝ իր նորարարական լուծումներով, ինտերակտիվ և վիզուալ բովանդակությամբ, ժամանակակից շունչ և մոտեցում բերեց հայկական դպրոց՝ միանգամից սիրվելով և դառնալով մեր ուսուցիչների ամենօրյա գործիքը։ Ծրագրի նպատակն է վերափոխել ուսուցումը Հայաստանի դպրոցներում, նպաստել դասամատուցման որակի բարելավմանը, ձևավորել սովորելու և սովորեցնելու նոր մշակույթ, և մենք մեծ ոգևորությամբ հետևում ենք, թե ինչպես է «Աշխարհացույցը» մտնում դպրոցից դպրոց, տարածվում ուսուցչից ուսուչից ու աշակերտից աշակերտ։

Սակայն, ակնհայտ է նաև, որ դպրոցներում տեխնիկական միջոցների սղությունը, իսկ ավելի հաճախ՝ բացակայությունը, հնարավորություն չեն տալիս լիարժեք կիրառել հարթակը․ ուսուցիչները տեխնիկա են հայթայթում և տեղափոխում դպրոցից դպրոց «Աշխահացույց»-ով դասավանդելու համար։ Այս փաստը անտարբեր չթողեց դպրոցներ այցելող Հիմնադրամի տնօրեն Հովհաննես Ղազարյանին և «Մանուկյան Սիմոն» հիմնադրամի նախագահ, բարերար Քրիստին Սիմոնին։ Հենց այս կարիքից ելնելով «Վիզուալ Հայաստան» զարգացման հիմնադրամը մշակեց «Հանրակրթական դպրոցների տեխնիկական վերազինում» մրցութային ծրագիրը, որի հիմնական աջակիցն ու գործընկերը դարձավ «Մանուկյան Սիմոն» հիմնադրամը։

Մեր օրերում դժվար է պատկերացնել մի ոլորտ, ուր չեն ներթափանցել ժամանակակից տեխնոլոգիաները։ Տեխնոլոգիաներն ամենուր են և փոխում են մեր առօրյան։ Մեզ համար սկզբունքային էր, որ «Աշխարհացույց» հարթակը 21-րդ դարի շունչը հասցնի դպրոցներ և բարձրացնի դասապրոցեսի արդյունավետությունը ոչ միայն տեխնոլոգիական լուծումներով, այլև արդի տեխնիկայով։ Մեծ հուզմունք ապրեցինք, երբ «Մանուկյան Սիմոն» հիմնադրամի նախագահ, բարերար Քրիստին Սիմոնն առաջարկեց ձեռք բերել միանգամից 40 սմարթ-էկրան՝ զգալի մասշտաբ ապահովելու համար։ Մեր ուսուցիչներն ու աշակերտներն արժանի են, որպեսզի կրթությունը կազմակերպվի լավագույն պայմաններում և լավագույն գործիքներով՝ լավագույն արդյունքներ գրանցելու համար։ Շնորհավորում ենք հաղթող 40 դպրոցների սաներին և ուսուցիչներին։ Լիահույս ենք, որ այս հաղթանակը կոգեշնչի նրանց ձգտել և հասնել ավելի մեծ նպատակների իրագործմանը։ Սմարթ-էկրաններ վաստակելու «Վիզուալ Հայաստան»-ի ծրագրին Հայաստանի մարզերից և Երևանից դիմել է 60 դպրոց, որոնցից 2-րդ փուլ են անցել 49-ը։ Հաղթող են ճանաչվել 40 դպրոց՝ ներգրավելով 70 ուսուցիչ և 460 աշակերտ։ Այն մասին, թե ինչպես սմարթ-էկրանները հասան հաղթող դպրոցներ դիտեք ստորև։

«Աշխարհացույցը» կրթական հարթակի արդյունավետ կիրառման կարիքներից ելնելով՝ «Վիզուալ Հայաստան» հիմնադրամը որոշեց մշակել ծրագիր, որը կգար լրացնելու դպրոցների տեխնիկական հագեցվածության բացը։ «Վիզուալ Հայաստան» հիմնադրամի թիմը դրա հիմքում մեկ կարևոր սկզբունք դրեց՝ այն պետք է լիներ մրցութային, թափանցիկ ու հասանելի բոլոր դպրոցներին, իսկ դպրոցները սմարթ-էկրանները պետք է վաստակեին սեփական աշխատանքով։ Համահունչ այսօրվա կրթական պահանջներին՝ հանձարարվեց «Իմ բնակավայրը» խորագրով նախագծային աշխատանք․ ընտրությունը պատահական չէր՝ «Աշխարհացույց»-ն իր ճամփորդությունը սկսել էր պատմություն առարկայից՝ վստահ, որ հայրենասիրությունը սկսվում է սեփական պատմությունը, բնակավայրն ու հայրենիքը ճանաչելուց։ Մրցույթը հայտարարվեց, ստացվեց 60 դիմում։ Ծրագրի պահանջները բավարարող երկրորդ փուլ անցած 49 դպրոց ձեռնամուխ եղան նախագծային աշխատանքի իրականացման։ Թիմային աշխատանք, հետազոտելու, վերլուծելու և կարևորը վերհանելու կարողություն՝ ահա հմտություններ, որոնք ձեռք բերեցին դպրոցական թիմերն աշխատանքը կատարելիս։ Ծրագրի ընթացքն ապացուցեց, որ ուսուցիչ-աշակերտ երկխոսությունը, միևնույն նպատակի շուրջ համախմբումը, աշխատասիրությունն ու սեփական ուժերին հավատալը բերում են հաղթանակներ։ Այսօր 40 հանրակրթական դպրոցների 70 ուսուցիչ և 460 աշակերտ հենց այդ հաղթանակի կրողն են։