Covid-19-ի համաշխարհային տարածումն այսօր շատերիս է ստիպում աշխատել տանից՝ որոշակի ժամանակահատվածով փոխելով մեր կյանքի ընթացքը: Իհարկե, բոլորիս քաջ հայտնի է, որ տանից աշխատանքի, կամ ինչպես հաճախ օգտագործում ենք remote working-ի ռեժիմը, անկախ այս պանդեմիայի ժամանակաշրջանից, մեծ տարածում է ստանում օր օրի ամբողջ աշխարհում՝ ապացուցելով իր ձևաչափի արդյունավետությունը, սակայն ոչ բոլորս ենք պատրաստ և տեղեկացված բոլոր այն գործիքներին, որոնց միջոցով կարող ենք տանից աշխատանքը կազմակերպել առավել քան արդյունավետ։
Եվ անկախ այն հանգամանքից, թե ինչ մասնագիտությամբ ենք աշխատում, կան գործիքներ, որոնք առաջնային նշանակություն ունեն մեր աշխատանքի լիարժեք իրականացման համար 🙂 չէ՞ որ նախագծերն ունեն հստակ ժամկետներ ու գծագրված ուղի, որի հարթությունը կախված է մեզնից յուրաքանչյուրից։
Այս առիթով, staff.am-ն առանձնացրել է մի շարք tech գործիքներ ձեր թիմերի, հաճախորդների, գործընկերների հետ արդյունավետ հաղորդակցվելու ու այս արտակարգ դրության օրերին արտակարգ արդյունավետություն ցուցաբերելու համար։
Միգուցե և հավանեք ու շարունակեք օգտագործել նաև ոչ արտասովոր դեպքերում ։)
ՉԱԹԵՐԻ ԵՎ ՏԵՍԱԶԱՆԳԵՐԻ ՀԱՄԱՐ
Slack
Թիմային չաթերի պոպուլյար առաջնորդը Slack-ն է։ Այն ապահովում է անմիջական կապ բոլոր թիմակիցների միջև՝ չեզոքացնելով միմյանցից հեռու աշխատելու զգացողությունը։ Այն հեշտությամբ նաև ինտեգրվում է Google Docs-ի և DropBox-ի հետ։
Skype
Կարծում եմ Skype-ի առավելությունների մասին բոլորս գիտենք։ Չաթի, օնլայն միթինգների և տեսազանգերի համար կարող եք օգտվել նաև Skype-ից կամ բիզնես միթինգներին հարմարեցված Skype Business-ից։
Այս հավելվածը կարող եք օգտագործել ոչ միայն ներքին հաղորդակցության, այլ նաև հաճախորդների հետ կապ ապահովելու համար։ Ակնհայտ է, որ բիզնեսը և աշխատանքը կարող են առաջընթաց ունենալ, եթե հաղորդակցությունը կատարվում է իրական ժամանակում։
Zoom
Տեսազանգերի և ձայնային զանգերի համար Zoom-ը կարող է լինել ձեր լավագույն ընտրությունը։ Բազային հնարավորություններով այն թույլ է տալիս օգտվել անվճար։ Կարող եք նաև ձայնագրել զանգերը ավելի ուշ լսելու համար։
Krisp
Լավագույն ժամանակն է նաև ծանոթանալու և օգտվելու մեր հայրենական պրոդուկտից՝ Krisp հավելվածից։ Աղմկոտ միջավայրից զանգեր կատարելն այլևս հոգ չէ, կարող եք աղմուկը խլացնել Krisp հավելվածի միջոցով։ Յուրաքանչյուր շաբաթ 60 րոպե անվճար օգտագործելու հնարավորություն, իսկ IOS օգտատերերի համար՝ շաբաթական 240 րոպե անվճար։
ՀԱՄԱԳՈՐԾԱԿՑՈՒԹՅԱՆ ԵՎ ՊՐՈԴՈՒԿՏԻՎՈՒԹՅԱՆ ՀԱՄԱՐ
G Suite
Google AI-ի կողմից առաջարկվող գործիքների հավաքածու՝ Gmail, Drive, Docs, Calendar…, որոնք ապահովում են ձեր նամակագրության, օնլայն հանդիպումների նշանակման, փաստաթղթերի, ֆայլերի պահպանման և փոխանցման արագությունը և, իհարկե, անվտանգությունը: Թերևս ամենակիրառելիներից 🙂
Office 365
Outlook, OneDrive, Word, Excel, PowerPoint․ ահա և այն ծրագրերի խումբը, որոնք կերաշխավորեն ձեր աշխատանքի արդյունավետությունը։
ՖԱՅԼԵՐԻ ՊԱՀՊԱՆՄԱՆ ԵՎ ՓՈԽԱՆՑՄԱՆ ՀԱՄԱՐ
Google Drive
Կարծում եմ շատերս ենք օգտագործում այս գործիքը մեր ամենօրյա աշխատանքում։ Ամեն դեպքում նշեմ, Google-ում ստեղծված Ձեր հաշվի միջոցով օնլայն դարձրեք ձեր բոլոր ֆայլերը, պահպանեք Drive-ում և ֆայլերով կիսվեք ձեր թիմակիցների հետ իրական ժամանակում։
DropBox
DropBox-ը նույնպես Cloud-ի վրա ֆայլերի պահպանման այլընտրանք կարող է լինել հատկապես դիզայներների և tech թիմի համար։
ՆԱԽԱԳԾԵՐԻ ԵՎ ԹԻՄԻ ԿԱՌԱՎԱՐՄԱՆ ՀԱՄԱՐ
Asana
Աշխատանքի բաշխման, ընթացքին հետևելու ու արդյունքների դիտարկման համար Asana-ն հզոր գործիք է։ Շատ ճկուն է իր հնարավորություններով, կարող եք փորձել հիմա։
Trello
Այս գործիքը աչքի է ընկնում իր պարզությամբ։ Յուրաքանչյուր նախագծի համար կարող եք ստեղծել board-եր, իսկ թասկերը խմբավորել քարտային կառուցվածքով։
HubStaff
Թիմի կողմից յուրաքանչյուր նախագծի վրա ծախսված ժամանակը և կատարված աշխատանքը մշտադիտարկելու համար առաջարկում ենք օգտվել HubStaff հարթակից։
REMOTE DESKTOP-Ի ՀԱՄԱՐ
TEAMVIEWER
Իսկ վերջում, անպայման խոսենք նաև Teamviewer-ի առավելությունների մասին։ Ձեր համակարգչում ինչ-որ ծրագիր ներբեռնելու, ակտիվացնելու և այլ հարցերի դեպքում, ձեր թիմը կարող է մշտապես լինել ձեր կողքին՝ հեռահար հասանելիություն ունենալով ձեր desktop-ին։
Դե ինչ, բոլորիս առողջ, արդյունավետ աշխատանքային օրեր ու դրական լիցքեր։
