Երբեմն որևէ գործ կամ առաջադրանք անելու մեր ցանկությունը և ձգտումը շատ մեծ են։ Սակայն պատահում է նաև, որ գործն առաջ չի գնում, և ուղղակի չի ստացվում որևէ կերպ կենտրոնանալ, մոտիվացվել և ավարտին հասցնել այն։ Ահա մի քանի խորհուրդներ, թե ինչպես կարելի է հեշտորեն մոտիվացվել և արդյունավետ կերպով կատարել քո առջև դրված աշխատանքը։
1. ՈՒՂՂԱԿԻ ՍԿՍԻՐ ԳՈՐԾԴ ԱՌԱՆՑ ՄՈՏԻՎԱՑԻԱՅԻՆ ՍՊԱՍԵԼՈՒ
Ստիպված մի եղիր սպասել, թե երբ ես մոտիվացվելու քանի որ այդպես դու ժամանակ ես կորցնում, ուղղակի սկսիր աշխատանքդ: Եթե ցանկանում ես որևէ արդյունքի հասնել, ապա պետք է առանց դադարի աշխատել։ Հետաքրքիրն այն է, որ փոքր ինչ աշխատելուց հետո կզգաս, թե որքան գործ ես արել, և ինքդ քեզ կմոտիվացնես արագ ավարտին հասցնել այն։
2․ ՄՈՏԻՎԱՑՎԻՐ ՇՐՋԱՊԱՏԻԴ ՄԻՋՈՑՈՎ
Եթե էքստրովերտ ես, այս տարբերակը հենց քեզ համար է։ Անընդհատ շփման մեջ լինելով դու տեղեկանում ես, թե ինչպես են աշխատում քո ընկերները, ծանոթները, և թե ինչ արդյունքների են հասնում նրանք։ Տեսնելը, թե ինչպես են շրջապատիդ մարդիկ աշխատում՝ քեզ կմոտիվացնի ամեն ինչ մի կողմ դնելու և կենտրոնանալու աշխատելու և լավ արդյունքի հասնելու վրա, որպեսզի ինքդ էլ ինքնավստահ լինես, որ ինչպես մնացածը, դու էլ օրդ ապարդյուն չես անցկացրել։
3․ ԾԱՆՈԹԱՑԻՐ ՀԱՅՏՆԻ ՄԱՐԴԿԱՆՑ ՀԱՋՈՂՈՒԹՅԱՆ ՊԱՏՄՈՒԹՅՈՒՆՆԵՐԻՆ
Գաղտնիք չէ որ հայտնի մարդկանց մեծ մասը իր կարիերան մեծ դժվարությամբ է ստեղծել, այդ իսկ պատճառով, եթե թերագնահատում ես աշխատանքը կատարելու քո հնարավորությունները, ապա հայտնիների հաջողության պատմությունները կօգնեն քեզ հասկանալ, որ նպատակիդ հասնելու համար անհրաժեշտ ամեն ինչ դու ունես, որոնք ավելին են քան ուղղակի նստելն ու սպասելը թե երբ ես մոտիվացվելու։
4. ՊԱՐԳԵՎԱՏՐԻՐ ՔԵԶ ԳՈՐԾԴ ԿԱՏԱՐԵԼՈՒՑ ՀԵՏՈ
Ընդհանրապես կարևոր չէ, թե ինչպես կպարգևատրես ինքդ քեզ։ Այն կարող է լինել որևէ համեղ ուտելիք, հյութ, կամ ուղղակի զբոսանք։ Կարևորն այն է, որ ընտրածդ նվերը մոտիվացնի քեզ անընդհատ աշխատելու, որպեսզի գործի ավարտից հետո վայելես այն։
5․ ԿԱՆԱՉ ԳՈՒՅՆԸ
Գիտնականները հայտնաբերել են, որ կանաչ գույնը մոտիվացիայի խթան է համարվում։ Իզուր չէ որ շատ աշխատավայրերում կանաչ գույնը գերակշռում է։ Շրջապատիր քեզ կանաչով։ Եթե բակում ծառեր կան, դուրս արի զբոսանքի։ Ծաղիկներ, ծառեր, կամ խոտեր, ամենևին էլ կարևոր չէ, ուղղակի վայելիր կանաչը, քանի որ այն կօգնի քեզ հոգնածության զգացում չունենալ և անընդհատ մտածել աճի ու զարգացման մասին։
Փորձիր տարբերակներից մեկը և կտեսնես, թե ինչպես ես մոտիվացվում։ Վստահ եղիր, որ աշխատանքդ քեզ դրա համար շնորհակալություն կհայտնի։
Հաջողության հասնելու համար չկա շարժասանդուղք կամ վերելակ, պետք է օգտվել աստիճաններից:
