2021 թվականն առանձնահատուկ է բոլորիս համար, այս տարի լրանում է Թումո յի 10-ամյակը: Թումոն 10 տարի շարունակ կրթել, դաստիարակել է մի ողջ սերունդ, բացահայտել մի ողջ սերնդի ներուժ, հմտացրել նրանց ամենաբազմազան ոլորտներում:
Այս տարիների ընթացքում Թումոն ստեղծել է հիանալի աշխատանքային միջավայր իր աշխատակիցների համար, խրախուսել իր աշխատակիցներին լինել նորարար ու ստեղծագործ, Թումոյում այս պահին աշխատող շուրջ երեք հարյուր աշխատակիցներից յուրաքանչյուրն առանձնանում է իր ինքնատիպությամբ:
Այժմ եկեք հասկանանք, թե ինչու են Թումոյի աշխատակիցներն այդքան շատ սիրում Թումոն 🙂
ՊԱՏՃԱՌ 1. ԹՈՒՄՈՆ ՀՆԱՐԱՎՈՐՈՒԹՅՈՒՆ Է ՏԱԼԻՍ ՄԱՍՆԱԿՑԵԼՈՒ ՏԵՂԱԿԱՆ ԵՎ ՄԻՋԱԶԳԱՅԻՆ ԿԱՐԵՎՈՐԱԳՈՒՅՆ ԻՐԱԴԱՐՁՈՒԹՅՈՒՆՆԵՐԻՆ
Երևի քչերը գիտեն, որ Թումոյում հարուստ փորձով ճարտարապետ-շինարարներ են աշխատում: Նրանց ներդրումը Թումոյի կայացման գործում շատ մեծ է։ Թումոյի ճարտարապետ-շինարարներն աշխատակիցների ու երեխաների համար ստեղծել են հարմարավետ պայմաններ և ոչ միայն: Այս տարի Թումոյի թիմը մասնակցեց Վենետիկի ճարտարապետական 17-րդ բիեննալեին: Իսկ թե ինչ միջոցառում է այն, մեզ կպատմի Թումոյի ճարտարապետ Ալեքսը՝ Թումոյի ներկայացուցիչը Բիեննալեում.
Ինձ համար մեծ պատիվ էր մասնակցել Վենետիկի ճարտարապետական բիեննալեին և իմ ներդրումն ունենանալ Վենետիկի Արսենալե քաղաքում Թումոյի ինստալյացիայի գործընթացին: Վենետիկի ճարտարապետության բիեննալեն համարվում է աշխարհի ամենահայտնի ճարտարապետական ցուցահանդեսներից մեկը: Աշխարհի ամենաթույն արտիստները, ճարտարապետական ստուդիաներն ու հետազոտողները հավաքվում են Վենետիկի Բիեննալեում` խոսելու, քննարկելու և ցուցադրելու մարդկանց համագոյակցությունը մոտ և հեռու ապագայում: Ես մեկնեցի Վենետիկ` համակարգելու և կառավարելու շինարարությունը, որտեղ էլ աշխատեցի իտալացի գործընկերների հետ նախագիծը ժամանակին ավարտին հասցնելու համար: Աշխատել իտալացի գործընկերների հետ, փորձ փոխանակել, սա մի հիանալի հնարավորություն էր ինձ համար: Ցուցահանդեսի թեման էր «Ինչպե՞ս ենք միասին ապրելու», որն առավել ակտուալ դարձավ համավարակի պայմաններում:
ԱԼԵՔՍ ՆԳ
Ահա Ալեքսի տպավորությունները Վենետիկից, Թումոն իր աշխատակիցներին միշտ ընձեռում է նման հնարավորություն մասնակցելու միջազգային ցուցահանդեսների, մրցույթների, կարևոր իրադարձությունների:
ՊԱՏՃԱՌ 2․ ԹՈՒՄՈՅԻ ԿՐԹԱԿԱՆ ԾՐԱԳԻՐԸ ՀԱՍԱՆԵԼԻ ԴԱՐՁՆԵԼ ՅՈՒՐԱՔԱՆՉՅՈՒՐԻՆ
Կրթությունը հասանելի դարձնել յուրաքանչյուր երեխայի համար. սա Թումոյի առաքելություններից մեկն է: Այդ նպատակով Թումոն ստեղծեց Թումո տուփերը։
Թումո տուփերը շարժական և տեխնիկապես հագեցած մինի կենտրոններ են` տեղակայված գյուղերում կամ քաղաքներում, որտեղ չկան Թումո կենտրոններ:
Այժմ տուփերից մեկը գտնվում է Գավառում, իսկ մյուսը՝ Բերդ քաղաքում: Գագիկը և Նարեկը`մեր Գավառի ու Բերդի աշխատակիցները կիսվել են իրենց տպավորություններով և նշել, թե ինչու են այդքան սիրում Թումոն:
Սկզբում կարծես թվում էր, թե շատ դժվար է լինելու Թումո տուփում աշխատանքը, բայց հետզհետե այն վերածվեց շատ հավես ու հետաքրքիր աշխատանքի: Թումո տուփերը երեխաների համար նոր հնարավորություններ են ստեղծում, սա մի հրաշալի հնարավորություն է նրանց համար կրթվելու, նոր բաներ սովորելու, բացահայտելու իրենց ներուժը: Թումո տուփի շնորհիվ շատ խելացի ու պայծառ ուսանողներ են հայտնաբերվել, որոնք կերտելու են մեր ապագան: Թումոյում աշխատանքը շատ մեծ ազդեցություն է ունեցել նաև իմ մասնագիտական աճի վրա, ես մասնագիտությամբ ծրագրավորող եմ, բայց Թումոյի շնորհիվ հմտացել եմ տարբեր ոլորտներում: Այս աճը կարելի է տեսնել նաև ուսանողների վրա: Ահա թե ինչու եմ ես այդքան սիրում Թումոն, ոչ միայն ես եմ զարգանում, աճում, այլ նաև իմ լուման եմ ունենում մեր ապագա սերնդի կրթության մեջ:
ԳԱԳԻԿ ՂԱՐԱԲԱՂՑՅԱՆ
Նարեկը`Բերդի Թումո կենտրոնի աշխատակիցը, խոսեց տուփի հարմարավետության և ուսանողների վրա ունեցած ազդեցության մասին:
Ուսանողները կարող են հեշտությամբ գալ և գնալ, ինչը նրանց համար ավելի է հեշտացնում կենտրոնանալ իրենց ուսման վրա: Քանի որ ես հենց սկզբից եմ սկսել աշխատել Թումո տուփում, ես տեսնում եմ այդ տարբերությունն ու աճը ուսանողների մոտ: Երեխաները, ովքեր նույնիսկ համակարգչից օգտվել չգիտեին, հիմա իրականացնում են իրենց երազանքները: Շատ կարճ ժամանակում մեծ թվով ուսանողներ են անդամագրվել, և ավելին ՝ դեռ շարունակում են գրանցվել ու սպասել իրենց հերթին, և այս ամենը ցույց է տալիս երեխաների մեջ Թումոյի թողած ոգևորությունն ու դրական էներգիան:
ՆԱՐԵԿ ԶԱՐԳԱՐՅԱՆ
ՊԱՏՃԱՌ 3. ԱՇԽԱՏԵԼ ՄԻ ՊՐՈԴՈՒԿՏԻ ՎՐԱ, ՈՐՆ ՕԳՏԱԳՈՐԾՈՒՄ ԵՆ ԱՎԵԼԻ ՔԱՆ 9 ԵՐԿՐԻ ՀԱԶԱՐԱՎՈՐ ԵՐԵԽԱՆԵՐ
Թումոն ունի իր ծրագրավորողների մեծ թիմը, ովքեր ստեղծել են ու շարունակում են ստեղծել տարբեր պրոդուկտներ, որոնք օգնում են աշխատակիցներին և ուսանողներին կազմակերպել ուսուցման գործընթացը:
- Active Manager – Ժամանակակից CMS համակարգ, որն օգնում է բովանդակություն ստեղծել Թումոյի ուսանողների ինքնուսուցման գործընթացի համար:
- Թումո պորտֆոլիո – ծրագիր, որտեղ պահվում են ուսանողների աշխատանքները, որոնք նրանք կատարել են Թումոյում ողջ ուսումնառության ժամանակ:
- Թումո շավիղ – հավելված, որը նախատեսված է Թումոյի ուսանողների համար՝ իրենց առաջընթացը կառավարելու, ինքնուրույն ուսանելու և սեփական ուղին զարգացնելու համար: Թումո շավիղը բաղկացած է ուսանողների դասընթացներից և վարժանքներից, որոնք նրանք ուսումնասիրում են իրենց ողջ ուսումնառության ընթացքում: Թումո շավիղը վեբ հավելված է, որն օգտագործում է JavaScript frontend-ում, իսկ Backend-ը գրված է PHP Yii 2 framework-ով:
Թումո շավիղն այժմ օգտագործում են 9 երկրներում`Ֆրանսիայում, Գերմանիայում, Ռուսաստանում, Ալբանիայում, Ուկրաինայում և այլուր։
Մարկը՝ ծրագրավորողների թիմից, պատմեց մի քանի մանրամասներ պրոդուկտի մասին, ինչպես նաև կիսվեց իր փորձով:
Մարկը եղել է Թումոյի ուսանող, մենք նրան հարցրեցինք իր բացառիկ փորձի և ուսանողից աշխատակից դառնալու զգացողությունների մասին․
Շատ տպավորիչ էր, քանի որ ես որպես ուսանող եմ օգտագործել Թումո շավիղը և դրանում հետագայում որպես աշխատակից փոփոխություններ և թարմացումներ կատարելը հիանալի փորձ և հնարավորություն էր: Ես շատ հպարտ էի զգում, որ ունեի մեր ուսանողների համար արտադրանքը բարելավելու կարողություն և պատասխանատվություն: Երբեմն, ես կատարում էի փոփոխություններ, որոնք միշտ ցանկանում էի ունենալ որպես ուսանող, և դա շատ տպավորիչ էր: Իրոք զարմանալի ու հիանալի փորձ և հնարավորություն է մասնակցելու այն պրոդուկտի ստեղծմանը, որը մեծ ազդեցություն է ունենալու հազարավոր երեխաների ուսուցման գործընթացի վրա: Հաճելի է աշխատել այս պրոֆեսիոնալ, ընկերական թիմում, ահա այդ իսկ պատճառով էլ շատ եմ սիրում Թումոն և իմ աշխատանքը:
ՄԱՐԿ ԱՄԻՐԱՂՅԱՆ
ՊԱՏՃԱՌ 4. 10 ՏԱՐԻ, ՄԻ ՈՂՋ ԿՅԱՆՔ ԹՈՒՄՈՅՈՒՄ
Թումոյի ամենամեծ բաժինը և թիմը դասընթացների բաժինն է, որտեղ աշխատում է մոտ 80 դասընթացավար 14 ոլորտներից: Նրանք ոլորտի պրոֆեսիոնալներ են, մեզ իր հաջողությունների ու անցած ուղու մասին պատմեց ստեղծագործության դասընթացավար Վիոլետը, ով արդեն 10 տարի է աշխատում է Թումոյում․
Արդեն 10 տարի է, ինչ ես աշխատում եմ Թումոյում, բայց 10-ն ընդամենը պաշտոնական գրանցմանս թիվն է։ Մինչ այդ էլ մասնակցում էի տարբեր քննարկումների՝ սկսած անուն ընտրելուց մինչև բովանդակություն ու դրա լեզվի վճարովի, թե անվճար լինելու և այլ բազմաթիվ թեմաները։
Ես տարիներով մենակ եմ աշխատել ստեղծագրության ոլորտում, ստեղծել եմ այդ ոլորտի ողջ բովանդակությունը՝ հընթացս ուսումնասիրելով ու սովորելով տարբեր աղբյուրներից։ Մինչև Թումոն ես էլի եմ ստեղծագրության աշխատարան վարել «Ուտոպիանա» ծրագրով, բայց դա մեկանգամյա մի փոքր դրվագ էր, իսկ ահա Թումոյի շնորհիվ հիմնվեց ու պարբերական պրակտիկա դարձավ գրական հմտությունների ու գիտելիքների դասավանդման մի փորձ, որ առհասարակ չկար Հայաստանում։
Այս դասընթացի շնորհիվ ես ինքս շատ բան եմ սովորել՝ գրողական իմ անձնական փորձին գումարելով տեսական գիտելիքներ։ Իսկ դասավանդման տարիների ընթացքում էլ, ելնելով մանկավարժական փորձից, որ ձեռք էի բերում դասերի շնորհիվ, պարբերաբար փոփոխել ու զարգացրել եմ բովանդակությունը՝ նկատի առնելով ուսանողների աշխատանքների վերլուծությունից ստացվող եզրակացությունները, որոնք բացահայտում էին հայաստանյան կրթության պայմաններում անհրաժեշտ տեսական ու գործնական գիտելիքների շրջանակը։
Հետագայում, երբ արդեն գործընկերներ ունեցա իմ ոլորտի համար, մենք խմբով ենք քննարկում անելիքները՝ մեր ընդհանուր կուտակած փորձը վերլուծելով։
Տարիների ընթացքում ես նաև բախտ եմ ունեցել մասնակցելու տարբեր հատուկ դասընթացների աշխատանքներին՝ մեկ որպես պարսկերենի թարգմանիչ, մեկ որպես պատմություն կառուցելու հմտություններ ուսուցանող և այլն, և այդ աշխատանքների ընթացքում տեսել եմ, թե ինչպես է բանաստեղծությունը վերածվում ինստալյացիայի, պատմությունը դառնում կոմիքս, լուսանկարը տեքստի շնորհիվ ստանում հավելյալ շերտ ու խորք։
Այսպես՝ տարիներ շարունակ ես Թումոյում ունեցել եմ ստեղծագործական բացառիկ նախագծերի մասնակցելու հնարավորություն։ Ու այդ տարիների ընթացքում ես ունեցել եմ տարբեր գործընկերներ, որ եկել ու գնացել են՝ հաճախ Թումոն ունենալով որպես կարիերայի նպաստավոր հարթակ։ Ոմանք հենց Թումոյի ներսում են արել այդ կարիերան, մյուսները շարունակել են դրսում՝ հենվելով Թումոյում ստացած փորձի վրա։
Ու հիմա ամեն անգամ, երբ ես ավտոբուս ու երթուղային եմ նստում, որի վրա կարդում եմ Թումոյի գույներով գրված «Թումո» բառը, ես գիտեմ, որ դա իմ հասցեն է:
ՎԻՈԼԵՏ ԳՐԻԳՈՐՅԱՆ
ՊԱՏՃԱՌ 5. ԲԱՑԱՌԻԿ ՀՆԱՐԱՎՈՐՈՒԹՅՈՒՆ ԿԱՐԻԵՐԱՅԻ ԱՃ ՈՒՆԵՆԱԼՈՒ ԹՈՒՄՈՅՈՒՄ
Թումոն համագործակցում է հայաստանյան և արտերկրի բարձրագույն ուսումնական հաստատությունների հետ, հնարավորություն է տալիս ուսանողներին կատարել կամավորական աշխատանք, որոնցից շատերը հետագայում դառնում են Թումոյի աշխատակիցները։
Բացառիկ, աշխարհում իր կրթական մոդելի արդյունավետությունն ապացուցած Թումո կենտրոնը սիրելու պատճառներն ավելին են, քան այսօր մենք ձեզ հետ կիսվեցինք։ Վայր, որն առօրյա հաստատուն քայլերով հիմք է ստեղծում նոր տաղանդների ձևավորման և զարգացման համար, կառուցում է մեր վաղվա օրը տեխնոլոգիական ժամանակաշրջանին խիստ համընթաց։
Շնորհակալություն ենք հայտնում Թումոյի աշխատակիցներին այս կրթական մեծ գործում իրենց մեծ բաժինն ունենալու համար։
