Ֆինանսական և առողջապահական ոլորտում ծրագրային ապահովման լուծումներ մշակող AOByte ընկերության մասին արդեն հասցրել ենք պատմել staffmedia.am-ում (կարդալ այստեղ)։ Մեր գործընկերն իր 7-ամյա ակտիվ գործունեության ընթացքում հետաքրքիր ու արկածներով լի ճանապարհ է անցել, ձևավորել է ջերմ ու պրոֆեսիոնալ թիմ, գործընկերների մեծ բանակ ու հպարտանալու շաա՜տ առիթներ։
Read the article in English.
Դե իսկ մենք, ամփոփելով տարին, այս հոդվածում կիսվել ենք 7 ուշագրավ փաստով AOByte-ի մասին։
Փաստ #1
AOByte-ն այս տարի դարձավ 7 տարեկան։ Երբ կազմակերպությունը հիմնադրվեց 2016 թ.-ին, այն ուներ մի քանի թիմակից, իսկ հիմա թիմը մեծացել է շուրջ 10 անգամ։ Ի դեպ, ամենահին թիմակիցը AOByte-ում է արդեն յոթ տարի՝ հիմնադրման առաջին իսկ օրվանից։ Իր գործունեության յոթ տարիների ընթացքում AOByte-ն ավելի քան 20 մեծամասշտաբ նախագիծ է իրականացրել՝ ստեղծելով փոխադարձ վստահելի և հավատարիմ համագործակցություններ։
Փաստ #2
Կազմակերպության անունը որոշելիս միտում են ունեցել ստանալու որևէ գույնի և Byte բառի համակցություն՝ միևնույն ժամանակ պահելով անվան յուրօրինակությունը։ AO-ն ճապոներենով արտահայտում է կապտականաչ գույնը, ինչն էլ հենց ընկած է AOByte-ի բրենդային գույների հիմքում։ Օրինակ, Ճապոնիայում լուսացույցի կանաչ գույնը կոչվում է “ao shingō” (青信号), իսկ կապույտ երկինքը նկարագրելիս օգտագործում են “aozora” (青空) բառը։ Հետաքրքիր է, որ Հեյանի շրջանում կանաչ գույնը նկարագրելու համար օգտագործվել է նաև “midori” (緑) բառը “AO”-ի հետ մեկտեղ, իսկ միայն Երկրորդ համաշխարհային պատերազմից հետո է, որ կրթական նյութերում տարանջատվում են կապույտ և կանաչ բառերը։
Փաստ #3
AOByte-ն իր գործունեության յոթ տարիների ընթացքում գործընկերների հետ ձևավորել է երկարատև համագործակցություններ։ AOByte-ն ունի գործընկերներ, որոնց հետ աշխատում է կազմակերպության ստեղծման պահից ի վեր՝ անընդհատ բարելավելով պրոդուկտները և ավելացնելով դրանց ֆունկցիոնալը։ Ստեղծելով ֆինանսական և առողջապահական մեծ համակարգեր՝ օգնում է իր գործընկերներին հաջողություններ գրանցել թվային վերափոխման միջոցով։ Տարիների ընթացքում գործընկերների հետ ձևավորած երկարատև համագործակցությունները փոխադարձ վստահության խոսուն դրսևորումն են։
Փաստ #4
AOByte-ում հպարտանալու շատ պատճառներ ունեն, բայց դրանցից թերևս ամենակարևորը թիմակիցների համընդհանուր ձգտումն է բարձր պահելու կոդի որակը։ Թիմում բոլորը համակարծիք են, որ բացառիկ կոդի որակ ունենալը չափազանց կարևոր է և որ դրանով է պայմանավորվում նրանց աշխատանքի, նախագծերի և, ընդհանուր առմամբ, կազմակերպության հաջողությունը։ Թիմակիցների կողմից ցանկացած կոդ վերանայում է անցնում (Code Reviews), ինչի արդյունքում ոչ միայն բարելավվում է կոդը, այլ նաև թիմակիցներն ունենում են հմտանալու հավելյալ հնարավորություն։
Փաստ #5
3 տարի, 1853 դիմորդ, և թիմին միացած 8 ինթերն։ Ինթերնշիփը կազմակերպության հաջողված նախագծերից մեկն է, որը կազմակերպությունում ձևավորել է սովորելու, աճելու և նոր թիմակիցներ ինտեգրելու ինքնատիպ մշակույթ։ Այն ոչ միայն հնարավորություն է տալիս օգնելու ոլորտում սկսնակ մասնագետներին ընդլայնելու գիտելիքներն ու ձեռք բերելու պրակտիկ փորձ, այլ նաև լավագույնս դրսևորվելու արդյունքում դառնալու թիմի մաս։ Արդյունքում, վերջին երեք տարիներին ութ ինթերն միացել է AOByte-ին։
Փաստ #6
Աշխատանքը՝ աշխատանք, ընկերությունը՝ ընկերություն։ Կազմակերպությունում ձևավորվող ընկերությունը դուրս է գալիս գրասենյակի պատերից, ինչի արտացոլումն են ընկերական հանդիպումները և ճամփորդությունները Հայաստանում և երկրից դուրս։ Մնայուն ընկերներ ձեռք բերելը նկարագրում է այն միջավայրը, որը բոլորը ստեղծել են կազմակերպությունում։
Փաստ #7
Պատկերացնու՞մ եք, յոթ տարիների ընթացքում, AOByte-ում թիմակիցները միմյանց ասել են «բարև» շուրջ 1,089,200 անգամ։ ։)
Դա մոտավորապես 155,600 «բարև» է յուրաքանչյուր տարում, ինչն արտացոլում է կազմակերպությունում դրական աշխատանքային և ընկերական հարաբերություններն ու մթնոլորտը։
Դե ի՞նչ, չչարաշահելով ձեր համբերությունը, տեղեկացնենք, որ կարող եք հետևել AOByte-ի կարիերայի էջին staff.am-ում, որպեսզի բաց չթողնեք ընկերության թարմացումները։ Եվ ո՞վ իմանա, միգուցե գալիք տարում կազմակերպության ներսում հնչած միլիոնավոր «բարև»-ների մի մասը հնչի հենց ձեր ձայնով։
