Դարձի՛ր նորօրյա մաքսային ծառայող․ ՊԵԿ-ի նոր դասընթացները՝ մասնագիտական ապագայի և աշխատանքային հեռանկարի հնարավորություն

1469

Պետական եկամուտների կոմիտեն (ՊԵԿ) սկսում է նոր չափանիշներով մաքսային ծառայողներ պատրաստելու աննախադեպ դասընթացների շարք, որը հնարավորություն կընձեռի հավականոտ և նպատակասլաց մասնագետներին կառուցելու կայուն ապագա և ապահովելու կարիերային աճ:

Staff.am-ը ներկայացնում է մաքսային ծառայողի մասնագիտություն ձեռք բերելու մանրամասները և ուղղորդում՝ ինչ անել, ինչպես դիմել՝ ՊԵԿ համակարգի մասը դառնալու հնարավորություն ձեռք բերելու համար։

Մաքսային ծառայությունը՝ նոր կերպարով և նորարարական լուծումներով

ՊԵԿ-ը թևակոխել է մաքսային ծառայության ոլորտում բարեփոխումների նոր փուլ։ Լինելով կայացած պետական ինստիտուտ՝ ՊԵԿ-ը պատրաստ է ժամանակին համընթաց քայլել և, միավորելով տարիների կուտակված փորձը, լավագույն ավանդույթներն ու նոր միտումները, իր դռները բացել կայացման ուղի փնտրող, սովորելուն պատրաստ և մասնագիտական աճի ձգտող մասնագետների համար։ Նորացված մոտեցումներով մաքսային ծառայությունը առանձնակի ուշադրություն է դարձնելու թվային լուծումներին և  նորարարական մոտեցումներին։ Հաշվի առնելով համակարգում իրականացվող և ծրագրված բարեփոխումները՝ ներդրվում է մաքսային համակարգ ընդունվելու նոր ընթացակարգ. դասընթացի միջոցով աշխատանքի ընդունելության հավասար հնարավորություն է ապահովվում բոլոր դիմողների համար։


«Դասընթացին կարող են մասնակցել ինչպես մաքսային ծառայողներն, այնպես էլ բոլոր նրանք, ովքեր ցանկանում են մասնակից լինել նոր որակի մաքսային ծառայության ձևավորմանը։ Համակարգում աշխատողների համար սա վերապատրաստվելու, առաջխաղացման և ուժերը այլ ստորաբաժանումներում փորձելու հնարավորություն է: Նորօրյա մաքսային ծառայողը պետք է լինի մասնագիտորեն անխոցելի ու պատասխանատու, տիրապետի օտար լեզուների, ունենա համակարգչային հմտություններ, լինի ազնիվ և բարեկիրթ, ունենա բարեվարքության բարձր մակարդակ»:

ՊԵԿ նախագահի տեղակալ Ծովինար Սողոմոնյան

Դասընթացի մասնակիցները կստանան ոլորտի վերաբերյալ հիմնարար գիտելիքներ և գործնական պարապմունքներ կունենան մաքսային մարմիններում, այդ թվում՝ սահմանային մաքսակետերում:

Ով և ինչպես կարող է դիմել

Դասընթացի ընդունելությանը կարող են մասնակցել հայերենին տիրապետող, 18 տարին լրացած բարձրագույն կրթություն ունեցող ՀՀ քաղաքացիները։

Ընդունելությունը բաղկացած է երկու փուլից՝ թեստավորման և հարցազրույցի։ Ընդունելությանը մասնակցելու համար ներկայացվում է ընդունելության առցանց դիմում՝ հատուկ ավտոմատացված համակարգով։

Դիմելու համար անհրաժեշտ է նախ և առաջ ծանոթանալ մանրամասներին, լրացնել ձեր մասին պահանջվող տեղեկատվությունը և անպայման ձեռքի տակ ունենալ անհրաժեշտ բոլոր փաստաթղթերի թվային տարբերակները՝ դիմումին կցելու համար։ Անհրաժեշտ փաստաթղթերի ցանկը նշված է հայտարարության մեջ։

Նոր հնարավորություններ, ֆինանսական կայունություն

Դասընթացը հաջողությամբ ավարտած մասնակիցները հնարավորություն կունենան ստանալու հավաստագիր, աշխատանքի առաջարկ՝ մաքսային ծառայության տարբեր պաշտոններում, մասնագիտանալու տնտեսական անվտանգության պաշտպանության գործում, ինչպես նաև նպաստելու մաքսային ծառայության վերափոխմանը: Վարձատրությունը կլինի մրցակցային ՝ 250.000 – 750.000 ՀՀ դրամ միջին ամսական (հաշվարկային) եկամտով:

Ավելի մարդակենտրոն մոտեցումներ և թվային լուծումներ


Դասընթացների նման ձևաչափն աննախադեպ է ՊԵԿ-ի համար, քանի որ այս գործընթացում ուշադրության կենտրոնում է հենց անհատը՝ իր մարդկային ու մասնագիտական որակներով։

Դասընթացին դիմելու առցանց կարգը հնարավորություն է ընձեռում հետևելու հայտի ընթացքին և հավասար պայմաններով մասնակցելու անցկացվելիք մրցույթին։ Բացի այդ, նման ձևաչափը լավ նախադեպ է պետություն-մասնավոր համագործակցության, քանի որ մրցույթը, ինչպես ՀՀ մասնավոր գործատուների մեծ մասի դեպքում, հայտարարվել է staff.am հարթակում՝ ավելի շատ պոտենցիալ մասնագետ ներգրավելու և ավելի բաց լինելու նպատակով։


Դասընթացի ընդունելության կարգը, ժամկետները և այլ մանրամասներ ներկայացված են ՊԵԿ կայքում` https://petekamutner.am/dimord.aspx:

Powered by staff.am.