Հայաստանում միջազգային կազմակերպությունների ներկայությունը շարունակում է աճել, ինչը ենթադրում է աշխատաշուկայի զարգացում, աշխատանքի նոր հնարավորություններ ու զարգացման նոր խթան։ Այս անգամ ուրախ ենք մեր աշխատաշուկայում հյուրընկալել Apple -ի պաշտոնական գործընկեր և Premium reseller կարգավիճակ ունեցող ASBC կազմակերպությանը։
Այսպիսով, որպեսզի բացահայտենք ASBC-ի պլանները ու աշխատակիցներին տրամադրվող լավագույն հնարավորությունները, հատուկ հարցազրույց ունեցանք ASBC հայաստանյան ներկայացուցչության HR ղեկավար Աննա Կատվալյանի հետ։
Տարածաշրջանում Apple-ի պաշտոնական գործընկերոջ նոր գրասենյակի բացումը այս անգամ Հայաստանում էր։ Կնշե՞ք ինչ պլաններ են առկա հայաստանյան թիմի հետ կապված։
ASBC-ն հանդիսանում է ASBIS կորպորացիայի դուստր ձեռնարկություն, որը գործունեություն է ծավալում աշխարհի ավելի քան 30 երկրում, տարեկան 3 միլիարդ դոլար շրջանառությամբ։ ASBC-ն հանդիսանում է տարածաշրջանում Apple ընկերության միակ պրեմիում կարգի վերավաճառող։ Հայաստանում նախատեսում ենք ունենալ 30-50 հոգանոց անձնակազմ հիմնական չորս բիզնես ուղղություններում`
● մանրածախ (APR Store)
● մեծածախ (B2B)
● օնլայն վաճառք (E-Commerce)
● Apple-ի պաշտոնական տեխնիկական սպասարկման կենտրոն։
Ի՞նչ մասնագետներ են առավել պահանջված Ձեր թիմում։
Մեր թիմին անհրաժեշտ են Apple-ի սիրահարներ, ովքեր առաջադեմ են, կհանդիսանան գաղափարախոսության ջատագով եւ դեսպան, ունեն վառվող աչքեր եւ կոմերցիոն ջիղ։
Մեզ անհրաժեշտ են վաճառքի մասնագետներ` մանրածախ, մեծածախ, ինչպես նաեւ օնլայն տարբերակով աշխատելու համար։ Փնտրում ենք նաև տեխնիկական սպասարկման մասնագետներ, քանի որ Հայաստանում ունենալու ենք Apple-ի սերտիֆիկացված սպասարկման կենտրոն, որտեղ ապահովվելու է գնված ապրանքատեսականու երաշխիքային եւ հետերաշխիքային սպասարկումը։ Հավելենք, որ մեր կազմակերպական կառուցվածքը համալրելու են մարքեթինգի, in-house հաշվապահության, HR, լոգիստիկայի թիմի անդամները։
Ինչո՞վ է առանձնանում ընկերությունը և ի՞նչ հնարավորություններ այն կընձեռի իր աշխատակիցներին։
Ընկերությունը պրեմիում կարգի միակ վերավաճառողն է Հայաստանում, ինչը նշանակում է, որ մեր հաճախորդները ստանալու են այն բոլոր ծառայությունները եւ պրոդուկտները, որոնք իրենց հասանելի կլինեին Apple-ի պաշտոնական սրահից օգտվելու դեպքում։
Կազմակերպությունը հայտնի է իր առաջադեմ ուսուցման կառավարման համակարգով (Learning Management System), որը թույլ է տալիս աշխատակիցներին կարճ ժամանակում ստանալ համաշխարհային մակարդակի գիտելիքներ եւ տեղեկանալ գործող ստանդարտներին։ Աշխատակիցներն ունեն նաեւ բառացիկ հնարավորություն մասնակցելու Apple ընկերության կողմից տրամադրվող դասընթացների լայն շարքին եւ դառնալու ոլորտի առաջատարներ։ Լավագույնները կարող են նաեւ ստանալ Apple Expert միջազգային հավաստագիր։
Աշխատանքային ի՞նչ մոդել է կիրառվում ASBC-ում, և արդյո՞ք ներքին հաղորդակցությունը ենթադրում է կապ գլխամասի և մյուս երկրների ներկայացուցչությունների հետ։
ASBIS ընկերությունն օգտագործում է համաշխարհային առաջադեմ տեխնոլոգիաներ։ Ողջ գործունեությունը ծավալվում եւ ֆիքսվում է ներքին ERP համակարգում, եւ կորպորացիայի ավելի քան 2000 աշխատակիցները շփվում են միմյանց հետ բիզնես հաղորդակցության պլատֆորմի շրջանակներում։
Արտոնությունների ի՞նչ փաթեթներ են տրամադրվում աշխատակիցներին։
Շուկայականից բարձր ֆիքսված աշխատավարձ և ճկուն բոնուսային համակարգ, որն անմիջականորեն կապված է վաճառքի ցուցանիշների հետ։ Մասնագիտական աճի և ռոտացիոն համակարգով կորպորացիայի 30 երկրներում աշխատանքի տեղափոխվելու հնարավորություն։
Թիմի ինչպիսի՞ աճ եք նախատեսում 2022 թվականին և առհասարակ ի՞նչ խոստումներ ունի գալիք տարին Ձեր ընկերության համար։
Մեր ընկերության եւ սպառողների համար գալիք տարին շատ խոստումնալից է լինելու։ Տարեսկզբին նախատեսված է մեր առաջին խանութ-սրահի հանդիսավոր բացման արարողությունը, որին կհաջորդեն երկրորդ եւ երրորդ խանութները, որոնք երկար սպասեցնել չեն տա: Նոր խանութների բացմանը զուգահեռ բնականաբար ունենալու ենք նոր հաստիքներ։
Մեր կազմակերպությունը հնարավորություն է տալու տեղական բիզնեսին օգտվել Apple-ի ամպային տիրույթի ծառայություններից եւ դրանով լիովին օգտագործել սարքավորումների հնարավորությունները։ B2B վաճառքի բաժինը Հայաստանի ՏՏ, ֆինանսական, կրթական եւ այլ ոլորտների տեխնիկական վերազինմանն ուղղված շատ մեծ աշխատանք է կատարելու, այդ թվում օգնելով, որ հայաստանյան ընկերությունները հեշտորեն անցում կատարեն PC-ից Mac OS օպերացիոն համակարգ եւ դրանով խնայեն համակարգչային տեխնիկայի վրա կատարվող ծախսերը։
Լավագույն ժամանակն է ծանոթանալու ASBC հայաստանյան գրասենյակում առկա աշխատանքի հնարավորություններին ու գալիք տարին սկսել կարիերայի բոլորովին այլ հնարավորություններով։
