Մասնագիտական հարթակ․ Հայաստանի ՄՌ Ասոցիացիա

926

Ցանկացած ոլորտում մասնագիտական փորձառությունն ու ինստիտուցիոնալ կառույցների առկայությունը կարևոր են։ Արդեն 10 տարի է, ինչ Հայաստանի Մարդկային Ռեսուրսների (ՄՌ) Ասոցիացիան միավորում է հայաստանյան ՄՌ համայնքը, տարբեր բնագավառներում ծրագրեր նախաձեռնում, նպաստում ոլորտի զարգացմանը։ Ասոցիացիայի գործունեությունը կարևոր է հատկապես Հայաստանում, որտեղ բոլորովին վերջերս են սկսել լայնորեն կիրառվել տաղանդների կառավարման առաջադեմ մոտեցումները, շատ ընկերություններ էլ մասնագիտական աջակցության լուրջ կարիք են զգում։ Ասոցիացիան ունի ավելի քան 85 անդամ ամենատարբեր ոլորտներում գործող 40-ից ավելի ընկերություններից, ովքեր համախմբվել են ընդհանուր նպատակների իրականացման շուրջ:

Ստեղծման պահից ի վեր Հայաստանի ՄՌ Ասոցիացիան հավատարիմ է մնում իր նպատակին՝   Հայաստանում մասնագիտացված մարդկային ռեսուրսների համայնք զարգացնելուն։ Վստահաբար, դա կնպաստի գործընկեր ցանկացած ընկերության շրջանակներում անձնակազմի արդյունավետ կառավարմանն ու զարգացմանը՝ ի վերջո ծառայելով Հայաստանում տնտեսական ակտիվության բարձրացմանն ու տաղանդների՝ երկրում մնալուն։

Մինչ օրս Ասոցիացիայի ջանքերով  հայաստանյան աշխատաշուկան հարստացվել է 150-ից ավելի ՄՌ մասնագետներով, ովքեր այժմ զբաղեցնում են տարբեր պաշտոններ։ Խոշորագույն միջազգային մասնագիտական  կառույցների հետ համագործակցության շնորհիվ 30-ից ավելի ՄՌ ղեկավարներ ստացել են միջազգային հավաստագրումներ, կազմակերպվել են ավելի քան 170 ՄՌ ակումբներ, նախաճաշեր, վարպետաց դասեր, վերապատրաստման ծրագրեր: Իրականացվել է 8 տարեկան տարածաշրջանային ՄՌ համաժողով՝ շուրջ 25 երկրներից ՄՌ կառավարիչների մասնակցությամբ: Ասոցիացիայի աջակցությամբ ԵՊՀ-ում բացվել է ՄՌ կառավարման առաջին մագիստրոսական ծրագիրը: 

Անգամ կորոնավիրուսով պայմանավորված իրավիճակը Ասոցիացիային չխանգարեց, որպեսզի շարունակի հավատարիմ մնալ իր արժեքներին։ Հենց դժվարին այս իրավիճակում էր պետք լինել և մնալ մարդկանց կողքին՝ օգնելով հաղթահարել դժվարությունները միասին։ Համավարակի ընթացքում կազմակերպվեցին մասնագիտական զարգացմանը նպաստող անվճար վեբինարներ, անձնակազմի ղեկավարներին տրամադրվեց մասնագիտական աջակցություն՝ դժվարին իրավիճակում խնդիրները լուծելու համար:

Հայաստանի ՄՌ Ասոցիացիայի կողմից ստեղծվել է  ՄՌ մասնագիտական  հարթակ, որը փորձի փոխանակման, ինքնաարտահայտվելու և բազում հարցերի պատասխաններ ստանալու հնարավորություն է տալիս։ Հարթակում պարբերաբար տեղադրվում են մասնագիտական միջոցառումներ, շաբաթական կտրվածքով մասնագիտական հոդվածներ, տրվում են ոլորտից կարևոր հարցերի պատասխաններ։ Ի դեպ, HRCommunity.am հարթակը ունի նաև անվճար անդամակցության հնարավորություն, որին կարող են միանալ բոլոր ցանկացողները։ Օնլայն հարթակին միացել են արդեն 300 և ավելի անդամներ։ Աշխատաշուկա մուտք գործողներն այստեղ հնարավորություն են ձեռք բերում անմիջական կապ ստեղծել HR-ների հետ։

Մարդկային ռեսուրսների կառավարման ոլորտի սկսնակ ու փորձառու այն մասնագետները, ովքեր դեռ չեն հասցրել միանալ, միանալով Հայաստանի ՄՌ Ասոցիացիային կստանան՝

  • Հայաստանի ՄՌ մասնագիտական ցանցի հետ ակտիվ ու հագեցած համագործակցություն, փորձի փոխանակում և փոխօգնություն,
  • Միջազգային և տեղական հավաստագրման և  ուսուցման ծրագրերի մասնակցության զեղչեր, 
  • Մասնակցություն Ասոցիացիայի կողմից կազմակերպվող հանդիպումներին, նախաճաշերին, վարպետաց դասերին և արտոնյալ պայմաններով մասնակցություն տարվա ամենամեծ ՄՌ իրադարձությանը՝ Տարեկան Տարածաշրջանային ՄՌ Համաժողովին,
  • Հնարավորություն մասնակցել համաշխարհային ճանաչում ունեցող համաժողովներին, արտոնյալ պայմաններ տեղական ու միջազգային հավաստագրման և  ուսուցման բազում ծրագրերին մասնակցելու դեպքում,
  • Հարցեր ուղղելու և պրոֆեսիոնալներից պատասխաններ ստանալու հնարավորություն։

Ասոցիացիային անդամակցելու համար կարելի է գրանցվել հենց հիմա՝ անցնելով հղումով։

Գործընկերային նյութ