Վերջերս LinkedIn-ում հարցում անցկացրինք, հասկանալու համար, թե ո՞ր տարիքից են սկսել աշխատել թվով 24,000-ը գերազանցող մեր հետևորդները։ Հարցումն ակտիվ արձագանք ստացավ. ունեցանք մոտ 2,000 մասնակից։ Արդյունքները ներկայացնում ենք ստորև՝
Պարզ դարձավ, որ գերակշիռ մասը՝ 65%-ը սկսել է աշխատել 19-23 տարեկանում։
Ժամանակակից աշխարհում կարիերան վաղ սկսելու տենդենցն ավելի նկատելի է դառնում, ինչը զարմանալի չէ, քանի որ օրեցօր փոփոխվող աշխատաշուկայում ակադեմիական կրթությունը շատ նոր մասնագիտությունների համար այլևս բավարար չէ։ Երիտասարդները ստիպված են լինում դիմել ոչ ֆորմալ կրթությանը, որպեսզի լրացնեն այն բացերը, որոնք անհրաժեշտ են ցանկալի աշխատանքը գտնելու համար, ինչպես նաև փորձում են համատեղել ուսումն ու աշխատանքը, ստանալով և՜ տեսական և՜ պրակտիկ գիտելիքներ։
Գործատուները ևս աջակցում են երիտասարդներին աշխատանքի առաջարկների և ինթերնշիփերի տեսքով ու նախապատվությունը տալիս ակտիվ, նախաձեռնող անհատներին, ովքեր համարձակ են և սիրում են հետաքրքիր ու վառ գաղափարներ գեներացնել։
Լավ նորություն․ Հայաստանում նման երիտասարդների ու գործատուների քանակը գնալով ավելանում է, մենք էլ օգնում ենք վերջիններիս գտնել իրար։)
TCF- ը խրախուսում է հնարավորինս շուտ սկսել զարգացնել ձեռնարկատիրական մտածելակերպը և գումար աշխատելը։ Մենք ավագ դպրոցի աշակերտների հետ էլ ենք համագործակցության փորձառություն ունեցել և համարում ենք այն երկուստեք շատ հաջողված։ Նրանք տալիս են քեզ առանց սահմանափակումների մտածելու և գործելու հնարավորություն, դու` նրանց անձի կայացման, պատասխանատվություն ստանձնելու և ինքնուրույն որոշումներ կայացնելու հնարավորություն։
Թեկուզ փոքր ծավալով, բայց պետք է համատեղել փորձի ձեռք բերումն ու ակադեմիական կրթությունը` կենտրոնացումը պահելով ուսման վրա։ Դա տալիս է հնարավորություն հմտություններ զարգացնելու, ավելի կայացած ու կողմնորոշված լինելու, կենտրոնացում ունենալու և անձնային աճ գրանցելու։ Բնականաբար նման նախապատրաստական աշխատանքները կարող են թռիչքային դերակատարում ունենալ ցանկացած երիտասարդի կարիերայի վրա։
ՄԱՐԻԱՄ ՀԱՄԲԱՐՁՈՒՄՅԱՆ, TCF ՀԱՄԱՀԻՄՆԱԴԻՐ ԵՒ ԿԱՌԱՎԱՐՈՂ ԽՈՐՀՐԴԻ ԱՆԴԱՄ
StaffMedia թիմը զրուցել է մի քանի երիտասարդների հետ, ովքեր իրենց կարիերան վաղ են սկսել և գրանցել հաջողություններ։
Մեր առաջին հերոսը Ռուբեն Առաքելյանն է, 16 տարեկան։
Այս գարուն ֆրիլանսինգի միջազգային հարթակներից մեկում գտա հետաքրքիր part-time աշխատանք, որն էլ համատեղեցի և կշարունակեմ համատեղել դասերիս հետ։ Սիրում եմ էլեկտրոնային երաժշտություն ստեղծել և վիդեո հոլովակներ պատրաստել, նաև տարբեր մասնագիտական ոլորտներում ուսումնասիրություններ կատարել։ Ահա այս բոլոր հմտությունները, ինչպես նաև անգլերենիս իմացությունն անչափ օգնեցին ինձ։ Շատ դժվար է այսօր երիտասարդներին կողմնորոշվել մասնագիտության ընտրության հարցում, իսկ տարբեր ոլորտներում կամավորական և ինչու չէ նաև վճարվող աշխատանք կատարելը միանշանակ օգնում է այդ հարցում։ Կարող եմ հաստատել հենց իմ փորձով։
Մեր մյուս հերոսը՝ Վիգեն Խաչատրյանն է, 18 տարեկան, ով գործունեություն է ծավալում ՏՏ, կրթական և հասարակական ոլորտներում։
Կրթության հնարավորություները 21րդ դարում ամենուր են, ինքներդ հետագծեք ձեր կրթական ուղին՝ հասնելու համար այնտեղ որտեղ կցանկանաք։ Այս դարում թերի կրթության համար ոչ-ոքի մեղադրելու իրավունք չունենք։” – նշեց Վիգենը։
Վիգենը դեռ վաղ տարիքից մասնակցել է մի շարք իրարից տարբեր խմբակների՝ մշակութային, սպորտային, ռոբոթատեխնիկայի։ Ռոբոթատեխնիկայի խմբակը հետագայում դարձավ Արմաթ, երկար ժամանակ Արմաթ հաճախելուց հետո, հետագայում ընկերոջ հետ հիմնեց AR ոլորտի ստարտափ, դասավանդեց Արմաթի Մաստարա գյուղում գտնվող խմբակում, արդյունքում նաև ծնվեց Լյուպին երիտասարդական ՀԿ-ն, որի Նախագահը հիմա Վիգենն է։
Մեր անդրադարձը եզրափակում ենք Հասմիկ Հովսեփյանի օրինակով՝ 18 տարեկան։
Երբեք չհավատաք, որ Ձեր նպատակներն անհասանելի են։ Մեր օրերում հնարավորություններն անսահման են, անելիքները՝ շատ։
16 տարեկանում բացահայտեցի ոչ ֆորմալ կրթությունն ու հասկացա, որ այն ինձ համար լավագույն տարբերակն է։ Անցա գործի։ Յուրաքանչյուր նոր դասընթացի, ծրագրի կամ աշխատանքի հետ ինձ ավելի մոտ եմ զգում նպատակներիս։ Ոգեշնչվում եմ նպատակասլաց մարդկանցից, մասնավորապես հայրենակիցներիցս։ Ինձ համար կարևոր խթան էր ճիշտ առաջնահերթությունների սահմանումը, ինչի արդյունքում հասկացա, թե ուր եմ գնում։ Այս հարցում մեծ էր հենց նման մարդկանց դերն ու անվերջ փորձերը։
Մոռացեք բոլոր արդարացումներն ու վախերը։ Կարևոր է բաց լինել նոր մարտահրավերների առաջ ու գործել։ Սեփական օրինակով ամեն օր փորձում եմ ցույց տալ, որ արգելքները միայն գլխում են ու որ նպատակներին հասնելու ճանապարհին բավական են ցանկությունը, համառությունը, դիսցիպլինան ու հավատը։
Ու հա։) Ժամանակին նայեք “արդեն” -ի տեսանկյունից, արդյունքին՝ “դեռ”-ի ոչ թե հակառակը։))
Իհարկե ոլորտից կախված ոչ բոլոր մասնագիտությունների դեպքում է հնարավոր սկսել կարիերան վաղ տարիքից, բայց նույնիսկ ապագա բժշկին կամ իրավաբանին չի խանգարի տարբեր ոլորտներում կամավորական կամ նման աշխատանքներ կատարելը, չէ որ թիմում աշխատելու հմտությունները, մարդկանց հետ արդյունավետ շփվելու կարողությունները, կամ օրինակ project management-ի հմտությունները բոլորին են պետք այսօր։ Իսկ նշված հմտությունները, և դրանց նման շատերը հնարավոր է ձեռք բերել միայն պրակտիկ միջավայրում՝ ինչը շատ ընդունված է արևմտյան երկրներում։
Այս տարվա սկզբին մեր թիմը ժամանակավոր համալրվեց ԱՄՆ հեղինակավոր UC Berkeley համալսարանի ուսանողներով, ովքեր միացան մեզ որպես intern (փորձնակ) և մեր տարբեր թիմերի հետ աշխատեցին հեռահար։ 6 ամիս տևած ինթերնշիփին մասնակցած 7 ուսանողները, ովքեր 18-20 տարեկան էին, արդեն իսկ միջինում 4-5 տարվա աշխատանքային փորձ ունեին։ Այս մշակույթը շատ տարածված է ԱՄՆ-ում, իսկ առաջատար համալասրաններն իրենց ուսանողների ընդունելության հարցում մեծ ուշադրություն են դարձնում նաև ապագա ուսանողի՝ ակադեմիական հաջողություններից զատ, նաև այն նախագծերին, որոնց մեջ ներգրավված է եղել վերջինս։
Որպես կարիերաս 17 տարեկանում սկսած մասնագետ և ժամանակակից աշխատաշուկայի հիմնական առանձնահատկություններին ծանոթ մարդ, միանշանակ խորհուրդ եմ տալիս երիտասարդներին սկսել կարիերան հնարավորինս վաղ, համատեղել կրթվելու ակադեմիական և գործնական ձևաչափերը, երբեք չվախենալ կամավորական աշխատանք կատարելուց և աշխատել սկսելու համար չսպասել համալասարանն ավարտելուն։
ԼՈՒԻԶԱ ԱՎԵՏԻՍՅԱՆ, STAFF.AM HIREBEE HԱՄԱՀԻՄՆԱԴԻՐ
Կարևոր ենք համարում կիսվել նման օրինակներով, որոնք կոգեշնչեն ու կմոտիվացնեն երիտասարդներին լինել ավելի նախաձեռնող և ձգտել ավելիին։
