Համավարակի ընթացքում մեզնից շատ-շատերն անցում կատարեցին նոր աշխատանքային ռեժիմին՝ տանից աշխատանքին, որի գոհացնող արդյունք ապահովելն առաջին հերթին կախված էր զորեղ մի հանգամանքից՝ բջջային և ինտերնետ կապի առկայությունից, այն էլ՝ արագ և որակյալ։ Իսկ թե ինչպես են վայրկյանական մեր բրաուզերներն ուղղորդում մեր ցանկալի կայքն ու համակարգերը, ինչպես ենք բոլորս ամեն օր հետևում կորոնավիրուսյան թեժ թեմաներին ու, միաժամանակ, մեր երեխաների օնլայն կրթությանը, կպարզենք այսօր մեր անչափ հետաքրքիր վիրտուալ ճամփորդության ընթացքում։
Մեր այցի ուղղությունն այս անգամ Beeline Հայաստան էր, հասցեն չենք նշի, քանի որ մեր այցը ոչ միայն Երևան էր, այլ նաև տարբեր մարզերում գտնվող գրասենյակներ։ Մինչ մանրամասներով ու աշխատանքի լավագույն փորձով ձեզ հետ կիսվելը, մեկ բան կցանկանանք առանձնահատուկ նշել. նրանք այս ամբողջ ընթացքում եղել են մեր կողքին, աշխատել են մեզ համար, հոգացել են մեր բոլորիս անվտանգության համար։
Դե ինչ, գնացինք ․․․ արկածներ, հետաքրքիր դրվագներ «սերվերներից այն կողմ» 🙂
Շնորհակալ ենք, Beeline Հայաստան թիմին։
Անգլերեն տարբերակին կարող եք ծանոթանալ այստեղ։
Beeline Հայաստանի արձագանքը Covid-19-ին
Հնարավոր ճգնաժամերին պետք է նախապես պատրաստվել: Դա կարելի է անել՝ պարզապես ներդնելով ժամանակակից տեխնոլոգիաներ և գաղափարներ, փորձելով նոր մեթոդներ: Մենք հենց առաջին օրվանից պատրաստ էինք հեռավար աշխատանքին, քանի որ ունեինք BeFree հեռավար աշխատանքի մեթոդը, էլեկտրոնային փաստաթղթաշրջանառություն, էլեկտրոնային ստորագրություն, որը որոշ առումով պարտադրել ենք մեր գործընկերներին, և այլ գործիքներ: Մեզ պետք էր միայն դրանք ընդլայնել և ադապտացնել իրավիճակին:
Ինչպես գիտեք, Հայաստան բավականին ուշ հասավ կորոնավիրուսը, համեմատած այլ երկրների հետ, և մինչև այստեղ կարանտին կհայտարարվեր, մենք մեծ ռազմավարության նախագիծ ստացանք Ամստերդամում գտնվող մեր HQ-ից (գլխամասային գրասենյակից), որտեղ արդեն լուրջ աշխատանքներ էին տարվում:
Այդ ռազմավարությունը ներառում է քայլեր բոլոր ուղղություններով՝ անվտանգություն, աշխատակազմի հետ աշխատանք, գնումների, սպասարկման անխափան իրականացում և այլն: Իհարկե, մենք էլ մեր առաջարկությունները հավաքեցինք տարբեր ստորաբաժանումներից և շատ շուտով արդեն ունեինք հստակ գործողությունների պլան: Դա, իհարկե, շատ օգնեց մեզ արագ կողմնորոշվել, երբ կարանտին հայտարարվեց, քանի որ ամեն ստորաբաժանում հստակ գիտեր, թե ինչ պիտի անի իրողությունների զարգացման տարբեր սցենարներում, ներառյալ մեր աշխատակիցների վարակման դեպքում:
Որպես կապի և հեռահաղորդակցության խոշորագույն օպերատոր՝ ձեր ընկերության որոշ ստորաբաժանումների համար հեռավար աշխատանքն այդքան էլ իրատեսական չէր, հետևաբար ի՞նչ քայլեր են ձեռնարկվել ոչ միայն աշխատակիցների, այլ նաև մեր հասարակության անվտանգության համար։
Մեր աշխատակիցների և հաճախորդների անվտանգությունը միշտ կարևոր է մեզ համար, իսկ այս օրերին՝ այն դարձավ մեր հետագա բոլոր քայլերի հիմնասյունը։
Բացառիկ ուշադրության կենտրոնում այն մարդիկ են, ովքեր հիմա անմիջապես աշխատում են հաճախորդների հետ՝ վաճառքի մասնագետները, տեխնիկական աշխատողները, զանգերի սպասարկման կենտրոնի աշխատակիցները:
Հայաստանում վարակի ներթափանցման հենց առաջին օրերից մենք սկսեցինք ախտահանիչ նյութեր տեղադրել մեր բոլոր գրասենյակներում: Նույնիսկ կարանտին հայտարարելուց առաջ փակեցինք սպասարկման գրասենյակները, այսօր էլ կան գրասենյակներ, որ դեռ չեն գործում: Բոլոր այն աշխատակիցները, ովքեր կարող էին իրենց աշխատանքը կատարել տնից, անցան BeFree համակարգին, դրա համար շնորհակալ ենք մեր ՏՏ ծառայության անձնակազմին՝ դա արվեց հաշված ժամերում:
Բոլոր նրանց համար, ում ներկայությունն աշխատավայրում պարտադիր է, մշակվեցին հատուկ աշխատանքային գրաֆիկներ, որպեսզի մեկ հերթափոխում միշտ աշխատեն միևնույն մարդիկ:
Արվեց ամեն բան, որ տարբեր հերթափոխի աշխատակիցներն իրար չհանդիպեն, և մի խմբի գնալուց հետո տարածքն ախտահանվում է՝ մյուսի գալուց առաջ: Խոսքը զանգերի սպասարկման կենտրոնի և մոնիթորինգի ծառայության մասին է, որը հետևում է ցանցերի աշխատանքին: Ամեն հերթափոխի սկզբում մեր կորպորատիվ բժիշկը ստուգում է նրանց ջերմությունը: Բոլորին տրամադրվում են դիմակներ, իսկ աշխատանքի և տուն նրանց հասցնում են մեր վարորդները՝ կորպորատիվ մեքենաներով:
Իսկ հեռավար աշխատանքը համավարակին ի պատասխան էր, թե՞ ընկերության աշխատակիցների սիրելի բենեֆիթը։
BeFree քաղաքականությունը ՎԵՈՆ ընկերությունների խմբում գործում է արդեն մի քանի տարի: Դա խմբի ընդհանուր մոտեցումն է, որ աշխատակիցը չպիտի կցված լինի ֆիզիկական վայրին, այլ պիտի հնարավորություն ունենա իր աշխատանքը կատարել տարբեր տեղերից՝ միևնույն ժամանակ կարողանա օգտվել իր աշխատանքային ֆայլերից և գործիքներից: Նույնիսկ կան մշակված որոշակի գործիքներ, որոնց օգնությամբ ղեկավարը կարող է առաջադրանքներ դնել իր թիմի առաջ և այդ ծրագրի օգնությամբ հետևել նրանց աշխատանքի արդյունավետությանը: Նման կարիք մեզ մոտ հաճախ է լինում, երբ մեր ղեկավարները, օրինակ, գնում են Ամստերդամ գործուղման հանդիպելու խմբի ղեկավարության հետ կամ թրեյնինգների: Նաև ցանկացած աշխատակից կարող է կարիք ունենալ լինելու որևէ տեղ առանց աշխատանքային պարտականությունները դադարեցնելու, և այդ հնարավորությունն ընկերությունը սիրով տրամադրում է:
Beeline Հայաստանի տրամադրած ծառայությունների շնորհիվ շատ-շատ ընկերությունների գործունեությունը շարունակվեց նույնքան արդյունավետ, որքան Covid-19-ից առաջ էր։ Ավելի քան երբևէ կարևորվեց որակյալ ինտերնետ կապի հասանելիությունը, ինչի համար իսկապես շնորհակալություն ենք հայտնում ձեր նվիրյալ անձնակազմին։
Այո, քանի որ մենք կապի օպերատոր ենք, և այս իրավիճակում մեր մատուցած ծառայությունները կտրուկ դարձան ոչ թե կարևոր, այլ կենսական նշանակության, շատ կարևոր է խոսել այն մասին, թե ինչ է ընկերությունն արել տնից աշխատող և սովորող մեր այլ համաքաղաքացիների համար:
Օրինակ, Կրթության, գիտության, մշակույթի և սպորտի նախարարության հետ համագործակցությամբ մենք հնարավորություն ենք տվել մեր հաճախորդներին անվճար օգտվել կրթական հարթակներից, նախարարության YouTube ալիքից, մեր BeeTV հավելվածով թույլ տվեցինք, որ բոլորն անվճար դիտեն նախարարության ալիքը: Նաև անվճար դարձան այլ կարևոր պետական կայքեր և հարթակներ, որոնք օգտակար կարող էին լինել քաղաքացիների համար համաճարակի ընթացքում: Մենք անվճար հեռախոսահամարներ տրամադրեցինք Առողջապահության նախարարության կամավորներին՝ բարձր գնահատելով նրանց ներդրումն ու նվիրվածությունը, ինչպես նաև անվճար դարձրեցինք թեժ համարներին զանգելը մեր բաժանորդների համար:
Կարծում ենք, որպես ընկերություն, և որպես թիմ մենք իրոք շատ լավ աշխատեցինք և չխնայեցինք մեր ջանքերը, որպեսզի այս բարդ իրավիճակում բոլորը լինեն կապի մեջ և միայնակ չմնան դժվարությունների հետ:
Իսկ հետաքրքիր է՝ ի՞նչ tech գործիքներ կիրառվեցին ձեր թիմի կողմից անխափան աշխատանքի իրականացման համար։
BeFree ռազմավարության շրջանակում VPN-ի միջոցով բոլոր աշխատակիցները կարող են կպնել կորպորատիվ ցանցին և լիարժեք օգտվել դրանից, ինչպես կլինեին աշխատավայրում: Համակարգի անխափան աշխատանքն ապահովում է ՏՏ ծառայությունից հերթափոխով գրասենյակ այցելող աշխատակից: Կորպորատիվ մեծ հանդիպումները, հատկապես HQ-ի հետ կազմակերպվող, անցնում են BlueJeans-ով, սակայն առանձին ստորաբաժանումներ կարող են նախընտրել այլ ծրագրեր կապի համար, օրինակ Zoom, WhatsApp և այլն: Կախված ստորաբաժանումից, օրինակ, նախագծային սկզբունքով աշխատող բաժիններն օգտվում են համապատասխան գործիքներից, օրինակ, Wrike-ից, որպեսզի հետևեն և վերահսկեն իրականացվող նախագծի ընթացքը:
Վերջերս StaffBlog-ում հետաքրքիր քննարկում ունեցանք հեռավար և օֆիսային աշխատանքի վերաբերյալ, որտեղ տարբեր մասնագետներ իրենց մոտեցումներն էին ներկայացնում։ Ինչպիսի՞ն է ձեր մոտեցումը այս հարցի շուրջ․ ո՞րն է ապագայի աշխատանքի կազմակերպման մոդելը։
Հեռավար աշխատանքի դեպքում ընտանիքի հետ ավելի շատ ժամանակ անցկացնելը թե՛ առավելություն է, և թե բարդություն տվյալ իրավիճակում: Բարդ է, քանի որ հարազատները խանգարում են կենտրոնանալ: Հայրիկը կամ մայրիկը տանն են, ուրեմն պետք է հետը խաղալ, էլ ի՞նչ գործեր: Եվ ինչպե՞ս մերժես փոքրիկին: Բայց նաև կարելի է ավելի լավ պլանավորել օրդ և ավելի շատ բան հասցնել: Գոնե ճանապարհի վրա ժամանակ չես ծախսում:
Մենք հասկացանք, որ էլեկտրոնային փաստաթղթաշրջանառությունը, առաջադրանքների կատարման վերահսկողության, տվյալների անվտանգության գործիքները հեռավար աշխատանքի դեպքում կարող են լուրջ փորձություն լինել ՏՏ ծառայության համար, և անպայման նման ծառայություններ ենք առաջարկելու մեր В2В հաճախորդներին:
Արդեն հիմա ձևավորվում է ապագայի աշխատանքային մեթոդը՝ հիբրիդային, երբ մարդը մասամբ աշխատում է տանից, մասամբ՝ գրասենյակից: Դա կօգնի հավասարակշռել աշխատանքն ու անձնական կյանքը, թույլ կտա տնտեսել գրասենյակային ծախսերը: Նոր իրականությունը կարող է էլ ավելի արդյունավետ լինել, քան այն մեկը, որին արդեն խիստ կարոտում ենք:
Իսկ այս նոր իրականությունում ինչպե՞ս եք կարողանում այդքան բարձր պահել թիմային համախմբվածությունն ու աշխատակիցների մոտիվացիան։
Մենք կապի օպերատոր ենք և մշտապես կապի մեջ ենք՝ թե մեր գործընկերների, թե մեր հաճախորդների, և թե միմյանց հետ: Հեռախոսով, համացանցով՝ համագործակցությունը և կապը ստորաբաժանումների միջև չի ընդhատվում: Ավելին, մենք ունենք ավանդույթ, երբ եռամսյակը մեկ ընկերության տնօրենները ներկայացնում են իրենց ստորաբաժանումների աշխատանքն ու արդյունքները, և այդ հանդիպումն ունեցանք իր ժամանակին, աշխատակիցները կարողացան իրենց հուզող հարցերը տալ տնօրեններին:
Ու դրանից բացի այս շրջանում ունեցանք ևս երեք նման վիրտուալ հանդիպում, որից երկուսին մասնակցել ենք ոչ միայն մենք, այլ ողջ խմբի գլխավոր համատնօրեններն ու մնացած երկրներում գործող խմբի ընկերությունները: Այս տեսազանգերի նպատակն է, որպեսզի ՎԵՈՆ ընտանիքի բոլոր ընկերությունները հստակ գիտակցեն, որ միայնակ չեն այս բարդ իրավիճակում:
Այս ամբողջ ընթացքում HR-ը շատ ճկուն արձագանքեց փոփոխվող աշխարհի մարտահրավերներին և շարունակեց ապահովել աշխատակիցների ներգրավվածությունն ու զարգացումը՝ տեղափոխելով այն օնլայն տիրույթ.
- աշխատակիցների համար Ինտրանետ օնլայն հարթակին զուգահեռ այս շրջանում գործարկվեց կորպորատիվ ալիքը Telegram-ում, որտեղ ավելի ոչ պաշտոնական ոճով կիսվում ենք բոլորի հետ նորություններով, հումորային և ոգեշնչող տարբեր գրառումներ անում, չելենջներ ու մրցույթներ հայտարարում՝ ներգրավելով բոլոր գործընկերներին,
- ուսուցման մեջ կիրառվեց օնլայն Pecha Kucha ֆորմատը,
- կազմակերպվեց օնլայն կինոդիտում և քննարկում,
- և նույնիսկ իրականացվեց ՎևՍԳ մասնագետների գիտելիքների ստուգում օնլայն տարբերակով (290 աշխատակից):
Իհարկե, այս ամենի հետ մեկտեղ շարունակում ենք դիմավորել մեր նոր գործընկերներին։
Եկեք փոքր-ինչ բացահայտումներ անենք ձեր ոչ-պաշտոնական կորպորատիվ լրահոսից 🙂
Կարանտինի ընթացքում, երբ Ազատության պողոտայում գտնվող մեր շա՜տ մեծ գրասենյակը գրեթե դատարկվել էր, այդտեղ հայտնվեցին նոր փոքրիկ բնակիչներ՝ շան ձագուկներ, որոնք մնացել էին առանց մամայի: Եվ մեր գրասենյակում ապաստան գտնելը նրանց կողմից շատ ճիշտ որոշում էր, քանի որ մեր անվտանգության և զանգերի սպասարկման կենտրոնի աշխատակիցներն անմիջապես որոշեցին տեր կանգնել փոքրիկներին:
Նրանց արագ կերակրեցին, քնելու տեղ սարքեցին և արդեն նույն օրը կորպորատիվ Telegram ալիքով տարածվեց նրանց լուսանկարը: Մտադրությունն այն էր, որ հաջորդ օրը նկարը տարածենք արտաքին լսարաններում, որպեսզի շունիկներն անտուն չմնան: Անհավատալի է, բայց դրա կարիքը չեղավ՝ ձագուկները շատ արագ տեղավորվեցին մեր աշխատակիցների տներում և արդեն երջանիկ են զգում իրենց սիրող ընտանիքներում:
Չնայած ամենօրյա դրական աշխատանքային մթնոլորտին ու Beeline Հայաստանի միասնական ու բոլորովին անվտանգ թիմային գործելաոճին, Covid-19-ը միայնակ չի այցելել մեր երկիր՝ բերելով «փոքրիկ հյուրեր» կամ, ինչպես մենք ենք անվանում, մարտահրավերներ։ Որո՞նք են այդ մարտահրավերները ձեր ընկերության տեսանկյունից։
Առաջին հերթին պետք է արդյունավետության վերահսկման նոր գործիքներ ներդնել: Եթե գրասենյակում հաճախ աշխատանքի կատարման ցուցանիշը ժամանակին գալն է ու շուտ չգնալը, իսկ ընթացքում ոչ մի բան չփչացնելն ու գոնե մի գործ անելը (սա, իհարկե, սխալ մոտեցում է), ապա այժմ կարևոր է առաջադրանքը կատարել ժամանակին և լիարժեք: Իսկ թե երբ և ինչպես՝ կարևոր չէ: Թե ղեկավարները, թե աշխատակիցները հարմարվում են այս նոր իրավիճակին:
Իհարկե, նաև առցանց սպասարկումը: Դա արդեն վաղվա հարց չէ, այլ՝ այսօրվա: Եթե դուք չունեք պարզ առցանց ծառայություններ և վաճառք, ձեր բիզնեսը չի գոյատևի:
Հետևել Beeline Հայաստանին staff.am-ում
Ի՞նչ տվեց այս իրավիճակը ձեր թիմին։
Մեզ համար ամենամեծ օգուտն այն էր, որ ևս մեկ անգամ տեսանք և համոզվեցինք, թե որքան կարևոր է մեր աշխատանքը հասարակության համար, և ինչ կարևոր առաքելություն ենք մենք կատարում՝ ամեն օր աշխատանքի գնալով և մեր պարտականությունները կատարելով: Այս շրջանում, անկախ բարդություններից և մարտահրավերներից, կարող ենք ասել, որ թիմն էլ ավելի միավորված է և ոգեշնչված, մենք շարունակում ենք ներդրումային ծրագրեր իրականացնել, բառացիորեն վերջերս գործարկեցինք 4G+ նոր սերնդի ցանցը Երևանում, որն էլ ավելի արագ կապ կապահովի բնակիչներին:
Հաջորդ կարևոր արդյունքն այն է, որ մեր բաժանորդներն իրենց խնդիրները լուծելու համար սկսեցին նախընտրել ժամանակակից, արդյունավետ և արագ միջոցներ, որ մենք վաղուց տրամադրում ենք: Օրինակ, BeeMoney ունիվերսալ հավելվածը տարբեր տեսակի վճարումներ կատարելու համար, MyBeelineArmenia-ն՝ իրենց հաշիվները կառավարելու, վճարումներ կատարելու, զանգերի քաղվածքը տեսնելու և այլն, E-Shop՝ առցանց խանութը, որի շնորհիվ կարելի է պատվիրել և առաքումով ստանալ մեր ապրանքներից և ծառայություններից ցանկացածը, ներառյալ SIM քարտեր: Սա է սպասարկման հարմարավետ և ժամանակակից տարբերակը, և կարծում եմ, որ այս անցումն օգտակար կլինի նաև մեր բաժանորդների համար:
Հրաշալի՜ է, իսկ արդյո՞ք մտածել եք՝ որն է լինելու ձեր առաջին քայլը բոլորով միասին օֆիս գնալուց հետո 🙂
Կանջատենք բոլորի ինտերնետը, թող գնան ման գալու ու շփվելու 🙂 Կատակ է 🙂
#WorkFromHome VS #OfficeWork
Խոստովանենք, որ իրավիճակն օգնեց մեզ նորովի գնահատել ոչ միայն հաղորդակցության, այլ նաև հեռահաղորդակցության կարևորությունը։ Առանց կապի խոշորագույն օպերատորներից Beeline Հայաստանի նվիրված ու կենսական աշխատանքի, անհնար կլիներ նաև մեր հեռավար աշխատանքային առօրյան, ակտիվ շփումը մեր վիրտուալ գործընկերների ու հարազատների հետ։
