Եթե անկեղծ լինենք, այս համաճարակի օրերին շատերիս ուշադրության կենտրոնում առողջապահության ոլորտն է՝ սկսած կառավարման համակարգից մինչև կիրառվող տեխնոլոգիաներ ու բուժանձնակազմի գործունեություն։ Եվ այդ առիթով էլ որոշեցինք վիրտուալ այցելել բիոտեխնոլոգիաների ոլորտում կարևորագույն տեղ զբաղեցնող ClinSoft hայաստանյան ընկերություն։
Անչափ հետաքրքիր զրույց ունեցանք ClinSoft-ի գործադիր տնօրեն Հեղինե Զաքարյանի հետ, և, իհարկե, բացահայտեցինք նոր գաղափարներ ու աշխատանքային մեթոդներ, որոնցով անպայման ուզում ենք կիսվել ձեզ հետ։
#HYBRIDWORK. CLINSOFT-Ի ԼԱՎԱԳՈՒՅՆ ՓՈՐՁԸ
Լինելով առողջապահության ու կլինիկական հետազոտությունների ոլորտի համար բիոտեխնոլոգիաներ, հետազոտությունների անալիտիկա ու ծրագրային լուծումներ ապահովող կազմակերպություն` ClinSoft-ում դեռևս 2020 թվականի փետրվարից մոտիկից հետևում էինք հիվանդության զարգացման տեմպերին։ Բնականաբար, շատ ենք կարևորում բոլորի՝ հատկապես մեր աշխատակիցների առողջությունն ու անմիջապես մարտից անցել ենք տնային ռեժիմով աշխատելու։ Ասեմ, որ անցումը եղել է առավելագույնս սահուն ու մեր աշխատակիցներն այս ընթացքում շարունակել են դրսևորել բարձր պրոֆեսիոնալիզմ ու մեծ նվիրվածություն իրենց գործի նկատմամբ։
ԳՐԱՍԵՆՅԱԿԱՅԻՆ ԱՇԽԱՏԱՆՔԸ՝ ՈՐՊԵՍ ԲԵՆԵՖԻԹ
Անցնող շաբաթների ընթացքում մասնակիորեն վերաբացել ենք մեր գրասենյակների տարածքները։ Նախկինում, Արտակարգ Դրությունից առաջ, մեկ-մեկ, ըստ կարիքի կամ իրավիճակի, աշխատակիցներին տնից աշխատելու հնարավորությունը համարվում էր առավելություն, բենեֆիթ (արտոնություն):
«ԱՐՏԱԿԱՐԳ ԴՐՈՒԹՅԱՆ ԻՐԱՎԻՃԱԿՈՒՄ, ՀԱՏԿԱՊԵՍ ԵՐԲ ԱՄԵՆ ԱՄԻՍ ԱՅՍ ԻՐԱՎԻՃԱԿԸ ԵՐԿԱՐՈՒՄ Է, ԱՐԴԵՆ ԳՐԱՍԵՆՅԱԿԱՅԻՆ ՏԱՐԱԾՔԻ՝ ԱՇԽԱՏԱԿԻՑՆԵՐԻՆ ՏՐԱՄԱԴՐՈՒՄՆ Է ՀԱՄԱՐՎՈՒՄ ԲԵՆԵՖԻԹ»։
Մենք ունենք աշխատակիցներ, ովքեր, հոգնելով տան պայմաններում աշխատելուց, այս օրերին նախընտրում են գալ գրասենյակ ու աշխատել առանձին սենյակներում, իհարկե, բոլոր կանոնների պահպանմամբ։ Մենք իրենց տալիս ենք այդ հնարավորությունը՝ նախապես համաձայնեցնելով, որ տարածքում լինեն թվով շատ քիչ աշխատակիցներ և պահպանվեն ֆիզիկական հեռավորության կանոնները։
ՆԱԽ՝ ԱՇԽԱՏԱԿԻՑՆԵՐԻ ԱՌՈՂՋՈՒԹՅՈՒՆՆ ՈՒ ԲԱՐԵԿԵՑՈՒԹՅՈՒՆԸ
Նախքան Արտակարգ Դրության հայտարարումն ու նույնիսկ դրա առաջին օրերին մենք չունեինք հատուկ մշակված մեթոդաբանություն, թե ոնց պետք է մենք մեզ դրսևորենք ստեղծված նոր ու բավականին մտահոգիչ իրավիճակում։
«ԻՆՉՊԵՍ ՀԱՄԱՃԱՐԱԿԻ ՏԱՐԱԾՄԱՆ ԱՌԱՋԻՆ ՕՐԵՐԻՆ, ԱՅՆՊԵՍ ԷԼ ՄԻՆՉԵՒ ՀԻՄԱ, ՄԵԶ ՀԱՄԱՐ ԱՌԱՋՆԱՅԻՆ ՄՆՈՒՄ Է ՄԵՐ ԱՇԽԱՏԱԿԻՑՆԵՐԻ ԱՌՈՂՋՈՒԹՅՈՒՆՆ ՈՒ WELL-BEING-Ը (ԲԱՐԵԿԵՑՈՒԹՅՈՒՆ)»:
Բարեբախտաբար, շնորհիվ այն բանին, որ մեզ մոտ ճկունությունը ոչ միայն ծրագրեր իրականացնելու ու հաճախորդների հետ աշխատելու մեթոդաբանություն է, այլ նաև արդեն մաս է կազմում մեր կազմակերպության ինքնության որպես որակ, մենք կարողացանք լինել ճկուն, կողմնորոշվել ըստ իրավիճակի, ու առաջնայինը հիմնվելով մեր թիմի well-being-ի ու մեր հաճախորդների ծրագրերի նկատմամբ բարձր պատասխանատվության գիտակցության, միշտ գտնել օրվա համար ամենահարմար լուծումը, ինչը և շարունակում ենք անել մինչև օրս։
ՆԵՐՔԻՆ ՀԱՂՈՐԴԱԿՑՈՒԹՅՈՒՆԸ ԵՎ ՓՈՓՈԽՈՒԹՅՈՒՆՆԵՐԻ ԿԱՌԱՎԱՐՈՒՄԸ
Մենք շատ ենք կարևորում ներքին հաղորդակցությունը ու փորձում ենք անել առավելագույնը՝ հարմարվելու ստեղծված իրավիճակին ու կիրառելու հաղորդակցման նոր հնարներ։ Այսպես, մենք ամենօրյա ռեժիմով շփվում ենք Slack հարթակում։ Հատկապես կարևոր ենք համարում մեր աշխատակիցներին տեղեկացված պահել կազմակերպությունում տեղի ունեցող իրադարձությունների, փոփոխությունների, հաջողությունների ու մարտահրավերների մասին։ Եվ մեծ ուրախությամբ պետք է ասել, որ անցնող երեք ամիսների ընթացքում մեր թիմը մի մարդու նման ցուցաբերել է բարձր որակներ ու միասին հաղթահարել աշխատանքային մարտահրավերները, ամենաբարդ խնդիրներին տվել ամենաառաջատար լուծումները։
Դժվարին ժամանակներում առողջ ու շարունակական հաղորդակցության շնորհիվ է, որ մենք անցնող ամիսների ընթացքում կարողացանք ունենալ կարևոր ձեռքբերումներ, առաջացնել նոր գաղափարներ և շարունակել միասնական աշխատել որպես մեկ մեծ ընտանիք։
Պետք է ասել, որ այս ընթացքում տեղի ունեցան վաղուց հաստատված աշխատանքային պլանների ժամկետային խախտումներ, ֆորմատների փոփոխություններ հաճախորդների հետ, ինչը ժամանակի ազատության տեսանկյունից միշտ չէ, որ մեզ ձեռնտու էր։ Սակայն, պետք է հպարտությամբ արձանագրել, որ մեր թիմն ամեն անգամ պատվով էր դուրս գալիս անգամ ամենաբարդ իրավիճակից։ Սա միայն խոսում է մեր յուրաքանչյուր աշխատակցի գիտակցության բարձր մակարդակի մասին։
CLINSOFT-Ը՝ ՈՐՊԵՍ ԹԻՄԱՅԻՆ ԸՆՏԱՆԻՔ
Երբ թիմակիցները գտնվում են ֆիզիկական նույն տարածքում, միասին ապրում են աշխատանքային առօրյան, կիսում են մարտահրավերների հաղթահարման պատասխանատվությունն ու հաջողությունը, բաժնեկից են դառնում մեկը մյուսի զգացմունքներին, ապրումներին։
«ԱՇԽԱՏԱՎԱՅՐՈՒՄ, ԼԻՆԻ ԱՌԱՎՈՏՅԱՆ ԲԱՐԵՒԵԼՈՒՑ, ԹԵ ԸՆԴՄԻՋՄԱՆ ԺԱՄԻՆ, ԹԵ ՏԱՐԲԵՐ ՊԱՀԵՐԻ, ՄԱՐԴԿԱՆՑ ՄԻՋԵւ ՀԱՂՈՐԴԱԿՑՈՒԹՅՈՒՆՆ ՕՐԳԱՆԱԿԱՆ Է»։
Աշխատանքային քննարկումները կարող են ընդմիջվել ընկերական, ոչ աշխատանքային խոսքով, զրույցով, կատակներով, որոնք, իրենց հերթին, նպաստում են նրան, որ թիմն ընտանիքի նման ապրի նույն մթնոլորտում։ Այդպիսով է, որ իրար անծանոթ աշխատակիցները դառնում են թիմային ընտանիք։ Առցանց շփումը, ինչքան էլ դա ապահովի աշխատանքի պրոֆեսիոնալ կատարումը, չի կարող ստեղծել այդ իրական ու օրգանական մթնոլորտը, որտեղ մարդկային շփումը բնական ձևով զարգանալու հնարավորությունը կունենար։ Այդ բացը լրացնելու նպատակով հնարավորության սահմաններում փորձում ենք ներքին հանդիպումների ընթացքում մի փոքր ժամանակ հատկացնել ոչ աշխատանքային թեմայով զրույցների, հասկանալ ինչ է կատարվում մեզնից յուրաքանչյուրի կյանքում ու կիսել մեկը մյուսի ապրումները։
Ինչքան էլ տնից աշխատանքի գաղափարը գայթակղիչ թվա, մենք արդեն գիտենք, որ Արտակարգ Դրության պայմաններում, երբ ընտանիքի բոլոր անդամները, հատկապես երեխաները տանն են, առաջանում են մի կողմից աշխատանքային ժամերին առանձնանալու ու կենտրոնանալու, մյուս կողմից ընտանիքի կենցաղային կարիքների մասին հոգ տանելու խնդիրները։
«ՄԵՆՔ ԱՌԱՋՆՈՐԴՎՈՒՄ ԵՆՔ ԸՆՏԱՆԻՔԸ ԱՌԱՋՆԱՅԻՆ Է ՍԿԶԲՈՒՆՔՈՎ ՈՒ ՄԵՐ ՀԱՄԱՐ ՊՐՈՖԵՍԻՈՆԱԼԻԶՄԻ ՈՒ ՆՎԻՐՎԱԾՈՒԹՅԱՆ ՉԱՓ ԿԱՐԵՒՈՐ Է ԱՅՆ, ՈՐ ՄԵՐ ԹԻՄԱԿԻՑԸ ՎՍՏԱՀ ԼԻՆԻ, ՈՐ ԻՆՔՆ ԱԶԱՏ Է ՀՈԳԱԼՈՒ ԻՐ ԸՆՏԱՆԻՔԻ ԿԵՆՑԱՂԻ ՄԱՍԻՆ»:
Ու արդեն երեք ամսվա փորձը ցույց է տվել այն, որ մեր այս մոտեցումից մեր աշխատակիցների պրոֆեսիոնալիզմի մակարդակը երբեք չի իջել։
ՕՖԻՍԱՅԻՆ ԿՅԱՆՔԸ ԿՈՎԻԴԻՑ ՀԵՏՈ 🙂
Երևի, առաջինն իրար կբարևենք ջերմ գրկելով։ Ինձ թվում է այդ օրը տոն կլինի մեր գրասենյակում։ Կկիսվենք տնից աշխատելու, ինչպես նաև գրասենյակում միայնակ աշխատելու մեր անհատական փորձառություններով, ապրումներով, կքաղենք համապատասխան դասեր։ Նաև, անպայման կօգտագործենք ֆիզիկապես նույն տարածքում գտնվելու փաստից առաջացած ոգևորվածությունն ու brainstorming-ի մտքերի գրոհի միջոցով կփորձենք գտնել մեր օֆիսային աշխատանքն առավել արդյունավետ ու հաճելի դարձնելու նորարարական մոտեցումներ։
Ամփոփենք ։) Եթե իմանայինք, որ 2020թ․-ին պետք է աշխատենք հիբրիդային ռեժիմով, որոշ օրեր օֆիսից, որոշները՝ տանից, կամ բնության մոտիվացնող միջավայրից, մենք հավանաբար կասեինք, որ որևէ խնդիր չկա, մենք ԿԱՐՈՂ ԵՆՔ, բայց միայն այն դեպքում, եթե ունենանք ClinSoft-ի նման թիմային ընտանիք, ճկունություն ու իրավիճակին ճիշտ ու հարմար լուծումներ տալու ունակություն։
