Ծրագրային ապահովման մշակման ընկերություն DataArt-ն աշխատում է մարդկանց հետ և մարդկանց համար։ Հայաստանյան DataArt-ն ամբողջությամբ որդեգրել է միջազգային ընկերության այդ կարևոր գաղափարախոսությունը և շարունակում է ակտիվորեն զարգացնել այն՝ փորձելով «արտահանել» մարզեր։

staff.am-ը զրուցել է DataArt Armenia-ի փոխտնօրեն, ՄՌԿ տնօրեն Իշխան Մարգարյանի հետ և պարզել, թե ինչ արդյունքներ է գրանցել ընկերությունը նախորդ տարի ու ինչ խոշոր ծրագրեր է պատրաստել 2022թ․-ի համար։


«Առանց սահմանների» գաղափարախոսությունը

«ՏՏ-ն առանց սահմանների գաղափարախոսությունն ամբողջությամբ արտացոլում է DataArt-ի գլոբալ էությունը․ մենք չենք ճանաչում սահմաններ, ազգություններ, սեռական կամ ռասայական պատկանելիություն, կրոնական կողմնորոշումներ և այլն։ Այդ գաղափարախոսության մեջ արտացոլվում է նաև մեր՝ ներառական մոտեցումներին և մշակութային բազմազանությանը հավատարմությունը։ Դա այն է, ինչ DataArt-ը որդեգրել է 25 տարի առաջ և շարունակում է հետևել այսօր։ Այս գաղափարախոսությունն արտացոլում է նաև մեր ամբիցիաներն առաջ գնալու և ամբողջ աշխարհում լինելու, մեր «DataArt մոլորակն» ընդլայնելու։ Բացի այդ, դա նաև արտոնություն է մեր աշխատակիցների համար, որոնք կարող են գնալ աշխարհի ցանկացած կետ, որտեղ կա DataArt, և աշխատել այդտեղից։ Այսինքն՝ քո աշխատանքային պայմանագիրը կարող է լինել Հայաստանի հետ, բայց դու գնաս՝ մեկ ամիս աշխատես Լեհաստանում, այնուհետև՝ Արգենտինայում, և ցանկացած տեղ «DataArt մոլորակում», – ասում է Իշխանը։

DataArt-ն այսօր ներկայացված է աշխարհի 11 երկրում, ընկերությունն ունի 25 գրասենյակ և պլանավորում է ընդլայնել իր աշխարհագրությունը։


Ջնջելով Երևանի և մարզերի սահմանները

DataArt Armenia-ն տարածել է «առանց սահմանների» գաղափարախոսությունը նաև լոկալ շուկայի վրա և նախատեսում է «ջնջել» Երևանի ու մարզերի միջև սահմանները։ Ի՞նչ է դա նշանակում։ 

«Մենք ուզում ենք, որ այլևս չդրվի տարբերություն Երևանի և որևէ մարզի միջև ու ՏՏ-ն առանց սահմանների լինի նաև Հայաստանում։ Դեռևս կներկայանանք երեք մարզկենտրոնում՝ Գյումրի, Վանաձոր և Գորիս, այնուհետև պլանավորում ենք այլ քաղաքներում էլ լինել։ Ուզում ենք նաև զարգացնել ՏՏ ոլորտը մարզերում։ Մենք բազմիցս եղել ենք ՀՀ տարբեր քաղաքներում և լիքը տաղանդավոր, պոտենցիալ ունեցող մարդկանց ենք այդտեղ հանդիպել։ 2019-ին, երբ դեռ նոր էինք սկսում DataArt Հայաստանը, նման գաղափար կար մեր երազանքներում, որովհետև DataArt-ի ՀՀ գալու նպատակը նաև դա էր՝ գալ ու ստեղծել նոր աշխատատեղեր», – պատմում է ընկերության փոխտնօրենը։


Երևանյան պայմաններ, որպեսզի մասնագետները մնան մարզերում

Իշխանի խոսքով՝ մարզերում ընկերության աշխատավարձային քաղաքականությունը երևանյան է լինելու՝ աշխատավարձի չափերը չեն տարբերվելու։

«Կապ չունի՝ դու Գյումրիում ես աշխատում, Երևանում, թե Գորիսում, եթե դու DataArt-ի աշխատակից ես, քո աշխատավարձը նույնն է լինելու, արտոնությունները նույնն են լինելու, մենք տարբերություն չենք դնելու։ Դա անում ենք, որպեսզի մարդիկ ֆինանսական մոտիվացիա չունենան մայրաքաղաք գալու և մնան իրենց մարզերում՝ զարգացնելով դրանք», – նշում է Իշխանը։ 

Նրա խոսքով՝ երբ ընկերությունն ունենա գրասենյակ, օրինակ, Գորիսում, ինքն էլ սիրով ժամանակավոր կտեղափոխվի այնտեղ աշխատելու, քանի որ դա լավ ու հաճելի հնարավորություն է։ Իշխանն օրինակ է բերում Վրաստանի մասնաճյուղը, որի բացումը Հայաստանում հետաքրքրությամբ ընդունեցին, իսկ որոշ մասնագետներ անգամ ցանկություն հայտնեցին ժամանակավոր տեղափոխվելու այնտեղ։

Խոսելով մարզերում մասնագետներ ընտրելու չափանիշներից՝ Իշխանը շեշտում է, որ դրանք ևս կլինեն «առանց սահմանների»՝ նույնը, ինչ Երևանում, Արգենտինայում կամ Ուկրաինայում։ 

«Թերևս, միակ տարբերությունը կլինի onboarding-ի ծրագիրը․ ադապտացիայի ծրագրերն ավելի խորությամբ և ինտենսիվ կանենք, ավելի շատ ժամանակ կտրամադրենք դրան, որովհետև հասկանում ենք, որ մարդկանց համար շատ բան կարող է նորություն լինել։ Երևանում շատ են միջազգային ընկերությունները, և մարդիկ ավելի սովոր են դրանց։ Մարզերում գուցե կարիք լինի մշակութային ավելի խորը կողմնորոշման», – հավելում է DataArt-ի փոխտնօրենը։


DataArt-ն ունի մոտ 80 թափուր հաստիք

«Այս պահին DataArt-ն ունի մոտ 80 թափուր հաստիք։ Այնքան շատ են մեր թափուր հաստիքները, որ staff.am-ում մեր հայտարարություններում, օրինակ, գրում ենք, որ փնտրում ենք Java ծրագրավորող, իրականում մի քանի պրոդուկտի համար ենք փնտրում, և այդ մեկ հայտարարությունը կարող է դառնալ հինգ», – նշում է ընկերության ՄՌԿ տնօրենը։

Ասում է՝ մասնագետների կարիք ունեն մարզերում, սակայն առաջնահերթ կարևորություն են տալիս հենց մարդկանց։

«Նախ և առաջ մենք փնտրում ենք մարդկանց, այնուհետև՝ բոլոր ուղղություններով մասնագետների։ Մեզ պետք են JavaScript ինժեներներ, DevOps ինժեներներ, QA մասնագետներ և այլն։ Իսկ հետագայում, երբ արդեն մարզերում անցնենք գրասենյակային աշխատանքի, կարիք կունենանք նաև ՄՌ մասնագետների», – պատմում է Իշխանը։


2021-ի «դրամատիկ» աճը

Խոսելով այն մասին, թե ինչ աճ է գրանցել ընկերությունը 2021-ին, Իշխանը նախընտրեց նկարագրել այն մեկ բառով՝ դրամատիկ։

«Կարող եմ ասել, որ տարվա ընթացքում մենք 100-150 տոկոսով աճել ենք։ Տարին սկսել էինք աշխատակիցների որոշակի թվով, իսկ փակել՝ արդեն 250-ով։ Այսպիսով կարող եմ ասել, որ իսկապես դրամատիկ աճ ենք ունեցել։ Իսկ 2022-ին պլանավորում ենք ավելի շատ աճել, չենք ուզում կանգ առնել եղածի վրա։ Մենք շատ ամբիցիոզ ենք և ուզում ենք հասցնել հայաստանյան թիմը 500 հոգու այս տարի։ Նոր գրասենյակ ունենք արդեն, որն այժմ վերանորոգում ենք, այդտեղ կտեղավորվի շուրջ 450 հոգի։», – նշում է ընկերության փոխտնօրենը։

Իշխանի կարծիքով՝ մինչև հունիսը նշված երեք մարզկենտրոններից յուրաքանչյուրում ընկերությունը կունենա 22-ական աշխատակից։


«Ջիգյարով» թիմը

Խոսելով այն մասին, թե որ հատկանիշներն են ավելի շատ գնահատում միջազգային գործընկերները հայաստանյան թիմերում, Իշխանն ընդգծում է կապեր հաստատելու իրենց հմտությունը։

«Մենք շատ արագ ենք մարդկանց հետ կապ հաստատում, արագ ենք կարողանում հարաբերություններ ստեղծել, կարողանում ենք առօրյա զրույցներ ունենալ մեր հաճախորդների հետ։ Ես պարբերաբար լսում եմ՝ ինչպես են շփվում մեր աշխատակիցներն իրենց ամերիկացի, բրիտանացի գործընկերների հետ, խոսում են ինչպես ընկերների հետ», – պատմում է Իշխանը։

Նրա կարծիքով՝ հայաստանյան թիմի այդ «ջիգյարով» շփվելու հմտությունը հավելյալ ամուր կապ է ստեղծում թե՛ հաճախորդների, թե՛ գործընկերների հետ, և նպաստում է դրական հետադարձ կապի հաստատմանը։

«Բացի այդ, մեր մասնագետների մեծ մասը շատ ունիվերսալ է, իր նեղ մասնագիտական շրջանակից դուրս ևս գիտելիքներ ունի, ինչը հավելյալ առավելություն է և գնահատվում է միջազգային գործընկերների կողմից», – հավելում է Իշխանը։


staff.am-ն ակտիվորեն հետևելու է DataArt Armenia-ի նոր զարգացումներին և 2022-ի նվաճումներին՝ լուսաբանելով դրանք և ներկայացնելով ձեզ։ DataArt Armenia-ի մարզային հաստիքների դիմումներն արդեն բացված են, ուստի ձեր երազանքների աշխատանքն արդեն կարող եք գտնել Գյումրիում, Վանաձորում կամ Գորիսում՝ առանց մայրաքաղաք տեղափոխվելու անհրաժեշտության։

Powered by staff.am.