ԱՄՆ ամենահեռանկարային տեխնոլոգիական ընկերություններից մեկի՝ DISQO -ի, համահիմնադիր Դրո Քոչարյանը ժամանել է Հայաստան։ Հուլիսի 19-ին DISQO-ն Leadership in Tech նախաձեռնության հետ միասին կազմակերպել էին բացառիկ միջոցառում, որի նպատակն էր բարձրացնել ու քննարկել ՏՏ ոլորտի մասնագետների համար կարևոր ու արդիական հարց՝ «Աճի ի՞նչ հնարավորություններ կան ավագ ինժեների համար»։
Հանդիպման և պանելային քննարկման ընթացքում Դրո Քոչարյանը, ինժեներական թիմի տնօրեններ Ռուբեն Դիլանյանը և Հարություն Բաղդասարյանը քննարկել են Հայաստանում senior+ մակարդակի մասնագետների աճի հնարավորությունները, ընդգծել այն հեռանկարները, որոնք բացվում են տեխնոլոգիական ոլորտում ավագ մակարդակի հասած մասնագետի համար:
Դրո Քոչարյանը «Staff ինժեներ. առաջնորդություն ղեկավարման ուղուց այն կողմ» թեմայով ելույթի ընթացքում ներկայացրեց ավագ ինժեների աշխատանքային կարիերայի զարգացման հեռանկարները և զարգացման այլընտրանքային մոտեցումը, որի արդյունքում ավագ ինժեները կարող է արդյունավետորեն ստանձնել տեխնիկական ղեկավարի դեր: Նրա ելույթին հաջորդեց DISQO-ի ղեկավար թիմի մասնակցությամբ պանելային քննարկում, որը վարում էր Armenian Code Academy-ի (ACA) համահիմնադիր և գործադիր տնօրեն Նարեկ Ասլիկյանը:
«Ես շատ ուրախ եմ, որ այս միջոցառման համատեքստում մենք համագործակցում ենք Armenian Code Academy-ի հետ, հատկապես, որ այն վերաբերում է առաջնորդությանը։ Միջոցառման նպատակն է աջակցել ավագ մասնագետների աճին ու զարգացմանը ողջ Հայաստանում», – նշեց Քոչարյանը։
Նրա խոսքով՝ Հայաստանի DISQO-ի տեխնոլոգիական թիմում ևս կան ավագ մասնագետներ, որոնք հաջողությամբ հետևում են ներկայացված մոդելին:
Ինչպես հավելեց DISQO-ի ծրագրավորման թիմի ղեկավար Հարություն Բաղդասարյանը, որը ևս միջոցառման բանախոսներից էր, ընկերությունում ավագ մասնագետների աճի թեման չափազանց արդիական է:
«Հայտնի է, որ որոշակի մակարդակի հասնելուց հետո մասնագետների առջև հարց է ծառանում՝ ինչպես շարունակել իրենց հետագա զարգացումը, ինչպես ռեալիզացնել իրենց ոլորտում՝ չլճանալով ու շարունակելով աճել։ Այս խնդիրն արդիական է նաև DISQO-ի համար։ Երբ սկսեցինք այս թեման քննարկել մեր թիմի ավագ մասնագետների ապագայի համատեքստում, հասկացանք, որ այնքան արժեքավոր ու կարևոր նյութ է հավաքվել, որ արժե դրանով կիսվել ոլորտի նաև այլ ընկերությունների ու մասնագետների հետ։ Դա համընկավ նաև Դրոյի՝ Հայաստան այցի հետ, և որոշեցինք համատեղել ու կազմակերպել նման օգտակար միջոցառում», – ասած Բաղդասարյանը։
Նա հավելեց, որ DISQO-ի նպատակն է հասնել այնպիսի մակարդակի, որ թիմում senior+ մասնագետների և մենեջերների քանակը հավասար լինի։
DISQO-ի հայաստանյան գրասենյակի ղեկավար Թանիա Սահակյանը նշեց, որ ընկերությունն իր ավագ մասնագետներին տալիս է աճելու տարբեր հնարավորություններ և, գնահատելով յուրաքանչյուր ավագ մասնագետի ցանկությունները, ձգտումները և soft հմտությունները, առաջարկում է նրան հետագա զարգացման իր ուղին:
Խոսելով թեմայի կարևորության մասին՝ միջոցառման մոդերատոր Նարեկ Ասլիկյանը նշեց, որ առաջնորդության թեման շատ արդիական է և հատկապես ՏՏ ոլորտում դրա վերաբերյալ քննարկումների անհրաժեշտությունը զգացվում է։
Միջոցառումը հնարավորություն տվեց վերհանել ոլորտի համար մեծ նշանակություն ունեցող հարցեր։ Միջոցառման ավելի քան 130 մասնակից՝ ավագ ինժեներները և ոլորտի մասնագետները թե՛ DISQO-ի թիմից, թե՛ այլ ընկերություններից, հնարավորություն ունեցան լսելու Դրո Քոչարյանի մոտիվացնող և հետաքրքիր ելույթը, մասնակցելու արդիական թեմայի շուրջ քննարկմանը, իսկ այնուհետև անկաշկանդ միջավայրում շարունակելու շփումը ոլորտի լավագույն մասնագետների հետ՝ ձեռք բերելով նոր ծանոթություններ և ամրապնդելով հները։
DISQO-ն պարբերաբար անցկացնում է միջոցառումներ՝ ուղղված ոլորտի զարգացմանը և մասնագետների աշխատանքային միջավայրի ու կյանքի որակի բարելավմանը։ Ավագ մասնագետների հետագա աճի և առաջնորդության թեմայով միջոցառումները ևս կարող են շարունակական դառնալ՝ նպաստելով Հայաստանի ՏՏ ոլորտում ևս մեկ կարևոր հարցի լուծմանը։
Armenian Code Academy-ն առաջատար կրթական հաստատություն է, որը հիմնադրվել է Երևանում 2015 թվականին։ ACA-ի առաքելությունն է գիտելիքների և հմտությունների փոխանցումը ուսանողներին՝ իրենց փորձին, ունակություններին և կրթական նպատակներին համապատասխան։
Leadership in Tech (LIT) Academy-ն Armenian Code Academy-ի նախաձեռնությունն է, որի նպատակն է լրացնել հայկական SS ոլորտում առկա առաջնորդության բացերը` որակյալ առաջնորդության զարգացման ծրագրերի միջոցով։
DISQO-ն հաճախորդների փորձառության հարթակ է, որը հնարավորություն է տալիս ինչպես փոքր և միջին, այնպես էլ մեծ ընկերություններին ճիշտ որոշումներ կայացնել: Այն օգնում է փորձարկել և չափել յուրաքանչյուր պրոդուկտի և բրենդի հետ հաճախորդի ունեցած փորձառությունը։ Անցած տարի ընկերությունը նոր ներդրողներ է ներգրավել և ամփոփել ներդրումների 2-րդ փուլը (Series B):
DISQO-ի հաճախորդների թվում են ավելի քան 300 համաշխարհային բրենդներ, մարքեթինգային հետազոտություն իրականացնող 125 խոշոր ընկերություններ, 35 առաջատար գովազդային գործակալություններ և ավելի քան 20 մեդիա հարթակ։
DISQO-ն արագ զարգացող «Lավագույն 100 տեխնոլոգիական ընկերությունների» շարքում է և ունի շուրջ 500 աշխատակից ողջ աշխարհում։ DISQO-ի առաքելությունն է նպաստել հայկական տեխնոլոգիական համայնքի զարգացմանը:
