Երևան, Հրաչյա Քոչար 4
Flux Technologies-ը համեմատաբար երիտասարդ ՏՏ ընկերություն է, թերևս մեր այցելած ընկերություններից ամենաերիտասարդը։ Երիտասարդ, բայց միևնույն ժամանակ կայացած և դինամիկ զարգացման իրենց ուղին հստակ պատկերացնող թիմ, որը սկիզբ է առել 2015-ից` կազմված լինելով ընդամենը 3 մասնագետից, իսկ այժմ ունի արդեն 20-ից ավելի աշխատակիցներ։ 3 ժամից ավելի անցկացրեցինք Ֆլաքսի գեղեցիկ և ընդարձակ գրասենյակում, զրուցեցինք հիմնադիրների և մասնագետների հետ, խոսեցինք Ֆլաքսի հետաքրքիր միջազգային նախագծերի, թիմային հետաքրքիր ավանդույթների մասին և լիքը լուսանկարվեցինք (Flux-ում, ի դեպ, լուսանկարվել շատ են սիրում 🙂 , վայելեցինք գրասենյակից բացվող Երևանի գեղեցիկ տեսարանն ու մայրամուտը և ահա պատրաստվում ենք ձեզ հետ կիսվել ևս մեկ հաջողության պատմությունով, որը հավատացած ենք, որ կոգևորի շատերիդ։
Դե ինչ, սկսենք։ 
Գոռ Վարդանյան, Chief Executive Officer
Արմեն Մշեցյան, Chief Technology Officer
Զրույցը սկսեցինք ընկերության հիմնադիր Գոռի հետ, ով նաև հանդիսանում է ընկերության տնօրենը։ Գոռին խնդրեցինք ներկայացնել ընկերությունը։
– Ֆլաքսի հիմնադրման գաղափարը դեռևս 5-6 տարի առաջ էր ի հայտ եկել, և միտքը մի այնպիսի հարթակի ստեղծումն էր, որը թիմակիցներին կտա առավելագույն հնարավորություն ստեղծելու միշտ նորը և մաքսիմալ խենթը 😉 Կարծում եմ, որ մեզ դա հաջողվել է և դեռ ամեն ինչ առջևում է այդ ապացուցելու համար։ Flux Technologies-ը հիմնադրվել է 2015 թվականին, երբ մեր առաջին Project Manager Սոնան միացավ և սկսեցինք ուրվագծել Ֆլաքսի ապագան:
Գոռը նշեց, որ Flux-ը տրամադրում է ՏՏ ոլորտում նորարարական լուծումներ իր բազմապրոֆիլ հաճախորդներին։ Լուծումների շարքին են պատկանում ինչպես բիզնեսի ավտոմատացման և ռեսուրսների էֆեկտիվ կառավարման համար նախատեսված համակարգերը, այնպես էլ նորաստեղծ կազմակերպությունների հետ համագործակցությունը, գեր նորարարական մտքերի իրականացումը տեխնոլոգիական ամենատրենդային լուծումներով։
– Կարծում եմ՝ որպես պահանջված գործատու, հենց բազմապրոֆիլ գործունեությունն է հանդիսանում Flux -ի հաջողության գրավականներից մեկը. մեր թիմակիցները ունեն գրեթե անսահման հնարավորություն նորագույն տեխնոլոգիաներում իրենց ուժերը փորձելու և նոր մարտահրավերներ նետելու համար։
Flux-ի մասին խոսեցինք նաև համահիմնադիր թիմի անդամ և ընկերության CTO (Chief Technology Officer – Տեխնոլոգիաների գծով տնօրեն) Արմենի հետ։
– Կուզենամ հատկապես նշել, որ մեր ընկերությունում կրտսերից-ավագ ծրագրավորող բոլոր մակարդակներում գտնվող մասնագետների համար էլ կա անելիք, կա մասնագիտական աճի հնարավորություն և նոր տեխնոլոգիաներ կիրառելու ազատություն։ Սա շատ գրավիչ է կարծում եմ, և, երևի թե, մեր ընկերության հաջողության գրավականներից մեկը, քանի որ 3 տարին դեռ չենք բոլորել, իսկ արդեն կարող ենք ասել, որ ունենք կայացած tech team և զարգացման հստակ ծրագրեր, որոնց վրա մեր թիմը հիմա ակտիվորեն աշխատում է։
Արմենը նշեց նաև, որ ի շնորհիվ գնահատման համակարգի, ունեն հնարավորություն գնահատել նաև իրենց թեկնածուներին և կայացնել որոշում՝ արդյոք թեկնածուն համապատասխանում է տվյալ որևէ հաստիքի պահանջներին, թե՝ ոչ, անգամ եթե թեկնածուն մասնագիտացած է իրենց անծանոթ տեխնոլոգիայում։
Մեր հաջորդ զրուցակիցը Լիլիթն է, ով հանդիսանում է QA` Որակի կառավարման թիմի անդամ։ Լիլիթին հարցրեցինք, թե ինչպես է գործատուն նպաստում մասնագիտական աճին․ թրեյնինգներ, meetup-ներ և այլն: Արդյո՞ք աշխատակիցը հնարավորություն ունի սովորել նոր տեխնոլոգիա և հմտանալ վերջինիս մեջ։
-Flux-ին միացել եմ մի քանի ամիս առաջ, այս պահին Automation QA-ով եմ զբաղվում, բավականին շատ բան եմ այստեղ սովորել այս կարճ ժամանակահատվածում, մասնակցել եմ նաև Automation QA-ի հատուկ երկամսյա թրեյնինգի, իսկ թիմին միանալուց առաջ Manual QA-ի մասնագետ էի։ Այսինքն, ընդամենը մի քանի ամսվա ընթացքում իմ մասնագիտական որակավորումը զգալիորեն աճել է։ Սովորելու ընթացքում շատ մեծ աջակցություն եմ ստացել մեր CTO-ի, ինչպես նաև մյուս ծրագրավորողների կողմից։
Լիլիթից տեղեկացանք, որ բացի այն, որ մասնագետները հնարավորություն ունեն մասնակցելու թրեյնինգ մատուցող ընկերությունների կողմից կազմված թրեյնինգներին, ուսուցման և մենթորության կայացած մշակույթ կա նաև ընկերության ներսում։
Օրինակ, նոր ընդունված բոլոր մասնագետներն ունեն իրենց մենթորները, ովքեր առաջին 3 ամիսների ընթացքում աջակցում են նորեկներին և հավաստիանում, որ նրանք լավագույնս ինտեգրվում են թիմին։
– Չնայած Flux-ին միանալու շատ կարճ ժամանակահատվածին, ես ինձ ֆլաքս-օրգանիզմի մի մասն եմ համարում։ Միշտ բաց եմ նոր ու հետաքրքիր գաղափարների, համարձակ մարտահրավերների առաջ, կոմպետենտ մասնագետներ, հրաշք թիմակիցներ, որ պատրաստ են ամեն պահի օգնության հասնել՝ բացատրել, սովորեցնել։ Վառ, գունավոր, ուրախ. էսպիսին է Ֆլաքս-ը։ Անձամբ ինձ համար հատկապես կարևորում եմ ընկերության ներդրումը որակապես նոր գիտելիքներ ստանալու հարցում, որի արդյունքում ես ձեռք եմ բերել աճ, մասնագիտական ինքնավստահություն, զգացում, որ ընկերությունն ունի իմ կարիքը և ես ունեմ ընկերության կարիքը, և թրեյնինգի արդյունքում ստացածս գիտելիքները Ֆլաքսի հետագա առաջխաղացման մեջ ներդնելու մեծ ցանկություն։ Ուրախ եմ, որ Ֆլաքսում եմ, ուրախ եմ, որ ֆլաքսիանին եմ, ինչպես մենք ենք ասում ։)
Լիլիթից տեղեկացանք, որ Ֆլաքսիանին դառնալն այդքան էլ դյուրին բան չէ, և ընկերությունում հետաքրքիր ավանդույթ կա փորձաշրջանը հաջողությամբ ավարտած թիմակիցների համար։ Ահա այսպես են նրանք <<կնքվում>> որպես Ֆլաքսիանին։
– Փորձաշրջանի ավարտին մեր թիմը յուրաքանչյուր մասնագետի համար որևէ հետաքրքիր <<փորձություն>> է կազմակերպում։ Օրինակ, իմ դեպքում թիմը շատ լավ բան էր մտածել։ Քանի որ ես QA (որակի կառավարման) մասնագետ եմ, և իմ աշխատանքի բուն էությունը կայանում է bug-եր, այսինքն անճշտություններ գտնելը, ապա Ֆլաքսիանին կնքվելու իմ challenge-ն էլ համահունչ էր մասնագիտությանս 🙂 Մեր թիմակիցների բոլորի սեղաններին եղած իրերը խառնել էին և բաժանել տարբեր տեղեր, օրինակ` մեր ՄՌԿ ղեկավարի սեղանին գտնվող լուսանկարը հայտնվել էր ծրագրավորողներից մեկի սեղանին և այլն։ Իմ խնդիրն էր բնականաբար բացահայտել բոլոր bug-երը և սեղանների իրերը վերադասավորել այնպես, որ ամեն ինչ իր ճիշտ տեղերում լինի։ Իսկապես հետաքրքիր և զվարճալի փորձություն էր, ես էլ բավականին լավ հաղթահարեցի այն և դարձա Ֆլաքսիանին:
Մեր հաջորդ զրուցակիցը Սոնան է, ով հանդիսանում է Flux-ում Production manager։ Սոնային հետևյալ հարցը տվեցինք, ինչո՞ւ Flux, ինչ առավելություններ է ընկերությունը տալիս հատկապես նախագծերի և պրոդուկտի կառավարման մասնագետներին։
– Այստեղ ազատ ենք, ստեղծագործ և չկան սահմաններ ոչ մի առումով, մենք սիրում ենք սովորել, փորձել ինքներս մեզ տարբեր ոլորտներում, զարգանալ և աճել որպես մասնագետ։ Ընդ որում` այս մոտեցումը գալիս է հենց մեր ընկերության հիմնադիրներից, ում հետ սերտորեն աշխատում ենք և շատ բան ենք սովորել մեկս մյուսից այս ընթացքում։ Միանշանակ կարող եմ ասել, որ ցանկացած նոր նախագծից հետո թիմն ավելի ու ավելի է հմտանում իր գործում, քանի որ նախագծերն էլ շատ տարբեր են, ապա երբեք միապաղաղություն չենք զգում, նաև այսքան տարբեր նախագծերի առկայությունը թույլ է տալիս մեզ անընդհատ նոր տեխնոլոգիաների մեջ խորանալ, սովորել և կատարելագործվել։ Եթե ամփոփենք, որպես թիմի project և product manager ինձ համար շատ կարևոր է ունենալ այս հնարավորությունը աշխատել հետաքրքիր ու բազմատեսակ նախագծերի շրջանակներում, հետևել որակական չափանիշներին և մասնակցել նախագծման գործընթացներին։ Միշտ ոգևորիչ է նախագծել մի բան և հետո տեսնել այն իրական կյանքում։ Ամեն վայրկյան լավացնում ու թարմացնում ենք մեր աշխատանքային պրոցեսները, ինչը ևս հանդիսանում է իմ աշխատանքի մի մասը և վստահ կարող եմ ասել, որ կազմակերպությունը հավատարիմ է իր “անվանը”` միշտ հոսում ենք առաջ 😉
Սոնա, յուրաքանչյուր ընկերություն ունի իր ուրույն team spirit և culture ասվածը: Կարո՞ղ եք նկարագրել Flux Technologies-ի culture-ը Ձեր պատկերացմամբ:
– Ֆլաքսը ինձ համար ավելին է, քան ուղղակի կազմակերպություն։ Քանի որ այստեղ եմ այն պահից, երբ կազմակերպությունն իր առաջին քայլերն էր կատարում, այնպես որ յուրաքանչյուր հաջողություն դա իմ անձնական հաջողությունն է և ես շատ եմ գնահատում նրա դերն իմ կյանքում։
– Ֆլաքսն ունի իր յուրահատուկ թիմային ոգին և մշակույթը, որը մեծ դեր ու նշանակություն ունի կազմակերպության հաջողության գործում։ Յուրաքանչյուրս ունենք մեծ հնարավորություններ առաջ գնալու և աճելու որպես մասնագետներ և ունենք ընդհանուր գաղափարախոսություն կերտելու որակ և պրոֆեսիոնալիզմ յուրաքանչյուրս մեր մասնագիտական ճյուղի մեջ և միասին՝ որպես մեկ ամբողջական թիմ։
– Կաղապարված չենք և ամեն վայրկյան ինքներս կերտում ենք մեր հաջողությունը՝ հիմնվելով լավագույն փորձի և նորարարությունների վրա, ունենալով միշտ կողքներիս այն մասնագետը, ումից կարելի է սովորել ավելին։
– Մշակութային առանձնահատկություն եմ համարում թիմի համախմբվածությունն ու պատրաստակամությունը անտարբեր չլինելու ընկերությունում իրականացվող բոլոր ծրագրերի և միմյանց առաջընթացի հանդեպ։ Գովելի և գնահատելի է նաև մասնագիտական որակի բարձր սպասելիքներն ու դրսևորումները։ Եվ ամենակարևորը՝ կազմակերպությունը չի վախենում վստահել Քեզ, ինչն էլ փոխադարձ վստահություն է հաղորդում յուրաքանչյուրիս լինել ամեն օր ավելի լավը, քան երեկ։
Մեր հաջորդ զրուցակիցը Վիգենն է, ով Flux Techbnologies-ում տեխնիկական թիմի ղեկավար է։ Վիգենի հետ զրույցը սկսեցինք` թիմում նոր մասնագետների հավաքագրման առանձնահատկությունների մասին խոսելով։
– Շատ մեծ կարևորություն ենք տալիս նրան, թե մասնագետն ինչքան խորքային է ուսումնասիրել այն նյութը, որով ներկայանում է։ Այսինքն` տեխնիկական բնույթի հարցերի նպատակը նաև հասկանալն է, թե ինչքան մանրամասնորեն է մասնագետը ուսումնասիրել տվյալ տեխնոլոգիայի բոլոր առանձնահատկությունները։ Շատ հաճախ վերոնշյալ հատկանիշներն ավելի ենք կարևորում, քան միայն գիտելիքների առկա մակարդակը։
– Իսկ ինչ վերաբերվում է արդեն մեր թիմակիցների մասնագիտական աճին և զարգացմանը, ապա ունենք ներդրված համակարգ, որն օգնում է մեզ ոչ միայն սահմանել տվյալ մասնագետի համար զարգացման ուղին և նպատակները, այլ նաև դրանց պարբերական դիտարկման և գնահատման արդյունքում, հավաստիանալ, որ մասնագետը շարունակաբար կատարելագործում է իր գիտելիքներն ու հմտությունները, ուսումնասիրում է նոր տեխնոլոգիաներ, նոր մոտեցումներ, կիրառում է ոլորտի ինովացիաները։
Վիգենին հարցրեցինք նաև, թե որն է համարում իր աշխատանքի ամենահետաքրքիր, իսկ որն ամենադժվար և մարտահրավերներով լի մասը:
– Գործս առհասարակ հետաքրքիր եմ համարում, որովհետև շատ քիչ բնագավառներ կան, որոնք նման հնարավորություններ և անհրաժեշտ ռեսուրսներ են քեզ տալիս՝ առավելագույնս ցուցաբերելու քո ունակությունները: Ամենահետաքրքիրը գործիս մեջ թերևս համարում եմ թիմի անդամների հետ ժամանակ առ ժամանակ մարտահրավերների հաղթահարումը, որոնք առաջին հայացքից անիրագործելի են թվում, ու միասին այդ “հաղթանակը” վայելելու զգացողությունը, իսկ մեր բնագավառում դրանք, բարեբախտաբար, քիչ չեն, ու ձանձրանալ ուղղակի թույլ չեն տալիս:
– Ամենադժվարը, թերևս, համարում եմ առաջադրանքը ժամանակին ու արագ իրագործելուց զատ ապահովել նաև այն որակը, որին ձգտում ենք ու որը հուսով եմ օրեցօր բարելավում ու բարձրացնում ենք, թեև վերջնական օգտագործողի տեսանկյունից երբեմն տարբերությունը կարող է զգալի չլինել: Ինքս շատ եմ կարևորում գրագետ աշխատանքը ու տրված լուծումների օպտիմալ լինելը: Դժվար, բայց հետաքրքիր է նաև նախագծել պրոդուկտը ու դա անել այնպես, որպեսզի ծրագրավորման ոչ մի փուլում առաջ չգան խնդիրներ, որոնք նախագծման պահին հաշվի չեն առնվել:
Վիգենի հետ ամփոփեցինք մեր զրույցը թվարկելով այն տեխնոլոգիաները, որոնց մեջ ընկերությունը մասնագիտացած է։
– Ակտիվորեն օգտագործում ենք JavaScript-ի տարբեր Framework-ներ, ինչպես front-end-ի այնպես էլ back-end-ի համար (Angular.js, React.js, Express, Sails JS և այլն)։ PHP Framework-ներից օգտագործում ենք Laravel, Symphony, Yii2, տվյալների բազաներից՝ MYSQL, PostrgreSQL, MongoDB:
Վիգենից տեղեկացանք նաև, որ անգլերենի իմացությունը նույնպես բավականին մեծ կարևորություն ունի ընկերությունում, հաշվի առնելով միջազգային հաճախորդներին, այդ իսկ պատճառով ընկերության արտոնություններից մեկը հենց անգլերեն լեզվի դասընթացներն են, որոնք կազմակերպվում և լիովին փոխհատուցվում են ընկերության կողմից։
Մեր հաջորդ զրուցակիցը Գևորգն է, ով նույնպես տեխնիկական թիմի ղեկավար է Flux-ում։
– Թիմին միացել եմ անցյալ տարվա վերջին՝ որպես mid-level developer: Նոր նախագծերից մեկի համար անհրաժեշտ էր ուսումնասիրել այդ ժամանակ ինձ անծանոթ PHP Framework։ Իսկ արդեն ընդամենը մի քանի ամիս անց, ես հաջողությամբ ավարտեցի բավականին ծավալուն մի պրոյեկտ օգտագործելով ինձ համար այդ նոր տեխնոլոգիան, որի պատվիրատուն Շվեյցարիայից է։ Իսկ այժմ արդեն սկսել եմ ուսումնասիրել JavaScript տեխնոլոգիաներ, որոնց շնորհիվ կներգրավվեմ նաև այլ բնույթի նախագծերում։
Գևորգին խնդրեցինք հակիրճ նկարագրել Flux-ը։
Ֆլաքսը կարող եմ նկարագրել չորս բառով.
– Ճկունություն, անընդհատ փորձում ենք նորարար տեխնոլոգիաներ ներդնել, որոնք օգնում են ավելի արագ արձագանքել փոփոխություններին։
– Կատարելագործում՝ գիտելիքների և փորձի փոխանակում գործընկերների հետ։
– Թիմային աշխատանք և ոգի՝ հաճախ կազմակերպում ենք միջոցառումներ, որոնք ամրացնում և առավել մտերիմ են դարձնում թիմակիցների հարաբերությունները, սկսում ես նրանց ավելի լավ ճանաչել, ինչն օգնում է աշխատանքի ընթացքում։
– Հնարավորություն՝ ընկերությունը տեսնելով քո գիտելիքները, պոտենցիալը հնարավորություն է տալիս առաջխաղացման։
Լյուսի, Business Development Specialist
Անի, Talent Acquisition and Organization Development Manager
Արաքսն արդեն մոտ 1 տարի է աշխատում է Flux Technologies-ում։ Արաքսն, ի դեպ, staff.am-ի հետ համագործակցող QuickStart ծրագրի շրջանավարտ է, և ավարտելով <<Նախագծերի կառավարման>> թրեյնինգը միացել է թիմին որպես նախագծի ղեկավար։ Արաքսի հետ խոսեցինք իր աշխատանքի առանձնահատկությունների մասին։
Արաքսից տեղեկացանք, որ ընկերությունն օգտագործում է Agile մեթոդոլոգիայի Scrum Framework-ը կամ պրոյեկտից կախված Kanban Framework-ը։
– Մինչև Ֆլաքսում աշխատանքի անցնելն ընդամենը մոտավոր պատկերացում ունեի, թե ինչ է իրենից ներկայացնում project manager -ի աշխատանքը։ Իրականում մեր կազմակերպությունում դա շատ կարևոր օղակ է, որը պատասխանատու է բազմազան ասպեկտների համար՝ թիմի աշխատանքի կոորդինացման, հաճախորդի հետ կապի, համակարգի վերլուծության ու արդյունավետ լուծումներ առաջարկելու համար։ Այսինքն, դա այն օղակն է, որը պատասխանատու է որակով պրոդուկտ մշակելու և այդ ընթացքը կազմակերպելու համար։ Իրականում պրոյեկտ մենեջերի աշխատանքն ինչքան պատասխանատու, այնքան էլ հետաքրքիր ու բազմազան է, որովհետև ես հնարավորություն եմ ունենում աշխատել տարբեր մարդկանց հետ թիմում և թիմից դուրս։ Հնարավորություն եմ ունենում նաև բազմազան պրոյեկտների մեջ ներգրավված լինելու, որոնք իրենց տեսակով տարբեր են ու տալիս են բազմաբնույթ գիտելիքներ։ Օրինակ, եթե պրոյեկտը ֆինանսական համակարգի շրջանակում իրականացվող պրոյեկտ է, ձեռք ես բերում գիտելիքներ այդ ոլորտում, եթե օրինակ հիվանդանոցի մենեջմենթի համար է իրականցվում պրոյեկտը, հետևաբար ձեռք ես բերում համապատասխան հատուկ գիտելիքներ ու այդպես շարունակ․․․ չես հասցնում ձանձրանալ: Այս ամենն օգնում է անընդհատ զարգանալ, սովորել ու ընդարձակել մտահորիզոնը։
Մեր հաջորդ զրուցակիցը Լյուսին էր, ով Ամերիկյան Համալսարանի նորավարտ է՝ Բիզնեսի զարգացման մասնագետներից է։
– Չունենալով բազային գիտելիքներ ՏՏ ոլորտի վերաբերյալ` Ֆլաքսում ինձ հաջողվեց շատ կարճ ժամանակում ձեռք բերել անհրաժեշտ գիտելիք, որն ինձ թույլ է տալիս ազատ հաղորդակցվել ՏՏ հարթակում, ընտրել և գնահատել ընկերության չափորոշիչներին համապատասխան պրոյեկտներ և հանդես գալ համագործակցության առաջարկով։ Իրականում, արդեն աշխատելով ավելի քան 7 ամիս Flux-ում, համոզվել եմ, որ ՏՏ ոլորտն իսկապես ինձ շատ հոգեհարազատ է, քանի որ երբեք չես դադարում սովորել, ոլորտն ինքը բավականին դինամիկ զարգացում է ապրում, և կարևոր չէ ծրագրավորող ես, նախագծի ղեկավար, թե բիզնեսի զարգացման մասնագետ։
staff.am-ի միջոցով Flux Technologies-ի թափուր աշխատատեղի բոլոր հայտարարությունները շատ պոպուլյար են լինում: Ընկերության Talent Acquisition and Organization Development Manager (ՄՌԿ ղեկավար) Անի Ռշտունու հետ խոսեցինք, թե ինչ չափանիշներով եք առաջնորդվում աշխատակից ընտրելիս:
– Մինչ օրս, այո ձեր հարթակի միջոցով շատ թեկնածուներ ենք ունեցել և համալրել թիմը, ինչի համար շնորհակալ ենք և համարում ենք մեր համագործակցությունը հաջողված, վստահ ենք այն կլինի շարունակական,- նշեց Անին, ապա շարունակեց։
– Բավականին բծախնդիր կերպով ուսումնասիրում ենք բոլոր ստացված CV-ները։ Հանդիպում եմ առաջինը ես, որպես ՄՌԿ, իսկ երկրորդ փուլում արդեն հարցազրույց է տեխնիկական թիմի ղեկավարների հետ։ Այս 2 հանդիպումներից հետո, որոնք նաև կարող են 2-ը 1-ում լինել, տեղի է ունենում ամենակարևոր փուլը մեզ համար, մենք մասնագետին հրավիրում ենք մեր գրասենյակ թեսթային առաջադրանքի համար։ Անչափ կարևորում ենք հավաքագրման և համալրման գործընթացի արագ և արդյունավետ լինելը, ռեքրութմենթի ամբողջ ընթացքում էլ. նամակագրության մեջ ենք թեկնածուի հետ՝ տալով հետադարձ կապ յուրաքանչյուր փուլի ավարտին, և փորձում ենք հավաքագրման ժամանակահատվածը հասցնել նվազագույնի, որպեսզի այն չանցնի 10 օրը։
Անին նշեց, որ նոր թափուր հաստիք համալրելիս ունեն հստակ սահմանված չափորոշիչներ։
– Գնահատման գործոններ, որոնցով առաջնորդվում ենք, բայց այդ ամենից զատ շատ ենք կարևորում այն ներքին «կայծը»՝ «դրայվը», որը ցույց է տալիս թեկնածուի մոտիվացիան, մեզ միանալու և աշխատանքն իրականացնելու ցանկությունը։
Գնահատում են՝
Աշխատանքն իրականացնելու մոտիվացիան,
Թիմային հմտությունները,
Մշակութային համապատասխանությունը,
Բնավորություն եւ արժեքներ,
Պոտենցիալը։
Վերոնշյալ գործոնների համապարփակ գնահատականը տալիս է մեզ որոշում կայացնելու հնարավորություն՝ արդյոք համապատասխանում ենք միմյանց, թե՞ ոչ։
Թիմային միջոցառումներ
Թիմային միջոցառումները մեզ ներկայացրեց ընկերության ՄՌԿ ղեկավար Անի Ռշտունին։
– Մենք կազմակերպում ենք մի շարք միջոցառումներ, որոնք ուղղված են աշխատակիցների զարգացմանը, մասնավորապես փորձի փոխանակման, մենթորության ժամերի իրականցման ֆորմատով, կամ ներքին/արտաքին թրեյնինգների/coaching սեսիաների կազմակերպմամբ։
Անին նշեց, որ հիմնականում ոչ ֆորմալ բնույթի միջոցառումները ունեն մեկ առաջնային նպատակ, այն է՝ կորպորատիվ մշակույթի ամրապնդումը , թիմային հմտությունների զարգացումը, որոնք նրանց օգնում են լինել ավելի միասնական և հաղթահարել բոլոր գործնական խնդիրները առավել առողջ մթնոլորտում։
– Բացի վերը նշվածից, արդեն ավանդույթ դարձած Flux Day-եր ունենք, որոնք յուրաքանչյուր ամսվա ֆիքսված օրն ենք նշում։ Չնայած մեր հարմարավետ գրասենյակի պայմանների, որտեղ մեզ համար ստեղծված են գրեթե բոլոր պայմանները ոչ միայն արդյունավետ աշխատանքի, այլ նաև աշխատանքից դուրս հանգստի կամ միջոցառման կազմակերպման համար, այդուհանդերձ մենք Ֆլաքս դեյերը նշում ենք անպայման ողջ թիմով, բայց գործնական մթնոլորտից դուրս ամենատարբեր ձևաչափերում՝ կարտինգ քշել, պարել, խեցգետնի և գարեջրի երեկո, բոուլինգի մրցաշար, ինչպես նաև մուլտ կամ կինոդիտումներ, հեծանվային արշավ, արտագնա մի քանի միջոցառում, փեյնթդբոլ ենք խաղալու շուտով, և լեռնագնացության ենք պատրաստվում։
– Կուզեմ ներկայացնել նաև մեր ավանդույթներից ևս մեկը՝ որպես կորպորատիվ մշակույթի և միջոցառումների անբաժան մաս։ Յուրաքանչյուր նոր աշխատակից հնարավորություն ունի «կնքվելու» և կոչվելու իրական Ֆլաքսիանին, երբ նրա՝ մեզ հետ բարեհաջող համագործակցությունը դառնում է ուղիղ երեք ամսական։ Օրվա հերոսը անակնկալ որևէ փորձություն է հաղթահարում, որի արդյունքում ստանում է մեր ավանդական կորպորատիվ տորթը և ստանում Ֆալքսիանինի կոչում։
Employer Branding-ի կարևորությունը շատ է քննարկվում այսօր: Նույնիսկ այնպիսի ընկերություններ, որտեղ շատերն են ցանկանում աշխատել, ունի Employer Branding-ի կարիք: Կասե՞ք՝ ինչպիսի՞ն է Flux Technologies-ի մոտեցումն այս հարցին:
Անին նշեց, որ Flux Technologies ընկերության մոտեցումն այս հարցին հետևյալն է՝
– Մենք գիտակցում ենք, որ մեր օրերի շուկայական մրցակցությունն արդեն հասել է այն կետին, երբ գործատուներն ուղղակի ունեն մեծ աշխատանք տանելու հենց իրենց՝ գործատուի բրենդավորման հարցում։ Մենք դա սկսել ենք մեր ներքինից՝ մի շարք միջոցառումներ իրականացնելով, բիզնես պրոցեսներ ներդնելով, հարմարավետ պայմաններ ստեղծելով։
– Մենք հասկանում ենք, որ մենք ենք մեր բրենդի առաջնային ներկայացուցիչները և, նախ և առաջ, մենք պետք է մեզ այնքան ուրախ ու հաջողակ զգանք մեր աշխատավայրում, որ ցանկություն ունենանք ամենուրեք տարածելու մեր ընկերության մասին՝ որպես «ցանկալի գործատու» և հենց դրա համար էլ ունենք արդեն նաև ռեֆեռալ ծրագիր. մեր աշխատակիցների ուղղորդությամբ բազում դիմորդներ ենք ունենում։ Աշխատում ենք գործատուի բրենդավորման վրա արտաքին մարքեթինգի ուղղությամբ նույնպես։
Արտոնություններ
Արտոնություններ մասին շարունակեցինք զրույցը Անիի հետ։
– Մեզ համար առաջնային է մեր թիմակիցների աշխատանքից բավարարվածությունը և ուրախ լինելը, ընդհանուր հարմարավետությունը, մասնագիտական արդյունավետությունը և առաջխաղացումները, ուստի այդ ամենի համար աշխատում ենք ստեղծել հավելյալ պայմաններ՝ լրացուցիչ առաջարկելով նաև օգտվել մեր արտոնությունների փաթեթից՝
Մեր թիմին միացող յուրաքանչյուր նոր անդամ ունի հնարավորություն աշխատելու ուժեղ պրոֆեսիոնալ թիմի անդամների հետ։
Նոր մասնագիտական հմտություններ ձեռք բերելու հարցում պրոֆեսիոնալ թիմից բացի նպաստում է ժամանակակից տեխնոլոգիաներով իրականացվող ամենատարբեր ոլորտների և բիզնես լուծումներ պահանջող պրոյեկտները։
Ընկերությունում ներդրված է աշխատավարձի վերանայման ֆիքսված համակարգ, որը հնարավորություն է տալիս լինել մրցունակ, իսկ վերջինիս վերանայումները տեղի են ունենում աշխատակիցների գնահատման կատարողականների արդյունքների հիման վրա։
Անգլերենի դասընթացներ ենք ֆինանսավորում և կազմակերպում գրասենյակում, քանզի կարևորում ենք անգլերեն լեզվի լավ իմացությունը՝ հաշվի առնելով, որ աշխատում ենք արտերկրյա հաճախորդների հետ։
Իհարկե, աշխատավարձից զատ հաճելի է ունենալ նաև պարգևավճարներ, որոնք տրամադրում ենք աշխատակիցներին` խրախուսումների և/կամ նվեր քարտերի տեսքով (պրոյեկտների բարեհաջող իրականացման արդյունքում խրախուսումներ, referral բոնուսներ, ծննդյան տոներ, ամուսնության, երեխայի ծննդյան կապակցությամբ և այլն։
Մասնագիտական աճի և զարգացման համար կազմակերպում ենք և հնարավորություն տալիս մասնակցելու վերապատրաստման ներքին և արտաքին ծրագրերի։
Ինչպես տեսնում եք ունենք ժամանակակից, ուրախ և հարմարավետ գեղեցիկ տեսարանով գրասենյակ։
Միշտ ունենք անսահմանափակ սուրճ, թեյ, քաղցրավենիք։
Անին նշեց, որ մեծ կարևորություն տալով նաև ուսանողների կարիերայի ընտրության և աջակցման հարցին, ինչպես նաև թիմում ունենալով ուսանողներ, ովքեր համատեղում են ուսում /աշխատանք, տրամադրում են աշխատանքային ճկուն գրաֆիկ ուսանողների համար:
– Շեշտ ենք դնում թիմային հմտությունների և թիմային աշխատանքի կարողության վրա, ուստի ընկերության կողմից հովանավորվում են տարբեր թիմային կորպորատիվ միջոցառումներ։
Անին նշեց նաև, որ ընկերությունում ճկուն են դեյ օֆֆերի տրամադրման քանակի հարցում, ինչպես նաև տրամադրում են լրացուցիչ վճարովի դեյ օֆֆեր հիվանդության դեպքում: Տենդերային փուլում է աշխատակիցների և նրանց ընտանիքների անդամների բժշկական ապահովագրության տրամադրման գործընթացը։
FLUX—ը՝ նկարներում
Դե ինչ ամփոփենք․
Երիտասարդ, խելացի, լուսավոր ու մի քիչ էլ խենթ 🙂 այ այսպես կնկարագրեինք Ֆլաքսիանինների այս հրաշք թիմին։ Հավատարիմ մնալով իրենց անվանը՝ Flux, որը կարելի է նկարագրել որպես – միշտ առաջ գնացող, հոսող` այս թիմն իսկապես դինամիկ մեծանում է՝ հավաքագրելով և ինչու չէ նաև կրթելով ծրագրավորողների նոր սերունդ։ Գեղեցիկ և հարմարավետ գրասենյակում, որտեղ ոչ պակաս հաճելի է նաև աշխատանքային մթնոլորտը, մարդիկ ամեն օր աշխատում են իրենց հաճախորդներին հնարավորինս լավագույն տեխնոլոգիական լուծումներ տրամադրելու համար։ Եվ ինչպես իրենք են ասում, յուրաքանչյուր նոր նախագիծ, յուրաքանչյուր նոր երկրից հնարավորություն է սովորելու և ինքնակատարելագործվելու։ Դե ինչ, մեզ մնում է միայն մաղթել այս երիտասարդ ընկերությանը հետագա զարգացում, ընդլայնում և նոր հաղթանակներ։
Ի դեպ․
Flux Technologies-ը հրավիրում է իր թիմ տաղանդավոր մասնագետների, ովքեր արդեն լինելով լավագույններից իրենց ոլորտում՝ չեն դադարում իրենց մասնագիտական հմտությունները և անձնային որակներն էլ ավելի զարգացնել։ Ապագա Ֆլաքսիանին, այս թիմը քեզ է սպասում 🙂
