Եթե մտովի վերհիշենք, մոտ 10 տարի առաջ ֆրիլանս մասնագետ ընդունելը շատ անսովոր ու ոչ ընդունված պրակտիկա էր մեր հասարակությունում։ Ավելին, գործատուները միայն փնտրում էին կես դրույք կամ լրիվ դրույք զբաղվածությամբ աշխատակիցներ։ Իսկ այսօրվա աշխարհը թելադրում է աշխատանքի ու աշխատաձևի նոր հնարավորություններ թե գործատուներին, թե մասնագետներին։ ՏՏ ոլորտի զարգացումը, թվային տեխնոլոգիաների ներդրումը մեր առօրյա կյանքում լիովին փոխեց պատկերը։ ֆրիլանսինգը աշխատաշուկայում հաստատուն դիրք զբաղեցրեց ու շարունակում է բարձրանալ պահանջարկի սանդղակով։
2020 թվականին էլ համավարակով պայմանավորված բումային աճ տեղի ունեցավ այս ոլորտում։ Ըստ 2020թ․ վիճակագրության, Fortune 500 ընկերությունների շուրջ 33%-ը անցում է կատարել ֆրիլանս աշխատակիցների հավաքագրմանը։ Ընդ որում, ֆրիլանս աշխատանքների 45%-ը ծրագրավորման, մարքեթինգի, խորհրդատվության և այլ մասնագիտական ոլորտներում են։
Նույն տենդենցը նկատելի է նաև Հայաստանում․ 2020թ․-ը փոխեց ՀՀ աշխատաշուկայի պատկերը․ թե տեղական, թե արտասահմանյան առաջատար ընկերությունները, որոնք անգամ չունեն գրասենյակներ Հայաստանում, staff.am հարթակի միջոցով սկսեցին հավաքագրել նաև ֆրիլանս մասնագետների՝ կարևորելով հայերի տեխնիկական ներուժը։ Մասնավորապես, 2020թ․-ից մինչ այսօր մեկ տարվա ընթացքում staff.am հարթակում տեղադրվել է 100-ից ավելի ֆրիլանս աշխատանք։
Իսկ ի՞նչ եք կարծում, որո՞նք են ֆրիլանսի առավելությունները գործատուների համար։ Մի քանի առավելություններ մենք առանձնացրել ենք, կարող եք նաև կիսվել ձեր կարծիքներով մեկնաբանություններում։
ՖՐԻԼԱՆՍԻ ԱՌԱՎԵԼՈՒԹՅՈՒՆՆԵՐՆ ԸՆԿԵՐՈՒԹՅՈՒՆՆԵՐԻ ՀԱՄԱՐ
ՀՄՈՒՏ ՄԱՍՆԱԳԵՏՆԵՐԻ ՆԵՐԳՐԱՎՈՒՄ
Ֆրիլանսերը կարող է հեշտությամբ լրացնել այն հմտության բացը, որն այս պահին ունեք Ձեր կազմակերպությունում։ Օրինակ, եթե Ձեզ անհրաժեշտ է լոգոյի կամ կայքի հատուկ դիզայն, ապա կարող եք աշխատանքի ընդունել ֆրիլանս մասնագետի, ով կզբաղվի միմիայն այդ առաջադրանքով և կտրամադրի որակյալ աշխատանք։
ՌԵՍՈՒՐՍՆԵՐԻ ՆԵՐԳՐԱՎՈՒՄ
Եթե տարածքի խնդիր ունեք գրասենյակում, և մտածում եք, թե ինչպես բաշխել ռեսուրսները, որպեսզի կարողանաք համակարգիչ ու այլ սարքավորումներ տրամադրել ձեր նոր աշխատակցին, կարող եք դիտարկել ֆրիլանս աշխատակից ընդունելու տարբերակը։
ԱՇԽԱՏԱՆՔԻ ԱՐԱԳՈՒԹՅՈՒՆ
Շատ դեպքերում կան նախագծեր, որոնք հապճեպ իրագործում են պահանջում, իսկ նոր աշխատակցի ընդունումը կարող է ավելի երկար ժամանակ պահանջել․ շատ թղթաբանություն, պայմանագրեր, վերապատրաստում։
Ֆրիլանսերի հետ այս աշխատանքը շատ ավելի արդյունավետ կարող եք իրականացնել և ավելի կարճ ժամանակահատվածում։ Այլ կերպ ասած, նոր աշխատակցի ընդունումը կարող է տևել շաբաթներ, քանի որ ընտրում եք այն թեկնածուին, ով ունի անհրաժեշտ հմտություններ և համապատասխանում է Ձեր ընկերության մշակույթին, մինչդեռ ֆրիլանսերի դեպքում Ձեր ուշադրության կենտրոնում են հիմնականում հմտությունները։ Այսպիսով, ֆրիլանսերին կարող եք աշխատանքի վերցնել հաշված ժամերի կամ օրերի ընթացքում։
Եթե ամփոփենք, իհարկե, շատ կարևոր է թիմային աշխատանքն ու առհասարակ նոր աշխատակիցների ներգրավումը թիմում, սակայն Ֆրիլանսը ոչ թե գալիս է փոխարինելու այս աշխատաձևին, այլ լրացնելու այն բացը, որը կարող է մեծ հաջողություններ ապահովել Ձեր կազմակերպության համար ու օգնել հասնել ամբիցիոզ նպատակներին։
