staff.am-ը՝ «Մարզերի Հզորացումը Բարձր Տեխնոլոգիաների Խթանմամբ» համաժողովի աջակից

Այս նոյեմբերը խոստանում է շատ ակտիվ լինել, իսկ staff.am-ում ոգևորվածությունը կրկնակի է, քանի որ այս ամիս մենք նշում ենք մեր հարթակի առաջին տարեդարձը։ Բայց այս անդրադարձն ամենևին էլ մեր ծննդյան մասին չէ։

Մի քանի ամիս առաջ էինք սկսել Գյումրու Տեխնոլոգիական Կենտրոնի մեր գործընկերների հետ այս համաժողովի քննարկումները, իսկ այժմ արդեն նախապատրաստական աշխատանքների մեջ ենք և մեծ սիրով սպասում ենք «Մարզերի Հզորացումը Բարձր Տեխնոլոգիաների Խթանմամբ» երկօրյա համաժողովին։ Իսկ staff.am-ի ներգրավածության և այլ մանրամասների մասին ներկայացրել ենք ստորև:

Համաժողովի մասին

Ձեռնարկությունների ինկուբատոր հիմնադրամը և Գյումրու տեխնոլոգիական կենտրոնը ՀՀ կառավարության, Շիրակի մարզպետարանի, Գյումրու քաղաքապետարանի հետ համատեղ Հայ Օգնության Ֆոնդի և Եվրոպական միության ու Գերմանիայի տենտեսական համագործակցության և զարգացման դաշնային նախարարության կողմից համաֆինանսավորվող և ԳՄՀԸ-ի կողմից իրականացվող «Աջակցություն ՓՄՁ զարգացմանը Հայաստանում» ծրագրի աջակցությամբ, ս.թ. նոյեմբերի 17-18-ին, Գյումրիում առաջին անգամ կազմակերպում են «Մարզերի Հզորացումը Բարձր Տեխնոլոգիաների Խթանմամբ» խորագրով երկօրյա համաժողով:

Համաժողովը կհյուրընկալի ոլորտով հետաքրքրված թվով 140 երիտասարդների՝ ՀՀ բոլոր մարզերից /յուրաքանչյուր մարզից 15 մասնակից/:

staff.am-ի ներգրավվածությունը

Մեծ հպարտությամբ հայտնում ենք, որ staff.am-ը հանդիսանում է համաժողովի աջակից կազմակերպություն։ Իսկ նոյեմբերի 18-ին, ժամը 11:30-13:00 staff.am-ի համահիմնադիր Լուիզա Ավետիսյանը Գյումրու տեխնոլոգիական կենտրոնում կվարի աշխատարան (Workshop) մարզերից ժամանած մասնակիցների համար հետևալ թեմայով՝ «Ինքնակենսագրականների և ուղեկցող նամակների պատրաստում և հարցազրույցի արվեստ»։

Մարզային զարգացումն, ու առհասարակ մարզերի հետ սերտորեն համագործակցելըam-ի օրակարգում է։ Մեր կազմակերպությունը շատ է կարևորում մարզային ընդգկրվածությունը ՀՀ աշխատաշուկայում։ staff.am-ի հետ համագործակցող շատ գործատուներ, որոնք ունեն մասնաճյուղեր և գրասենյակներ մարզերում, հաճախ հանդիպում են դժվարությունների որակյալ կադրեր ներգրավելիս ,- նշեց staff.am համահիմնադիր Լուիզա Ավետիսյանը,- «Մարզերի Հզորացումը Բարձր Տեխնոլոգիաների Խթանմամբ» համաժողովը մեզ հնարավորություն կտա մեր փոքրիկ ներդումն ունենալ աշխատաշուկայի զարգացման մեջ այս անգամ մարզային ներգրավվածությամբ։

«Վստահ ենք, որ համաժողովին մարզային երիտասարդության մասնակցությունը, նրանց կողմից Գյումրիում տեխնոլոգիական զարգացման ուղղությամբ արձանագրված հաջողության պատմություններին ծանոթանալը, ինչպես նաև տեղական ու միջազգային փորձագետների ներգրավմամբ կամակերպվելիք աշխատաժողովներին մասնակցությունը, մեծ խթան կհանդիսանա երիտասարդների համար՝ մուտք գործել տեխնոլոգիական ոլորտ, դառնալ հաջողակ ձեռներեցներ, նպաստել աշխատատեղերի ստեղծմանն ու ընդհանուր կենսամակարդակի բարձրացմանը››,

նշում է Ձեռնարկությունների ինկուբատոր հիմնադրամի տնօրեն Բագրատ Ենգիբարյանը:

Գյումրու տեխնոլոգիական կենտրոնի բիզնես ղեկավար Ամալյա Եղոյանը նշեց․

«Ինչպես հայտնի է, ՀՀ կառավարության կողմից երկրի տնտեսության զարգացման գերակա ճյուղ հայտարարված ՏՏ ոլորտի զարգացմանն ուղղված ծրագրերի շրջանակում խիստ կարևորվում է ՀՀ մարզերում տեխնոլոգիական զարգացմանն ուղղված նախաձեռնությունների իրականացումը, ինչը ոչ միայն ուղղված է մարզերից մասնագիտական արտահոսքի կանխարգելմանը, այլև մարզերի ընդհանուր սոցիալ-տնտեսական վիճակի բարելավմանն ու մրցունակության բարձրացմանը: Այս նպատակով նախաձեռնեցինք համաժողովը, որը հարթակ կհանդիսանա վեր հանել ոլորտի հիմնախնդիրները մարզերում, նպաստել մարզերում բիզնես միջավայրի ստեղծմանը՝ ցույց տալով Շիրակի ՏՏ ոլորտի հաջողված փորձը»:

Համաժողովի մասնակիցները

Համաժողոի երկու օրերն էլ հագեցած են լինելու հետաքրքիր քննարկումներով և workshop-ներով։ Կազմակերպիչները հետաքրքիր քննարկումներ, պրեզենտացիաներ և workshop—ներ են նախատեսել, որոնց ընթացքում իրենց փորձով կկիսվեն տարբեր ոլորտներում առաջատար մասնագետներ և փորձագետներ՝

• ՀՀ կառավարությունից
• Հայաստանում ԵՄ պատվիրարկության համագործակցության բաժնից
• Համաշխարհային բանկի Հայաստանի գրասենյակից
• «Ձեռնարկությունների Ինկուբատոր» հիմնադրամից
• «Աջակցություն ՓՄՁ զարգացմանը Հայաստանում» ծրագրից

Ծրագրի մանրամասներին կարող եք ծանոթանալ Համաժողովի պաշտոնական ֆեյսբուքյա էջում,  իսկ գրանցվելու համար հետևեք այս հղմանը՝ https://www.eventbrite.com/e/empowering-regions-through-hightech-conference-tickets-39367126134

Սիրով սպասում ենք մեր հանդիպմանը։