Ինչպես գտնել աշխատանք ՀՀ-ում 2024-ին

2077

«Ինչպես գտնել աշխատանք ՀՀ-ում», «Մրցակցությունն ախր այնքա՜ն շատ է», «Ինձ կվերցնե՞ն», «Ինքնակենսագրականս ո՞նց ճիշտ ներկայացնեմ», «Աշխատանքային փորձ չունեմ»,«Արդեն ո՞րերորդ դիմումս է, չեմ էլ հիշում», «Երևի մի դուռ կբացվի»։ Ծանո՞թ մտքեր են։
Երբևէ աշխատանք որոնած մարդիկ գիտեն՝ աշխատանքի փնտրտուքների ճանապարհին պահանջվում է լուրջ պատրաստվածություն ոչ պակաս, քան բուն աշխատանք գտնելիս։
Առաջարկում ենք երկար-բարակ պրպտումների  փոխարեն ընթերցել գործնական մի քանի քայլեր, որոնք վստահաբար կլինեն օգտակար:

Քայլ 1․ Ուսումնասիրել աշխատաշուկան

Աշխատանքի որոնման հարթակներ մուտք գործելով և անցնելով աշխատանքային առաջին հայտարարություններով՝ կարծես թե պարզ է դառնում՝ որոնք են ամենապահանջված մասնագիտությունները, սակայն մանրակրկիտ և խորքային պատկերացում կազմելու համար առաջարկում ենք ուսումնասիրել staff.am-ի ՀՀ աշխատաշուկա 2023 վիճակագրությունը:
Ամենապահանջված մասնագիտությունների թոփ 5-ն, օրինակ, գլխավորում են բանկային, վարկային, վաճառքի, սպասարկման, ծրագրավորման, մարքեթինգի, ադմինիստրատիվ ոլորտները։

Եթե այս հոդվածը կարդում եք մարզերից, ապա հնարավոր է ձեզ հետաքրքրի, թե որ մասնագիտություններն են մարզերում ամենապահանջվածները․ առաջին թոփ եռյակում ներառված են բանկային, վարկային, վաճառքի սպասարկման կազմակերպման և կրթության ոլորտները։

Աշխատանք փնտրելուց առաջ անհրաժեշտ է նախ հստակեցնել ձեր ցանկություններն ու հնարավորություններն ինչպես մասնագիտական ոլորտի, այնպես էլ հաստիքի մակարդակի (կրտսեր, միջին, ավագ), զբաղվածության տեսակի (հեռահար, կես-դրույք, ամբողջ դրույք) և այլն։ Հստակ տարորոշումը կօգնի ձեզ ֆիլտրել ու արագ գտնել ձեր նախընտրած տարբերակը։

Կարևոր է իմանալ
Մեր մասնագիտական հմտություններից զատ՝ ընկերությունները կարևորում են նաև անձնային որակները, որոնք աշխատաշուկայում հայտնի են՝ որպես «սոֆթ» կամ փափուկ հմտություններ:
Ըստ վիճակագրության՝ որպես «սոֆթ» հմտություն, գործատուների կողմից խրախուսվում է զարգացնել հետևյալ որակները․ ժամանակի կառավարում, թիմում աշխատելու ունակություն, խնդիրների լուծում, բանակցային հմտություններ, մանրուքներին ուշադրություն և այլն։
«Իսկ ինչու՞ է սա կարևոր»,- կհարցենք դուք։ Բանն այն է, որ աշխատաշուկան և հաստիքներն ուսումնասիրելիս, միայն մասնագիտական հմտությունները բավարար չեն ցանկալի աշխատանք գտնելու համար, անհրաժեշտ է ուսումնասիրել նաև փափուկ հմտությունները։

Քայլ 2․ Թարմացնել СV-ն կամ ստեղծել նորը

Աշխատանքի որոնման հարթակներում որոնեցիք, ֆիլտրեցիք, գտաք ձեր ցանկալի աշխատանքը, կարդացիք հայտարարությունը և ի ուրախություն ձեզ՝ հմտությունների մեծ մասը համընկնում է ձեր պատրաստվածության հետ։ Այժմ պետք է դիմեք հաստիքին։
Այս տողերն ընթերցելիս, ըստ երևույթին, որոնում եք համակարգչի մի խուլ անկյունում պահպանված CV-ն, նույն ինքը՝ ինքնակենսագրականը։ Ոմանք դեռ նոր պետք է այն կազմեն, իսկ ոմանք էլ՝ թարգմանեն մի լեզվից մյուսն ըստ գործատուի պահանջի, իսկ ժամանակը, գիտենք, ոսկի է։

«4С» դասընթացը

Հարմար տեղավորվեք․ հիմա խոսելու ենք պրոֆեսիոնալ և գրագետ CV կազմելու մասին, որը փաստացի ձեր այցեքարտն է աշխատաշուկայում։
Ստորև ներկայացրել ենք CV-ի ճիշտ և ընդունված կառուցվածքը:

1․ Վերնագիր, 
2․ CV-ի նպատակ կամ ամփոփում,
3․ Մասնագիտական փորձ,
4․ Ուսում,
5․ Հմտություններ։

CV-ն պետք է լինի PDF ֆորմատով, առավելագույնը՝ բաղկացած երկու էջից, լինի առանց տառասխալների, հեշտ ընթեռնելի, իսկ տառաչափը՝ 12։ Լեզվի ընտրության հարցում առաջնորդվեք հաստիքի պահանջով։ Եթե հայտարարության լեզուն հայերենն է, ապա տրամաբանական է, որ ինքնակենսագրականն էլ լինի հայերենով։ Խորհուրդ է տրվում խուսափել չափից շատ գույներ և ուշադրությունը շեղող լրացուցիչ նշաններ ու դիզայնի տարրեր օգտագործելուց։
Ցանկալի չէ կիրառել QR կոդեր էլեկտրոնային CV-երում, քանի որ այն կարող է բարդացնել դրա դիտարկումը։ Մեծ հավանականությամբ մասնագետը ձեր CV-ին ծանոթանալու է համակարգչով, ինչը QR կոդը սքանավորելու համար լրացուցիչ հարմարանքից օգվելու անհրաժեշտություն կառաջացնի։ 

Քայլ 3․ Ստեղծել կամ թարմացնել ձեր օնլայն CV-ն մասնագիտական հարթակներում

Էլեկտրոնային եղանակով ուղարկվող CV-ի մեկ այլ տարբերակ է oնլայն գրանցումը, որը բավական հեշտացնում է ինչպես ձեր, այնպեսէլ ՄՌԿ մասնագետի գործը․ փնտրում եք ոչ միայն դուք, այլև գործատուներն են որոնում ձեզ։
Ունե՞ք, օրինակ, staff.am-ում ձեր անձնական էջը, լրացրեք այն ամբողջությամբ։ Մուտք գործելով staff.am-ի վեբ հարթակ կամ ներբեռնելով մոբայլ հավելվածը, կգտնեք «Դիմորդի համար» բաժինը։
Գրանցվելով որպես թեկնածու՝ նշել ձեր փորձը, կրթությունը և հմտությունները։ Այս հարթակի առավելությունն այն է, որ փնտրում եք ոչ միայն դուք, այլ նաև գործատուն է փնտրում ձեզ, հիմնվելով այն բանալի բառերի վրա, որոնք դուք նշել եք ձեր մասնագիտական, կրթական և այլ տեղեկատվության համար նախատեսված դաշտերում։

Հաջորդ օգտակար գործիքը Linkedin-նն է, որտեղ նեթվորքինգ ստեղծելու և ընդլայնելու լայն հնարավորություն ունեք ինչպես տեղական աշխատաշուկայում, այնպես էլ՝ միջազգային։ 
Ի տարբերություն staff.am-ի՝ Հայաստանում Linkedin-նն առավել շատ օգտագործվում է՝ որպես նեթվորքինգային ու սոցիալական հարթակ՝ նպաստելով անձի բրենդավորմանն ու տալիս հնարավորություններ՝ կիսվելու հետաքրքիր մտքերով ու նյութերով։ Այստեղ առավել քիչ են  հանդիպում հայկական աշխատաշուկայում որոնվող այսպես կոչված «ռելեվանտ» (համապատասխան) աշխատանքները։

Կարևոր է իմանալ․
Խորհուրդ չի տրվում ֆեյսբուքյան և նմանատիպ այլ սոցիալական ցանցերում տեղադրված անանուն հայտարարության տակ դնել +` հույս ունենալով գտնել երազանքի աշխատանքը։

Քայլ 4․ Առանձնացնել և ուսումնասիրել ցանկալի գործատուներին

Աշխատանք փնտրելիս, նախ պետք է հստակեցնել ձեր նպատակները, ակնկալիքները կարիերայի հարցում՝ հասկանալու, թե որ ընկերությունն է համապատասխանում ձեզ։ Աշխատնքի մեջ ճիշտ կողմնորոշվելու համար անհրաժեշտ է մանրակրկիտ ծանոթանալ գործատուին, նույնիսկ ընկերության կորպորատիվ մշակույթին։ Ծանոթացեք ընկերության ներկայացվածությանը սոց․ հարթակներում, ինչպես նաև ուսումնասիրեք վեբ կայքը (առկայության դեպքում)։
Բավական է Google որոնողական համակարգում նշել կազմակերպության անվանումը, և ամբողջ տեղեկատվությունը կհայտնվի ձեր առջև։ 

Ինչպես գտնել աշխատանք ՀՀ-ում 2024-ին։

Մեկ այլ տարբերակ է staff.am-ը, որտեղ գրանցված է ավելի քան 5000 գործատու։ «Ընկերություններ» բաժնում փնտրեք տվյալ կազմակերպությունը, կամ առկա ֆիլտրերի միջոցով նեղացրեք փնտրման շրջանակը, օրինակ`ընտրելով բոլոր ՏՏ ընկերությունները, որոնք այս պահին ակտիվ հավաքագրում են կատարում։

Թափուր հաստիքին դիմելիս կարևոր է նախապես պատրաստված լինել։ Օրինակ, եթե հաստիքի վերաբերյալ հայտարարությունն առաջացնում է որոշակի հարցեր, կարող եք կապ հաստատել տվյալ կազմակերպության հետ և ուղղել ձեր հարցը։

Երբ նախընտրելի գործատուն այս պահին չունի ձեր որակավորումներին համապատասխան թափուր հաստիք, կարող եք հետևել ընկերության կարիերայի էջին staff.am-ում։ Նախընտրելի է հետևել նաև ընկերության կայքէջին․ հիմնականում այնտեղ նույնպես հրապարակվում են թափուր հաստիքները, ինչպես նաև հետևել ընկերությանը սոց․ հարթակներում։ 

Կարող եք բաժանորդագրվել նաև staff.am-ում՝ ընտրելով ձեր նախընտրած կատեգորիան, հմտությունը և անգամ ընկերությունը։ Այսպիսով դուք պարբերաբար տեղեկանում եք աշխատանքի հնարավորությունների մասին՝ համապատասխան ձեր նախապատվություններին։

Ընկերության կորպորատիվ մշակույթին ծանոթանալու արդյունավետ գործիք է նաև staffmedia.am-ը, որտեղ լուսաբանվում են լավագույն գործատուներն ու նրանց ընձեռած հնարավորությունները, կազմակերպած միջոցառումներն ու թիմային աշխատանքները։ 

Ուսումնասիրությունը կարող եք կատարել նաև Linkedin սոցիալական հարթակի միջոցով։ Այս հարթակում կազմակերպությունների ղեկավարները, ՄՌԿ մասնագետները, աշխատակիցները կիսվում են մասնագիտական նյութերով, օգտակար գրառումներ են կատարում։ 

Քայլ 5․ Հետևել դիմումի ընթացքին

Մի պահ պատկերացրեք, որ ՄՌԿ մասնագետը հենց դուք եք և դիմորդին հարցազրույցին հրավիրելիս հանկարծ պարզում եք, որ վերջինս անգամ չի էլ հիշում, թե որ հաստիքի համար էր դիմել։ Ինչպիսի՞ն կլիներ ձեր վերաբերմունքը։ Իհարկե, բացասական։
Նմանատիպ խնդրահարույց իրավիճակներից խուսափելու համար խորհուրդ է տրվում գրի առնել որևէ էլեկտրոնային  ֆայլում բոլոր ձեր դիմումները և անհրաժեշտության դեպքում արագ վերանայել։
Նշենք, որ, օրինակ, staff.am-ով հաստիքին դիմելիս ձեր դիմումների պատմությունը պահպանվում է։ Սա նշանակում է, որ հարցազրույցի գնալիս, կարող եք բացել մեր վեբ կամ մոբայլ հարթակները, ևս մեկ անգամ կարդալ աշխատանքի նկարագրությունը և պատրաստված ներկայանալ հարցազրույցին։

Քայլ 6․ Տրամադրել ժամանակ հարցազրույցին պատրաստվելու համար

Ինչպես արդեն նշվեց, շատ կարևոր է մանրամասն ուսումնասիրել տվյալ կազմակերպության կարիերայի էջը staff.am-ում, ընկերության կորպորատիվ մշակույթը staffmedia.am-ում և գործատուի կայքէջը։ Աշխատանք որոնելու ճանապարհին սա պայմանական անվանենք «տնային աշխատանք», իսկ հարցազրույցից առաջ գործատուի կողմից միմիայն խրախուսելի է, երբ կատարված է «տնային աշխատանքը»։ Սա կօգնի, որ հավաքագրման մասնագետներին ուղղեք ավելի հասցեագրված հարցեր, ցույց կտա ձեր պատրաստվածության աստիճանը։ Հարցազրույցին մասնակցելուց առաջ ուշադիր կարդացեք տվյալ թափուր հաստիքին առաջադրված պահանջները, որպեսզի պատկերացնեք հարցերն ու ձեր պատասխանները։ 

Անգամ եթե ձեր կարծիքով չեք համապատասխանում նշված պահանջներին կամ աշխատանքը չեք կարող կատարել, միևնույնն է գնացեք, քանի որ հարցազրույցին հրավիրելով ձեր մեջ տեսնում են  պոտենցիալ։ 
Խորհուրդ է տրվում նաև կազմակերպության մասին հարցեր հղել Ձեզ ծանոթ ու վստահելի այն մարդկանց, որոնք աշխատում են տվյալ կազմակերպությունում։ Սա ևս կօգնի առավել տեղեկացված գնալ հարցազրույցի։

Հարցազրույցին ներկայացեք ոչ շատ շուտ, ոչ շատ ուշ։ Ուշանալու կամ չներկայանալու դեպքում անպայման տեղեկացրեք։ Հարցազրույցին ներկայացեք կոկիկ ու խնամված տեսքով։

Հարցարզույցից հետո մերժում ստանալու դեպքում, մի՛ մոռացեք քաղաքավարության մասին և մի՛ ցուցադրեք ձեր ցասումը, ինչքան էլ անարդար թվա դիմացինի որոշումը։ Հիշեք, որ դա ձեր կյանքի վերջին հարցազրույցը չէր և կենտրոնացեք պատճառների վրա։ Նման մոտեցումը հաստատ կօգնի ձեզ ինքնակատարելագործվել։ Կարող եք նաև ի պատասխան մերժման նամակի կամ զանգի՝ հարցնել, թե ինչ մասնագիտական կամ սոֆթ հմտություն էր պակասում ձեզ իդեալական թեկնածու լինելու համար։

Քայլ 7․ Պատրաստ լինել նորը սովորելուն

Արագ ու դինամիկ զարգացող աշխարհում դժվար է բավարարվել մեկ մասնագիտությամբ և վստահ լինել, որ այն միշտ կլինի պահանջված։ Ուստի, նորմալ է երբեմն փոխել ոլորտը, ունենալ բազմամյա աշխատանքային փորձ, բայց ինչ-որ պահից նորից սկսել 0-ից։

Օրինակ, երկար տարիներ աշխատել եք՝ որպես թարգմանիչ, սակայն արհեստական բանականության դարաշրջանն այժմ ձեզ ստիպում է սովորել նաև այլ մասնագիտություն։ Այս դեպքում աշխատանքային փորձի կուտակումը նոր ոլորտում, փաստացի, սկսվում է նորից։

Բաց եղեք հնարավորությունների առջև․ վերապատրաստումներ, պրակտիկաներ, կամավորական կամ ցածր վարձատրվող աշխատանքներ։ Սրանք այն մեկնարկային կետերն են, որնց արդյունքում կդառնաք փորձառու մասնագետ և սկսնակ մակարդակից գուցե շատ ավելի արագ վերաճեք միջին և ավագ մասնագետի։ Անգամ պահանջված ոլորտի փորձառու մասնագետները կարիք ունեն պարբերաբար վերապատրաստվելու և կատարելագործվելու։
Հայաստանն ուղղակի հագեցած է ինչպես հեռահար, այնպես էլ առկա ուսուցման ծրագրերով և մասնագիտական աճին միտված նախագծերով։
Բաց մի՛ թողեք այս հնարավորությունները։

Ինչպես աշխատանք գտնել

Ամփոփենք․ Ինչպես գտնել աշխատանք ՀՀ-ում 2024-ին

Վստահ ենք, որ այժմ ձեր տրամադրությունը փոխվեց։ Դարձաք ավելի վստահ, դրական ու պատրաստ նոր հնարավորություններին ու անելիքներին։
Այս թեմայի շուրջ ասելիքը շատ է, սովորելունը նույնպես։ Այդ իսկ պատճառով մենք մի ամբոջղ դասընթաց ենք պատրաստել, որը կոչվում է 4C (Complete Career Certification Course)։ Դասընթացն անվճար է  և օնլայն։ Ավելի քան 30 ժամ տևողությամբ այս գիտելիքի աղբյուրը բաց թողնել պետք չէ։

Իսկ մեզ մնում է միայն մաղթել, որ այս տարի բոլորդ գտնեք ձեր երազանքի աշխատանքը։ Ի դեպ, այս հղումով էլ գուցե հենց դա ստացվի։