Շաբաթվա գիրքը | Աստղիկ Սահակյան․ «Նախագծերի կառավարում»

991

staffmedia.am-ը շարունակում է ներկայացնել արդեն շատ սիրված «Շաբաթվա գիրքը» շարքը։ Նախորդ անգամ ներկայացրել ենք Ռոբին Շարմայի «Հրովարտակ՝ ուղղված ժամանակակից հերոսին» գիրքը։ Այն դիտարկել ենք մեր գործընկեր Բուկինիստի հետ համատեղ։ Շարման հետաքրքիր ու իրատեսական հայացք է նետել հերոսի ընդհանրական կերպարին, որն, ըստ հեղինակի, կարող էր դառնալ մեզնից յուրաքանչյուրը հետևողականության ու աշխատասիրության շնորհիվ։
Այս շաբաթվա գիքրը տարբերվում է նախորդներից, քանի որ այս անգամ անդրադարձել ենք հայ հեղինակի կողմից գրված աշխատությանը։ Դիմավորեք Նախագծերի կառավարման փորձագետ, թրեյներ և արդեն գրող Աստղիկ Սահակյանին, ով «Նախագծերի կառավարում» թեմայով առաջին հայալեզու գիրքն է հրապարակել այս փետրվարին։
Մասնագիտական հայալեզու գրականության շարքը, այսպիսով, համալրվել է ևս մեկ օգտակար գրքով, որը կարևոր է ոլորտով հետաքրքրվողների, նախագծեր իրականացնողների և, առհասարակ, յուրաքանչյուրիս համար։ Դե մենք էլ չէինք կարող չանդրադառնալ նման կարևոր իրադարձությանը՝, հաշվի առնելով որ մեր թիմում նույնպես ունենք Նախագծերի կառավարման մասնագետներ։

Նշենք նաև, որ գիրքը հրատարակվել է NewMag-ի կողմից և շատ կարճ ժամանակահատվածում արդեն հասցրել է արժանանալ հանրության մեծ ուշադրությանը։

Տարիներ շարունակ Նախագծերի կառավարում դասավանդելիս և պրոյեկտներ կառավարելիս բազմիցս համոզվել եմ, որ անհրաժեշտ է ունենալ հայերեն, հայալեզու և հայ հեղինակի կողմից մշակված մասնագիտական ռեսուրս։
Հայերեն մասնագիտական գրականություն ունենալը չափազանց կարևոր է, դրա միջոցով կապահովվի գիտելիքի հասանելիությունն ավելի լայն շրջանակներին, թույլ կտա շատ ավելի շատ մարդկանց ծանոթանալ մեր օրերի ամենապահանջված մասնագիտություններից մեկի հետ։

Աստղիկ Սահակյան, Հեղինակ
Նախագծերի կառավարում գրքի հեղինակ Աստղիկ Սահակյան

1. Նախաբան․ ու՞մ համար է «Նախագծերի կառավարում» գիրքը

Գիրքը բոլորի համար է․ կազմակերպության թոփ մենեջմենթից մինչև սկսնակ մասնագետ, քանի որ յուրաքանչյուր ոք այս կամ այն կերպ առնչվում է կազմակերպությունում իրականացվող պրոյեկտներին։ Այս գիրքը նաև սկսնակ կամ խոշոր ձեռներեցների համար է։ Չէ՞ որ ձեռնարկատիրությունն իրենից բազմաթիվ պրոյեկտների իրականացում է ենթադրում՝ բիզնեսի հիմնումից մինչև զարգացում, ընդլայնում, փոխակերպում և այդ ճանապարհին բազմաթիվ նախագծերի իրականացում։ Նաև բոլոր բուհերի ուսանողների համար խիստ կարևոր է նախագծերի կառավարման խնդիրներին ծանոթանալը և մասնագիտության հիմնային գիտելիք ձեռք բերելը։

2. Նախագծերի կառավարումը մասնագիտություն է

Նախագծերի կառավարումը, հեղինակի դիտարկմամբ, մեր կյանքում մշտապես է եղել, սակայն մարդիկ և կազմակերպությունները չեն դիտարկել այն՝ որպես առանձին ֆունկցիա, այլ ընկալել են այն՝ որպես լրացուցիչ կազմակերպչական աշխատանք, որը կարող է հանձնարարվել թիմի որևէ մասնագետի։ Սակայն ժամանակի ընթացքում, երբ պրոյեկտները մեր կյանքում և կազմակերպություններում սկսեցին ավելի կարևորվել՝ որպես հստակ նախաձեռնություններ՝ ուղղված կազմակերպության ռազմավարական նպատակների իրականացմանը, նախագծերի կառավարումը սկսեց դիտարկվել որպես առանձին գործունեություն։ Հետագայում այն դարձավ առանձին մասնագիտություն, որը մեր օրերում արդեն իսկ խիստ պահանջված է և շարունակելու է մնալ այդպիսին։

3. Նախագծերի կառավարման բում և նախագծերի տնտեսություն

Մեր փոփոխական աշխարհում իրադարձությունները չափազանց բուռն և արագ կերպով են զարգանում։ Այդ փոփոխություններին դիմակայելու, դրանցից օգուտ քաղելու, մրցակցային առավելություններ ձեռք բերելու, ճկուն լինելու և շարունակաբար փոխակերպվելու համար հեղինակն առաջարկում է կազմակերպություններին ձեռնարկել կոնկրետ քայլեր․ իրականացնել պրոյեկտներ։ Այդ իսկ պատճառով նախագծերի կառավարումն է՛լ ավելի պահանջված հմտություն է դարձել աշխարհի բոլոր ծայրերում, քանի որ բիզնեսներին անհրաժեշտ են մարդիկ, որոնք, օժտված լինելով կոնկրետ նախաձեռնություններ արդյունավետ կերպով կառավարելու հմտություններով և գիտելիքով, կկարողանան ձևավորել պրոյեկտների տնտեսություն և ապահովել կազմակերպության զարգացումը, ադապտացումը, շարունակական աճը։

4. Ի՞նչ է նախագիծը

Յուրաքանչյուրս մեր կյանքում բազմաթիվ նախագծեր ենք իրականացնում՝ առանց կենտրոնանալու այն փաստի վրա, որ դրանք նախագծեր են։ Սկսած մեր առօրյայից, մինչև յուրաքանչյուր ոլորտի յուրաքանչյուր կազմակերպություն բազմաթիվ և բազմազան պրոյեկտներ է իրականացվում։
Ընտանեկան ճամփորդությունն, օրինակ, պրոյեկտ է, տան վերանորոգումը`ևս։ Հետևաբար, նախագծերի կառավարումը կյանքի հմտություն է, որն անհրաժեշտ է բոլորին։ Նախագիծը կամ պրոյեկտը սկիզբ և ավարտ ունեցող նախաձեռնություն է, որը միտված է պրոդուկտի, ծառայության կամ արդյունքի տեսքով նոր արժեք ստեղծելուն։

Նախագծերի կառավարում գրքի շնորհանդեսին
Լուսանկարը՝ Yerevantsiner-ի ֆեյսբուքյան էջի
Նախագծերի կառավարում գրքի շնորհանդեսին բազմաթիվ մարդիկ էին ներկա
Լուսանկարը՝ Աստղիկ Սահակյանի ֆեյսբուքյան էջի
Նախագծերի կառավարում գրքի մասին խոսում է հենց հեղինակը
Լուսանկարը՝ New Mag-ի

5. Ո՞վ է նախագծի ղեկավարը

Նախագծի ղեկավարն այն մարդն է, որը, թիմի հետ միասին ինտեգրելով նախագծի տարբեր բաղկացուցիչ մասերը, ապահովում է նախագծի իրականացումը։ Նախագծի ղեկավարին հաճախ համեմատում են դիրիժորի հետ, ինչը, իհարկե, շատ լավ բնութագրում է նախագծի ղեկավարի դերի փիլիսոփայությունը։

Նախագծի ղեկավարին բազմակողմանի և բազմաշերտ հմտություններ են հարկավոր՝ իր առջև դրված մարտահրավերային նախաձեռնությունները հաջողությամբ պսակելու համար։ Դրանք կարելի է երեք հիմնական խմբի բաժանել՝ նախագծերի կառավարման մասնագիտական գիտելիք, ոլորտային գիտելիք և ստրատեգիկ մտածելակերպ, և վերջում ամենակարևորը՝ հզոր կամ անձնային հմտություններ։

6. Կազմակերպության ռազմավարական պլանավորում և նախագծեր

Կազմակերպության կողմից իրականացվող նախագծերն առանձին միավորներ չեն։ Նախագծերի միջոցով կազմակերպությունները կյանքի են կոչում իրենց ռազմավարական պլանները։ Իսկ ռազմավարական պլաններն իրենց հերթին սնուցում են կազմակերպության առաքելությանը։

Որքան հասկանալի և հստակ են կազմակերպության առաքելությունն ու տեսլականը, այդքան ավելի հեշտ է ճիշտ նախանշել այն պրոյեկտները, որոնց իրականացումը լավագույնս կնպաստի դրանց իրացմանը։ Նախագիծը պլանավորելիս հարկավոր է հստակ պատկերացնել, թե կազմակերպության կոնկրետ որ ռազմավարական նպատակների իրականացմանն է այն օժանդակելու։

7. Առաջնորդություն

Ցանկացած նախագիծ իրականացվում է թիմային աշխատանքի միջոցով։ Եթե չկա իրական թիմային աշխատանք, վստահության մթնոլորտ, առաջնորդություն, աճելու հնարավորություն, գնահատանք, ապա լավագույն դեպքում կարելի է ակնկալել միջակ արդյունքներ։

Բացառիկ հաջողություններ գրանցելու համար անհրաժեշտ է համախմբվել գաղափարի շուրջ, մարտական ոգի և տրամադրվածություն ունենալ, գիտակցել նախագծի և դրա արդյունքում ստեղծվելիք հանրային, բիզնես, ֆինանսական արժեքների կարևորությունը։ Նման միջավայրի ձևավորման համար նախ և առաջ պատասխանատու է նախագծի ղեկավարը, այն է՝ թիմի առաջնորդը։

Ամփոփենք

Որպես ամփոփում կիսվենք «Նախագծերի կառավարում» գրքի մասին հեղինակավոր մասնագետների կարծիքներով, և նշենք որ գիքրը կարող եք ձեռք բերել բոլոր գրախանութներում։

Նախագծերի կառավարման ոլորտում գրքերը շատ են, սակայն միայն մի քանի հեղինակներ են իրականում «անում դա»։ Աստղիկը նրանցից մեկն է։ Վստահ եմ, որ Աստղիկի գիրքը տեղ կգտնի իմ գրադարանում,-նշել է PMP միջազգային հավաստագրման համահիմնադիր Լի Լամբերտը

Այս գիրքն արժեքավոր ռեսուրս կլինի նրանց համար, ովքեր ցանկանում են նախագծեր ղեկավարել։ Աստղիկը դրսևորել է հայրենասիրություն՝ հայերի համար ստեղծելով հայերեն գիրք՝ ավելի լավ Հայաստան ունենալու նպատակով,-նշել է ClinChoice LLC գործադիր տնօրեն Կիրիտ Վելանին

Այս գիրքը must-read է և՛ փորձառու մասնագետների, և՛ սկսնակների համար։ Այն հետաքրքիր է, պարզ ու գրված է ժամանակակից լեզվով,-նշել է Evocabank-ի վարչության նախագահի տեղակալ Տաթևիկ Խաչատրյանը

Գիրքը կարող եք գնել գրախանութներից կամ պատվիրել առցանց։