Միջազգային պրակտիկայում ընդունված նորմ է հանրային տարբեր խնդիրները վեր հանել ֆիլմերի և շոուների միջոցով, և այս առումով բացառություն չեն կազմում HR ոլորտի խնդիրները։ Գաղտնիք չէ, որ ֆիլմերը հատուկ մեսիջներ են պարունակում, որոնց շնորհիվ մենք սկսում ենք պատկերավոր ապրումակցել հերոսներին, զգալ ու հասկանալ այն խնդիրները, որոնց բախվում են աշխատակիցներն իրենց աշխատավայրում, կամ օրինակ զգալ կորպորատիվ մշակույթի կարևորությունը և, իհարկե, թե ինչպիսին կլիներ ընկերությունը, եթե մեր այդքան սիրելի HR-ը մեր կողքին չլիներ։
Այս նպատակով StaffMedia-ում հատուկ առանձնացրել ենք HR թեմայով այն ֆիլմերն ու շոուները, որոնք մեզ կտեղափոխեն աշխատանքային նոր իրականություն։
1. THE INTERN
Ֆիլմի գլխավոր հերոս Դե Նիրոն պատրաստ էր ցանկացած աշխատանքի` սկսած խորհրդատուից մինչև վարորդ։ Նրա բիզնես էթիկան, որն այժմ արդեն շատերի կողմից մոռացվել է, թարմություն մտցրեց աշխատավայրում։
Ֆիլմի՝ HR մասնագետներին ուղղված գլխավոր գաղափարն այն է, որ աշխատավայրում շատ կարևոր է բազմազանության ապահովումը։
2. THE SOCIAL NETWORK
Այս ֆիլմում ներկայացված է Facebook-ի CEO Մարկ Ցուկերբերգի և իր բազմամիլիարդ դոլար արժողությամբ ընկերության ստեղծման պատմությունը։ Ֆիլմը ցույց է տալիս, թե ինչպես ամենապահանջված հմտություններն ու տաղանդը կարող են բացահայտվել ամենաանսովոր եղանակով, և որի հիման վրա էլ ձևավորվում է ընկերության մշակույթը։ Մենք տեսնում ենք, թե ինչպես Մարկ Ցուկերբերգը (Ջեյսի Էյզընբերգ) և իր լավագույն ընկեր Էդուարդո Սեվըրին (Անդրյու Գարֆիլդ) միավորեցին իրենց ջանքերը ստեղծելու Facebook-ը։ Մարկը իր նորարար գաղափարներով և ծրագրավորման հմտություններով գրավում է անգամ Napster համահիմնադիր Սին Պարկերի (Ջասթին Թիմբերլեյք) ուշադրությունը։ Մարկի կրեատիվությունն անգամ դրսևորվեց այն ժամանակ, երբ աշխատանքի ընդունեց առաջին ինթերնին։ Եվ նրա աշխատասիրությունն ու արագաշարժությունն էլ ձևավորեցին այսօրվա Facebook-ի կորպորատիվ մշակույթը։
Ֆիլմի՝ HR մասնագետներին ուղղված գլխավոր գաղափարն այն է, որ աշխատակիցները հեշտությամբ կընդունեն ընկերության մշակույթը և կառաջնորդվեն այդ արժեքներով, եթե թիմի ավագ մասնագետները նույնպես հետևեն այդ մշակույթին։ Եվ երբ բոլորը համախմբված են լինում ընկերության առաքելության, արժեքների և մշակույթի շուրջ, դա կարող է ապահովել միմիայն աճ ու զարգացում։
3. MONEYBALL
Վիճակագրության սիրահարների համար այս ֆիլմը շատ հետաքրքիր կլինի։ Իրական կյանքից վերցված այս պատմության մեջ ներկայացված է, թե ինչպես է բեյսբոլի մենեջերն օգտագործում տվյալների վրա հիմնված մեթոդներ իր թիմում լավագույն խաղացողներ հավաքագրելու համար։
Ֆիլմի՝ HR մասնագետներին ուղղված գաղափարն այն է, որ ինչքան մեծ առավելություններ ունի փաստերի ու վիճակագրության վրա հիմնված մարդկային ռեսուրսների հավաքագրումը։ Միշտ պետք է փնտրել նորը ու իրականացնել՝ մարտահրավեր նետելով բոլոր ավանդական մոտեցումներին։
4. MAD MEN
Այս հեռուստահաղորդումը ցույց է տալիս, թե ինչ է կատարվում ընկերությունում առանց HR-ի ներկայության․ սցենարը զարգանում է գովազդային գործակալություններից մեկի շուրջ, որտեղ նկատելի են սեռային խտրականություն, զեղծարար աշխատակիցներ, ոչ արդյունավետ աշխատանքային օրեր՝ լի խմիչքով և ծխախոտով։
Եվ այսօր էլ, չնայած HR մասնագետները մեծ աշխատանք են տանում այս ուղղությամբ, որպեսզի աշխատակիցները հետևեն աշխատավայրում սահմանված ընթացակարգերին, HR թիմը, այնուամենայնիվ, բախվում է նման խնդիրների։
Դե ինչ, բարի դիտում 🙂 Իսկ մեկնաբանություններում կարող եք կիսվել HR թեմայով ձեր նախընտրելի ֆիլմերով։
