JS Hacker’s School — պրակտիկայի ծրագիր, որին ամեն անգամ մեկ շաբաթում դիմում է ավելի քան 800 մասնագետ։ Այս անգամ լավագույն 15-ը կստանան հնարավորություն մասնակցելու դասընթացի առաջին` տեսական փուլին, իսկ առաջին փուլից լավագույն մասնակիցները կանցնեն երկրորդ՝ գործնական նախագծի փուլ։

Սիմփլի Թեքնոլոջիս ընկերության նախաձեռնությամբ տարին երկու անգամ անցկացվում է ՏՏ ոլորտի ամենահայտնի ինթերնշիփային ծրագրերից մեկը՝ նախատեսված JavaScript ծրագրավորողների համար։

JS Hacker’s School-ի պատմության, ընդունելության գործընթացի և կրթական ծրագրի մասին զրուցել ենք Սիմփլի Թեքնոլոջիս ընկերության մարդկային կապիտալի ղեկավար Տաթևիկ Բաղդասարյանի հետ։


Ինչպե՞ս որոշվեց սկսել ծրագիրը, ո՞րն էր ծրագրի սկզբնական նպատակը։

JS Hacker’s School ստեղծելու միտքն առաջացավ դեռ 7 տարի առաջ։ Ամեն ինչ սկսվեց նրանից, որ մենք համոզվեցինք, որ ավանդական և տարածված պրակտիկայի մոտեցումը արդյունավետ չէ։ Խոսքն այն մասին է, երբ ուսանողին ուղարկում են ինչ-որ կազմակերպություն արտադրական պրակտիկայի, որտեղ չկա հստակ մշակված պլան, մենթորները շատ զբաղված են, և ուսանողը ստիպված փորձում է կողքից նայելով ինչ-որ բան սովորել, կամ անում է այնպիսի աշխատանք, որը չի նպաստում նրա մասնագիտական աճին։
Մի քանի անգամ Սիմփլի Թեքնոլոջիսում նմանատիպ պրակտիկա անցկացնելուց հետո հասկացանք, որ դա արդյունավետ չէ, և պետք է լիովին այլ մոտեցում կիրառել։ Դրան գումարվեց նաև Հայաստանում ՏՏ ոլորտի մասնագետների պահանջարկի աճը և մեր մեծ ցանկությունը՝ մեր ներդրումն ունենալ նոր մասնագետների կայացման մեջ ու նաև նպաստել JavaScript-ի տարածմանը Հայաստանում՝ որպես աշխարհում մեծ պահանջարկ ունեցող տեխնոլոգիա։

Իսկ առաջին հերթին ի՞նչ խնդիր է լուծում ծրագիրը։

Ցավոք, այս պահին հայաստանյան շատ բարձրագույն ուսումնական հաստատություններում շեշտը չի դրվում պրակտիկ գիտելիքների ստացման վրա։ Մասնագետներն անցնում են աշխատանքի, սակայն նախքան բուն աշխատանքին անցնելը դեռ կարիք ունեն բավականին պրակտիկ գիտելիքներ ստանալու։ Մենք լուծում ենք հենց այս խնդիրը։ Բացի մասնագիտական գիտելիքներից, մասնակիցները ծանոթանում են, թե ինչպես են իրականացվում նախագծերը կայացած կազմակերպություններում, ծանոթանում են կազմակերպության մշակույթին, սովորում են թիմային աշխատանքին, բայց միևնույն ժամանակ նրանցից պահանջվում է ինքնուրույն խնդիրներ լուծել։ Ավարտից հետո մասնակիցները պատրաստ են սկսել աշխատանքը՝ լիովին պատկերացնելով ծրագրավորողի աշխատանքի ամբողջ բնույթը։
Ավելացնեմ նաև, որ JS Hacker’s School-ը չի սահմանափակվում միայն ինթերնշիփի ծրագրով։ Մենք ունենում ենք դասընթացներ նաև փորձառուների համար։ Օրինակ, React Native-ի դասընթացներ այն փորձառու մասնագետների համար, ովքեր ուզում են ուսումնասիրել մոբայլ հավելվածների մշակումը, կամ Node.js-ի դասընթացներ front-end մասնագետների համար, ովքեր ցանկանում են իրենց ուժերը փորձել նաև back-end-ում։

Արդեն քանի՞ սերունդ է ավարտել դպրոցը, պլանավորում ե՞ք ավելի հաճախ կազմակերպել այն։

Արդեն 11 սերունդ մասնակցել են ինթերնշիփի ծրագրին, շուտով կմեկնարկի 12-րդը։ Թեև կազմակերպում ենք տարին 2 անգամ, սակայն շատ մեծ պահանջարկի պատճառով պլանավորում ենք ավելի հաճախ կազմակերպել։

Ի՞նչ չափանիշներով են ընտրվում դիմորդները, ինչպիսի՞ն է ընդունելության գործընթացը։

Մասնագիտական տեսանկյունից դիմորդը պետք է ունենա JavaScript, HTML, CSS-ի նախնական գիտելիքներ և կարողանա լուծել տրամաբանական խնդիրներ։ Այսինքն JS Hacker School-ի ինթերնշիփին դիմելու համար մասնակիցը պետք է արդեն ինչ-որ չափով ուսումնասիրած լինի JavaScript-ը, վեբ ծրագրավորումը և որոշում կայացրած լինի, որ ուզում է մասնագիտանալ հենց այս ուղղությամբ։
Առաջին փուլում մասնակիցները գրանցվում են առցանց թեստի համար, գրանցման հղումը տեղադրում ենք մեր ֆեյսբուքյան էջում։ Այնուհետև գրանցված մասնակիցներին ուզարկում ենք թեստ, որը պետք է լրացվի նշված ժամկետում։ Թեստն իր մեջ ներառում է JavaScript, HTML, CSS-ի, ընդհանուր ծրագրավորման հարցեր և տրամաբանական խնդիրներ։ Այնուհետև լավագույն մասնակիցներին հրավիրում ենք մեր գրասենյակ՝ նմանատիպ թեստի։ Երրորդ փուլում մասնակիցներին հրավիրում ենք կարճ զրույցի, որտեղ ծանոթանում ենք դիմորդների հետ, պարզում նրանց մոտիվացիան, հասանելիությունը ինթերնշիփի ընթացքում։

Ի՞նչ է նշանակում ունենալ JS Hacker School-ի սերտիֆիկատ, դա ի՞նչ կարող է տալ մասնագետներին։

Մասնակիցների համար JS Hacker’s School-ի սերտիֆիկատը նշանակում է հավելվածը 0-ից մինչև վերջ մշակելու կարողություն և լավագույն կազմակերպություններում արագ աշխատանքի անցնելու հնարավորություն։ Մասնակիցների մի մասին առաջարկում ենք աշխատանք հենց մեզ մոտ՝ Սիմփլի Թեքնոլոջիսում։ Նաև համագործակցում ենք մի շարք այլ կազմակերպությունների հետ։
Իսկ գործատուի տեսանկյունից JS Hacker’s School-ի սերտիֆիկատը նշանակում է պրակտիկ գիտելիքներով զինված մասնագետ, ով կարող է միանգամից մասնակցել իրական նախագծերին, լուծել խնդիրներ և ստանձնել պատասխանատվություն։

Որքա՞ն է տևում դպրոցը ու ի՞նչ են ուսումնասիրում ինթերնշիփ անցնող մասնագետները։

Դասընթացները տևում են 1,5 ամիս և իրականացվում 2 փուլով։ Առաջին փուլն անց է կացվում առցանց։ Մասնակիցները խորությամբ ուսումնասիրում են այն տեխնոլոգիաները և գործիքները, որոնք անհրաժեշտ են նախագիծը 0-ից մինչև վերջ մշակելու համար։ Դրանցից են՝ HTML, CSS, Node.js, Express, MongoDB, React.js, Redux։
Երկրորդ փուլում ընտրում ենք մի հետաքրքիր հավելվածի գաղափար, և ինթերնշիփի թիմը սկսում է այն մշակել և հասցնել ավարտին։ Այս փուլում մասնակիցներն ամբողջ աշխատանքային շաբաթն անցկացնում են մեր գրասենյակում։
Ավելացնեմ, որ շեշտը դրվում է ոչ միայն տեխնիկական գիտելիքների, այլ նաև ոչ մասնագիտական հմտությունների զարգացման վրա։ Թիմը աշխատում է Scrum մեթոդով, ունենում է իրական Scrum Master, հստակ ժամկետներ և պատասխանատվություններ։ Այսինքն, արվում է ամեն ինչ, որ պրոցեսը հնարավորինս նման լինի իրական նախագծի մշակմանը։
Նաև նշեմ, որ ծրագրի երկրորդ փուլի մասնակիցների համար սահմանված է կրթաթոշակ` 100.000 դրամ։

Իսկ ովքե՞ր են դասավանդողները։

Դասավանդում են մեր կազմակերպությունից հմուտ և փորձառու մասնագետները՝ մեծ ոգևորությամբ և պատասխանատվությամբ, առաջնորդվելով այն սկզբունքով, որ մեր ներդրումն ենք ունենում ՏՏ ոլորտում նոր մասնագետների կայացմանը։

Այժմ ընդունելությունը բաց է՞, ե՞րբ կարող են մասնագետները դիմել պրակտիկայի ծրագրին։

Գրանցվելու հղումը արդեն հասանելի է մեր ֆեյբուքյան էջում։ Դիմորդները պետք է շտապեն, որովհետեւ գրանցումը բաց է լինելու մինչեւ հոկտեմբերի 1-ը։ Հաջողություն եմ մաղթում բոլոր մասնակիցներին։ Հուսով եմ շատերի հետ կհանդիպենք մեր գրասենյակում։


Եթե հետաքրքրված եք այս հնարավորությամբ և դասընթացով, հետևեք Simply Technologies ընկերությանը staff.am-ում, Facebook-ում և LinkedIn-ում՝ ծրագրի մեկնարկը բաց չթողնելու համար։