Հայկական Krisp ստարթափի հաղթարշավը շարունակվում է

2679

Աշխարհում կան մի քանի ճամփորդություններ, որոնք հավասարաչափ գրավիչ ու խոստումնալից են, որքան հաջողակ ստարթափեր լինելը 😊 Այդ ճամփորդական ուղղություններից է Հայաստանը, որը, մասնավորապես, 2016 թվականին մեկնարկ և վերելք (startup & up) ապահովեց Krisp ստարթափին։

Այո՛, այո՛, այսօր խոսելու ենք Krisp հայկական ստարթափի հաղթարշավի մասին, ինչպես, երբ ու ինչ փուլերով այն ստեղծվեց, ովքեր են այս հզոր նորարարության հեղինակներն ու ինչ նորույթներ են սպասվում բոլորիս։

KRISP ՍՏԱՐԹԱՓԻ ԱՌԿԱՅԾՈՂ ՊԱՏՄՈՒԹՅՈՒՆԸ 😊

«Ես այդ ժամանակ ապրում էի Ամերիկայում և աշխատում էի Twilio ընկերությունում։ 2016թ․ աշնանը Հայաստան եկա ճամփորդելու նպատակով, բայց հայաստանյան ժամանակով երեկոները աշխատանքային միթինգներ պետք է ունենայի Twillio-ում։ Իսկ քանի որ երեկոներն էլ ուզում էի դուրսը լինել, տարբեր վայրեր գնալ, անընդհատ ցանկություն էր առաջանում, որ թիմային միթինգների ժամանակ մեկ կոճակով կարողանամ մեկուսացնել կողմնակի բոլոր ձայները և միայն իմ ձայնը լսվեր․․․ և այդտեղից էլ ծնվեց ստարթափ գաղափարը» – ընկերության հաջողության պատմությամբ մեզ հետ կիսվեց համահիմնադիր Դավիթ Բաղդասարյանը:

Այսպիսով, գաղափարը մեքենայական ուսուցման միջոցով զանգերի ընթացքում կողմնակի աղմուկի հեռացումն էր, որն այնուհետև Դավիթը քննարկեց Արտավազդ Մինասյանի հետ, և համատեղ ջանքերով սկսեցին տեխնոլոգիական մշակման աշխատանքները, թիմ հավաքագրելը և պրոդուկտն ու ընկերությունը ֆորմալ կյանքի կոչեցին 2017 թվականին Krisp անվամբ (թարգմ․ մաքուր, զուլալ)։  

«Առաջին իսկ օրվանից մենք երկու միսիայով ընկերություն ենք․ առաջինն անմիջապես Հայաստանի հետ է կապված։ Մեզ համար շատ կարևոր է, որ ստեղծենք 10 միլիարդանոց ընկերություն Հայաստանում՝ նպատակ ունենալով մեծ ազդեցություն թողնել մեր երկրի, հասարակության, տեխնոլոգիական զարգացվածության վրա։ Եվ ամեն օր աշխատանքի գնալիս, ես էլ, համահիմնադիր Արտոն էլ, մտածում ենք նույն կերպ, որ համաշխարհային բրենդի ստեղծումը կօգնի Հայաստանին մեծ զարգացում ապրել, մեծ ներդրումներ ներգրավել, ավելի լավ մասնագետներ ունենալ։ Իսկ երկրորդ միսիան կապված է ավելի շատ տեխնոլոգիական պրոդուկտի հետ․ օգնել պրոֆեսիոնալներին դառնալ ավելի էֆեկտիվ զրուցակիցներ օնլայն միթինգների ընթացքում։ Սա իհարկե, ահռելի մեծ միսիա է, բայց մենք այժմ շատ լավ դիրքում ենք գտնվում աշխարհին ապահովելու նման հնարավորությամբ»։

Եվ խելացի ձևով մատուցելով պրոդուկտի առաջին տարբերակը՝ սկսվեց Krisp-ի իրական հաղթարշավը․

  • աշխարհահռչակ, ամենահետաքրքիր ու մրցակցային Hackernews հարթակում Krisp-ի մասին հոդվածը թոփ եռյակում հայտնվեց,
  • ProductHunt-ի կողմից այն ճանաչվեց օրվա պրոդուկտ, շաբաթվա պրոդուկտ, այնուհետև տարվա պրոդուկտ,
  • 2020թ․ հունվարին աշխարհի ամենամեծ մեսինջերներից Discord-ի հետ համագործակցություն (Krisp-ը ինտեգրվեց Discord-ում),
  • 2020թ․ հունիսին Krisp-ը ընտրվեց Forbes AI50՝ արհեստական բանականությամբ զբաղվող ամենախոստումնալից ընկերությունների ցանկում, (ի դեպ, Հայաստանում առաջինը նման անվանակարգում),
  • 2020թ․ հուլիսին 5,000,000 մլն․ դոլարի ներդրում,
  • 2020թ․ սեպտեմբերին Forbes-ը Krisp-ը ընդգրկեց ամենահեղինակավոր ցուցակներից մեկում՝ Cloud100 Rising star, որը կազմվում է Bessemer Venture-ի և SalesForce Venture-ի հետ համատեղ (Cloud-ում իրենց ծրագրերն ունեցող ընկերությունների թոփ 100-ի ցանկ և Աճող աստղի թոփ 25 ընկերությունների ցանկ),
  • Եվ վերջերս, Time ամսագիրը Krisp-ն ընդգրկեց աշխարհի թոփ 100 նորարարությունների ցանկում։

Բայց տարին դեռևս չի ավարտվել, իսկ Դավիթն ու Արտոն մեզ վստահեցրեցին, որ արդեն կան ևս երկու ոգևորիչ նորություններ (ու էլի շա՜տ հետաքրքիր ու հպարտանալու), որոնց մասին անպայման կպատմեն մեզ։

«Ի սկզբանե, Krisp-ի հաջողությունը պայմանավորված էր նրանով, որ գաղափարը բավականին պարզ էր, և ցանկացած մարդ կարող էր հասկանալ, թե ինչ խնդիր ենք լուծում։ Աղմուկն ենք հեռացնում և դա բացատրելը թե ներդրողներին, թե օգտատերերին բավականին հեշտ էր»,- նշեց Դավիթը:

Իսկ 2020 թվականի թագավարակյան մարտահրավերներն աճի ահռելի մեծ ալիք հաղորդեցին Krisp-ին, ամենասկզբից 10 անգամ աճ ունեցավ ընկերությունը․

«Մինչև Covid19-ն էլ, մենք արդեն իսկ նկատում էինք հեռահար աշխատանքի միտումն աշխարհում ու որոշակի քայլեր ձեռնարկել էինք այդ ուղղությամբ․ կայքը ամբողջությամբ վերափոխել էինք, այդ ռազմավարական ուղղությամբ մարքեթինգի ու վաճառքի թիմ ունեինք ձևավորված, և մարտին մեզ մնում էր միայն բարձրանալ այդ ալիքի վրայով»:

Անցնելով տանից աշխատանքի ռեժիմի՝ անհնար էր թվում մեր բոլորիս համար անաղմուկ միջավայր ապահովել ու մասնակցել ֆորմալ միթինգների։ Այլ կերպ ասած, բացի Krisp-ից աշխարհում մեկ այլ լուծում չկար, որը կկարողանար հեռացնել աղմուկն ու պահպանել մեր պրոֆեսիոնալիզմը 😊 Եվ հենց այս հանգամանքն էր, որ խոշորագույն պայմանագրերի ու բիզնես համագործակցությունների առիթ ստեղծեց, նյույորքյան խոշոր ընկերություններից մեկն իր 2000 աշխատակցի համար ձեռք բերեց Krisp-ը, մեկ այլ խոշորագույն ընկերության կողմից 40,000 աշխատակցի համար ներդրվեց Krisp-ը՝ զանգերի կենտրոնների աշխատանքը կանոնակարգելու համար և շատ այլ նման համագործակցություններ։

ԻՆՉ ԹԻՄ Է ԿԱՆԳՆԱԾ KRISP ՊՐՈԴՈՒԿՏԻ ԵՏԵՎՈՒՄ

Ինչպես պրոդուկտն է առանձնահատուկ, այնպես էլ թիմի կառուցվածքը․

«այսօրվա դրությամբ մեզ մոտ ընկերության 25%-ը հետազոտության (research) թիմն է, հզորագույն թիմ է մաթեմատիկոսների ու ֆիզիկոսների, և այնպիսի պրոդուկտ ենք մշակում ու զարգացնում, որտեղ ամեն ինչը մեր կողմից պետք է իրականացվի՝ մարքեթինգ, վաճառք, growth hacking և այլն»:

Իսկ այս բանիմաց ու պրոֆեսիոնալ թիմին միանալու համար պարտադիր չէ լինել Հայաստանում, ընկերությունը պատրաստ է հավաքագրել նոր մասնագետների ամբողջ աշխարհից։

Այս պահին էլ կան թափուր աշխատատեղեր գրեթե բոլոր բաժիններում՝

ԱՊԱԳԱՆ ԱՌՋԵՎՈՒՄ Է

Krisp-ն այն հաջողակ ու աշխարհահռչակ ստարթափներից է, որ հիմնադրման օրվանից վերելքի ալիքներով թռիչքաձև բարձրանում է ու երբեք չի դադարում նորը մտածելուց, ստեղծելուց ու իրագործելուց։ Այս պահին էլ մշակվում է պրոդուկտի բոլորովին նոր կատեգորիա, որը չկա աշխարհում՝ AI Communication Assistant՝ նպատակ ունենալով օգնել մարդկանց լինել ավելի էֆեկտիվ զրուցակից օնլայն տիրույթում, ինչն արվում է ձայնի և տեսագրության հետ կապված տեխնոլոգիական լուծումները կատարելագործելու շնորհիվ։

«Արդեն հաջորդ տարի սուպեր լուծումներ ենք ունենալու այս ասպարեզում․ օրինակ, գուցե տեսախցիկն օգտագործելով՝ կարողանանք հայտնաբերել, թե արդյոք այդ մարդը նայում է տեսախցիկին, թե ոչ, ժպտում է հաղորդակցվելիս, թե ոչ։ Ինչն էլ կօգնի օգտատիրոջը դառնալու էլ ավելի լավ զրուցակից»։

Միանգամայն, վստահ ենք, որ Krisp ընկերությունը կհաջողի իր բոլոր միսիաներում՝ ունենալով 100 մլն-ը գերազանցող հաճախորդներ և դառնալով հայկական յունիքորն ստարթափ։