Ապրիլի 6-ին մեր գործընկերներից Targeting ընկերության նախաձեռնությամբ տեղի ունեցավ Հայաստանում և տարածաշրջանում երբևէ առաջին անգամ LinkedIn Local Yerevan-ի բիզնես նեթվորքինգ միջոցառումը։
Ինչպես կիսվում են մեր գործընկերները․ «Նեթվորքինգ անելու համար պետք են հատուկ հմտություններ․ սա է ամենատարածված կարծիքը։ Մինչդեռ իրականության մեջ հաջողված նեթվորքինգ անելու համար՝ անհրաժեշտ է ճիշտ ընտրված վայր, բիզնես լսարան և ուղղորդված գործընթացներ»։
LinkedIn Local Yerevan միջոցառումը Altezza by Armenian Helicopters-ի հարկի տակ միավորել էր 300+ գործարար համայնքի անդամների՝ ստեղծելու նոր կապեր, խորացնելու առկա կապերը, օգտվելու ընձեռված հնարավորություններից և իրենց հերթին դառնալու հնարավորություն այլ բիզնեսների և գործարար մարդկանց համար։
Իր ձևաչափով միջազգային այս ֆորմատը՝ LinkedIn Local Event-ը, միտված է նպաստելու նոր մշակույթի ձևավորմանը, որը նպաստելու է ամենատարբեր մասշտաբի բիզնեսներին հիմք դնելու նոր նախաձեռնությունների և խորացնելու իրենց կապերը։
Թարգեթինգ ընկերությունն, ի դեպ, դեռ տարեսկզբին հաջող փորձ էր ունեցել ԱՄՆ-ի Լոս Անջելեսի Գլենդել քաղաքում՝ կազմակերպելով LinkedIn Local Glendale-ը։ Այնուհետև այս հաջողված փորձը տեղափոխեց նաև Երևան։
LinkedIn Local Yerevan միջոցառման մեկնարկն ազդարարվեց խոսնակների ուղղաթիռով ժամանմամբ։ Միջոցառման 7 խոսնակները՝ Արմեն Դարբինյան, Աշոտ Հովհաննիսյան, Ռեմ Դարբինյան, Արմինե Մկրտչյան, Գոռ Կարապետյան և Էմիլ Կրոյան, կիսվեցին իրենց հաջողակ պատմություններով և շեշտեցին բիզնես աշխարհում գրագետ նեթվորքինգ իրականացնելու անհրաժեշտության մասին։
Նշենք, որ տվյալ միջոցառման հասույթի 10%-ն ուղղվելու է ռեԱրմենիա հարթակում ներկայացված հետևյալ սոցիալական ծրագրերին՝ Մարզերի երեխաները մարզերում և Ուսանողի տուն։
Միջոցառման ընթացքում կարելի էր մասնակցել ամենատարբեր ժամանցային և ինֆորմացիոն նախաձեռնություններին։ Ներկաները հնարավորություն ունեին վայելելու գինու, համեղ սուրճի և թխվածքաբլիթների հյուրասիրություն։ Իսկ միջոցառման ընդմիջումներին մասնակիցները կարող էին խաղալ գոլֆ և փորձարկել ամենագնացների թեսթ-դրայվը։
LinkedIn Local Yerevan-ի միջոցառումը լի էր նաև տարբեր անակնկալներով և մրցանակներով՝ նախատեսված միջոցառման մասնակիցների համար։
Սրանով, ի դեպ, LinkedIn Local Yerevan-ի միջոցառումները և անակնկալները չեն սահմանափակվում։ Սպասեք հունիսի 14-ին Ararat Valley Golf Club-ում Business Fun միջոցառմանը, որն իր բնույթով նախատեսվում է լինել ոչ ֆորմալ և լի նոր անակնկալներով։
Միջոցառումը՝ լուսանկարներում
