Մարտահրավերներ, խելահեղ ռիթմ, նոր լուծումներ ու գաղափարներ. սա է մարքեթինգն ու իմ աշխատանքը:
Ճիշտ մասնագիտություն ընտրելուց հետո մի օր նկատում ես քո և ոլորտիդ որակների ներդաշնակությունը, ինչը մեծացնում է նորը ստեղծելու մոտիվացիան և առաջ շարժվելու մղումը:
Ուզում եմ պատմել այն որակներիս մասին, որոնք օգնել են ինձ իմ աշխատանքային կարիերայի ընթացքում:
1. Մարքեթոլոգը բնավորությամբ պետք է լինի նրբանկատ, պատշաճ ու ներկայանալի. ինչպիսի հոգատարությամբ նվեր եմ պատրաստում իմ սիրելիների համար, նույնքան նրբանկատորեն էլ, որպես մարքեթոլոգ, մոտենում եմ պրոդուկտի ներկայացվածությանը, որպեսզի սպառողը լիովին ընկալի դրա առավելություններն ու ամբողջական համապատասխանությունն իրեն ու իր պահանջմունքներին:
Բացի այդ, պետք է նաև պերֆեկցիոնիստ լինել: Չանտեսելով երկարաժամկետ պլանավորման և հեռանկարային ստրատեգիկ քայլերի կարևորությունը՝ պետք է շեշտեմ մանրուքների հանդեպ ուշադրության անհրաժեշտությունը. հենց այդ նրբանկատության դրսևորումն է բրենդը դարձնում բրենդ։
2. Լինելով վառ անհատականություն և չցանկանալով նմանվել ինձ շրջապատողներին՝ նույն որակը փորձում եմ կիրառել նաև իմ աշխատանքում. բրենդը ևս չպետք է ձուլվի մրցակիցներին և ունենա ընդգծված անհատականություն:
3. Շատ եմ կարևորում կատարածս աշխատանքում ոգեշնչում գտնելու ունակությունս՝ անկախ արտաքին մոտիվատորներից։ Հատկապես մարքեթինգում մասնագետը պետք է կարողանա մինչև վերջ նվիրվել իր գործին՝ չվերաբերվելով դրան որպես եկամուտ ապահովող հերթական առաջադրանքի, այլապես նման վերաբերմունքը չի ծնի նոր գաղափարներ և լուծումներ. կրեատիվությունը՝ որպես առկա խնդրի լուծում, ծնվում է հենց այդ նվիրվածության արդյունքում։
4. Ինչպես յուրաքանչյուր ողջամիտ անհատականություն, ես ևս իմ կյանքում ցանկացած քայլ կատարելուց առաջ գիտակցում եմ դրա առաքելությունն ու հնարավոր հետևանքները: Մարքեթինգը, լինելով մեծ առաքելություն ունեցող մասնագիտություն, պահանջում է տվյալ որակը, քանի որ որպես մարքեթոլոգ` ես պետք է ունակ լինեմ գիտակցելու, որ իմ մասնագիտությունը կապող օղակ է կոնկրետ պահանջ ունեցողի և այդ պահանջը բավարարող պրոդուկտը ստեղծողի միջև։ Առանց գիտակցության այդ մակարդակն ունենալու, զուտ ընթացիկ աշխատանքներ իրականացնելով՝ լավ մարքեթոլոգ լինելն այնքան էլ իրատեսական չէ։
5. Աշխատանքս «քաոսային» է, որտեղ ամեն ինչ հասցնելու և լավ մասնագետ լինելու համար անհրաժեշտ է ունենալ ներքին վերահսկողություն և պլանավորման ընդգծված հմտություններ ինչպես սեփական ժամանակի մենեջմենթի, այնպես էլ բրենդի ստրատեգիկ հեռանկարներն արդյունավետ պլանավորելու համար։
Կարծում եմ՝ մասնագետի ու իր աշխատանքի միջև ներդաշնակությունը պետք է լինի ցանկացած ոլորտում. անհատը պետք է զբաղվի այն մասնագիտությամբ, որը թույլ կտա դրանով ապրել, արարել և առաջ նայել:
Շնորհակալություն ենք հայտնում BSMI CEO Աննա-Մարի Սարգսյանին իր մասնագիտական փոձով և օգտակար խորհուրդներով կիսվելու համար։ StaffMedia հատուկ նախագծի շրջանակներում կշարունակենք ներկայացնել տարբեր ոլորտների մասնագետների հետաքրքիր դիտարկումները։
