Ո՞ր մասնագիտություններն են առավել պահանջված Հայաստանում, ի՞նչ հիմնական հմտություններ է պահանջում գործատուն աշխատանքի առաջարկ կատարելու համար, ինչպե՞ս նկատվել գործատուի կողմից staff.am հարթակի միջոցով, ի՞նչ առավելություններ է տրամադրում staff.am կարիերայի հարթակը Հայաստանում աշխատանք փնտրողների համար, կարիերայի ի՞նչ հնարավորություններ կան հայրենադարձների համար Հայաստանում։
Ահա այս հարցերի շուրջ կայացավ Repat Armenia-ի և staff.am-ի համատեղ Meet & Greet միջոցառումը “Develop your career in Armenia“ («Զարգացրու կարիերադ Հայաստանում») թեմայով։ Հանդիպմանը, որը տեղի ունեցավ Deworkacy AOKS-ում, ներկա էին գտնվում ավելի քան 50 հայրենադարձներ։
staff.am համահիմնադիր Լուիզա Ավետիսյանը մանրամասն կիսվեց բոլոր այն գործիքներով, որոնք օգտակար կլինեն յուրաքանչյուր հայրենադարձի կամ հայի համար, ովքեր նպատակ ունեն վերադառնալ հայրենիք և օգտագործել իրենց հմտությունները հայրենիքի զարգացման համար։
Խոսվեց նաև ամենաարդի թեմաներից մեկի՝ կարիերայի ուղին փոխելու մասին։ Օրինակ, ինչպե՞ս կարելի է անցում կատարել #tech ոլորտի, արդյո՞ք գործատուն դիտարկում է այն թեկնածուներին, ովքեր նախկինում այդ ուղղությամբ չեն աշխատել և այժմ ցանկանում են փորձել իրենց նոր ոլորտում։
Այնուհետև staff.am-ից Նազելի Բադալյանը ներկայացրեց, թե ինչպես է երևում թեկնածուն Գործատուի կողմից staff.am հարթակում, ինչպես նաև ներկաների հետ կիսվեց հարցազրույցին պատշաճ ներկայանալու մի քանի խորհուրդներով։
Շատ ակտիվ մթնոլորտում անցավ նաև Q&A-ը և նեթվորքինգը, որի ընթացքում հայրենադարձների բոլոր հարցերը գտան իրենց պատասխանները։
