Ահա ևս մեկ հաճելի նորություն staff.am-ից, և քանի որ մեր StaffBlog ընթերցասերները շատ-շատ են, ցանկանում ենք անպայման կիսվել այս ուրախալի լուրով։
StaffBlog-ը, որն HR ոլորտի ամենախոշոր մեդիա ռեսուրսն է Հայաստանում, ներկայանում է բոլորովին նոր ձևաչափով՝ վերանվանվելով StaffMedia-ի: Այս շատ խոստումնալից մայլսթոն է HR ոլորտի զարգացման ճանապարհին․ սպասվում են տարաբնույթ ինֆորմատիվ տեսանախագծեր, հարցազրույցներ, մեր գործատուների մասին պատմող նոր հետաքրքիր թողարկումներ, ինսայթներ, HR ոլորտի քննարկումներ ու մասնագիտական դիտարկումներ։ Ինչպես նաև StaffMedia-ում կարող եք մշտապես տեղեկացված լինել HR ոլորտում և մեր գործատուների կողմից կազմակերպվող միջոցառումներին։
Մենք նաև հոգացել ենք մեդիա ռեսուրսից օգտվելու Ձեր հարմարավետության համար։ StaffMedia-ն բաղկացած է երեք գլխավոր բաժնից։ Առաջին բաժինը նվիրված է աշխատանք փնտրողներին և տարբեր ոլորտների մասնագետներին, որտեղ կարող եք հետևել staff.am-ի, մեր գործատուների ամենաթարմ նորություններին, ծանոթանալ աշխատաշուկայի պահանջարկին, ոգեշնչվել հաջողակ մարդկանց պատմություններով ու մասնագետների խորհուրդներով ու առաջինը տեղեկանալ տարբեր ընկերություններում կարիերայի հնարավորություններին։
Երկրորդ բաժինը նախատեսված է Գործատուների համար, որտեղ ներկայացված են HR ոլորտի ամենավերջին զարգացումները, օգտակար խորհուրդներ ինչպես HR մասնագետներից, այնպես էլ StaffMedia հեղինակներից (ի դեպ, Դուք նույնպես կարող եք Ձեր առանձին ռեսուրս բաժինն ունենալ StaffMedia-ում և որպես «StaffMedia հեղինակ» կիսվել Ձեր մասնագիտական մոտեցումներով և պրակտիկ փորձով):
Այս բաժնում նաև Գործատուները կարող են մշտապես տեղեկացված լինել ռեքրութմենթի կառավարման, գործատուի բրենդավորման, թրեյնինգների առաջխաղացման staff.am-ի գործիքներին։
StaffMedia-ում հատուկ բաժին է զբաղեցնում նաև ՀՀ աշխատաշուկան։ staff.am-ի հետազոտական թիմի կողմից ամեն տարի անցկացվող ՀՀ աշխատաշուկայի ակտիվության և աշխատավարձերի վիճակագրական ուսումնասիրության արդյունքները հրապարակվում են StaffMedia-ում՝ որպես բաց ռեսուրս։
Համավարակով պայմանավորված՝ StaffMedia-ում առանձնացրել ենք նաև COVID-19 HR ռեսուրսներ թե գործատուների, թե աշխատանք փնտրողների համար այս անցումային իրավիճակը լավագույնս հաղթահարելու համար։
Իսկ եթե փորձենք ամփոփել մեր այս հագեցած քառամյա «ճամփորդությունը» ու առանձնացնել ամենահետաքրքիր թողարկումները, գրեթե անհնար կլինի։ Սակայն, եկեք փոքր-ինչ էքսկուրս կատարենք և ձեզ հետ միասին վերհիշենք StaffBlog-ի պատմությունը՝ սկսելով 2017 թվականից (կարծես երեկ լիներ, անգամ հիշում ենք մեր առաջին StaffCoverage-ը, շատ լուսավոր ու դրական էներգիայով լի այց էր Joomag ընկերություն, այնուհետև Synergy International Systems, HelpSystems Armenia… ու այլ շատուշատ միջազգային ու հայկական ընկերություններ)։
Տպավորիչ էին նաև մեր հարցազրույցները հաջողակ կարիերա ունեցող մասնագետների հետ, անցյալ տարի StaffBlog-ը՝ որպես կարիերայի մեդիա գործընկեր, հարցազրույցներ էր ունենում «Վերափոխելով բանականությունը» խորագրով «Գլոբալ ինովացիոն ֆորում»-ին մասնակցող աշխարհի 20 երկրի ներկայացուցիչների հետ, ինչպես նաև #WCIT2019 համաշխարհային տեխնոլոգիական համաժողովի աշխարհահռչակ մասնակիցների հետ։
Բայց ամենակարևորը, StaffBlog-ից StaffMedia անցումը մեր այս ճամփորդությունում միայն մայլսթոնի փոփոխություն է, քայլ է՝ լի նոր ու հետաքրքիր նախագծերով, քննարկումներով, իսկ նպատակը շարունակում է մնալ նույնը՝ զարգացնել աշխատաշուկան, օգնել գործատուներին արդյունավետ կառավարել մարդկային ռեսուրսները, գտնել լավագույն մասնագետներին, իսկ աշխատանք փնտրողներին աջակցել կարիերայի կառուցման առաջին իսկ փուլից։
Եվ, իհարկե, այս ամենն ուղղակի անհնար կլիներ առանց ձեզ, ձեր կողմից ցուցաբերած ակտիվության և նախագծերին մասնակցության, ինչի համար անչափ շնորհակալ ենք։ Այս առիթով մենք ունենք հատուկ անակնկալ ձեզ համար՝ հնարավորություն ընձեռելով StaffMedia-ում հրապարակել ձեր կարիերայի առանձնահատուկ պատմությունը։
Այսպիսով, մասնակցեք «Իմ կարիերայի պատմությունը» թեմայով StaffMedia շարքին՝ գրելով փոքրիկ հոդված ձեր կարիերայի պատմության մասին։ Այն կլուսաբանվի StaffMedia-ում, իսկ ամենաշատ հավանումների արժանացած հոդվածի հեղինակը կստանա նվեր – անակնկալ staff.am-ի կողմից։
Նաև փոքրիկ (ընդամենը 4 հարց, 2 րոպե) հարցում ենք պատրաստել տեղեկանալու, թե ինչ հետաքրքիր նախագծեր ու թողարկումներ կցանկանաք տեսնել staff.am մեդիա ռեսուրսում։
