People Operations (ՄԳՀ) միտումները | Հեղինակ՝ Անի Թորանյան

607

Մարդկանց գործողությունների համակարգման (People Operations) միտումներն աներկբա կշարունակեն զարգանալ և վերափոխվել՝ ըստ կազմակերպությունների կարիքների։ Սակայն մենք նշենք ընդհանրական այն միտումները, որոնք վաղուց դադարել են լինել հորիզոնից այն կողմ։

Ծանոթանանք.

Ա – Աշխատակիցների բարեկեցություն և հոգեկան առողջություն,

Բ – Աշխատանք-անձնական կյանք հավասարակշռություն,

Գ – Այլակերպ (hybrid) աշխատանք,

Դ – Աշխատակիցների որակավորում և վերապատրաստում,

Ե – Մասնագիտական-տեխնիկական ծրագրային ապահովում եւ գործիքակազմ։

Ահա և խորագրի համարժեք հինգ ընդգծումները, որոնք իրենց հերթին բաղկացած են բազում շերտերից։ Փորձենք բացահայտել Մարդկանց գործողությունների համակարգման (ՄԳՀ) էական միտումները։

ՄԳՀ անընդմեջ զարգացող գործառույթները լրջորեն շարունակում են ճյուղավորվել և արտացոլել ժամանակակից աշխատավայրի հարափոփոխ կարիքները:

Գոյություն ունեցող հիմքի վրա շարունակ նոր աղյուսներ են ավելանում՝ ստեղծելով այն կարևոր ու բազմաշերտ կառույցը, որը և ձևավորում է ՄԳՀ ապագան:

Անդրադառնանք վերոհիշյալ աղյուսներին։

Աղյուս Ա – Լիակատար բարեկեցություն

Դեռևս մի քանի տարի առաջ գոյություն ունեցող միտումն ընդգծում էր բարեկեցության և հոգեկան առողջության կարևորությունը, մինչդեռ այսօր այդ ուղղությունը վերաարժևորվել և ճանաչումից անցում է կատարել դեպի աշխույժ և գործնական ռազմավարություն:

Կազմակերպությունների ՄԳՀ բաժիններն ընդունում են բարեկեցության մշակված ծրագրեր, հոգեկան առողջությանը սատարող նախաձեռնություններ, ինչպես նաև կատարելագործում են աշխատավայրի մշակույթը:

Աշխատակիցների աջակցման ծրագրերն ու լարվածության կառավարումը  դադարել են լինել ընտրական և դարձել են ՄԳՀ ռազմավարության անբժանելի բաղադրիչները:

Որպես կյանքի իրավունք ստացած օրինակ՝ կարող եմ նշել Picsart ընկերության «Հոգեկան առողջության օր»-ը, որն աշխատակիցները վայելում են յուրաքանչյուր ամսվա երրորդ ուրբաթ օրը, այն միացնելով շաբաթավերջի օրերին, և այդպիսով բազմապատկելով հանգստյան օրերի պարգևած հաճույքը։ Մարդիկ իրենց անթաքույց ուրախությունն են հայտնում տարեկան 20 աշխատանքային օրերի վրա, գումարված 12 լրացուցիչ օրերի դրական ազդեցության վերաբերյալ։

picsart
Լուսանկարը՝ staffmedia.am-ի

Աղյուս Բ – Աշխատանք – կյանք ներդաշնակում, հավասարակշռութուն

Աշխատանքի որակական և քանակական ցուցանիշների վրա Էական ազդեցություն ունի աշխատանք-անձնական կյանք հավասարակշռությունը, որին պետք է հասնել ամեն գնով։

Այս առումով կազմակերպությունների ղեկավար կազմերն ու ՄԳՀ-ն սկսել են ավելի հոգատար վերաբերմունք  ցուցաբերել՝ քաջ գիտակցելով, որ մարդու աշխատանքն ու անձնական կյանքն անքակտելի են և փոխկապակցված: Առաջատար ընկերություններում որդեգրվում են բավականին ճկուն մոտեցումներ, որոնց կիրառմամբ աշխատակիցների զգալի մասը կարողանում է հավասարակշռել իր աշխատանքային և անձնական կյանքը:

Աշխատակցի հանդեպ կազմակերպության ղեկավարության և ՄԳՀ մասնագետի վստահությունը բազմապատկում է սեփական ժամանակացույցը տնօրինելու ազատություն ստացած մարդկանց գոհունաակությունն ու հոգեկան անդորրը՝ այդպիսով բարձրացնելով նաև նրանց աշխատանքի արդյունավետությունը։ Աշխատակիցն արժանի է ուշադրության, վստահության և բարեհոգի վերաբերմունքի։ Այստեղ անհապաղ գործում է բումերանգի անխախտ օրենքը։

Աղյուս Գ – Այլակերպ (hybrid) աշխատանք

2020 թվականից այս կողմ աշխատանքի այլակերպ (hybrid) տարբերակն աշխատակցին տալիս է ավելի մեծ ազատություն և հնարավորություն՝ ըստ իր հայեցողության և կյանքի պահանջների կազմել սեփական ժամանակացույցը, որը և հանգեցնում է ավելի մեծ բավարարվածության, հոգեկան հանգստության և բարեկեցության:

Սա ժամանակի հրամայականն է և կազմակերպության ճկուն քաղաքականություն վարելու խելամտությունը, որը նպաստում է իր աշխատակիցների արտադրողականության բարձրացմանը։

Աղյուս Դ Ուսումնառությունը՝ ապրելակերպ։ Կատարելագործում և վերապատրաստում

Կարևորագույն նշանակություն և դեր ունեն աշխատակիցների որակավորումն ու վերապատրաստումը, որոնք ամեն գնով պետք է դարձնել պարտադիր և շարունակական: 21-րդ դարն իր սրընթաց զարգացումներով թելադրում է հարատև ուսումնառություն:

ՄԳՀ-ին վերապահված է ստանձնել մարդկանց հմտությունների բացերը բացահայտելու, անհատականացված ուսուցման ուղիներ մշակելու, ինչպես նաև աճի հնարավորություններ ստեղծելու գործոն դերը: Այս միտումը կարող է սնունդ ստանալ արհեստական բանականության (AI) և մեքենայական ուսուցման (ML) ընձեռած հնարավորություններից, որոնք կազմակերպություններին հնարավորություն են տալիս լինել իրենց արագ զարգացող ասպարեզների առաջնագծում:

Աղյուս Ե – Շարունակվում է People Operations (ՄԳՀ) տեխնիկական բարեշրջումը (evolution)

ՄԳՀ տեխնիկական ծրագրային (software) ապահովման և գործիքակազմի ոլորտը ենթարկվում է բարեշրջման հոլովույթին։  Մեքենայացումը, AI-ով պայմանավորված վերլուծություններն ու դրանց կանխատեսող մոդելավորումը ոչ միայն նպաստում են արդյունավետության բարձրացմանը, այլև դարձել են կարևորոգույն գործոններ և… ինչ որ ձևով նաև ռազմավարական դաշնակիցներ:

ՄԳՀ մասնագետների ավանդական դերի վրա գումարվում են նոր գործառույթներ։ Նոր սերնդի մասնագետները պետք է տարբերվեն տվյալների վրա հիմնված որոշումներ կայացնելու իրենց ունակությամբ, որոնք, իրենց հերթին, կծառայեն գործընթացների պարզեցմանը, հավաքագրման ռազմավարությունների բարելավմանը, այդպիսով պատկերացում տալով աշխատակիցների ներգրավվածության չափի և կատարողական որակի վերաբերյալ։

Կազմակերպությունների հարուստ գործունեության ընթացքում ՄԳՀ-ն հանդես է գալիս որպես հիմնական ներդաշնակող՝ նախանշելով աշխատանքի ապագան սահմանող թաքուն շերտերը:

Անվերջ փոփոխությունների և նորարարության այս դարաշրջանում ՄԳՀ-ի պարտականությունն է կատարել ոչ միայն գլխավոր օժանդակողի, ներդաշնակողի, այլև կազմակերպչական առաքելությամբ նոր աշխատատեղեր ձևավորողի դերը։ Այն աշխատատեղերի, որոնք  ընդունակ կլինեն դիմակայել վաղվա մարտահրավերներին: