Շաբաթվա գիրքը | Ռոբին Շարմա․ «Հրովարտակ՝ ուղղված ամենօրյա հերոսին» (The Everyday hero Manifesto)

1072

Այս անգամ շաբաթվա գիրքը յուրահատուկ է, քանի որ այն դիտարկել ենք համատեղ մեր գործընկեր Բուկինիստի հետ։
Եթե ակտիվ հետևում եք մեզ, ապա նկատած կլինեք, որ օրեր առաջ «Շաբաթվա գիրքը» շարքի շրջանակներում staff.am-ի սոց. հարթակներով կարճ հարցում էինք անցկացրել՝ առաջադրելով Բուկինիստի թարգմանությամբ 4 գիրք, որոնցից մեկը պետք է արժանանար շաբաթվա դիտարկմանը։ Ընթերցողների մեծ մասը քվեարկել էր մի գրքի համար, որն աշխարհում հայտնի է իր մոտիվացիոն և առաջ մղող գաղափարներով։

Ռոբին Շարմա անունը մեր ընթերցասեր հասարակությունն անմիջապես կապում է «Վանականն, ով վաճառեց ֆերրարին» գրքի հետ։
Ի ուրախություն բոլորիս՝ հեղինակի մոտիվացիոն ստեղծագործություններն այսքանով չեն սահմանափակվում։

Շաբաթվա գիրքը նախագծի շրջանակներում Ձեզ ենք ներկայացնում Շարմայի ևս մեկ ազդեցիկ գրքի դիտարկում՝ «Հրովարտակ՝ ուղղված ամենօրյա հերոսին» (The Everyday hero Manifesto), որի հեռանկարային ու մոտիվացնող գաղափարներն անշուշտ արժանի են մեր դիտարկմանը։ Գքրի դիտարկման ընթացքում նաև զրուցել ենք հայերերն տարբերակի թարգմանիչ Աննա Աբրահամյանի հետ, ով կիսվել է մեզ հետ հեղինակի և գրքի մասին իր տպավորություններով։ Ի դեպ, գիրքը կարող եք ձեռք բերել Բուկինիստի օնլայն կայքից՝ books.am-ից։

Աշխատության վերնագիրն արդեն իսկ դրդում է բացել գիրքն ու ծանոթանալ հեղինակի ասելիքին, հասկանալ, թե ով է մեր ժամանակի հերոսը, ինչպես կարող ենք ինքներս մեր մեջ դաստիարակել հերոսին վայել որակներ։ Դե եկեք սկսենք։

1. Մեզնից յուրաքանչյուրը կարող է դառնալ ամենօրյա հերոս՝ հետևողականության և աշխատասիրության շնորհիվ

Հերոսությունը, համաձայն հեղինակի, չի պահանջում արտասովոր, անիրական սխրանքներ։ Այս որակը կարող է լինել առօրյա հոգսերով ապրող յուրաքանչյուր անհատի մեջ, որի ձգտումը ազնվությամբ և նպատակներով լի ապրելն է։
Շարման իր աշխատության մեջ ընդգծում է, թե որքան կարևոր է մարդու պոտենցիալի բացահայտումը`դրա մեջ ներառելով այնպիսի որակներ, ինչպիսիք են քաջությունը, տոկունությունն ու ստեղծարարությունը։
Մեծ գործեր իրականացնելու կարողությունը բոլորիս մեջ է, իսկ մեր առջև դրված խնդիրն այն բացահայտելն ու վեր հանելն է:
Կարևոր է, որ մարդը հավատա իր ուժերին, կատարելագործմանն ու ձգտի լիարժեքությանը։
Կարևորագույն օրենքը, որ հեղինակը ցանկանում է կիսել առօրյա կյանքում հերոսություն գործողների հետ, հետևյալն է․ «Մի՛ սպասեք։ Հետաձգված գործողությունը մեծագույն դավաճանությունն է»։ 

2․ Հերոսության նախադրյալը մտածողության ու գործողությունների պարզ ընթացքն է

Հերոս դառնալու համար նշանակալի մեծ ազդեցություն ունի Ձեր գործողությունների ու մտածողության պարզ ընթացքը։ Նախևառաջ պետք է փոխարինել «Չեմ կարող»-ը «Կարող եմ»-ով՝ այսպիսով ընդգծելով դրական մտածողության կարևորությունը։ Խրախուսվում է նաև, որ ամեն օր ինքներս մեզ ոգեշնչող խոսքեր հղենք։
Հեղինակը խորհուրդ է տալիս, որ կենտրոնանանք արդյունքի վրա՝ այդպիսով հորդորելով մարդկանց չընկրկել որևէ անհաջողության կամ մարդկանց բացասական կարծիքների առջև։ Անցյալի փորձը չպետք է հետ պահի Ձեզ, այլ մոտիվացնի ու առաջ շարժի։

Հեղինակը նաև հորդորում է, որ ուշադիր լինենք, թե ինչի վրա ենք ծախսում մեր ժամանակը։ Բոլորը զբաղված են, սակայն քչերն են արդյունավետ օգտագործում իրենց ժամանակը։
Շարման նաև կարևորում է, որ մարդն ազատվի սպառողի հոգեբանությունից և ավելի շատ փորձի նվիրաբերել։  

3. Վերահսկեք ձեր միտքը, մարմինը և շրջապատը

Էական է, որ կարողանաք վերահսկել ձեր միտքը, մարմինը և շրջապատը։ Պետք է կարողանալ ընտրել ազդեցությունների ճիշտ շրջանակ։ Դրանք կարող են լինել զրույցների, սոցիալական մեդիայի, լրատվական դաշտի կամ ցանկացած ընթերցված աշխատության շնորհիվ։ Այստեղ պետք է հետևել ԵԿԴԱ (եղիր դրական և կստանաս դրական արդյունք) սկզբունքին։
Շարման կիրառում է նաև այսպես կոչված «Կենսունակության փառահեղ երրորդություն» մոդելը՝ սրա տակ նկատի ունենալով երեք հիմնական տարրեր՝ մարզում, սնուցում, վերականգնում։  
Մոդելի առաջին տարրը խրախուսում է մեզ մարզվել։ Այս սովորությունը նպաստում է նեյրոքիմիական դոֆամինի արտադրմանը, որն իր հերթին նպաստում է մեծ ոգեշնչվածության ապահովմանը։ Օրն այս պարզագույն սովորությամբ ջերմեռանդորեն մեկնարկելը դրական կազդի աշխատունակության վրա։ Երկրորդ տարրը սնուցումն է։ Հեղինակը դիտարկում է ճիշտ սնունդը՝ որպես դեղամիջոց։ Մարդու սննդակարգը արհեստավարժ մարզիկի պես առողջ լինելու, երկար ժամանակ խանդավառ, եռանդուն, ուրախ և չափազանց արդյունավետ լինելու հիմնական բաղադրիչն է։ Երրորդ տարրը՝ վերականգնումը, ոչ թե շքեղություն, այլ անհրաժեշտություն է և առաջնահերթություն։ Իրական թարմացման համար անհրաժեշտ է հեռու մնալ անհանգստություն պատճառող ցանկացած ազդեցությունից։ Այն կարող է լինել ընթերցանություն, զրույց հետաքրքիր մարդկանց հետ, ֆիլմերի դիտում, այցելություն մարզասրահ և այլն։ 

4․ Առավելագույն արտադրողականության ռազմավարությունը

Անհանգստությունները, ճգնաժամերը, ողբերգությունները, ինչպես նաև մեր կախվածությունը թվային աշխարհից, սպառում են մեր ճանաչողական կարողությունը՝ դարձնելով մեզ պակաս կենտրոնացած և զրկելով մեզ մեր՝ զարմանալի սխրանքներ իրականացնելու հանճարեղությունից։

Այս խնդիրը հաղթահարելու համար հեղինակն առաջարկում է առաջին հերթին կենտրոնանալ մեկ առաջադրանքի վրա, ապա կատարել մյուսները և ոչ թե ամեն ինչ անել միաժամանակ։ Ռազմավարության հաջորդ օգտակար քայլը օրվա ճիշտ բաշխումն է։ Հեղինակը կողմնակից է նաև վաղ առավոտյան արթնանալուն։ Այդպես կարգավորվում է մտային, հոգևոր, առողջական համակարգը։ Արդյունավետ տեխնիկաներից է նաև գրառումներ անել «Երախտագիտության օրագրում»։
Գործադիր տնօրեններին ու ձեռնարկատերերին Շարման խորհուրդ է տալիս ստեղծել փորձագիտական խորհրդատուների թիմ, որոնք գերազանցում են անցյալի հաղթանակները և արագ իրականացնում արդյունավետությանը նպաստող առաքելությունը․ անհնար է միայնակ հասնել վարպետության։

Ըստ հեղինակի՝ առանձնացումն արգելափակում է ուշադրությունը շեղող երևույթները, ուստի կենտրոնանալու և արդյունավետ աշխատելու համար պետք է գտնես քո «թաքստոցը»։ 

5. Երբ ձեր սիրտն ու ուղեղը ներդաշնակ են, շահում եք ոչ միայն դուք, այլև ամբողջ մարդկությունը

Սիրտը բարդ համակարգ է, և գրեթե բոլորն այնտեղ ունենում են անցյալից մնացած որևէ ցավոտ հիշողություն։ Լավագույն դեղամիջոցն, ըստ հեղինակի, այդ ցավի հետ աշխատելն ու այն ճանաչելն է։
Ուղեղի և սրտի ներդաշնակության համար Շարման առաջարկում է ճանաչել ու մեկտեղել հետևյալ որակները․ ճանաչողություն, զգացմունք, ազատություն, զարգացում (AFRA-Awareness, Feel, Release, Ascend)։ 

Այս որակների զարգացմամբ նպաստում ենք տարբեր համակարգերի ներդաշնակությանը և, անցյալին հետհայացք նետելով, առավել զգոնությամբ ենք մոտենում մեր զգայական ընկալումներին։
Միաժամանակ Շարման նախազգուշացնում է, որ չընկնենք կեղծ դրականության ծուղակը և համարձակորեն ընդունենք մեր զգացմունքային էությունը, որի հետ աշխատելով՝ գրանցում ենք անձնային աճ։ Հերոսական սխրանքն, ըստ հեղինակի, հենց ինքդ քեզ հետ աշխատելու մեջ է։      
Մեր ներքին պայքարի և խոցելիության կառավարումը վեր է հանում յուրաքանչյուր անհատի մեջ իր ներքին հերոսին։ 

Գրքի թարգմանիչը

Ռոբին Շարման վաղուց է գրավել իմ ուշադրությունը կյանքի նկատմամբ իր ուրույն մոտեցմամբ և գաղափարախոսությամբ: Առաջնորդության, ընտանեկան իմաստնության, հանճարեղության, մեծության  և հերոսության նրա դասերը շատ են օգնել ու ոգեշնչել ինձ, ավելի հաստատակամ, ուժեղ ու համարձակ դարձրել: Սա Շարմայի հեղինակած գրքերի իմ հինգերորդ թարգմանությունն է, որը կոչված էր ամբողջականացնելու իմ աշխարհընկալումը, քաջալերելու հավատարիմ մնալ ընտրածս ճանապարհին և շարունակել բացահայտել իմ ներուժը, ներքին հերոսին, ներքին հանճարին և բնատուր կարողություններովս ու թրծված հատկություններովս ծառայել հայրենիքիս, հայ ընթերցողին, առհասարակ մարդկանց՝ սիրով, «տալու» մեծ ցանկությամբ և աշխարհում իմ ներկայությամբ թեկուզ դույզն-ինչ դրական փոփոխություն անելու բուռն տենչանքով,-նշել է գրքի թարգմանիչ Աննա Աբրահամյանը։

«Մի՛ փոքրացրու քո մեծությունը։ Հասկացի՛ր մեկընդմիշտ, որ այսօր մոլորակի վրա քեզ նման մարդ չկա»,-Շարմայի այս խոսքերով, թերևս, ամփոփենք գրքի ասելիքը։ Այս աշխատությունը մեզ ցույց է տալիս հերոս դառնալու պարզ ու իրական ճանապարհը: Շարման բացում է դուռը դեպի իրական հերոսական սխրանքներ, որոնք զերծ են անիրական պատկերացումներից։

Ինչպե՞ս առաջադրել Ձեր նախընտրած գիրքը

Շնորհակալ ենք մեր ընթերցողներին, որ առաջարկում են իրենց նախընտրած գրքերը, որոնց հերթով անդրադառնում ենք։ 

Եթե ցանկանում եք ուղարկել Ձեր նախընտրած գիրքը դիտարկման համար, կարող եք ուղարկել այն hello@staff.am էլ․ հասցեին՝ նշելով․
1․ Ձեր տվյալները (անուն, ազգանուն, մասնագիտություն, աշխատավայր (եթե առկա է),
2․ Գրքի վերնագիրն ու հեղինակին,
3․ Ձեզ վրա գրքի ազդեցության վերաբերյալ 4-5 նախադասությամբ ամփոփում,
4․ Մեկ լուսանկար,
5․ Հեռախոսահամար՝ հետադարձ կապի նպատակով։

Հիշեցնենք, որ առաջարկած գրքի գաղափարը պետք է արտացոլի բիզնեսի կամ կարիերայի աճին միտված ասելիք։ 

Սիրով սպասում ենք Ձեր առաջարկներին։

Powered by staff.am.