staff.am-ն ակտիվորեն ընդլայնում է իր համագործակցությունը պետական ոլորտի հետ։ Փետրվարի 11-ին կնքվեց համագործակցության հուշագիր ՀՀ «Հաշվարկային կենտրոն» ՓԲԸ-ի և staff.am-ի միջև՝ թափուր և ժամանակավոր թափուր աշխատատեղերի վերաբերյալ իրազեկվածության բարձրացման և համապատասխան մասնագետների հավաքագրման համար։
Համագործակցության շնորհիվ այսուհետ կարող եք ծանոթանալ ՀՀ «Հաշվարկային կենտրոն»-ի թափուր աշխատատեղերին staff.am-ում և դիմել ընդամենը մեկ click-ով՝ օնլայն։ ՀՀ «Հաշվարկային կենտրոն»-ը գործում է ՀՀ Էներգետիկ ենթակառուցվածքների և բնական պաշարների նախարարությանն առընթեր և իրականացնում է ՀՀ ողջ տարածքում էլեկտրական էներգիայի (հզորության) առևտրային հաշվառման, ինչպես նաև հաշվառված էլեկտրաէներգիայի (հզորության) վերաբերյալ ակտեր կազմելու և պայմանագրային կողմերին ներկայացնելու գործառույթներ։
Նշենք, որ staff.am-ը պետական հատվածի հետ սկսել է համագործակցությունը դեռևս 2019թ․ հունիսին՝ գործընկերային սկզբունքով պետական մարմինների նախաձեռնությամբ։ Արդեն համագործակցում ենք ՀՀ Վարչապետի աշխատակազմի, ՀՀ Վարչապետի աշխատակազմի անվտանգության խորհրդի գրասենյակի, ՀՀ Ազգային ժողովի աշխատակազմի, ՀՀ Կրթության, գիտության, մշակույթի և սպորտի նախարարության, ՀՀ Աշխատանքի և սոցիալական հարցերի նախարարության, ՀՀ Էկոնոմիկայի նախարարության, ՀՀ Սոցիալական ապահովության ծառայության, Հայաստանի արտահանման ապահովագրական գործակալության, ՀՀ Քաղաքաշինության, տեխնիկական և հրդեհային անվտանգության տեսչական մարմնի և այլ պետական մարմինների հետ։
