Ինչպես ասում է Գարեգին Նժդեհը․ «Մի ժողովուրդ`մի ընտանիք», իսկ ինչպես ասում է staff.am-ը «Մի ընկերություն՝ մի ընտանիք»։ Պատերազմական իրավիճակն էլ եկավ ապացուցելու այս փաստը, որ ընկերությունները նման են ընտանիքի․ համախմբվում ու միմյանց թև ու թիկունք են լինում թե ուրախության, թե արտակարգ դրության ու թե ռազմական դրության պայմաններում։ Շատ արագ բռունցքվում են, մեծ ջանասիրությամբ նվիրաբերում հնարավոր ամեն բան՝ տաղանդներ, ֆինանսական, հումանիտար այլ միջոցներ ու միասնաբար էլ կերտում հաղթանակը։
Մեծ հպարտությամբ էլ այսօր ուզում ենք ձեզ հետ կիսվել մի շարք ընկերությունների բարձր մարտական ոգով ու ողջունելի գործունեությամբ, ինչի շնորհիվ մեր թիկունքն ամուր է, իսկ առաջնագիծը՝ հզոր։
ԻՆԵԿՈԲԱՆԿ ՓԲԸ
Ինեկոբանկում յուրաքանչյուրը փորձում է օգտակար լինել հայրենիքին՝ ամենքն իր տեղում:
Որպես հաճախորդամետ և ֆինանսական կազմակերպություն՝ Ինեկոբանկում առաջին հերթին սեպտեմբերի 28-ից ներդրվեց #ArtsakhStrong ձևանմուշը։ Հաճախորդները շատ արագ և հեշտ կարողացան մասնակցել «Հայաստան» համահայկական հիմնադրամի համազգային դրամահավաքին՝ տասնապատկելով բանկի կողմից կատարված նվիրատվությունը՝ այսպիսով անցնելով 1 մլրդ դրամի շեմն առ այս պահը։
Բանկը նաև մշակել և հրապարակել է գործողությունների համառոտ ուղեցույց զորակոչված հաճախորդների գործարքները դյուրացնելու համար։
Չնայած նրան, որ արդեն իսկ բավականին մեծ աջակցություն է ցուցաբերվել ընկերության կողմից, որոշ գաղափարներ դեռ քննարկման փուլում են։ #ՀԱՂԹԵԼՈՒԵՆՔ
ROCKBITE GAMES
Որպես խաղերի ստեղծման ընկերություն՝ Rockbite Games ընկերության աջակցությունն այլ ուղղվածությամբ էր։ Բացի Արցախին ցուցաբերած ֆինանսական օժանդակությունից, այստեղ յուրաքանչյուր թիմակից փորձում է իր անձնական ներգրավվածությունն ունենալ ու հնարավորինս թիրախավորված աջակցություն ցուցաբերել։
Եվ այսպես, որոշվեց շեշտը դնել խնդրի բարոյահոգեբանական կողմի վրա․
«անմիջապես կապ հաստատեցինք Արցախից Երևան ու հարակից մարզեր ժամանած ընտանիքների հետ ու արցախահայ երեխաներին ապահովեցինք խաղալիքներով, գեղարվեստական գրքերով ու գրենական պիտույքներով, քանի որ այս պահին տիրող անկայուն ու սթրեսային իրավիճակում հատկապես կարևոր է մանուկների հոգեվիճակն ու աշխարհընկալումը հնարավորինս առողջ ու դրական պահպանելը»։
#ՀԱՂԹԵԼՈՒԵՆՔ
DAVEL CREATIVE AGENCY
Հաշվի առնելով, որ գնում է թեժ պատերազմ ոչ միայն սահմանին, այլ նաև տեղեկատվական դաշտում, Davel Creative Agency-ում գործի դրեցին կրեատիվությունն ու միտքը՝ “Difference you must know” իլյուստրացիաների շարքի միջոցով աշխարհին ցույց տալով Արցախի և Ադրբեջանի միջև տարբերությունը։ Վիզուալ շարքը #HumanityVsAzerbaijan հաշթագով կարճ ժամանակում սիրվեց ու մեծ տարածում ունեցավ շատերի կողմից, տարբեր հարթակներում, տարբեր երկրներում, բազմաթիվ ինֆլուենսերների, սելեբրիթիների կողմից, անգամ ազերիների 🙂
«Իհարկե, բնավորության համաձայն նրանք գողացան մեր գաղափարը, փոխեցին անունների տեղը և սկսեցին մեր վիզուալը օգտագործել մեր դեմ։ Բայց դե, բոլորս գիտենք, վիզուալը կարող են վերցնել, իսկ մեր բարոյական արժեքներն ու մոտեցումները՝ ԵՐԲԵՔ»։
Սոցիալական արշավին ու մեդիա մարտին զուգահեռ Davel-ի թիմը մտահոգվում էր մեր առաջնագծի մարտիկների մասին։ Շատ արագ ճշտեցին, թե ինչ պարագաներ են պակասում ու ջերմագույն նամակներով իրերն ուղարկեցին առաջնագիծ։
«Մեր հավաքագրմանը միացել էր անգամ մի արշավական աղջիկ, ով իր միակ ու իր համար թանկ քնապարկը մեծ սիրով եկավ և ուղարկեց բանակին»։
#ՀԱՂԹԵԼՈՒԵՆՔ
GLOBBING
Միասին #հաղթելուենք: Չկա ավելի ոգևորիչ բան, քան այն, որ պատերազմի առաջին իսկ օրվանից հայ ազգի ցուցաբերած միասնականությունն ու համախմբվածությունը երևում է ոչ միայն առաջնագծում, այլ նաև՝ թիկունքում։ Ինչպես մյուս բոլոր ընկերությունների դեպքում, այստեղ էլ աջակցությունը տարբեր ուղղություններով էր։ Մի շարք աշխատակիցներ առաջին իսկ օրվանից մեկնեցին ճակատ՝ հաղթանակը բերելու, իսկ Գլոբբինգը նախաձեռնեց ու գործարկեց հումանիտար աջակցության ծրագիր թե Հայաստանից, թե արտերկրից։
Ամենաանհրաժեշտ բեռների փոխադրման ծրագրին մեկ մարդու պես մասնակցեց շուրջ 200 կամավոր, արագ սորտավորեցին իրերն ու ուղարկեցին ճակատ։ Ընկերության կանոնակարգված աշխատանքի շնորհիվ այս պահի դրությամբ 35 եւ ավել բեռնատար անհրաժեշտ պարագաներով եւ քաջալերող խոսքերով տեղ են հասել։
Ընկերությունը հնարավորություն տվեց նաեւ արտերկրում բնակվող հայրենակիցներին կամ այն անձանց, ովքեր ցանկություն ունեն արտերկրից օգնություն ուղարկել, oգնության նպատակով ուղարկված բոլոր ծանրոցները յոթ երկրներից (ԱՄՆ, Մեծ Բրիտանիա, Չինաստան, Գերմանիա, Իտալիա, Դուբայ, Ռուսաստան) առաքել անվճար։
«Գլոբբինգում վստահ ենք, որ մեր ազգի միասնականությունն անկոտրում է և մենք անպայման #հաղթելուենք»:
Համապատասխան մարմինների հետ կապ պաշտպանելով`Գլոբբինգը շարունակում է իր Տելեգրամ ալիքում ներկայացնել հավաքի անցկացման միշտ թարմացվող ու անհրաժեշտ իրերի ցանկը: #ՀԱՂԹԵԼՈՒԵՆՔ
DISQO
Իսկ լսե՞լ եք “support our country” կոմիտեի գործունեության մասին․ եթե ոչ, եկեք տեսնենք, թե ինչպես այն ձևավորվեց Disqo-ում ու ինչ գործունեությամբ է զբաղվել այս օրերին։
«Լուրը լսելու հաջորդ օրը՝ երկուշաբթի, սպոնտան օնլայն հանդիպում-քննարկում ունեցանք թիմում, support-our-country կոմիտե սետղծեցինք ու արագ բաժանվեցինք աշխատանքային խմբերի՝ ըստ թիմի առաջարկած աջակցությունների»։
- Բարձր տեխնոլոգիական աջակցություն – Տրամաբանորեն առաջին առաջարկներից մեկը DISQO-ի տեխնոլոգիական թիմի ներգրավվածությունն էր։ Գաղտնիությունն ապահովելու նպատակով՝ ուղղակի կնշենք, որ տարբեր կառույցների հետ համաձայնեցնելուց ու կարիքները քննարկելուց հետո փորձառու ու պրոֆեսիոնալ թիմն անցավ գործի։
- Մեդիա պայքար – հաղորդակցման ու մարքեթինգի հմուտ մասնագետներն էլ տարբեր ուղղություններով անցան գործի մեդիա հարթակում՝ լոկալ հանրությանը մոբիլիզացնելուց մինչև միջազգային թոփ լրատվականների հետ աշխատանքներ։
- Հումանիտար օգնություններ – Այս օրերին հասցրած կլինեք ծանոթանալ DISQO-ից Լևոնի և Լուսինեի հետ։ Առաջին անհրաժեշտության դեղորայքի, հագուստի կամ այլ ոչ-պարենային ու պարենային ապրանքների հավաքագրումը համակարգում էր ծրագրավորողներից Լևոնը, իսկ ՄՌ մասնագետ Լուսինեն՝ կամավորների աշխատանքն ու տրասնպորտափոխադրումը։
- Կացարանների ապահովում – «Ոչ ոքս չէր ցանկանա այս պայմաններում ծանոթանալ ու շփվել այս դրական էակների հետ, ովքեր գուցե դեռ չէին էլ գիտակցում, թե ինչ է կատարվում, բայց նրանք մեր կարիքն ունեին, ուստի փորձեցինք հնարավորինս օգտակար լինել նաև այս հարցում»:
- Միացում զորահավաքին – DISQO-ում մեծ ակնածանքով են խոսում, և, իհարկե, սրտատրոփ սպասումով, այն կոլեգաների ու ընկերների մասին, ովքեր թողեցին ամեն բան ու շտապեցին առաջնագիծ։
- Հայկական սփյուռքի մոբիլիզացիա – Գտնվելով Լոս Անջելեսում, որտեղ հայերի ամենամեծ համայնքներից մեկն է գործում, DISQO Հայաստանյան գրասենյակի ղեկավար Թանիա Սահակյանը նոր աշխատանքային խումբ նախաձեռնեց: Խմբում ընդգրկվեցին տարբեր ոլորտներից ակտիվ անհատներ (թիմից ու այլ կառույցներից), ովքեր միացան համահայկական դրամահավաքի առաջխաղացմանն ու տեխնիկական աջակցմանը։
- Ֆինանսական նվիրատվություն – DISQO-ն նաև չվարանեց իր թիմի անունից ֆինանսական նվիրատվություն կատարել՝ հասկանալով, որ պատերազմական վիճակի ավարտից հետո էլ դեռ շատ երկար ժամանակ երկիրը ոտքի կանգնելու ու առաջ գնալու կարիք է ունենալու։ Այդ նպատակով DISQO-ի աշխատակիցները որոշակի ժամանակահատված որոշել են նաև ամեն ամիս իրենց աշխատավարձից ֆիքսված գումար փոխանցել «Հայաստան» համահայկական հիմնադրամի ֆոնդին։ #ՀԱՂԹԵԼՈՒԵՆՔ
ԱԹԵՆՔ
Դեպի առաջնագիծ ու թիկունք Աթենք ընկերության հումանիտար աջակցությունը չուշացավ։ Մեծ նվիրվածությամբ փաթեթավորվեցին, սորտավորվեցին բեռները և ուղարկվեցին։ Այո, այսպիսին է մեր հայ ժողովուրդը, այսպիսին են նաև աթենքցիները։
Բացի ընկերության կողմից տրամադրած ֆինանսական մեծ աջակցությունից, աշխատակիցներն առանձին դրամահավաքություն են կազմակերպել և շուրջ 6,500,000 դրամ փոխանցել «Հայաստան» համահայկական հիմնադրամին։ #ՀԱՂԹԵԼՈՒԵՆՔ
STAFF.AM
staff.am-ում բոլորը, անգամ մեր հետևորդները գիտեն, որ բոլորիս գործը ՀԱՂԹԱՆԱԿՆ Է։ Հենց համանուն սոցիալական արշավով էլ սկսվեց մեր համառ պայքարը մեդիա դաշտում։ Բացի այն որ թիմից յուրաքանչյուրս մեր առանձին ներդրումն ունենք թե արցախահայությանն ուղղված հումանիտար աջակցությամբ, թե ֆինանսական, թիմով միասնական քննարկեցինք նաև մեդիա դաշտում պայքարի ու աջակցության մեր ուղղությունները՝
- Հայ համայնքին աջակցող StaffMedia ռեսուրսներ և StaffLIVE հանդիպումներ – այս նախագծի շրջանակներում շատ արագ պատրաստեցինք «Եղի՛ր տեղեկացված» մեդիա անդրադարձ, ինչպես նաև կազմակերպեցինք երկու StaffLIVE հանդիպում մինչբժշկական առաջին օգնության մասին և մեդիա դաշտում պատերազմելու ճիշտ կանոնների մասին՝ 100,000 և ավելի մեր հետևորդներին տրամադրելով այս օրերին ամենաանհրաժեշտ հմտություններն անմիջապես մասնագետների կողմից։ StaffLIVE այլ կարևոր հանդիպումներ առաջիկայում նույնպես սպասվում են, որի մասին շուտով կտեղեկացնենք։
- «Իմ գործը հաղթանակն է» – սոցիալական արշավի միջոցով հայ հասարակությանը ոգեշնչում ենք միանալ պայքարին իրենց աշխատանքով՝ անկախ մասնագիտությունից ու տարիքից։ Անգամ երեխաներն իրենց երազանքով մեզ մեկ քայլ ավելի մոտ են կանգնեցնում մեր հաղթանակին։
Շարունակենք նույն մարտական ու հաղթական ոգով կանգնել մեր հայոց բանակի թիկունքին՝ ամբողջ աշխարհին ցույց տալով, որ ՀԱՅԸ ՀԱՂԹԵԼ Է, ՀԱՂԹԵԼՈՒ Է ՈՒ ՊԻՏԻ ՀԱՂԹԻ։
Հատուկ շնորհակալություն ենք հայտնում բոլոր այն ընկերություններին, կազմակերպություններին ու անհատներին, որոնք մեծ նվիրվածությամբ այս հերոսական օրերին օժանդակում են ՄԵՐ ՀԱՅՐԵՆԻՔԻՆ։
