Ապրիլի 22-ին տեղի ունեցավ staff.am-ի կողմից կազմակերպած «Ինչո՞ւ է կարևոր գործատուի բրենդավորումը» թեմայով վեբինար-քննարկումը, որին մասնակցում էին տարբեր ընկերությունների HR և ոլորտով հետաքրքրված այլ մասնագետներ։
Թեման շատ ակտուալ էր, իսկ մեր հյուր-խոսնակների փորձն ու գիտելիքներն այդ ոլորտում էլ ավելի հետաքրքիր ու օգտակար դարձրեցին միջոցառումը մասնակիցների համար։ Այսպիսով, վեբինարի գլխավոր խոսնակներն էին Digitain ընկերության ՄՌ ղեկավար Աննա Պողոսյանը, ID Bank-ի ՄՌ տնօրեն Մարիանա Էդիլյանը, PicsArt ընկերության Ներքին հաղորդակցության և մշակույթի բաժնի ղեկավար Նազելի Պետրոսյանը և Synopsys Armenia -ի Ավագ հավաքագրման մասնագետ Ասյա Մխիթարյանը։ Վեբինար-քննարկումը վարում էր staff.am և HireBee համահիմնադիր Լուիզա Ավետիսյանը։
Վեբինարի ընթացքում հիմնականում քննարկվել են գործատուի բրենդավորման թրենդները հետպանդեմիկ շրջանում, ինչ պետք է անել և ինչ չպետք է անել գործատուի բրենդավորման համատեքստում (այլ կերպ ասած do’s & don’ts), և թե ինչպես են HR տեխնոլոգիաները բարելավում թեկնածուի փորձը։
Իսկ ի՞նչ է Գործատուի բրենդը, հարցը շատ պարզ է թվում, բայց պատասխանն էլ միանշանակ չէ․
«Ինձ համար գործատուի բրենդն առաջին հերթին ընկերության արժեքներն են, երկրորդը՝ ընկերության աշխատակիցները, և երրորդը ղեկավար պաշտոնում գտնվող անձի (հիմնադիր, տնօրեն) անձնական բրենդն է»,– Լուիզա Ավետիսյան։
«Եթե մենք ունենայինք նկարներ, ապա Գործատուի բրենդի համար կլիներ 3 նկար․ մեկը՝ ընկերության նկարը, մյուսը՝ աշխատակցի, իսկ երրորդը կլիներ դատարկ, քանի որ վերջինը պատկերում է ընկերության մշակույթը, որը ոչ ոք չի կարող տեսնել և նկարագրել», – Աննա Պողոսյան։
«Գործատուի բրենդավորումը հարաբերությունների կառուցումն է քո անցյալ, ներկա և ապագա աշխատակիցների հետ»,– Մարիանա Էդիլյան։
«Մարդիկ, մշակույթը և զգացողությունն (կամ էմոցիաներն) են Գործատուի բրենդը», – Նազելի Պետրոսյան։
«Գործատուի բրենդը աշխատակիցներն են միանշանակ, մշակույթը, որը ստեղծվում է և աշխատակիցների կողմից, և մենեջմենթի կողմից, և այն զգացողությունները, որոնցով մի կողմից կապվածություն է ստեղծվում բրենդի հետ, իսկ մյուս կողմից արտաքին միջավայրն է կապվում այդ բրենդի հետ», – Ասյա Մխիթարյան։
Իսկ ի՞նչ է պատահում, երբ ընկերությունները չեն զբաղվում գործատուի բրենդավորմամբ կամ պարզապես ուշադրություն չեն դարձնում, չեն նկատում դրա կարևորությունը ժամանակակից աշխարհում։
Կրկին հետաքրքիր հարցադրում հնչեց, որի պատասխանները եթե ամփոփենք, ապա կարող ենք ասել, որ ինչքան կարևոր է ընկերության բրենդը հաճախորդներին ներկայացնելու համար, նույնքան կարևոր է գործատուի բրենդը համապատասխան որակավորմամբ աշխատակիցներ ընդունելու և արդեն իսկ աշխատակիցների պահպանման համար։ Թե ինչպես է ընկալվում գործատուն թեկնածուի կողմից, ինչպես է իր ուժեղ կողմերը ներկայացնում, և թե ինչպիսի հեղինակություն ունի իր իսկ աշխատակիցների առջև, շատ բան է ասում ընկերության ներքին մշակույթի մասին։ Եվ ամենակարևորը, բարձր գործատուի բրենդավորում ունեցող ընկերություններն ավելի հեշտորեն են գտնում նոր, համապատասխան որակավորմամբ աշխատակիցներ, դա նաև նպաստում է երկարաժամկետ աշխատելու պատրաստակամության մեծացմանը։
Վերջին մեկուկես տարվա իրադարձություններն էլ անմիջականորեն առնչվում էին մարդկային ռեսուրսների կառավարման հետ, ինչի արդյունքում էլ նոր միտումներ առաջ եկան այս ոլորտում՝
- Աշխատակիցների բարեկեցության կարևորումը ընկերության կողմից,
- Աշխատակիցների՝ միմյանց և ընկերության միջև կապի ապահովումն ու պահպանումը,
- Նոր աշխատակիցների ընտրության ժամանակ հոգատար լինելու հանգամանքի կարևորությունը,
- Արագ հարմարեցումը փոփոխություններին։
Do’s and don’ts-ի քննարկման ժամանակ յուրաքանչյուր խոսնակ կիսվեց իր մոտեցումներով և շեշտը դրվեց այն փաստի վրա, որ տարիների ընթացքում ձևավորած գործատուի բրենդավորումը կարելի է փչացնել մեկ հրապարակման, մեկ հայտարարության կամ իրավիճակին ոչ համապատասխան վերաբերմունքի պատճառով։ Իսկ անհրաժեշտ քայլերի մեջ կարելի է առանձնացնել հետևյալ կետերը՝
- Պատմեք ձեր պատմությունը,
- Եղեք ազնիվ,
- Գործատուի բրենդավորումն իրականացրեք շարունակական։
Վերջում քննարկվեցին HR տեխնոլոգիաների դրական և բացասական ազդեցությունները գործատուի բրենդավորման վրա։ Պանդեմիայի պատճառով HR տեխնոլոգիաները դարձան ավելի քան պահանջված։ Հասարակ աշխատանքային շփումները տեղափոխվեցին վիրտուալ հարթակ, և տեխնոլոգիաների միջոցով կապի պահպանումը դարձավ մեր առօրյայի անփոխարինելի մաս և շարունակում է այդպիսին մնալ մինչ այսօր։ HR տեխնոլոգիաների մասին խոսելիս staff.am հաճախորդների բազայի ղեկավար Շուշանիկ Ղազարյանը ներկայացրեց HireBee.ai ռեքրութմենթի ավտոմատացման համակարգի հնարավորությունները պանդեմիկ և պոստմանդեմիկ ժամանակահատվածի համար, թե ինչքանով այն կարող է հեշտացնել ռեքրութերների աշխատանքը, բարձրացնել թեկնածուների հետ ճիշտ ժամանակին և ճիշտ մոտեցմամբ հաղորդակցման մակարդակն ու ապահովել լավագույն փորձը (candidate experience):
Ի՞ՆՉ Է HIREBEE.AI-Ը
HireBee.ai–ը ռեքրութմենթի կառավարման առաջին հայկական հարթակն է, որից այս պահին օգտվում են աշխարհի 10+ երկրներից։ Այն ամպային լուծում է, որն ավտոմատացնում է հավաքագրման ողջ գործընթացը՝ սկսած հայտարարության տեղադրումից մինչև աշխատանքի առաջարկ թեկնածուին։
Վեբինարի ավարտին staff.am Հաղորդակցության բաժնի ղեկավար Նազելի Բադալյանը ներկայացրեց staff.am-ի կողմից հիմնադրման օրվանից մինչ այժմ Գործատուների համար իրականացված բրենդի առաջխաղացման նախագծերն ու վառ օրինակները։ Փաստերն էլ իրենց հերթին արդեն իսկ խոսում էին, թե ինչքան կարևոր է Գործատուի բրենդավորումն ընկերությունների համար. 100-ից ավելի նախագծեր շուրջ 60 ընկերությունների համար, և այս թիվը շարունակ աճում է։
Շնորհակալություն ենք հայտնում մեր բոլոր խոսնակներին ակտիվ մասնակցության և օգտակար կարծիքներով կիսվելու համար։ Վեբինարն ամբողջական կարող եք դիտել ստորև տեսաձայնագրությունում ու շարունակել հետևել մեզ առաջիկա կարևոր վեբինար-քննարկումները բաց չթողնելու համար։
