Հանրօգուտ աշխատանքն այն աշխատանքն է, որի հիմքում ընկած է հասարակությանն օգտակար լինելու, ինչ-որ մեկի կյանքն ավելի լավը դարձնելու ձգտումը։ Այդպիսին է #իգործ նախագծի շրջանակում DJ Vakcina-ի՝ Արուսիկ Մկրտչյանի, նախաձեռնած աշխատանքը, որի արդյունքում աշխատած գումարն ամբողջությամբ ուղղվում է Հայաստանի երեխաների առողջության հիմնադրամին (HFC Armenia)։ Սա ոչ միայն պարզապես հանրօգուտ աշխատանք է, սա մի նախաձեռնություն է, որի նպատակն է օգնել առողջական խնդիրներ ունեցող երեխաներին, փրկել կյանքեր:
Նախաձեռնությանը սիրով միացել է նաև staff.am-ը և պատմում է թե՛ նախագծի մանրամասները, թե՛ հիմնադրամի գործունեության մասին, թե՛ ստացված, իսկ ավելի ճիշտ՝ ստացվող արդյունքի մասին, քանի որ նախաձեռնությունը դեռ ընթացքի մեջ է։
400-ից ավելի աջակցություն ստացած երեխա, մոտ $5 մլն հավաքված գումար
Հայաստանի երեխաների առողջության հիմնադրամը, որի հոգաբարձուների խորհրդի նախագահը Արցախի պետնախարար Արտակ Բեգլարյանն է, իսկ հիմնադիր-տնօրենը՝ սոցիալական ոլորտի իրավաբան Արմեն (Արմոս) Մարտիրոսյանը, ստեղծվել է 2021-ի հունիսի 1-ին: Սակայն դեռ մինչ այդ՝ 11 տարվա գործունեության ընթացքում, Մարտիրոսյանն իր ընկերների հետ միասին սոց.ցանցերում կարողացել է հանգանակել շուրջ $5 մլն։ Այդ գումարն ուղղվել է Հայաստանում և Արցախում բնակվող՝ առողջական ծանր խնդիրներ ունեցող ավելի քան 400 երեխայի բուժմանը։
Հիմնադրամը՝ համագործակցելով միջազգային առաջատար կլինիկաների ու բժիշկների հետ, օգնում է երեխաներին անհրաժեշտ բուժումը կազմակերպել հայաստանյան և արտասահմանյան լավագույն բուժհաստատություններում, ինչպես նաև իրականացնում է առողջապահական և բարեգործական ոլորտների վերաբերյալ հետազոտություններ, ներկայացնում է ոլորտային բարեփոխումների վերաբերյալ օրենսդրական առաջարկություններ:
Կյանքին վտանգ սպառնացող հիվանդություններ ունեցող երեխաների փրկությանն աջակցելու համար պարզապես անհրաժեշտ է նվիրատվություն կատարել։
#իգործ՝ կյանքեր փրկելու
Հունվարի 13-ից DJ Vakcina-ն՝ Արուսիկ Մկրտչյանը սկիզբ դրեց #իգործ նախաձեռնությանը, որի շրջանակում նա մեկական օր աշխատում է տարբեր ընկերություններում, իսկ ստացված աշխատավարձը՝ փոխանցում հիմնադրամին։
«Արուսիկի նախաձեռնած այս հիանալի արշավի վերաբերյալ տեղեկացա, երբ նա արդեն իր մոտ հրապարակում էր արել ու պատմել գաղափարի մասին և նշել, որ հավաքված ողջ գումարը փոխանցելու է Հայաստանի երեխաների առողջության հիմնադրամին: Ծանոթանալով գաղափարին՝ շատ ոգևորվեցինք, սիրով ընդունեցինք ու հասկացանք, որ այն կարող է հիմնադրամի գործունեության տեսանելիությունը բավականին մեծացնել ու հիմնադրամի գործունեության համար ֆինանսական միջոցներ ներգրավել: Այդպես էլ եղավ, արդեն իսկ շատ լայն շրջանակներ խոսում են այս արշավի մասին, փորձում մասնակցություն ունենալ, բազմաթիվ հեղինակավոր ընկերություններ են միացել, անգամ արտերկրից Արուսիկին դիմում են՝ գաղափարն իրենց մոտ օգտագործելու նպատակով: Այս ողջ ընթացքում բավականին կլորիկ գումար է փոխանցվել հիմնադրամին և Արուսիկի հետ քննարկման արդյունքում որոշել ենք այն ուղղել ասթմա ունեցող երեխաների համար շատ կարևոր դեղորայքի ձեռքբերման ուղղությամբ, որի վերաբերյալ հավելյալ մանրամասներ կներկայացնենք մոտ ժամանակներս: Արուսիկին ու բոլոր աջակիցներին շատ շնորհակալ ենք նման մեծ աջակցության ու վստահության համար և մեծ հույս ունենք, որ այն կլինի շարունակական ու այս նախաձեռնությանը կմիանան նաև այլ հայտնի անձինք ու ընկերություններ», – նշում է Արմեն Մարտիրոսյանը։
«Այս նախագծից շահում են թե՛ կազմակերպությունները, որոնք ցույց են տալիս, որ սոցիալապես պատասխանատու են, և իրենց ներդրումն են ունենում բարեգործության մեջ, թե՛ հիմնադրամը, իսկ արդյունքում՝ երեխաները, որոնց բուժմանը կուղղվի ստացված գումարը։ Սա լավ հնարավորություն է նաև ոլորտի համար, որովհետև երբ մի կազմակերպություն մասնակցում է բարեգործությանը, մնացածը ևս ձգտում են մասնակցել և մաս կազմել լավ գործ անելու այդ շղթայի։ Մարդիկ էլ իրենց հերթին սկսում են վստահել, երբ տեսնում են, որ ամեն ինչ շատ թափանցիկ է արվում», – ասում է Արուսիկը։
70-ից ավելի ընկերություն, մոտ 1,300,000 դրամ
Նախագծի շրջանակում Արուսիկն արդեն հասցրել է աշխատել 20-ից ավելի ընկերությունում՝ որպես վաճառող, կոշկակար, մատուցող, չիր պատրաստող, լրագրող և այլն։ Եվս մոտ 50 կազմակերպություն դեռ սպասում է բարեգործություն անելու իր հերթին։ Այս ընթացքում ստացված ողջ հասույթը՝ մոտ 1,300,000 դրամ, փոխանցվել է հիմնադրամին։
«Ի դեպ, Հայաստանի երեխաների առողջության հիմնադրամն իր ադմինիստրատիվ ծախսերը չի իրականացնում հանգանակված միջոցներից, իսկ դա նշանակում է, որ հանգանակված ողջ գումարն ուղղվելու է բացառապես երեխաների բուժմանը», – նշում է Արուսիկը։
«Շատ հաճախ փոխանցում են անքան գումար, որքան չէին պլանավորում ի սկզբանե․ օրինակ՝ սկզբում գուցե նախատեսում էին 30,000 դրամ փոխանցել, բայց հետո «հավեսի են ընկնում» և վճարում 100,000 դրամ, որովհետև վստահ են, որ գումարը կհասնի նպատակին։ Ի դեպ, այս նախագծի շրջանակում կարող են դիմել նաև փոքր կազմակերպություններ, որոնք հնարավորություն չունեն մեծ գումար փոխանցելու, որովհետև կարևոր է, որ յուրաքանչյուրը հասկանա՝ իր փոքր ներդրմամբ անգամ կարող է մեծ փոփոխություն անել որևէ մեկի կյանքում»։
Նրա խոսքով՝ նախագծի շուրջ այսպիսի ակտիվությունն իր համար էլ է հաճելի անակնկալ, քանի որ սկզբում սպասում էր, որ #իգործ-ին կմիանա մոտ 30 ընկերություն, հավաքված գումարն էլ չի գերազանցի 1 մլն դրամը։
«Ցանկացած ընկերություն կարող է միանալ մեր նախագծին, պարտադիր չէ՝ այս ֆորմատով, կարելի է պարզապես կապվել իմ կամ Արմոսի հետ, փոխանցել գումար և այլն։ Ցանկացած լումա կարևոր է, քանի որ ուղղվելու է երեխաների կյանքի փրկությանը», – հավելում է Արուսիկը։
Ընկերությունների կողմից Արուսիկին վճարված գումարը, բնականաբար, գերազանցում է այդ հաստիքի համար վճարվելիք աշխատավարձը, բայց այս դեպքում դա միայն դրական է, քանի որ շահում են մանուկները:
staff.am-ի «լուման» և Արուսիկի հետ 1 օրը
staff.am-ը չէր կարող անմասն մնալ նման կարևոր նախագծից և որոշեց հրավիրել Արուսիկին՝ անցկացնելու մեկ օր իր թիմի հետ։ Մեր գրասենյակում հայտնի դիջեյը հասցրեց ծանոթանալ staff.am-ի պրոդուկտներին, մասնակցել բրեյնսթորմինգների, քննարկել ընկերության մարքեթինգային ռազմավարությունը և միջոցառումները, անգամ շախմատ խաղալ մեր թիմի գրոսմայստերների հետ։
Հագեցած աշխատանքային օրվա ավարտին Արուսիկը ստացավ աշխատավարձ staff.am-ի կողմից, որն ուղղվել է բարեգործությանը, և փոքրիկ նվեր մեր թիմից հենց անձամբ իրեն։
«staff.am-ում մենք բոլորս ենք հակված բարիք գործելուն. դա արտահայտված է նաև մեր առաքելության մեջ՝ ապահովել այնպիսի արդյունավետ հարթակ, որը կապ կստեղծի աշխատանք փնտրողների և գործատուների միջև։ Եվ մինչ այսօր թե՛ մեր առաքելության, թե՛ կորպորատիվ սոցիալական պատասխանատվության շրջանակներում կազմակերպել և մասն ենք կազմել տարբեր սոցիալական միջոցառումների։ Վերջիններս հիմնականում կրթական ուղղվածություն են ունեցել: Իսկ #իգործ նախաձեռնությանը միանալը մեզ համար շատ կարևոր էր՝ ոչ միայն ֆինանսապես աջակցելու, այլ նաև տեղեկատվական դաշտում մեզ հետ համագործակցող 3000-ից ավելի ընկերություններին նման կարևոր գործին միանալու մասին իրազեկելու տեսանկյունից»:
