Սինոփսիս Արմենիան՝ Synopsys ընկերության ամենամեծ մասնաճյուղն ԱՄՆ-ից դուրս, հունիսի 13-ին հյուրընկալել էր Հայաստանի Հանրապետության նախագահ Վահագն Խաչատուրյանին և մոլեկուլային կենսաբան, նյարդաբան, բժշկագիտության 2021 թ. Նոբելյան մրցանակակիր, Scripps Research ինստիտուտի պրոֆեսոր Արդեմ Փաթափությանին, ով Հայաստան է եկել ՀՀ էկոնոմիկայի նախարարության հովանու ներքո իրականացվող «Գիտության և Գործարարության օրեր» միջոցառման շրջանակում:
«Առանձնահատուկ պատիվ և երջանկություն է հյուրընկալել Հայաստանի Հանրապետության նախագահ Վահագն Խաչատուրյանին և հանրաճանաչ հայորդի, Նոբելյան մրցանակի դափնեկիր Արդեմ Փաթափությանին։ Անչափ կարևորում եմ նման հանդիպումները, քանի որ դրանք տալիս են երկխոսության, անձնային ֆորմատով մտքերի և փորձի փոխանակման, ինչպես նաև հաջողության պատմությունների մատուցման հնարավորություն, ինչն այսօր կենսականորեն կարևոր է մեր երիտասարդ ճարտարագետների և գիտությամբ զբաղվողների համար իրենց մասնագիտական կարիերան և գիտական գործունեությունը ճիշտ և արդյունավետ կազմակերպելու համար»,- նշել է Սինոփսիս Արմենիայի նախագահ Երվանդ Զորյանը:
Շրջայցի ընթացքում ներկայացնելով Սինոփսիս ընկերության գործունեությունն ու ձեռքբերումները, ինչպես նաև Սինոփսիս Արմենիայի նշանակալի դերն ու ներդրումը ընկերության գլոբալ հաջողության մեջ, Հայաստանում իրականցվող կրթական ծրագրերի մասին խոսելիս Երվանդ Զորյանը ընդգծել է, որ բարձր որակավորում և գործնական հմտություններ ունեցող մասնագետներ պատրաստելու համար Սինոփսիսը մեծ ներդրումներ է անում Հայաստանի կրթության ոլորտում, կիրառելով նորարար մոտեցումներ և բուհ-արտադրություն համագործակցության վրա հիմնված կրթական մոդելներ։ Նա հատկապես նշել է, որ Սինոփսիս Արմենիայի Ուսումնական դեպարտամենտի արդյունքներն ինքնին տպավորիչ են․ ներկայումս Սինոփսիս Արմենիայի աշխատակիցների կեսից ավելին ընկերության Ուսումնական դեպարտամենտի շրջանավարտներն են, իսկ բակալավրական և մագիստրոսական ծրագրերում սովորող ուսանողների մեծ մասն արդեն իսկ աշխատում են ընկերությունում։
Իր ողջույնի խոսքում ՀՀ նախագահ Վահագն Խաչատուրյանը անդրադարձել է գիտության և բարձր տեխնոլոգիաների դերին, և, որ հայազգի գիտնականի գրանցած հաջողությունը վառ օրինակ է, թե «ինչպես կարող ենք մեր գիտելիքով աշխարհին ներկայանալի դառնալ»: Շարունակելով իր խոսքը հաջողության պատմությունների և կրթական արդյունավետ մոտեցումների մասին, նա հավելել է․ «Երբ մենք գնահատում ենք այսօրվա հնարավորությունները ՀՀ-ում, հասկանում ենք, որ մենք կարող ենք մեր գիտելիքով աշխարհին ներկայանալի դառնալ։ Սինոփսիսն էլ դրա վառ օրինակներից մեկն է։ Հարց է ծագում, թե մենք ինչու՞ չենք կարողացել Սինոփսիսի օրինակը ավելի մասսայական դարձնել։ Երբ մենք խոսում ենք գիտություն-արտադրություն կապի մասին, այդ մոդելն արդեն Հայաստանում կա և գործում է, բայց մենք փնտրում ենք այլ տեղ․․․ այն մարդիկ և ընկերությունները, որոնք զբաղված են արտադրությամբ և ավելի լավ են պատկերացնում ապագան, նրանք ներդրումներ են անում կրթության մեջ։ Եվ Սինոփսիսը դրա լավագույն օրինակն է», – ամփոփել է Հանրապետության նախագահը։
Սինոփսիս Արմենիա ընկերության տնօրեն Հովիկ Մուսայելյանը նշել է. «Առաջին անգամ է հայ գիտնականն արժանանում Նոբելյան մրցանակի և ես չափազանցրած չեմ լինի, եթե ասեմ, որ այս հաջողությունը մեր ազգային մեծագույն նվաճումներից մեկն է: Մենք կարող ենք ներկայանալ աշխարհին միայն բարդագույն ինժեներական տեխնոլոգիական խնդիրների լուծման հնարավորություններով և իհարկե տարբեր ոլորտներում Արդեմ Փաթափությանի նման համաշխարհային ճանաչում ունեցող մարդկանցով»:
Այցն ավարտվել է հարցուպատասխանի ձևաչափով պանելային քննարկմամբ։ Նախագահ Խաչատուրյանը, Նոբելյան մրցանակակիր Արդեմ Փաթափությանն ու Սինոփսիս Արմենիայի Նախագահ Երվանդ Զորյանը զրուցել են ընկերության աշխատակիցների և հյուրերի հետ, անդրադարձել նրանց հետաքրքրող հարցերին:
Պատասխանելով հարցին, թե ո՞րն է իր կարծիքով հաջողության բանձևը, Արդեմ Փաթափությանը նշել է․ «Պետք է մեծ երազանքներ ունենալ։ Բայց ամենակրևորը՝ պետք է կապ ստեղծել Ձեր մեծ երազանքների ու գործնականության միջև… հենց այդտեղ է ստեղծվում կարևոր արդյունքը… Կարծում եմ, որ Սինոփսիսը դրա հիանալի օրինակն է. այն սկսվել է մեծ երազանքի նման մի բանով, բայց այն նաև գործնական է… ոչ թե հեշտ, այլ գործնական… Ես կարծում եմ, որ մենք չպետք է շփոթենք գործնականը հեշտի հետ, գործնականը պարզապես «իրագործելի» է նշանակում: Եվ այդ միաձուլումը հենց այն տեղն է, որտեղ մոգական բաներ են տեղի ունենում…»:
Սինոփսիս ընկերությունը (Nasdaq:SNPS) առօրյա կյանքում անհրաժեշտ էլեկտրոնային արտադրանք ու ծրագրային հավելվածներ մշակող նորարական ընկերությունների Սիլիկոնից՝ ծրագրային ապահովում™ (Silicon to Software™) գործընկերն է: Որպես աշխարհի ծրագրային ապահովման 15-րդ խոշորագույն ընկերություն՝ Սինոփսիսն ունի էլեկտրոնային նախագծման ավտոմատացման (ԷՆԱ) և կիսահաղորդչային մտավոր սեփականության (ՄՍ) համաշխարհային շուկայում առաջատար լինելու երկարատև պատմություն, միևնույն ժամանակ ընդլայնելով ծրագրային անվտանգության և որակի ստուգման լուծումների ոլորտում իր առաջատարությունը : Թե՛ գերժամանակակից կիսահաղորդիչներ ստեղծող ինտեգրալ սխեմաների նախագծողների, և թե՛ ամենաբարձր անվտանգություն և որակ պահանջող կիրառական ծրագրեր ստեղծող ծրագրավորողների համար Սինոփսիսն ունի անհրաժեշտ լուծումները նորարարական, բարձրորակ ու անվտանգ արտադրանք տալու համար: Ավելին՝ ընկերության կայքում:
Սինոփսիս ընկերությունը սկսել է իր գործունեությունը Հայաստանում 2004 թ.-ին՝ որպես Սինոփսիս Արմենիա փակ բաժնետիրական ընկերություն (ՓԲԸ): Սինոփսիս Արմենիա ՓԲԸ-ն զբաղվում է գիտահետազոտական և ճարտարագիտական աշխատանքներով՝ էլեկտրոնային նախագծման ավտոմատացման (ԷՆԱ), արտադրության համար նախագծման (ԱՀՆ) և կիսահաղորդչային մտավոր սեփականության (ՄՍ) մշակման ոլորտներում: Ունենալով ավելի քան 850 որակյալ հայ մասնագետներ՝ Սինոփսիսը Հայաստանի ՏՏ ոլորտի խոշորագույն գործատուներից մեկն է: Բարձր որակավորում և գործնական հմտություններ ունեցող մասնագետներ պատրաստելու համար Սինոփսիսը մեծ ներդրումներ է անում Հայաստանի կրթության համակարգում։ ՏՏ ոլորտի նկատմամբ հետաքրքրությունը խթանելու նպատակով ընկերությունն իրականացնում և հովանավորում է տարբեր ծրագրեր և մրցույթներ: Սինոփսիս Արմենիայի ներդրումները միայն ՏՏ ոլորտով չեն սահմանափակվում: 2010 թ․-ին ԱՄՆ պետքարտուղարության կողմից Սինոփսիս ընկերությունը ճանաչվել է Կորպորատիվ գերազանցության ամենամյա մրցանակաբաշխության համաշխարհային լավագույն 12 ընկերություններից մեկը՝ Հայաստանում օրինակելի կորպորատիվ քաղաքացի լինելու, նորարարության և հաջողված բիզնես իրականացնելու համար: Սինոփսիս Արմենիան տեղակայված է Երևանում։ Ավելին՝ ընկերության կայքում:
