2023թ-ի վերջին ամիսները մարտահրավերային էին Հայաստանի համար։ Արցախից բռնի տեղահանված մեր հայրենակիցներին աջակցելու նպատակով մի շարք նախաձեռնությունների սկիզբ դրվեց՝ տարբեր ուղղություններով։ Բնականաբար առաջին ամիսներին ավելի ակտիվ իրականացվում էին հենց առաջնային կարիքների ապահովմանն ուղղված ծրագրերը, որոնցից staff.am-ը ևս անմասն չմնաց։ Սակայն մեր տեսադաշտից չվրիպեցին նաև ավելի խորքային խնդիրները, որոնցից մեկի ուղղությամբ էլ «Այստեղ» հոգեբանական կենտրոնի և հոգեբան Անի Հովհաննիսյանի հետ համագործակցության արդյունքում ստեղծել ենք «Տրավմատիկ փորձառություններ վերապրած աշխատակիցների հոգեկան բարեկեցությունն աշխատավայրում» ուղեցույցը HR մասնագետների համար։
Տևական ժամանակահատված պատերազմական իրադրությունում ապրելը, շրջափակումը, դրան հաջորդող բռնի տեղահանումը տրավմատիկ փորձառություններ են, որոնք կարող են հանգեցնել ամենատարբեր հոգեբանական դսրևորումների, ինչպես առհասարակ անհատի կյանքում, այնպես էլ՝ աշխատավայրում։ Հնարավոր տրավմատիկ դրսևորումներին կառուցողական արձագանք տալն առանցքային է արցախահայերի ապաքինման և հոգեկան բարեկեցության համար, ինչը կնպաստի նաև ՀՀ-ում՝ վերջիններիս նոր աշխատավայրերում, արժեքավոր ներդրում ունենալուն։
Ի՞նչ նպատակ ունի ուղեցույցը։
Ուղեցույցը նախատեսված է ՀՀ-ում ՄՌԿ ղեկավարների և մասնագետների համար, որպեսզի վերջիններս տեղեկացված որոշումներ կայացնեն արցախայերի (և առհասարակ տրավմատիկ փորձառություններ ապրած անձանց) աշխատանքի ընդունման և ինտեգրման հարցերում։ Այն նաև գիտահեն ռեսուրս է ՄՌԿ ղեկավարների և մասնագետների համար կազմակերպության ղեկավարության և աշխատակիցների շրջանակներում իրազեկման աշխատանքներ իրականացնելու համար։
Կարևոր է նկատի ունենալ, որ ուղեցույցը նկարագրողական է, ունի կրթալուսավորչական նպատակ։ Այն մշակվել է հիմնվելով աղետային իրավիճակներից հետո աշխատավայրում աշխատակիցների հոգեկան առողջությանն ու բարեկեցությանն ուղղված նախաձեռնությունների միջազգային փորձի հետազոտությունների վրա։ Այն չի փոխարինում վերապատրաստումներին, խորհրդատվական և հոգեթերապևտիկ ծառայություններին։
Ի՞նչ բաժիններից է բաղկացած ուղեցույցը
«Տրավմատիկ փորձառություններ վերապրած աշխատակիցների հոգեկան բարեկեցությունն աշխատավայրում» ուղեցույցը բաղկացած է երեք մասից.
Առաջին մասն անդրադառնում է աշխատակիցների ապաքինման և հոգեկան բարեկեցության ամրապնդման հարցում աշխատավայրերի դերին ու կարևորությանը։ Ինչպես նաև նկարագրում է աշխատակիցների դերն ու ներդրումը կազմակերպությունների համար։
Երկրոդ մասը նկարագրում է, թե ինչ հնարավոր կոգնիտիվ, հուզական ու վարքային արձագանքներ կարող են դրսևորել տրավմատիկ փորձառություն ապրած աշխատակիցներն աշխատավայրում։
Երրորդ մասն առաջարկում է տրավմատիկ փորձառություն ապրած աշխատակիցների ապաքինմանն ու հոգեկան բարեկեցությանն ուղղված կարճաժամկետ և երկարաժամկետ ռազմավարություններ կազմակերպությունների համար։
Ուղեցույցի հեղինակը Անի Հովհաննիսյանն է, ով հոգեբան է և հոգեկան բարեկեցության ու առողջության, ինչպես նաև պոզիտիվ հոգեբանության դեսպան։
staff.am էկոհամակարգը կազմված է staff.am կարիերայի առաջատար հարթակից, staffmedia.am բիզնեսի և աշխատաշուկայի ոլորտում մասնագիտացված մեդիա հարթակից, Compass by staff.am վերլուծական և Career Factory կրթական ուղղություններից։
«Այստեղ» հոգեբանական կենտրոնը զբաղվում է անհատական, խմբային և զույգերի թերապիաներով, բալինտյան խմբերով, հոգեբանների վերապատրաստումներով և ոչ հոգեբանների համար նախատեսված ուսումնական ծրագրերով ու ինտենսիվներով։
