Մի պահ եկեք մտածենք հեռահաղորդակցության ոլորտում շատերիս կողմից սիրելի բրենդի և համանուն ընկերության մասին։ Կար ժամանակ (կամ ավելի հստակ 2005թ․-ին), որ այդ ընկերությունը նոր-նոր էր հիմնադրվել՝ լի թարմ ու նորարար գաղափարներով, և այժմ շատերիս կողմից այն օգտագործվում է կանոնավոր ամեն օր՝ շարունակելով քայլել տեխնոլոգիական նորարարություններին համընթաց։ Ինչպես ստացվեց, որ այդ ընկերությունը կարողացավ այդքան արագ զարգացում ունենալ, ճանաչվել ու սիրվել բոլորիս կողմից և դառնալ ցանկալի գործատու մեզ համար։Ահա այս թեմայով անչափ հետաքրքիր զրույց ունեցանք Վիվա-ՄՏՍ -ի անձնակազմի հետ։ Հավատացնում ենք, որ հաջողության հասնելու ճանապարհը լիքը ջանքեր, նվիրվածություն ու ամուր թիմ է պահանջել, որի պակասը նույնիսկ մեկ վայրկյան ընկերությունը չի զգացել։ Շարունակենք կարդալ ու ոգեշնչվել արդեն 15-ամյա ընկերության հաջողության պատմությամբ։
Անգամ եթե մտադիր եք կյանքի կոչել ձեր սեփական բիզնես գաղափարը, այս պատմությունը կարող է կարևոր ուղղորդիչ լինել ձեզ համար գաղափարից մինչև կառավարում։
Ընկերության հիմնադրումը
2005 թվականը հեռահաղորդակցության ոլորտում նշանավորվեց հեռահաղորդակցության հայկական շուկա «ՎիվաՍել» ապրանքանիշի մուտքով:
ՎիվաՍել-ի ներցանցային առաջին զանգը կատարվել է 2005 թ.-ի հուլիսի 1-ին:
Մուտք գործելով շուկա՝ Վիվա-ՄՏՍ-ն արմատապես փոխեց տարիներ շարունակ գոյություն ունեցող իրավիճակը. Հայաստանում վերացավ բջջային կապի ոլորտում մենաշնորհը: Բջջային կապը դարձավ լիովին հասանելի: Ապահովվեց մրցակցային առողջ միջավայր ու ընձեռվեց օպերատորի ընտրության հնարավորություն:
Ընդամենը երկու տարի անց ՎիվաՍել-ն ուներ 1 միլիոն բաժանորդ:
Ուշագրավ է այն, որ ընկերությունն իր գործունեությունն սկսեց փոքրաթիվ կազմով. գլխավոր տնօրեն Ռալֆ Յիրիկյանը և տասնյակ աշխատակիցներ, որոնց մեծ մասը մինչև օրս աշխատում է ընկերությունում:
Երևանում առաջին բազային կայանները տեղադրվեցին Հայաստանի ազգային գրադարանի, Հայաստանի պատմության թանգարանի և Հայաստանի ազգային պոլիտեխնիկական համալսարանի՝ Ընդերքաբանության և մետալուրգիայի ֆակուլտետի շենքերի տանիքներին, ինչի շնորհիվ հնարավոր դարձավ կատարել առաջին զանգը:
Վիվա-ՄՏՍ-ը Հայաստանում առաջինն է գործարկել ինչպես երրորդ սերնդի (3G) համահանրապետական ցանցը, այնպես էլ՝ չորրորդ սերնդի (4G) ցանցը 2010-ին` Հայաստանն ընդգրկելով 4G ցանց ունեցող պետությունների առաջին տասնյակում, ինչը կարևոր քայլ էր աշխարհի տեխնոլոգիական քարտեզի վրա երկրի դիրքն ամրապնդելու ու միջազգային հեղինակությունը բարձրացնելու հարցում:
Վիվա-ՄՏՍ-ն այսօր ունի ավելի քան 2 միլիոն բաժանորդ և պահպանում է բջջային կապի շուկայի մոտ 59% մասնաբաժինը:
Ինչ հաջողություն, առանց դժվարության
Ընկերությունն անցել է դժվարին և մարտահրավերներով լի ուղի: 2008-ին քոբրենդինգի արդյունքում «ՎիվաՍել»-ը դարձավ «ՎիվաՍել-ՄՏՍ»՝ փոխելով նաև իր դիզայնը: 2019 թվականին ընկերությունը կրկին քոբրենդինգի արդյունքում անվանափոխվեց և դարձավ «Վիվա-ՄՏՍ»:
Մինչև օրս հանրային ընկալումներում ընկերությունը մնացել է «Վիվա» կամ «ՎիվաՍել»: Սակայն ընկերության կարևորագույն արժեքները և մատուցած ծառայությունների բարձր որակը մնացել են անփոփոխ և օրըստօրե կատարելագործվում են ու համալրվում ժամանակակից նորագույն լուծումներով:
Ընկերության գլխավոր տնօրեն Ռալֆ Յիրիկյանի խոսքով՝
«ՄԵՆՔ ԵՂԵԼ ԵՆՔ «ՎԻՎԱՍԵԼ», ԴԱՐՁԵԼ ԵՆՔ «ՎԻՎԱ-ՄՏՍ»: ՄԻՋՈՒԿԸ «ՎԻՎԱ»-Ն Է, ՀԱՅԻ ԿՈՂՄԻՑ ՍՏԵՂԾՎԱԾ ԱՐԺԵՔԸ, ՈՐՆ ՈՒՆԻ ՀԱՅԿԱԿԱՆ ԻՆՔՆՈՒԹՅՈՒՆ, ՀԱՅԵՑԻ ՄՏԱԾԵԼԱԿԵՐՊ, ՀԱՅԿԱԿԱՆ ՈԳԻ: ՎԻՎԱ-ՄՏՍ-Ը ԿԱՅԱՑԱԾ ԿԱՌՈՒՅՑ Է, ԱՇԽԱՏԱՍԵՐ ՀԱՅ ՄԱՐԴՈՒ ԶԳԱՑՄՈՒՆՔԻ, ԿԱՄՔԻ, ԵՌԱՆԴԻ, ՍՏԵՂԾԱԳՈՐԾ ՄՏՔԻ ՄԱՐՄՆԱՎՈՐՈՒՄ»:
Կապի օպերատոր լինելուց բացի՝ Վիվա-ՄՏՍ-ն անընդհատ շարժման մեջ է և աստիճանաբար փոխակերպում է իր համակարգերը՝ դառնալով թվային կամ digital ծառայություններ մատուցող ընկերություն։ Հեռահաղորդակցության ոլորտը չափազանց դինամիկ ոլորտ է և շուրջը կատարվող ցանկացած փոփոխություն ուղղակի կամ անուղղակի կերպով կարող է անդրադառնալ այս ոլորտի վրա: Իսկ ժամանակակից աշխարհում՝ միտումները փոփոխվում են օրեցoր: Այն, ինչի կարիքը սպառողը կամ բաժանորդն ունի այսօր, վաղն այլևս կարող է արդիական չլինել:
Միջազգային միտումներով ու սպառողի պահանջարկով առաջնորդվելու վառ օրինակ է թվային փոխակերպումը (digital transformation): Վիվա-ՄՏՍ-ն աստիճանաբար կյանքի է կոչում իր առջև դրված՝ թվային փոխակերպման մարտահրավերն ու այսօր իր բաժանորդներին հպարտորեն մատուցում է այնպիսի ծառայություններ (պրոդուկտներ), ինչի կարիքը նրանք իրապես ունեն:
Մի քանի խորհուրդ, որը կարելի է մտապահել
Մենք ապրում ենք այնպիսի ժամանակաշրջանում, երբ նորարարական գաղափարները շատ արագ են ծնվում ու իրագործվում և անհնարինը դառնում է հնարավոր: Ընկերություն հիմնելու, միջոցներ ու գործընկերներ ներգրավելու և գործունեություն ծավալելու հնարավորությունն այժմ հասանելի է շատերին: Սակայն կարևոր է գիտակցել, որ ընկերության հաջողությունը կայանում է ոչ թե պարզապես այն հիմնելու, այլ՝ ճիշտ կառավարելու, աշխատանքն արդյունավետ բաշխելու, ճշգրիտ ռազմավարություն մշակելու, ինչպես նաև՝ ճշմարիտ արժեքների վրա հիմնված՝ կառավարման արդյունավետ մշակույթ ներդնելու մեջ:
Հաջողության հասնելու համար կարևորագույն նախապայման է ամուր ու միասնական թիմը:
«ՎԻՎԱ-ՄՏՍ-Ի ՑԱՆՑԸ ԿԱՌՈՒՑՎԵԼ Է ԶՐՈՅԻՑ, ՈՒ ԹԵՐԵՒՍ ԴԱ Է ՊԱՏՃԱՌԸ, ՈՐ ՄԵՐ ԹԻՄՆ ԱՅՍՔԱՆ ԿՈՒՌ ՈՒ ՀԱՄԵՐԱՇԽ Է: ՈՒԺԵՂ ԹԻՄՆ ՈՒԺԵՂ ԱՆՀԱՏՆԵՐԻ, ԶՐՈՅԻՑ ԱՐԺԵՔ ՍՏԵՂԾԱԾ ՈՒ ԿԱՅԱՑԱԾ ՄԱՍՆԱԳԵՏՆԵՐԻ ԱՄԲՈՂՋՈՒԹՅՈՒՆՆ Է: ՄԵՆՔ ՄԻԱՍԻՆ ԵՆՔ ԿԱՅԱՑԵԼ ՈՒ ԿԱՅԱՆՈՒՄ, ՄԻՄՅԱՆՑԻՑ ԵՆՔ ՍՈՎՈՐԵԼ ՈՒ ՍՈՎՈՐՈՒՄ»:
Ոչ պակաս կարևոր է ընկերության կառավարման ճիշտ ռազմավարությունը: Վիվա-ՄՏՍ-ը մեծ բարձունքների է հասել գործարար կառավարման ոլորտում՝ կոտրելով կառավարման ավանդական կարծրատիպերն ու հիմնվելով համաշխարհային հարուստ փորձի վրա: Արդյունքում ընկերությանը հաջողվել է ստեղծել նորը՝ արտադրողականության հայկական ուրույն մոդելը:
Չպետք է վախենալ նորարարությունից, եթե անգամ այն շեղվում է գործարար կառավարման համընդհանուր և տարածված չափանիշներից: Սա է երաշխիքը, որ կստեղծվի նորը՝ ավելի մրցունակ ու արդյունավետ մոդելը:
Վիվա-ՄՏՍ-ը՝ ժամանակակից բրենդ
Վիվա-ՄՏՍ-ն այսօր կայացած բրենդ է: Այն ոչ միայն մատուցում է հեռահաղորդակցության ծառայություններ, այլև իր դիրքերն է ամրապնդում թվային ծառայությունների ոլորտում: Վիվա-ՄՏՍ-ը առաջարկում է այնպիսի լուծումներ, առանց որոնց դժվար է պատկերացնել ժամանակակից իրականությունը՝ հեռավար աշխատանքն ու ուսումը, վիրտուալ հանդիպումներն ու կոնֆերանսները:
Թվային փոխակերպման արդյունքում՝ Վիվա-ՄՏՍ-ը մատուցում է նոր ծառայություններ ու լուծումներ, որոնք նախատեսված են առօրյան ավելի հեշտ ու պարզ դարձնել: Օրինակ՝ Վիվա-ՄՏՍ-ի կողմից ստեղծված «X», «Y» և «Z» սակագնային պլանները հնարավորություն են տալիս բաժանորդին անսահմանափակ օգտվելու մի շարք մեսինջերներից և հավելվածներից՝ ակտիվ սակագնային պլանի դեպքում:
Խոսքը վերաբերում է այնպիսի հավելվածներին, որոնք դարձել են ժամանակակից առօրյայի անբաժանելի մասնիկը՝ «Viber», «WhatsApp», «Messenger», «Facebook», «Zoom», «Skype», «Telegram», «Zangi», «Youtube», «TikTok», «Snapchat», «Netflix» և «Instagram»` կախված սակագնային պլանից: Բացի այդ՝ Վիվա-ՄՏՍ-ն այսօր շուկայում առաջարկում է մի շարք խաղային, զվարճալիքային, ուսուցողական հավելվածներ, էլեկտրոնային դրամապանակ, բջջային հեռուստատեսություն, ամպային ծառայություններ և օգտակար լուծումներ՝ բիզնեսի ու ֆինանսների արդյունավետ կառավարման համար:
«Իմ Վիվա-ՄՏՍ» հավելվածը բաժանորդների կարիքներին համապատասխանեցված պարզ լուծում է, որը թույլ է տալիս.
- վերահսկել հաշվեկշիռը,
- ընտրել հաղորդակցության անհատական կարիքներին առավել համապատասխան սակագնային պլաններ և ծառայություններ,
- ակտիվացնել/ապաակտիվացնել օգտագործվող ծառայությունները,
- վերահսկել ինտերնետի, խոսելաժամանակի և SMS փաթեթները,
- գտնել մոտակա սպասարկման կենտրոնները,
- զանգահարել թեժ գիծ,
- փոխանակել բոնուսային միավորները նվերների հետ:
Վիվա-ՄՏՍ-ն ամրապնդել է իր դիրքերը նաև ֆինանսավճարային ծառայությունների ոլորտում: Թողարկելով «ՄոբիԴրամ» էլեկտրոնային դրամապանակը` հաճախորդին հնարավորություն է ընձեռվել կատարելու անհպում ապահով վճարումներ՝ սմարթֆոնի միջոցով: Այսօր Վիվա-ՄՏՍ-ի առցանց խանութում ցանկացած սարք գնելիս վճարումը նույնպես կարելի է կատարել «ՄոբիԴրամ»-ով:
Շարունակելով ընդլայնել իր թվային ծառայությունները՝ 2019 թվականին Վիվա-ՄՏՍ-ը՝ «Շանթ» ՀԸ-ի հետ համատեղ, թողարկեց «ՄՏՍ TV» HD ալիքների հայկական հավելվածը, որը նոր խոսք է հայերեն բովանդակությունն առավել հասանելի դարձնելու գործում: Հավելվածը հնարավորություն է տալիս սմարթֆոնը վերածելու լիարժեք հեռուստացույցի և դիտելու հայկական և արտասահմանյան մի շարք հեռուստաալիքներ և սերիալներ HD որակով՝ Վիվա-ՄՏՍ-ի 3G և 4G/4G+ ցանցերի ծածկույթում, ինչպես նաև՝ Wi-Fi-ի միջոցով:
Վիվա-ՄՏՍ-ը փոխանցում է իր փորձը
Տասնհինգ տարիների ընթացքում Վիվա-ՄՏՍ-ը կուտակել է մեծ փորձ ու տեղեկատվական ամուր բազա ու գիտելիքներ, և պատրաստակամորեն փոխանցում է դրանք երիտասարդ սերնդին: 2015 թվականին ընկերությունը հիմնադրեց սպասարկման մշակույթ ձևավորող ՝ «VivaStart» կրթական ծրագիրը: Այս կրթական ծրագրի օգնությամբ՝ Վիվա-ՄՏՍ-ը փոխանցում է իր կուտակած փորձը հեռահաղորդակցության ոլորտում և օգնում է իր շրջանավարտներին՝ ներսից դիտարկել աշխատանքային գործընթացները, ձեռք բերել անհրաժեշտ հմտություններ ու ձևավորել որոշումներն ինքնուրույն կայացնելու և կողմնորոշվելու կարողություն: 2015 թվականից՝ «VivaStart» կրթական ծրագրի շահառու է դարձել 393 ուսանող: Այդ տարիների ընթացքում, Վիվա-ՄՏՍ-ի աշխատանքային թիմին է միացել լավագույն արդյունք արձանագրած ավելի քան 51 ուսանող:
Վերջին տարիներին Վիվա-ՄՏՍ-ը մեծ ոգևորությամբ իր փորձն է փոխանցում նաև նորաստեղծ և իրենց առաջին քայլերը կատարող ստարտափ ընկերություններին:
Եվ որպես տեղեկատվական ու հեռահաղորդակցային տեխնոլոգիաների (ՏՀՏ) ոլորտի առաջատար, Վիվա-ՄՏՍ-ն իրականացնում է ՏՀՏ ոլորտի զարգացմանն ուղղված ծրագրեր, ներառյալ՝ Հայաստանում ստարտափ ընկերությունների զարգացմանն աջակցելը:
«ՄԻԱՆԱԼՈՎ ՏԱՐԲԵՐ ՆԱԽԱՁԵՌՆՈՒԹՅՈՒՆՆԵՐԻ՝ ՄԵՐ ՆՊԱՏԱԿՆ Է ԱՋԱԿՑԵԼ ՍՏԱՐՏԱՓՆԵՐԻՆ ԱՆՑՆԵԼՈՒ ԶԱՐԳԱՑՄԱՆ ՀԱՋՈՐԴ ՓՈՒԼ, ՈՐՊԵՍԶԻ ԴՐԱՆՔ ՎԵՐԱԾՎԵՆ ԿԱՅՈՒՆ ԲԻԶՆԵՍ ԿԱՌՈՒՅՑՆԵՐԻ ԵՒ ՆԵՐԳՐԱՎԵՆ ՄԻՋԱԶԳԱՅԻՆ ՆԵՐԴՐՈՒՄՆԵր»,– ՌԱԼՖ ՅԻՐԻԿՅԱՆ:
Մարդը՝ ավելին, քան ռեսուրս
Վիվա-ՄՏՍ-ը հայաստանյան ընկերությունների շրջանակում դասվում է այն ընկերությունների շարքին, որտեղ կարևորվում են ոչ միայն մասնագիտական, այլև՝ մարդկային որակները: Այս ընկերությունում կարևորվում է մարդը: Բազմիցս է նշվել գլխավոր տնօրեն Ռալֆ Յիրիկյանի կողմից, որ Վիվա-ՄՏՍ-ի համար իր աշխատակիցը կարևոր արժեք է: Վիվա-ՄՏՍ-ում շատ հաճախ կարելի է լսել «Վիվա-ՄՏՍ ընտանիք» արտահայտությունը: Եվ սա ամենևին PR-ին ուղղված քայլ չէ: Սա տարիների քրտնաջան աշխատանքի արդյունք է, որը գիտակցում է Վիվա-ՄՏՍ-ի յուրաքանչյուր աշխատակից:
Վիվա-ՄՏՍ-ի հաջողության գրավականներից է իր ուժեղ թիմը: Իսկ ուժեղ թիմը ուժեղ անհատների, զրոյից արժեք ստեղծած ու կայացած մասնագետների ամբողջություն է, որն էլ ընկերության ամենամեծ ոչ նյութական արժեքն է:
«Ընկերության ամուր մշակույթն առանցքային է մեր բիզնեսի համար, քանի որ այն որոշում է, թե որքանով են ներգրավված և հավատարիմ մեր աշխատակիցները: Վիվա-ՄՏՍ-ում Մարդկային ռեսուրսների բաժնի աշխատակիցների պարտականությունն է ձևավորել ու պահպանել ընկերության երկարաժամկետ ու կայուն մշակույթ: Սա ներառում է աջակցություն ղեկավար կազմին՝ գործելու որպես առաջնորդներ և ապահովելու հնարավորություն, որ բոլորի կարծիքն ու գաղափարները հնարավորինս հաշվի առնված լինեն: Ընկերության հիմնական արժեքները պահպանելուց բացի, ՄՌ-ի դերն է երաշխավորել թափանցիկության, ներառականության, հոգեբանական անվտանգության և հարգանքի միջավայր, որը համախմբում է թե՛ աշխատակիցներին, թե՛ ղեկավարներին՝ Վիվա-ՄՏՍ-ի նպատակներին հասնելու գործում:
ՄՌ-ին հաջողվել է դառնալ ղեկավար թիմի գործընկերը` ընկերության ռազմավարության իրականացման հարցում. մենք արագաշարժ ենք, հանդիսանում ենք շարունակական փոփոխությունների նախաձեռնողը, ճկուն ենք նոր գործընթացներ իրականացնելու հարցում, օգնում ենք բարելավել աշխատակիցների հմտությունները և իրականացնել կազմակերպչական փոփոխություններ, որոնք կօգնեն թիմերին իրականացնել ծրագրերը հնարավորինս արագ և նորարարական մոտեցումներով:
ՄՌ-ում առկա այս փիլիսոփայությունն ու գործառնական համակարգը օգնել են ընկերությանը դառնալ ցանկալի գործատու, ներգրավել խելացի շրջանավարտների և մասնագետների՝ անկախ տարիքից, սեռից և ֆիզիկական վիճակից, և օգնել վերջիններիս աճել ոչ միայն որպես մասնագետ, այլև գիտակից մարդ, որոնց մեծ նվիրման արդյունքում Վիվա-ՄՏՍ-ը կհասնի նոր բարձունքների»:
«Վիվա-ՄՏՍ-ում այսօր աշխատում է 121 կայացած մասնագետ, որոնք միացել են ընկերությանը գործարկման առաջին օրվանից»,-Վիվա-ՄՏՍ-ի ՄՌ վարչության պետ Լարա Չոլաքյան:
Արժեքներ և պատասխանատվություն
Կորպորատիվ սոցիալական պատասխանատվությունն (ԿՍՊ) առանձնահատուկ տեղ է զբաղեցնում Վիվա-ՄՏՍ-ի առաքելության մեջ: 15 տարվա ընթացքում ընկերությունն իրականացրել է շուրջ 29 միլիարդ դրամի սոցիալական ներդրում՝ հասարակական կյանքի ամենատարբեր ոլորտներում: ԿՍՊ շրջանակերում ընկերությունը նաև կիրառում է նորարարական լուծումներ, մասնավորապես՝ մարզերում, ներառյալ՝ սահմանամերձ համայնքներում ներդնելով լուսավորության ու ջեռուցման այլընտրանքային էներգիայով սնվող ժամանակակից ու ծախսարդյունավետ համակարգեր:
Ընկերության ձևավորման սկզբնական շրջանում բջջային կապի հիմնական կայաններ են տեղադրվել ամենահեռավոր ու քիչ բնակեցված գյուղերում, բարդ ռելիեֆ ունեցող վայրերում՝ հաճախ անտեսելով բիզնեսի ամենակարևոր՝ ներդրումների վերադարձելիության սկզբունքը: Եվ սա արվել է Հայաստանի Հանրապետությունում բջջային կապի հնարավորինս բարձր հասանելիություն ապահովելու համար՝ անկախ բնակավայրից:
Վիվա-ՄՏՍ-ը շարունակում է առաջ շարժվել, կուտակել փորձ ու արդեն 15 տարի ներկայացնել այն հայաստանյան շուկայում:
Case Study: Հայաստանի հեռահաղորդակցության ոլորտի զարգացման մեջ իր հատուկ դերն ունի Վիվա-ՄՏՍ ընկերությունը՝ թե որպես խոշոր գործատու, որտեղ մարդն ու իր արժեքները կարևորագույն առանցքն են բիզնեսի գործունեության, թե որպես պրոդուկտ։ Վիվա-ՄՏՍ-ի լայնածավալ ու բարձրորակ գործունեության շնորհիվ է նաև, որ այս 15 տարիների ընթացքում հայն ու Հայաստանը բազմիցս հայտնվել են միջազգային չափորոշիչների տասնյակում։ Ընկերության առաջնահերթություններից է նաև նոր տաղանդների զարգացումը և ներգրավումը թիմում, ինչպես նաև ստարտափ գաղափարներին աջակցությունը։ Իսկ եթե փորձենք ամփոփել մեկ նախադասությամբ, ապա Վիվա-ՄՏՍ-ի հաջողությունը գաղափարը ճիշտ պահին ճիշտ մարդկանց կողմից ներդրելն ու արդյունավետ կառավարելն էր։
