Երևանում առաջին անգամ մեկնարկել է «Կարիերայի անցում դեպի ՏՏ» կարիերայի կողմնորոշման հատուկ նախաձեռնությունը բոլոր նրանց համար, ովքեր փորձում են այլ ոլորտներից տեղափոխվել և հաստատվել տեխնոլոգիական ընկերություններում։ Ծրագիրը մեկնարկել է Girls in Tech-ի հայաստանյան մասնաճյուղի, staff.am աշխատանքային հարթակի և ISTC կենտրոնի համագործակցությամբ: Նախաձեռնության նպատակն է աջակցել գրավիչ այս ոլորտ ձգտող մասնագետներին համապատասխան խորհրդատվությամբ, ոլորտում կողմնորոշվելու խորհուրդներով և իհարկե մարտահրավերները հաղթահարելու և հաջողելու բանալիներով:
Նախաձեռնությանը մասնակցելու և իրենց ընկերությունների փորձը կիսելու պատրաստակամություն էին հայտնել Հայաստանում գործող 8 առաջատար ՏՏ ընկերությունների մարդկային ռեսուրսների բաժինների ղեկավարներ, այդ թվում՝ Synergy, SFL, Webb Fontaine, Rockbite Games, Joomag, Ginosi, Benivo և 10Web:
Աղբյուրը՝ BUSINESS & TECH | VNEWS-ի:
«Սա բացառիկ հնարավորություն էր ՏՏ-ում աշխատանք փնտրողների համար ոչ միայն պարզապես ծանոթանալու ոլորտում առաջատար ընկերությունների ներքին մշակույթին, այլ նաև նրանց ուղղել հուզող հարցերն ու բացահայտել աշխատանքի ընդունման նրանց քաղաքականությունը», – նշեց Girls in Tech-ի հայաստանյան մասնաճյուղի ղեկավար Սեդա Պապոյանը:
«Կարիերայի անցում դեպի ՏՏ» նախաձեռնության մասնակիցները նաև հնարավորություն ունեին տեղեկատվական հարթակի շնորհիվ ծանոթանալ մի քանի ընկերություններում առկա աշխատատեղերին և վերապատրաստման հնարավորություններին:
«Այս նախաձեռնությամբ մենք կարողացանք ցույց տալ, որ ՏՏ-ն որքան էլ որ գրավիչ է, միունույն է մեծ ջանքեր է պահանջում հաստատվելու և հաջողության հասնելու համար: Բայց եթե կա սովորելու եւ անձնային զարգացման հստակ մտադրություն, ապա պետք է ամուր առաջ շարժվել», – ասաց Staff.am հարթակի համահիմնադիր և ղեկավար Լուիզա Ավետիսյանը:
Գործընկերները նախատեսում են «Կարիերայի անցում դեպի ՏՏ» նախաձեռնությամբ հանդես գալ պարբերաբար:
