Շարունակելի․
«Մինչև վերջ գնալու ենք: Այպիսին է տրամադրությունն առաջնագծում, իսկ թիկունքու՞մ»,- հարցնում են մարտիկները, թիկունքում նույնպես․ «Մինչև վերջ օգնելու ենք, մինչև վերջ ձեր կողքին ենք»։
staff.am-ը շարունակում է անդրադառնալ թիկունքի զորաբանակին՝ մեր գործընկերներին, ովքեր օրուգիշեր հետևում են առաջնագծից եկող նորություններին, համագործակցում համապատասխան կազմակերպությունների հետ, հայտնաբերում թիրախային ուղղություններն ու շտապեցնում օգնությունը ՀԱՆՈՒՆ ՀԱՅՐԵՆԻՔԻ, ՀԱՆՈՒՆ ՅՈՒՐԱՔԱՆՉՅՈՒՐԻՍ ԱՊԱՀՈՎ ՆԵՐԿԱՅԻ ՈՒ ԾԱՂԿՈՒՆ ԱՊԱԳԱՅԻ։
BEELINE
Պատերազմի առաջին իսկ օրվանից ընկերությունում՝ որպես կապի օպերատոր և որպես հայաստանցիներ, փորձում են մաքսիմալ օգտակար լինել մեր երկրին՝ առաջնորդվելով ռազմական դրության օրենքով սահմանված ընթացակարգերով: Առանձին աշխատակիցներ և ստորաբաժանումներ բազմաթիվ հեռախոսներ և շարժական լիցքավորիչներ են ուղարկել Արցախ, այլ անհրաժեշտ իրեր և, իհարկե, նշանակալի գումար:
Կան աշխատակիցներ, ովքեր մեկնել են Արցախ օգնելու անմիջապես առաջնագծից: Իսկ որպես կապի օպերատոր՝ Beeline-ում աշխատանքը որքան լարված է, նույնքան էլ պատասխանատու ու հայրենանվեր։
Ընկերությունը 0 դրամ/րոպե սակագին է սահմանել Հայաստանի Հանրապետությունից, Beeline-ի բոլոր բջջային համարներից, դեպի Արցախի բջջային և ֆիքսված ցանցեր զանգերի համար։ Արցախում ռոումինգում գտնվող իր բաժանորդների համար Beeline-ը նաև սահմանել է 0 դրամ/րոպե սակագին՝ բոլոր մուտքային զանգերի, դեպի Արցախի տեղական բջջային և ֆիքսված ցանցերի, ինչպես նաև դեպի ՀՀ Beeline-ի բջջային ցանց ելքային զանգերի համար։ Նշենք, որ մինչ այդ ընկերությունը հնարավորություն է տվել Արցախից եկած մեր հայրենակիցներին 1 ամիս անվճար օգտվել «BeeFree 1900» փաթեթից:
Այս ամենին ի հավելումն, Հայաստանում Beeline-ը նույնպես միացել է աշխարհի հայության կողմից իրականացվող դրամահավաքին։
Բացի այդ, ընկերության ուշադրության կենտրոնում է կրթական համակարգը։ Ռազմական դրության հայտարարումից հետո, Կրթության, գիտության, մշակույթի և սպորտի նախարարության հետ ծրագրի շրջանակում, նախարարության կողմից տրամադրած վկայականների հիման վրա՝ հեռավար կրթություն ստացող աշակերտները կկարողանան օգտվել մատչելի ֆիքսված և շարժական ինտերնետի սակագներից՝ առաջին ամիսն անվճար:
«ԹԵՂՈՒՏ» ՓԲԸ
Ինչպես ամբողջ աշխարհի հայությունը, այնպես էլ «Թեղուտ» ՓԲԸ-ն, այս օրերին ամուր կանգնած է հայ զինվորի թիկունքում։ Հայ ազգի համախմբվածությունն էլ իր հերթին էլ ավելի է ոգևորում ընկերության ողջ աշխատակազմին։ «Թեղուտ»-ում ոչ միայն մասնակցել են «Հայաստան» Համահայկական Հիմնադրամի դրամահավաքին (աշխատակիցները փոխանցել են մոտ 10 մլն․ դրամ), այլ նաև ընկերությունը բավականին մեծ նվիրաբերություն է կատարել Զինծառայողների Ապահովագրության Հիմնադրամին։
Նաև «Թեղուտ»-ի աշխատակիցների հումանիտար աջակցության շնորհիվ 35-ից ավելի ընտանիք ապահովվել է առաջին անհրաժեշտության պարագաներով։ Շարունակաբար Արցախի և Հայաստանի ՊԲ են ուղարկվում անհրաժեշտ պարագաներ՝ տաք հագուստ, վերարկուներ, անձրևանոցներ և քնապարկեր։
Մենք այսքանով չենք սահմանափակվելու և շարունակելու ենք լինել մեր Զինվորի և պետության կողքին։ Երբ ազգը բռունցք է դառնում, նրան հաղթել չի լինի։ Հպարտ ենք քեզնով Հայ զինվոր։
ԲԵԿՈՆ ՊՐՈԴՈՒԿՏ
Հաշվի առնելով թեժ պատերազմական իրավիճակը՝ այսօր Բեկոն Պրոդուկտ ընկերությունը նույնպես ակտիվորեն ֆինանսական և հումանիտար աջակցություն է ցուցաբերում մեր հայրենակիցներին:
Թե առաջնագծում, թե թիկունքում ընկերությունն օգնության ձեռք է մեկնում արցախցի ընտանիքների և կամավորական խմբերի:
«Մենք ուժեղ ենք մեր միասնականությամբ»:
ՊՐԵՄԻԵՐ ՖՈՒԴՍ & ՊՐԵՄԻԵՐ ԲԵՎԵՐԻՋԻՍ
Պատերազմի առաջին իսկ օրվանից «Պրեմիեր Ֆուդս» և «Պրեմիեր Բեվերիջիս» ընկերություններն իրենց ողջ անձնակազմով ձեռնարկեցին բարեգործական ծրագրեր բազմաթիվ ուղղություններով՝ անգամ հոգ տանելով արյան դոնորների համար՝ քաղցրավենիք տրամադրելով, ինչպես նաև սննդամթերք տրամադրելով Արցախի Հանրապետության Գյուղատնտեսության նախարարությանը։ Այդ բարիք բերող գործերը կարելի է շարունակ նշել․․․աշխատակիցների կողմից «Հայաստան» Համահայկական Հիմնադրամին 4,500,000 ՀՀ դրամի նվիրատվություն, որը ընկերությունների հիմնադիրների կողմից կրկնապատկվել է, սննդամթերքի տրամադրում Գորիսի քաղաքապետարանին Գորիսում տեղակայված արցախցի ընտանիքների համար, համագործակցություն Հայաստանում Կարմիր խաչի գրասենյակի հետ և այլն։
Ինչպես նաև ընկերությունների աշխատակիցներն իրենց հերթին պարբերաբար կազմակերպում են դրամահավաքներ Արցախից ժամանած մեր հայրենակիցներին սննդամթերք և անհրաժեշտ այլ պարագաներ գնելու համար: Իրականացվելիք բոլոր այս ծրագրերն ունեն շարունակական բնույթ մինչև ՀԱՂԹԱՆԱԿ։
Նախագծի առաջին թողարկմանը կարող եք ծանոթանալ ստորև։ Հաղթելու ենք, անկասկած։
Հատուկ շնորհակալություն ենք հայտնում բոլոր այն ընկերություններին, կազմակերպություններին ու անհատներին, որոնք մեծ նվիրվածությամբ այս հերոսական օրերին օժանդակում են ՄԵՐ ՀԱՅՐԵՆԻՔԻՆ։
